កាសែតថៃ Bangkok Post បានចេញផ្សាយថា ប្រទេស អារ៉ាប៊ី សាអូឌីត បានសម្រេចនាំចូលសត្វគោ ចៀម និងពពែ រស់ ពីប្រទេសថៃ។ នេះបើយោងតាមរដ្ឋមន្ត្រីពាណិជ្ជកម្មថៃ។ កាសែតនេះបានរាយការណ៍ថា លោករដ្ឋមន្ត្រី Phumtham Wechayachai បាននិយាយថា សត្វរស់ទាំងនោះ នឹងត្រូវនាំចេញពីប្រទេសថៃ ទៅរក្សាទុក និងសម្លាប់ យកសាច់ នៅអារ៉ាប៊ី សាអូឌីត។ លោកបន្ថែមថា ភាគីទាំងពីរនឹងចុះកិច្ចព្រមព្រៀងជាផ្លូវការនាពេលខាងមុខ។ ថ្មីៗនេះ ភាគី អារ៉ាប់ប៊ី សាអ៊ូឌីត ក៏បានអនុញ្ញាតឲ្យនាំចូលមាន់ ពីប្រទេសថៃផងដែរ។ នេះបើតាមលោករដ្ឋមន្ត្រីពាណិជ្ជកម្មថៃ ដដែល។ កាលពីឆ្នាំមុន តម្លៃពាណិជ្ជកម្មរវាងប្រទេសថៃ និងអារ៉ាប៊ី សាអូឌីត មានចំនួន ៨,៧៩ពាន់លានដុល្លារអាមេរិក។ ប៉ុន្តែ ក្នុងរយៈពេល ៤ខែដំបូង នៃឆ្នាំ២០២៤ តម្លៃពាណិជ្ជកម្មធ្លាក់ចុះ ១៧% ធៀបនឹងដូចគ្នា កាលពីឆ្នាំមុន នេះបើតាមកាសែត Bangkok Post៕ ប្រែសម្រួល៖ សារ៉ាត

នាយករដ្ឋមន្ត្រីវៀតណាម លោក Pham Minh Chinh បានស្នើឱ្យសហគ្រាសរដ្ឋ ពិចារណា ជួលនាយកប្រតិបត្តិ ឬ CEO ជាជនបរទេស ដែលមិនមែនជាសមាជិកបក្សកុម្មុយនិស្ត ដោយលើកហេតុផលថា ដើម្បីចូលរួមអភិវឌ្ឍន៍ធនធានមនុស្ស។ នេះបើតាមកាសែត VNexpress កាលពីថ្ងៃអាទិត្យ។ អំឡុងកិច្ចប្រជុំជាមួយ CEO មកពីសហគ្រាសរដ្ឋធំៗ ជាង១៥០នាក់ លោក Chinh ក៏បានជំរុញឱ្យសហគ្រាសរដ្ឋ កែសម្រួលប្រាក់បៀវត្សរ៍ និងគោលនយោបាយប្រាក់បៀវត្សរ៍ ដើម្បីទាក់ទាញធនធានមនុស្ស ដែលមានគុណភាពខ្ពស់ ខណៈដែលអាជីវកម្មភាគច្រើន បង្ហាញថា ថ្នាក់គ្រប់គ្រងក្នុងស្រុក នៅមានកម្រិត លើសមត្ថភាព និងប្រសិទ្ធភាព ជាហេតុនាំឲ្យអាជីវកម្មធ្លាក់ចុះ។ សហគ្រាសរដ្ឋវៀតណាម បានរួមចំណែកយ៉ាងធំធេងក្នុងថវិកាជាតិ។ កាលពីឆ្នាំមុន ប្រាក់ចំណូលសរុបរបស់អាជីវកម្មរដ្ឋ ត្រូវបានប៉ាន់ប្រមាណថា មានចំនួន ជាង៦៧ពាន់លានដុល្លារអាមេរិក ហើយប្រាក់ចំណេញមុនបង់ពន្ធ មានប្រហែល ជិត ៥ពាន់លានដុល្លារអាមេរិក។ នេះបើតាមកាសែត VNexpress ដដែល៕ ប្រែសម្រួល៖ សារ៉ាត

បរទេស៖ វិមានក្រឹមឡាំង និងប្រព័ន្ធផ្សព្វផ្សាយរដ្ឋកូរ៉េខាងជើង បានឲ្យដឹង កាលពីថ្ងៃចន្ទ ថា ប្រធានាធិបតីរុស្ស៊ី លោក វ្ល៉ាឌីមៀ ពូទីន នឹងធ្វើទស្សនកិច្ច នៅកូរ៉េខាងជើង នៅថ្ងៃទី១៨-១៩ ខែមិថុនា សម្រាប់ «ដំណើរទស្សនកិច្ចផ្លូវរដ្ឋនិងមិត្តភាព»។ ទស្សនកិច្ចនេះនឹងក្លាយជាដំណើរទស្សនកិច្ចលើកទីមួយ របស់លោក ពូទីន ទៅកាន់ប្រទេសកូរ៉េខាងជើង ចាប់តាំងពីខែកក្កដា ឆ្នាំ២០០០។ ដោយកាលណោះ លោក ពូទីន បានជួបជាមួយលោក គីម ជុងអ៊ីល ដែលជាឪពុករបស់ លោក គីម ជុងអ៊ុន មេដឹកនាំកូរ៉េខាងជើង បច្ចុប្បន្ន។ ប៉ុន្តែ លោក គីម ជុងអ៊ុន ទើបបានទៅបំពេញទស្សនកិច្ចនៅរុស្ស៊ី កាលពីចុងឆ្នាំ២០២៣។ ដំណើរទស្សនកិច្ចនេះបានបង្ហាញពីកិច្ចសហប្រតិបត្តិការយោធា កាន់តែស៊ីជម្រៅ រវាងកូរ៉េខាងជើង និងរុស្ស៊ី ជាពិសេស ចំពេលមានការសង្ស័យថា កូរ៉េខាងជើងបាននិងកំពុងផ្តល់អាវុធដល់រុស្ស៊ី សម្រាប់សង្គ្រាមនៅក្នុងប្រទេសអ៊ុយក្រែន ដើម្បីជាថ្នូរនឹងជំនួយស្បៀងអាហារ និងបច្ចេកវិទ្យាអាវុធទំនើប ដែលមានសក្តានុពល។ វិមានក្រឹមឡាំងបាននិយាយនៅក្នុងសេចក្តីថ្លែងការណ៍ដាច់ដោយឡែកមួយថា បន្ទាប់ពីបញ្ចប់ទស្សនកិច្ច នៅកូរ៉េខាងជើង លោក…