តូក្យូ៖ ចំពោះមុខការកើនឡើងអំណាចយោធារបស់ចិន និងកូរ៉េខាងជើងដែលមានអាវុធនុយក្លេអ៊ែរក្នុងដៃនោះ រដ្ឋាភិបាលជប៉ុននឹងបង្កើនការចំណាយលើវិស័យការពារជាតិរបស់ខ្លួនទ្វេដង ដល់ស្តង់ដារដូចអង្គការណាតូ គឺ ២ភាគរយ នៃផលិតផលក្នុងស្រុកសរុបនៅឆ្នាំ ២០២៧។ ប្រទេសជប៉ុន នៅថ្ងៃព្រហស្បតិ៍ទី១៨ ខែមករានេះ បានចុះហត្ថលេខាលើកិច្ចព្រមព្រៀងជាផ្លូវការជាមួយសហរដ្ឋអាមេរិក ដើម្បីទិញមីស៊ីលរយៈចម្ងាយឆ្ងាយ Tomahawk ចំនួន ៤០០គ្រាប់ ខណៈទីក្រុងតូក្យូកំពុងព្យាយាមពង្រឹងសមត្ថភាពយោធា ទប់ទល់នឹងការគំរាមកំហែងផ្នែកសន្តិសុខក្នុងតំបន់។ កិច្ចព្រមព្រៀងមានតម្លៃ ២.៣៥ពាន់លានដុល្លារនេះ គឺជាការបញ្ជាទិញមីស៊ីល Tomahawk ពីរប្រភេទ ដែលអាចបាញ់បានចម្ងាយ ១,៦០០គីឡូម៉ែត្រ ដោយវាត្រូវបានអនុម័តយល់ព្រមពីទីក្រុងវ៉ាស៊ីនតោន កាលពីខែវិច្ឆិកា ឆ្នាំ២០២៣។ សូមរម្លឹកផងដែរថា កាលពីខែធ្នូឆ្នាំមុន ទីក្រុងតូក្យូបានបន្ធូរបន្ថយគោលការណ៍នាំចេញសព្វាវុធរបស់ខ្លួន ដើម្បីអាចលក់មីស៊ីលសម្រាប់ប្រើជាមួយប្រព័ន្ធមីស៊ីលការពារដែនអាកាសប៉ាទ្រីយ៉ូត (Patriot) ដែលផលិតនៅក្នុងប្រទេសជប៉ុន ក្រោមអាជ្ញាបណ្ណឱ្យទៅសហរដ្ឋអាមេរិក ស្របពេលដែលទីក្រុងវ៉ាស៊ីនតោនកំពុងព្យាយាមបំពេញស្តុកសព្វាវុធរបស់ខ្លួនឡើងវិញ បន្ទាប់ពីបានខិតខំផ្គត់ផ្គង់ពួកវាឱ្យទៅអ៊ុយក្រែន ដែលស្ថិតក្នុងសង្រ្គាមអូសបន្លាយជាមួយរុស្ស៉ី៕ ប្រភព៖ AFP ប្រែសម្រួលដោយ៖ ឈឹម ទីណា

ម៉ាឌ្រីដ៖ ក្រសួងសុខាភិបាលអេស្ប៉ាញនិយាយថា រដ្ឋាភិបាលអេស្ប៉ាញបានអនុម័តក្រឹត្យមួយ ដែលហាមឃាត់ការលក់ផលិតផលជក់ថ្នាំជក់ ជាផ្នែកមួយនៃកិច្ចខិតខំប្រឹងប្រែងទប់ស្កាត់ការប្រើប្រាស់ថ្នាំជក់។ ផលិតផលជក់ថ្នាំជក់ ឬហៅថា អេច ធី ភី (HTPs) ជាឧបករណ៍ម្យ៉ាងប្រើថ្មពិលបង្កើតថាមពល ដើម្បីបញ្ចេញជាតិនីកូទីនចេញពីស្លឹកថ្នាំជក់ តាមរយៈ pyrolysis ដែលមិនបាច់ដុតភ្លើង។ ក្រសួងសុខាភិបាលអេស្ប៉ាញបានបញ្ជាក់នៅក្នុងសេចក្តីថ្លែងការណ៍ថា ក្រឹត្យហាមឃាត់ការលក់ផលិតផលជក់ថ្នាំជក់នេះ តម្រូវឱ្យមានការវេចខ្ចប់ផលិតផល អេច ធី ភី (HTPs) ជាមួយសារព្រមានពីផលប៉ះពាល់ដល់សុខភាព ដូចគ្នាទៅនឹងផលិតផលថ្នាំជក់ដទៃទៀតដែរ។ ស្របពេលដែលអត្រានៃការជក់បារីនៅក្នុងប្រទេសអេស្ប៉ាញ បានធ្លាក់ចុះយ៉ាងខ្លាំងក្នុងពេលប៉ុន្មានទសវត្សរ៍ថ្មីៗនេះ ចំនួនអ្នកជក់បារីជាប្រចាំនៅតែមានកម្រិតខ្ពស់ដដែល។ ជាក់ស្តែង មនុស្សពេញវ័យម្នាក់ក្នុងចំណោម ៤នាក់នៅក្នុងប្រទេសអេស្ប៉ាញ ២៦ភាគរយប្រើប្រាស់ថ្នាំជក់ជាទៀងទាត់ បើធៀបនឹងមធ្យមភាគពិភពលោកដែលមាន ២២.៣ភាគរយ នេះបើយោងតាមតួលេខចុងក្រោយរបស់អង្គការសុខភាពពិភពលោក (WHO)៕ ប្រភព៖ AFP ប្រែសម្រួលដោយ៖ ឈឹម ទីណា

បាងកក៖ ឧបទ្ទវហេតុផ្ទុះរោងចក្រផលិតកាំជ្រួចមួយកន្លែង នៅភាគកណ្តាលប្រទេសថៃ នារសៀលថ្ងៃពុធនេះ បានធ្វើឱ្យមនុស្សស្លាប់កើនឡើងដល់ ២៣នាក់ហើយ។ ហេតុការណ៍ផ្ទុះរោងចក្រផលិតកាំជ្រួចនេះ បានកើតឡើងនៅម៉ោងប្រមាណ៣រសៀលថ្ងៃពុធនេះ ស្ថិតនៅក្បែរទីប្រជុំជនសាលាខោ ភាគកណ្តាលខេត្តស៊ូផាន់បូរី។ អភិបាលខេត្តស៊ូផាន់បូរី លោក ណាតាផាត ស៊ូវ៉ាន់ប្រាធីប បានប្រាប់កាសែត AFP ថា យើងបានទទួលរបាយការណ៍ពីក្រុមកំចាត់គ្រឿងផ្ទុះ (EOD) ថា មានអ្នកស្លាប់ចំនួន ២៣នាក់ ប៉ុន្តែពុំមានការបញ្ជាក់ពីមូលហេតុអ្វី ដែលបណ្តាលឱ្យមានការផ្ទុះរោងចក្រកាំជ្រួចនេះទេ។ លោកអភិបាលខេត្តនិយាយថា រោងចក្រនេះបានបើកដំណើរការស្របច្បាប់ និងមានអាជ្ញាប័ណ្ណត្រឹមត្រូវ។ បើតាមមន្ត្រីប៉ូលិស តំបន់ជុំវិញទីតាំងកើតហេតុ មិនមានការខូចខាតទេ។ ភ្លាមៗ ក្រោយទទួលបានដំណឹងនេះ នាយករដ្ឋមន្រ្តីថៃ លោក សេដ្ឋា ថាវីស៊ីន ដែលកំពុងចូលរួមវេទិការសេដ្ឋកិច្ចពិភពលោកនៅប្រទេសស្វីស បានបង្ហោះសារនៅលើបណ្តាញសង្គម ចូលរួមរំលែកទុក្ខជាមួយក្រុមគ្រួសារជនរងគ្រោះបាត់បង់ជីវិត និងបានបញ្ជាឱ្យបើកការស៊ើបអង្កេតរកមូលហេតុនៅពីក្រោយឧបទ្ទវហេតុនេះ។ គួរបញ្ជាក់ថា ករណីផ្ទុះក្នុងរោងចក្រផលិតផាវ និងឧបករណ៍បាញ់កាំជ្រួចផ្សេងទៀតមិនមែនជារឿងចម្លែកទេនៅប្រទេសថៃ។ ជាក់ស្តែង យ៉ាងហោចណាស់មនុស្ស ១០នាក់បានស្លាប់ បន្ទាប់ពីការផ្ទុះនៅក្នុងឃ្លាំងកាំជ្រួចមួយកន្លែងនៅទីក្រុងស៊ុនហ្កៃខូឡុក ក្នុងខេត្តណារ៉ាត់ធីវ៉ាត់ ភាគខាងត្បូងប្រទេសថៃ កាលពីឆ្នាំមុន។ ដោយឡែកកាលពីឆ្នាំមុនមួយទៀត មនុស្ស ១១នាក់ក៏បានរងរបួសផងដែរ នៅពេលដែលរោងចក្រផលិតកាំជ្រួចមួយ បានផ្ទុះនៅក្នុងទីក្រុងឈៀងម៉ៃភាគខាងជើង៕…

ប៉េកាំង៖ ទិន្នន័យផ្លូវការបានបង្ហាញឱ្យដឹងក្នុងថ្ងៃពុធនេះថា ចំនួនប្រជាជនរបស់ប្រទេសចិន បានថមថយក្នុងឆ្នាំ ២០២៣ ហើយបានបន្តធ្លាក់ចុះបន្ទាប់ពីកើនឡើងជាង ៦ទសវត្សរ៍កន្លងមក ខណៈដែលប្រទេសចិនកំពុងប្រឈមមុខនឹងវិបត្តិប្រជាសាស្រ្តដែលកំពុងកើនឡើង។ បន្ទាប់ពីឥណ្ឌាវ៉ាដាច់ចិនក្លាយជាប្រទេសមានប្រជាជនច្រើនជាងគេលើពិភពលោកកាលពីឆ្នាំមុន ឥឡូវនេះចិនកំពុងព្យាយាមជំរុញអត្រាកំណើតដែលធ្លាក់ចុះ តាមរយៈការឧបត្ថម្ភធន និងការឃោសនាគាំទ្រការមានកូនជាដើម។ ការិយាល័យស្ថិតិជាតិរបស់ទីក្រុងប៉េកាំង (NBS) ក្នុងថ្ងៃពុធនេះបញ្ជាក់ថា នៅចុងឆ្នាំ ២០២៣ ចំនួនប្រជាជនជាតិចិនមានចំនួន ១,៤០៩.៦៧លាននាក់។ ការធ្លាក់ចុះកាលពីឆ្នាំមុន គឺច្រើនជាងពីរដង បើធៀបនឹងការធ្លាក់ចុះដែលបានរាយការណ៍ក្នុងឆ្នាំ ២០២២។ បន្ថែមលើនេះ ប្រទេសចិនបានបាត់បង់មនុស្ស (ស្លាប់) ចំនួន ៨៥០,០០០នាក់ ខណៈដែលចំនួនប្រជាជនរបស់ខ្លួនបានធ្លាក់ចុះជាលើកដំបូងចាប់តាំងពីឆ្នាំ ១៩៦០។ បើតាមការិយាល័យ NBS ក្នុងឆ្នាំ ២០២៣ ចំនួនកំណើតមានប្រមាណ ៩.០២លាននាក់ ធ្លាក់ចុះពី ៩.៥៦លានកំណើតក្នុងឆ្នាំ ២០២២។ ប្រទេសចិនបានបញ្ចប់ “គោលនយោបាយកូនតែមួយ” ដ៏តឹងរ៉ឹងរបស់ខ្លួន ដែលបានដាក់ក្នុងទសវត្សរ៍ឆ្នាំ ១៩៨០ ស្របពេលព្រួយបារម្ភថា ចំនួនប្រជាជនច្រើនពេកនៅឆ្នាំ ២០១៦ ហើយបានចាប់ផ្តើមអនុញ្ញាតឱ្យគូស្នេហ៍មានកូនបីនាក់វិញ នៅឆ្នាំ ២០២១។ ប៉ុន្តែការសម្រេចចិត្តនោះបានបរាជ័យ ក្នុងការបញ្ច្រាសការធ្លាក់ចុះចំនួនប្រជាសាស្រ្ត សម្រាប់ប្រទេសដែលពឹងផ្អែកលើកម្លាំងពលកម្មដ៏ច្រើន ដែលជាកត្តាជំរុញកំណើនសេដ្ឋកិច្ចនេះ។ មនុស្សជាច្រើនបានស្តីបន្ទោសការធ្លាក់ចុះអត្រាកំណើត…

ព្យុងយ៉ាង៖ កូរ៉េខាងជើងបានអះអាង នៅថ្ងៃចន្ទ ទី១៥ ខែមករាថា ខ្លួនទើបបានបាញ់សាកល្បង នូវកាំជ្រួចផ្លោងថ្មី មានក្បាលគ្រាប់ ដែលអាចបញ្ជាបានលឿនជាងសំឡេង។ កូរ៉េខាងជើងបានឲ្យដឹងថា មីស៊ីលនេះជារបកគំហើញចុងក្រោយបំផុត ក្នុងការស្វែងរកអាវុធទំនើបរបស់ខ្លួន ដើម្បីគំរាមកំហែងដល់សត្រូវ ដែលគេដឹងថា សំដៅដល់កូរ៉េខាងត្បូង និងសហរដ្ឋអាមេរិក។ សម្រាប់ឆ្នាំ២០២៤ នេះគឺជាការបាញ់បង្ហោះសាកល្បងមីស៊ីល ជាលើកដំបូង របស់ទីក្រុងព្យុងយ៉ាង។ វាក៏ត្រូវបានដឹងថា ជាការសាកល្បងលើកដំបូងបំផុត ដែលមិនធ្លាប់មានពីមុនមក នូវប្រភេទ មីស៊ីលផ្លោង រយៈចម្ងាយមធ្យមលឿនជាងសំឡេង ហៅកាត់ថា IRBM។ យោធាកូរ៉េខាងត្បូងបានរកឃើញការបាញ់សាកល្បង មីស៊ីល IRBM ប្រភេទនេះ កាលពីរសៀល ថ្ងៃអាទិត្យ ចុងសប្តាហ៍មុន។ របាយការណ៍ខ្លីមួយនៅក្នុងទីភ្នាក់ងារសារព័ត៌មានកណ្តាលរបស់កូរ៉េខាងជើង KCNA បាននិយាយថា IRMB ជាប្រភេទមីស៊ីលដែលប្រើឥន្ធនៈរឹង។ មីស៊ីលប្រើឥន្ធនៈរឹង ត្រូវបានគេដឹងថា មិនចាំបាច់ចាក់សាំង ឬប្រេង មុននឹងបាញ់ចេញនោះទេ ដែលនេះធ្វើឱ្យវាអាចបាញ់ចេញភ្លាមៗ ធ្វើឱ្យសត្រូវពិបាកចាប់សញ្ញា និងបាញ់កម្ទេច។ ទីភ្នាក់ងារសារព័ត៌មាន KCNA បានឲ្យដឹងទៀតថា ការធ្វើតេស្តនេះគឺមានគោលបំណងដើម្បីផ្ទៀងផ្ទាត់ «លក្ខណៈនៃការរអិល និងធ្វើចលនា» នៃក្បាលគ្រាប់…