អ៊ីស្លាម៉ាបាដ ៖ ប៉ាគីស្ថានបន្តចាប់ផ្តើមយុទ្ធនាការផ្តល់វ៉ាក់សាំងនៅទូទាំងប្រទេស កាលពីថ្ងៃចន្ទម្សិលមិញ ដើម្បីការពារកុមារចំនួន ៤៥លាននាក់ពីជំងឺស្វិតដៃជើង ដែលនេះជាកិច្ចខិតខំប្រឹងប្រែងរារាំងករណីឆ្លងថ្មីៗបន្ថែមទៀត។ ប៉ាគីស្ថានតែងតែចាប់ផ្តើមយុទ្ធនាការបែបនេះ ប៉ុន្តែអំពើហិង្សាដែលសំដៅលើបុគ្គលិកសុខាភិបាល និងប៉ូលីស តែងតែកើតជារឿយៗ ដោយសាតែក្រុមសកម្មប្រយុទ្ធបានអះអាងថា យុទ្ធនាការផ្តល់ថ្នាំបង្ការនេះ គឺជាការឃុបឃិតជាមួយប្រទេសលោកខាងលិច ដើម្បីធ្វើឱ្យកុមារធំឡើងមិនអាចបន្តពូជបាន។ ទីប្រឹក្សានាយករដ្ឋមន្ត្រីប៉ាគីស្ថាន ទទួលបន្ទុកកម្មវិធីលុបបំបាត់ជំងឺស្វិតដៃជើង លោកស្រី Ayesha Raza Farooq និយាយថា យុទ្ធនាការនេះគឺជាលើកទីបីហើយនៅឆ្នាំនេះ ហើយនឹងបន្តរហូតដល់ថ្ងៃអាទិត្យចុងសប្តាហ៍ ដើម្បីឆ្លើយតបនឹងការកើនឡើងគួរឲ្យព្រួយបារម្ភ នៃករណីឆ្លងជំងឺស្វិតដៃជើង។ បើតាមការបញ្ជាក់របស់លោកស្រី Farooqយុទ្ធនាការនេះនឹងចែកចាយវ៉ាក់សាំងពីផ្ទះមួយទៅផ្ទះមួយ ផ្តល់ឱ្យកុមារដែលមានអាយុក្រោម ៥ឆ្នាំ និងថ្នាំគ្រាប់វីតាមីន A ដើម្បីបង្កើនភាពស៊ាំរបស់ពួកគេ ដែលនេះជាកិច្ចខិតខំប្រឹងប្រែងរបស់រដ្ឋាភិបាល ក្នុងការប្រយុទ្ធប្រឆាំងនឹងជំងឺស្វិតដៃជើង។ គិតមកទល់ពេលនេះ ប៉ាគីស្ថានបានកត់ត្រាករណីឆ្លងជំងឺស្វិតដៃជើងចំនួន៤១ នៅទូទាំង ៧១ស្រុក ក្នុងឆ្នាំ២០២៤។ ប៉ាគីស្ថាន និងអាហ្វហ្គានីស្ថាន គឺជាប្រទេសតែពីរគត់ក្នុងពិភពលោក ដែលមិនទាន់អាចលុបបំបាត់ការរាតត្បាតជំងឺស្វិតដៃជើង។ វាគឺជាជំងឺឆ្លងមួយក្នុងចំណោមជំងឺឆ្លងអាក្រក់បំផុតរបស់ពិភពលោក ដូច្នេះវានៅតែបន្តរីករាលដាលគ្រប់ទីកន្លែង បើសិនកុមារមិនទទួលបានវ៉ាក់សាំងការពារពេញលេញ។ ក្នុងករណីធ្ងន់ធ្ងរ ជំងឺស្វិតដៃជើងអាចបណ្តាលឱ្យកុមារពិការអស់មួយជីវិត និងអាចស្លាប់៕ ប្រភព៖ AP ប្រែសម្រួលដោយ៖ ឈឹម ទីណា

មូស្គូ៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន ថ្មីៗនេះនិយាយថា ក្រសួងការពារជាតិរុស្ស៊ី កំពុងគិតគូរពីមធ្យោបាយសងសឹកផ្សេងៗ ប្រសិនបើសហរដ្ឋអាមេរិក និងសម្ព័ន្ធមិត្តណាតូ លូកដៃជួយអ៊ុយក្រែន វាយលុកចូលជ្រៅទៅក្នុងទឹកដីរុស្ស៊ី ជាមួយនឹងមីស៊ីលរយៈចម្ងាយឆ្ងាយរបស់លោកខាងលិច។ លោក ពូទីន បានប្រាប់អ្នកសារព័ត៌មានដ៏ល្បីរបស់ទូរទស្សន៍រដ្ឋរុស្ស៊ី លោក Pavel Zarubin ថា ក្រសួងការពារជាតិរុស្ស៊ីកំពុងគិតគូរ អំពីរបៀបសងសឹកការវាយប្រហារដោយមីស៊ីលរយៈចម្ងាយឆ្ងាយដែលអាចកើតមាននៅលើទឹកដីរុស្ស៊ី ហើយរឿងនោះ នឹងទទួលបាននូវការឆ្លើយតបជាច្រើន។ លោក ពូទីន បានបញ្ជាក់យ៉ាងដូច្នេះថា មានតែមន្ត្រីណាតូទេ ដែលអាចបាញ់អាវុធបែបនេះចូលទៅក្នុងប្រទេសរុស្ស៊ី ដោយប្រើប្រាស់ទិន្នន័យពីផ្កាយរណបលោកខាងលិច ដើម្បីកំណត់គោលដៅ ដូច្នេះសំណួរគឺថាតើពួកគេនឹងអនុញ្ញាតឱ្យអ៊ុយក្រែនវាយប្រហារជ្រៅទៅក្នុងទឹកដីរុស្ស៊ីឬអត់។ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេនលេនស្គី បានស្នើសុំរាប់ខែពីសម្ព័ន្ធមិត្តលោកខាងលិចរបស់គាត់ សម្រាប់ការអនុញ្ញាតឱ្យប្រើប្រាស់មីស៊ីលរយៈចម្ងាយឆ្ងាយប្រឆាំងនឹងគោលដៅដែលជ្រៅនៅក្នុងទឹកដីរុស្ស៊ី។ សហរដ្ឋអាមេរិក និងអង់គ្លេសបានផ្តល់សញ្ញាថាការសម្រេចចិត្តលើបញ្ហានេះជិតមកដល់ហើយកាលពីខែមុន ប៉ុន្តែក្រោយមកបានពន្យារពេលវិញ បន្ទាប់ពីលោក ពូទីន ព្រមានថា ប្រទេសទាំងពីរកំពុងប្រថុយអូសទាញអង្គការណាតូ ឱ្យធ្វើសង្រ្គាមដោយផ្ទាល់ជាមួយទីក្រុងមូស្គូ៕ ប្រភព៖ China Daily ប្រែសម្រួលដោយ៖ ឈឹម ទីណា

បរទេស៖ កាសែត VNexpress បានចេញផ្សាយថា សិស្សានុសិស្ស ១០ម៉ឺននាក់ត្រូវបានបង្ខំចិត្ត ឲ្យស្នាក់នៅផ្ទះ ខកខានមិនបានចូលរៀន ខណៈដែលទឹកជំនន់បង្កឡើងដោយព្យុះ Trami បានវាយលុកភាគកណ្តាល ប្រទេសវៀតណាម។ គួររម្លឹកថា កាលពីខែកញ្ញា ព្យុះ Yagi បានសម្លាប់វៀតណាម ប្រមាណ៣០០នាក់ ខាតបង់សេដ្ឋកិច្ច ជាង៣ពាន់លានដុល្លារ នេះបើតាម VNexpress ដដែល។ កាលពីថ្ងៃចន្ទ សិស្ស១០ម៉ឺន នាក់នៅក្នុងខេត្ត Quang Binh និង Quang Tri ត្រូវបានប្រាប់ឲ្យនៅតែក្នុងផ្ទះ ខណៈដែលទឹកជំនន់ធ្ងន់ធ្ងរ លិចលង់សាលារៀន និងកាត់ផ្តាច់ផ្លូវនានា ទៅកាន់តំបន់សាលាជាច្រើន កន្លែង ក្នុងខេត្តទាំងពីរ រួមមានទាំងវិទ្យាល័យផងដែរ។ ប្រធានការិយាល័យនៃមន្ទីរអប់រំ និងបណ្តុះបណ្តាលខេត្ត Quang Binh បាននិយាយថា សិស្សទាំងអស់ នៅក្នុងស្រុក Le Thuy និង Quang Ninh ត្រូវបានណែនាំឱ្យស្នាក់នៅផ្ទះ ក្រោមហេតុផល «សុវត្ថិភាព»។ គួររម្លឹកថា…