បរទេស៖ ទីភ្នាក់ងារជួយសង្គ្រោះ នៅប្រទេសនីហ្សេរីយ៉ា បាននិយាយថា រថយន្តដឹកប្រេងមួយគ្រឿង បានផ្ទុះ បន្ទាប់ពីបានបុកជាមួយរថយន្តដឹកអ្នកដំណើរ និងសត្វពាហនៈ នៅភាគខាងជើងប្រទេសនីហ្សេរីយ៉ា ដោយបានសម្លាប់មនុស្សយ៉ាងហោចណាស់ ៥៩នាក់។ ហេតុការណ៍នេះបានកើតឡើង កាលពីព្រឹកថ្ងៃអាទិត្យ នៅក្នុងតំបន់ Agaie។ ដំបូងឡើយ រថយន្តដឹកប្រេងសាំង PMS បានបុកជាមួយរថយន្តសណ្តោងរ៉ឺម៉ក ដែលផ្ទុកអ្នកដំណើរ និងគោក្របី។ គោក្របី ជាង៥០ក្បាល ត្រូវបានដុតទាំងរស់។ ក្រោយមក ក៏មានរថយន្តពីរគ្រឿង ផ្សេងទៀត រួមមាន រថយន្តស្ទូចមួយគ្រឿង និងរថយន្តភីកអាប់ ក៏បានជ្រុលចូលមក ក្នុងពេលឆាបឆេះឡានដឹកប្រេង ផងដែរ។ ការផ្ទុះឡានដឹកសាំង កើតមានជាញឹកញាប់ នៅក្នុងប្រទេស ដែលមានប្រជាជនច្រើនជាងគេ នៅទ្វីបអាហ្រ្វិក មួយនេះ ខណៈដែលផ្លូវថ្នល់ មិនត្រូវបានថែទាំ បានល្អ។ យោងតាមគណៈកម្មការសុវត្ថិភាពផ្លូវថ្នល់ បានឲ្យដឹងថា មនុស្សជាង ៥០០០នាក់បានស្លាប់ ដោយសារគ្រោះថ្នាក់ចរាចរណ៍ នៅក្នុងប្រទេសនីហ្សេរីយ៉ា ក្នុងឆ្នាំ២០២៣៕ ប្រភពពី AFP ប្រែសម្រួល៖ សារ៉ាត

ហាណូយ៖ ចំនួនមនុស្សស្លាប់ដោយសារព្យុះទីហ្វុង Yagi នៅប្រទេសវៀតណាម កើនឡើងដល់ ៦៤នាក់ គិតត្រឹមយប់ថ្ងៃចន្ទ នេះបើតាមប្រព័ន្ធផ្សព្វផ្សាយរដ្ឋ។ យោងតាមអ្នកឧតុនិយម បានឲ្យដឹងថា Yagi ដែលជាព្យុះទីហ្វុងដ៏មានឥទ្ធិពលបំផុតពុំធ្លាប់មាន ក្នុងពេល៣០ឆ្នាំ បានវាយប្រហារភាគខាងជើង ប្រទេសវៀតណាម បំផ្លាញស្ពាន របើកដំបូលអគារ និងរោងចក្រខូចខាតយ៉ាងដំណំ ដោយបានបោកបក់ កាលពីថ្ងៃសៅរ៍ ក្នុងល្បឿន ១៤៩ គីឡូម៉ែត្រ ក្នុងមួយម៉ោង។ ប្រព័ន្ធផ្សព្វផ្សាយរដ្ឋ បានរាយការណ៍ដែរថា ក្នុងចំណោមមនុស្សស្លាប់សរុប មាន៤៤នាក់បានស្លាប់ដោយសារការបាក់ដី និង ទឹកជំនន់ភ្លាមៗ។ ក្រៅពីនេះ មនុស្សប្រមាណ ២៥០នាក់ផ្សេងទៀត បានរងរបួស។ ការដាច់ចរន្តអគ្គិសនី បណ្តាលឱ្យមានការរំខានយ៉ាងធ្ងន់ធ្ងរ ដល់រោងចក្រ នៅភាគខាងជើង ដែលជាមជ្ឈមណ្ឌលផលិតកម្មដ៏សំខាន់ សម្រាប់ក្រុមហ៊ុនបច្ចេកវិទ្យាពិភពលោក ដូចជា Samsung និង Foxconn ជាដើម។ មនុស្សប្រហែល ១.៥ លាននាក់នៅតែគ្មានអគ្គិសនីប្រើប្រាស់ កាលពីថ្ងៃចន្ទ ហើយស្ពានដ៏សំខាន់មួយឆ្លងកាត់ទន្លេ ប្រវែង៣៧៥ម៉ែត្រ នៅក្នុងខេត្ត Phu Tho បានបាក់ដាច់…

បរទេស ៖ យន្តហោះរបស់មេដឹកនាំបក្សប្រឆាំងនៃប្រទេសវេណេស៊ុយអេឡា លោក Edmundo Gonzalez Urrutia បានចុះចត នៅប្រទេសអេស្ប៉ាញ កាលពីថ្ងៃអាទិត្យ ពោលគឺបន្ទាប់ពីលោកត្រូវបានផ្តល់សិទ្ធជ្រកកោនយោបាយ នៅទីនោះ។ លោក Urrutia ក្នុងវ័យ៧៥ឆ្នាំ ដែលទទូចថា ប្រធានាធិបតីបច្ចុប្បន្ន គឺលោកបុរសខ្លាំង Nicolas Maduro បានអំណាចដោយខុសច្បាប់នោះ បានប្តេជ្ញាថា នឹង «បន្តការប្រយុទ្ធ» ដើម្បីសេរីភាព និងលទ្ធិប្រជាធិបតេយ្យ។ អាជ្ញាធររៀបចំការបោះឆ្នោត (គ.ជ.ប) បានប្រកាសថា លោក Maduro ជាអ្នកឈ្នះការបោះឆ្នោត ប៉ុន្តែ ក្រុមប្រឆាំងបានស្រែកថា មិនស្របច្បាប់ ដោយចោទថា លោក Maduro មានឥទ្ធិពលលើ គ.ជ.ប ហើយសហគមន៍អន្តរជាតិភាគច្រើន បានបដិសេធ មិនទទួលយកលទ្ធផលនេះ។ ក្នុងពេលសុំសិទ្ធិជ្រកកោន នៅប្រទេសអេស្ប៉ាញ មេបក្សប្រឆាំង លោក Gonzalez Urrutia ត្រូវបានជ្ញាធរវេណេហ្ស៊ុយអេឡា ចេញដីកាចាប់ខ្លួន៕ ប្រភពពី AFP ប្រែសម្រួល៖ សារ៉ាត

អាមេរិក៖ ខ្មាន់កាំភ្លើងអាយុ១៤ឆ្នាំម្នាក់ បានសម្លាប់មនុស្ស៤នាក់ មានសិស្ស២នាក់ គ្រូបង្រៀន២នាក់ ហើយ៩នាក់ផ្សេងទៀតរងរបួស អំឡុងការបាញ់ប្រហារ នៅសាលារៀនមួយកន្លែង ក្នុងរដ្ឋ របស់សហរដ្ឋអាមេរិក កាលពីថ្ងៃពុធ។ មន្ត្រីអនុវត្តច្បាប់បាននិយាយថា ខ្មាន់កាំភ្លើង ដែលជាសិស្សសាលា ត្រូវបានចាប់ខ្លួន។ ការិយាល័យស៊ើបអង្កេតរដ្ឋ Georgia បាននិយាយថា កុមាររូបនេះនឹងត្រូវចោទប្រកាន់ពីបទមនុស្សឃាត ហើយត្រូវកាត់ទោស ជាមនុស្សពេញវ័យ។ ប៉ូលិសមិនទាន់ដឹងថា តើអ្នកបាញ់សម្លាប់មនុស្ស ជាមុខសញ្ញា ឬក៏អត់ ហើយសមត្ថកិច្ចក៏មិនទាន់កំណត់អត្តសញ្ញាណអាវុធនោះដែរ។ ការបាញ់ប្រហារនៅសាលាបានក្លាយទៅជារឿង ដ៏គួរឱ្យសោកស្ដាយ ដែលកើតឡើង ជាទៀងទាត់ នៅក្នុងសហរដ្ឋអាមេរិក។ ប្រហែលមួយភាគបីនៃមនុស្សពេញវ័យ មានអាវុធក្នុងដៃ ហើយបទប្បញ្ញត្តិស្តីពីការទិញអាវុធ សូម្បីតែ កាំភ្លើងបែបយោធា ក៏មានភាពធូររលុងដែរ៕ ប្រភពពី AFP ប្រែសម្រួល៖ សារ៉ាត

វ៉ាស៊ីនតោន ៖ ការសិក្សាថ្មីមួយបានបង្ហាញថា កម្ទេចកម្ទីអាចម៍ផ្កាយ Rocky ដែលកើតចេញពីអាចម៍ផ្កាយ Dimorphos នៅពេលដែលយានអវកាស DART របស់អង្គការ NASA បានបុកកម្ទេចកាលពីឆ្នាំ ២០២២នោះ អាចនឹងបង្កើតបានជាភ្លៀងអាចម៍ផ្កាយបង្កឡើងពីមនុស្សជាលើកដំបូង ដែលគេស្គាល់ថា Dimorphids។ ក្រោយអង្គការ NASA បានសម្រេចជាផ្លូវការនូវបេសកកម្ម DART (Double Asteroid Redirection Test) ដែលជាការធ្វើតេស្តបញ្ជូនយានឲ្យហោះទៅបុកដើម្បីបង្វែរទិសដៅអាចម៍ផ្កាយកាលពីខែកញ្ញា ឆ្នាំ២០២២ ដោយពេលនេះ ឥទ្ធិពលនៃការបុកនោះ ត្រូវបានក្រុមអ្នកវិទ្យាសាស្ត្រព្យាករថា នឹងជះប៉ះពាល់មកលើភពផែនដីវិញនៅមួយទសវត្សរ៍ខាងមុខ។ យោងតាមលទ្ធផលសិក្សាថ្មីរបស់ក្រុមអ្នកជំនាញផ្នែកវិស្វកម្ម និងអវកាសមកពីវិទ្យាស្ថានតារាសាស្ត្រ និងបច្ចេកវិទ្យាប្រចាំទីក្រុងមីលែន ប្រទេសអ៊ីតាលី ដែលត្រូវបានបញ្ចេញក្នុងខែសីហា ឆ្នាំ២០២៤ បានបញ្ជាក់ថា ដុំថ្មតូចៗរាប់លានដុំ ដែលបង្កឡើងពីការបុករបស់យាន DART ជាមួយអាចម៍ផ្កាយ Dimorphos នោះ ទំនងជាកំពុងស្ថិតក្នុងគន្លងផ្លូវមកកាន់ផែនដី ហើយអាចធ្លាក់ស្រោចមកលើផែនដីវិញ នៅអំឡុងមួយទសវត្សរ៍ខាងមុខ។ ក្រុមអ្នកជំនាញបានអះអាងថា ពួកវាត្រឹមជាដុំថ្មតូចៗប៉ុណ្ណោះ ហើយប្រសិនបើវាធ្លាក់ស្រោចមកលើផែនដីមែន ក៏មិនខុសនឹងដុំថ្មអវកាសខ្នាតតូច (meteorite) ទូទៅនោះដែរ នោះគឺនឹងធ្លាក់បុកបរិយាកាសផែនដី ហើយឆាបឆេះក្លាយជាធូលីផេះផង់អស់មិនខាន។ ទោះបីជាពួកវាមិនបង្កហានិភ័យដល់ផែនដី…