សេអ៊ូល ៖ ទីភ្នាក់ងារស៊ើបការណ៍សម្ងាត់ជាតិកូរ៉េខាងត្បូង (NIS) បាននិយាយកាលពីថ្ងៃព្រហស្បតិ៍ថា យ៉ាងហោចណាស់ទាហានកូរ៉េខាងជើង ១០០នាក់ត្រូវបានសម្លាប់ និងជិត ១,០០០នាក់រងរបួស ដោយសារការប្រយុទ្ធយ៉ាងខ្លាំងក្លាជាមួយកងកម្លាំងអ៊ុយក្រែន នៅក្នុងតំបន់ព្រំដែន Kursk របស់រុស្ស៊ី។ នេះជាលើកដំបូងហើយ ដែលទីភ្នាក់ងារស៊ើបការណ៍សម្ងាត់កូរ៉េខាងត្បូងបានបញ្ជាក់ជាផ្លូវការអំពីទំហំនៃការស្លាប់ និងរងរបួស ក្នុងចំណោមទាហានកូរ៉េខាងជើង ដែលឈរជើងនៅរុស្ស៊ី។ សមាជិកសភា និងជាសមាជិកទីភ្នាក់ងារស៊ើបការណ៍សម្ងាត់ជាតិកូរ៉េខាងត្បូង លោក Lee Seong បានប្រាប់អ្នកយកព័ត៌មានថា ការខាតបង់យ៉ាងធ្ងន់ធ្ងរនេះ បណ្តាលមកពីកង្វះបទពិសោធន៍របស់ទាហានកូរ៉េខាងជើងក្នុងសង្គ្រាមយន្តហោះដ្រូន និងភាពមិនច្បាស់លាស់នៃសណ្ឋានដីរាបស្មើគ្មានកន្លែងលាក់ខ្លួន ជាទីដែលពួកគេកំពុងចូលរួមប្រយុទ្ធក្នុងសមរភូមិ។ លោក Lee បន្ថែមថា ការប៉ាន់ប្រមាណនេះ ខុសពីតួលេខប៉ាន់ស្មានរបស់មន្ត្រីយោធាអាមេរិក ដែលបានលើកឡើងថា មានអ្នកស្លាប់ និងរបួសច្រើនរយនាក់ ដោយសារតែការវិភាគបែបអភិរក្សនិយមដោយសេវាស៊ើបការណ៍ជាតិរបស់កូរ៉េខាងត្បូង។ ទីភ្នាក់ងារស៊ើបការណ៍សម្ងាត់ក៏បានបញ្ជាក់ផងដែរថា រុស្ស៊ី និងអ៊ុយក្រែនបច្ចុប្បន្នកំពុងជាប់គាំងនៅក្នុងការប៉ះទង្គិចគ្នាយ៉ាងខ្លាំងក្លា មុនពេលការចរចាសន្តិភាពដ៏មានសក្តានុពលមួយ ដែលរំពឹងទុក មុនពេលរដ្ឋបាលរបស់លោក ត្រាំ ចូលកាន់តំណែងជាលើកទីពីរ៕ ប្រភព ៖ Korea Times ប្រែសម្រួល ៖ ឈឹម ទីណា

អ.ស.ប ៖ លោក Jonah Leff ប្រធានអង្គការស្រាវជ្រាវ ដែលតាមដានអាវុធប្រើក្នុងសង្គ្រាម បាននិយាយនាពេលថ្មីៗថា ឆ្នាំនេះ កូរ៉េខាងជើងបានបង្ហាញថា ខ្លួនអាចផលិតមីស៊ីលបាលីស្ទិកជាច្រើនគ្រាប់ និងផ្គត់ផ្គង់ដល់រុស្ស៊ី សម្រាប់ប្រើប្រឆាំងនឹងអ៊ុយក្រែន ក្នុងរយៈពេលត្រឹមតែប៉ុន្មានខែប៉ុណ្ណោះ។ នៅចំពោះមុខក្រុមប្រឹក្សាសន្តិសុខអង្គការសហប្រជាជាតិ លោក Leff បាននិយាយថា ក្រុមអ្នកស្រាវជ្រាវនៅទីក្រុងកៀវ បានពិនិត្យសំណល់នៃមីស៊ីលចំនួន ៤គ្រាប់ មានប្រភពមកពីកូរ៉េខាងជើង ដែលបានរកឃើញនៅអ៊ុយក្រែន ក្នុងខែកក្កដា និងខែសីហា រួមទាំងមួយគ្រាប់មានសញ្ញាសម្គាល់ថា ត្រូវបានផលិតក្នុងឆ្នាំ២០២៤។ លោក Leff បានបញ្ជាក់យ៉ាងដូច្នេះថា នេះជាភ័ស្តុតាងសាធារណៈដំបូងបង្អស់ នៃមីស៊ីលដែលត្រូវបានផលិតនៅកូរ៉េខាងជើង ហើយក្រោយមកត្រូវបានប្រើនៅលើទឹកដីអ៊ុយក្រែន ក្នុងរយៈពេលត្រឹមប៉ុន្មានខែប៉ុណ្ណោះ មិនមែនប៉ុន្មានឆ្នាំនោះទេ។ ការអះអាងបែបនេះរបស់លោក Leff កើតឡើងបន្ទាប់ពីមេដឹកនាំកូរ៉េខាងជើង លោក Kim Jong Un បានប្តេជ្ញាថា ទីក្រុងព្យុងយ៉ាងនឹងគាំទ្រជានិច្ចដល់សង្គ្រាមរុស្ស៊ីនៅអ៊ុយក្រែន ក្នុងពេលជំនួបជាមួយប្រមុខការពារជាតិរុស្ស៊ីកាលពីចុងខែវិច្ឆិកា៕ ប្រភព ៖ AP ប្រែសម្រួល ៖ ឈឹម ទីណា