ប៉ារីស៖ អង់គ្លេស និងបារាំងនឹងបង្កើនកិច្ចខិតខំប្រឹងប្រែងដើម្បីបញ្ឈប់ការឆ្លងកាត់ច្រកសមុទ្រ របស់ប្រទេសអង់គ្លេស បន្ទាប់ពីគេកត់សម្គាល់ឃើញថា ជនចំណាកស្រុកដែលធ្វើដំណើរតាមទូកតូចៗ ចំនួនជាង១០០០ នាក់ បានឆ្លងកាត់ នៅក្នុងខែមករានេះដោយពួកគេចាកចេញពីប្រទេសបារាំង។ ការប្តេជ្ញានេះធ្វើឡើងក្នុងជំនួបរវាងរដ្ឋមន្ត្រីក្រសួងមហាផ្ទៃអង់គ្លេស លោក James Cleverly និង រដ្ឋមន្ត្រីមហាផ្ទៃបារាំង លោក Gerald Darmanin នៅក្នុងទីក្រុងប៉ារីស កាលពីថ្ងៃអង្គារ។ ពួកអះអាងថា ចំណាត់ការកន្លងមកបានកាត់បន្ថយការឆ្លងកាត់របស់ពួកគេ ដល់ទៅ ៣៦% កាលពីឆ្នាំមុន។ គួរបញ្ជាក់ថា ការធ្វើដំណើរដ៏គ្រោះថ្នាក់ ឆ្លងកាត់ផ្លូវដឹកជញ្ជូនដ៏មមាញឹកបំផុតមួយ របស់ពិភពលោក បានក្លាយជាបញ្ហាឈឺក្បាលផ្នែកនយោបាយ សម្រាប់រដ្ឋាភិបាលអភិរក្ស របស់ចក្រភពអង់គ្លេស។ បារាំងនិងអង់គ្លេសបានបង្កើតកិច្ចព្រមព្រៀងមួយ កាលពីខែមីនា ឆ្នាំ២០២៣ ក្នុងការបង្កើនមូលនិធិ ដល់ប្រទេសបារាំង ចំនួន ៥៧៥ លានដុល្លារ រហូតដល់ឆ្នាំ ២០២៦។ ការណ៍នេះអនុញ្ញាតឱ្យមានការដាក់ពង្រាយមន្ត្រីអនុវត្តច្បាប់បារាំង រាប់រយនាក់បន្ថែមទៀត នៅតាមបណ្តោយឆ្នេរ ដើម្បីបញ្ឈប់ជនចំណាកស្រុក ចូលតាមច្រកសមុទ្រ៕ ប្រភពពី AFP ប្រែសម្រួល៖ សារ៉ាត

យន្តហោះចម្បាំង F-16 មួយគ្រឿងរបស់សហរដ្ឋអាមេរិក ធ្លាក់នៅសមុទ្រខាងលិចនៃប្រទេសកូរ៉េខាងត្បូង នៅព្រឹកថ្ងៃពុធនេះ ប៉ុន្តែជាសំណាងល្អ អ្នកបើកយន្តហោះត្រូវបានជួយសង្គ្រោះ។ យោធាអាមេរិកបាននិយាយនៅក្នុងសេចក្តីថ្លែងការណ៍មួយថា យន្តហោះ F-16 Fighting Falcon ដែលត្រូវបានបញ្ជូនឱ្យទៅកងយន្តហោះចម្បាំងទី ៨ នៅប្រទេសកូរ៉េខាងត្បូង បានធ្លាក់នៅសមុទ្រខាងលិច នៅម៉ោងប្រហែល ៨និង៤១នាទីព្រឹកថ្ងៃពុធនេះ (ម៉ោងក្នុងតំបន់)។ ភ្លាមៗ អ្នកបើកយន្តហោះនោះ បានរំដោះខ្លួនចេញដោយសុវត្ថិភាព ហើយត្រូវបានគេជួយសង្គ្រោះនៅម៉ោងប្រហែល ៩និង៣០នាទីព្រឹកថ្ងៃដដែល។ ឆ្មាំឆ្នេរសមុទ្រកូរ៉េនិយាយថា យន្តហោះខាងលើ បានធ្លាក់នៅជិតកោះ Mokdeok ដែលស្ថិតនៅឆ្នេរសមុទ្រភាគខាងលិចរបស់ប្រទេសកូរ៉េខាងត្បូង។ គិតមកទល់ពេលនេះ មូលហេតុដែលនាំឱ្យយន្តហោះចម្បាំងអាមេរិកមួយគ្រឿងនេះធ្លាក់កំពុងស៊ើបអង្កេត។ គួរបញ្ជាក់ថា នេះជាការធ្លាក់យន្តហោះចម្បាំងអាមេរិក F-16 លើកទី៣ហើយនៅកូរ៉េខាងត្បូង ចាប់តាំងពីខែឧសភា ឆ្នាំ២០២៣។ សហរដ្ឋអាមេរិកគឺជាសម្ព័ន្ធមិត្តសន្តិសុខដ៏សំខាន់បំផុតរបស់កូរ៉េខាងត្បូង ហើយបច្ចុប្បន្នបានដាក់ពង្រាយទាហានប្រហែល ២៨,៥០០នាក់នៅលើទឹកដីកូរ៉េខាងត្បូង ដើម្បីជួយការពារទីក្រុងសេអ៊ូល ពីការគំរាមកំហែងរបស់កូរ៉េខាងជើង ដែលជាប្រទេសមានអាវុធនុយក្លេអ៊ែរក្នុងដៃ៕ ប្រភព៖ AFP ប្រែសម្រួលដោយ៖ ឈឹម ទីណា