វ៉ាស៊ីនតោន៖ រដ្ឋមន្ត្រីការបរទេសអាមេរិក លោក អាន់ថូនី ប្លីងគែន នៅថ្ងៃព្រហស្បតិ៍ទី២៥ ខែមករានេះ បានអំពាវនាវជាថ្មីឱ្យអ៊ីស្រាអែលការពារអាយុជីវិតជនស៊ីវិល បន្ទាប់ពីការវាយប្រហារដ៏សាហាវទៅលើជំរុំរបស់អង្គការសហប្រជាជាតិនៅតំបន់ហ្គាហ្សា ធ្វើឱ្យមានការថ្កោលទោសដ៏កម្រពីសហរដ្ឋអាមេរិក។ អង្គការសហប្រជាជាតិនិយាយថា គ្រាប់ផ្លោងចំនួនពីរគ្រាប់បានវាយប្រហារជំរុំរបស់អង្គការសហប្រជាជាតិ នៅថ្ងៃពុធទី២៤ ខែមករានេះ ក្នុងទីក្រុង Khan Yunis ភាគខាងត្បូងនៃតំបន់ហ្គាហ្សា បណ្តាលឱ្យមនុស្ស១២នាក់ស្លាប់។ ជុំវិញបញ្ហានេះដែរ ក្នុងអំឡុងបំពេញទស្សនកិច្ចនៅប្រទេសអង់ហ្គោឡា ប្រមុខការទូតអាមេរិក លោក អាន់ថូនី ប្លីងគែន បានប្រាប់អ្នកយកព័ត៌មានថា ជំរុំរបស់អង្គការសហប្រជាជាតិមានសារៈសំខាន់ណាស់ ហើយត្រូវតែការពារ។ លោក ប្លីងគែន និយាយថា យើងបានបញ្ជាក់ជាថ្មីអំពីការការពារអាយុជីវិតជនស៊ីវិលជាមួយរដ្ឋាភិបាលអ៊ីស្រាអែល ហើយលោកក៏បានសរសើរទីភ្នាក់ងាររបស់អង្គការសហប្រជាជាតិ ទទួលបន្ទុកជនភៀសខ្លួនប៉ាឡេស្ទីន (UNRWA) សម្រាប់ការខិតខំប្រឹងប្រែងរបស់ខ្លួន ក្នុងការជួយមនុស្សដែលត្រូវការជំនួយជាបន្ទាន់។ លោក ប្លីងគែន បានអះអាងថា ការងារដែលអង្គការសហប្រជាជាតិកំពុងធ្វើនៅហ្គាហ្សា គឺជាការសង្គ្រោះជីវិតពិត ហើយគ្មាននរណាម្នាក់អាចធ្វើវាបានឡើយ។ គួរបញ្ជាក់ថា សង្រ្គាមបានផ្ទុះឡើងបន្ទាប់ពីក្រុមសកម្មប្រយុទ្ធហ៊ូទី បានវាយប្រហារមិនធ្លាប់មានពីមុនមកក្នុងប្រទេសអ៊ីស្រាអែលកាលពីថ្ងៃទី០៧ ខែតុលា សម្លាប់មនុស្សប្រហែល ១,១៤០នាក់ ដែលភាគច្រើនជាជនស៊ីវិល។ ជាការឆ្លើយតប អ៊ីស្រាអែលបានបើកយុទ្ធនាការយោធាឥតឈប់ឈរលើតំបន់ហ្គាហ្សា ចាប់តាំងពីពេលនោះមក បណ្តាលឱ្យមនុស្សយ៉ាងហោចណាស់ ២៥,៧០០នាក់បានស្លាប់…

តៃប៉ិ៖ ក្រុមទាហានថ្មីចំនួន ៦៧០នាក់ដំបូងចុះពីលើឡានក្រុង ដើរឆ្ពោះទៅកាន់ជួរក្រុមជាងកាត់សក់ ដែលកំពុងរង់ចាំកាត់សក់ពួកគេ ដើម្បីត្រៀមចូលបម្រើយោធារយៈពេលមួយឆ្នាំ។ អ្នកជ្រើសរើសថ្មីដែលមកដល់ទីក្រុង Taichung ភាគខាងលិចកោះតៃវ៉ាន់ នៅថ្ងៃព្រហស្បតិ៍ទី២៥ ខែមករានេះ គឺជាក្រុមទាហានដំបូងដែលចូលរួមក្នុងការបំពេញកាតព្វកិច្ចយោធារយៈពេលមួយឆ្នាំរបស់កោះតៃវ៉ាន់ ខណៈពីមុន មានរយៈពេលត្រឹមតែ ៤ខែប៉ុណ្ណោះ។ ការអូសបន្ថាយរយៈពេលបំពេញកាតព្វកិច្ចនេះ ត្រូវបានប្រកាសជាលើកដំបូងនៅឆ្នាំ២០២២ ហើយក៏ជាផ្នែកមួយនៃផែនការរបស់អតីតប្រធានាធិបតីតៃវ៉ាន់ លោកស្រី តៃ្ស អ៊ីងវិន ក្នុងការពង្រឹងការការពារកោះដែលគ្រប់គ្រងដោយខ្លួនឯងនេះ នៅចំពោះមុខការគំរាមកំហែងកើនឡើងផ្នែកយោធាពីប្រទេសចិន។ យោងតាមផែនការប្រកាសកន្លងមក ក្រុមអ្នកដែលត្រូវចូលបំពេញកាតព្វកិច្ចយោធា នឹងឆ្លងកាត់វគ្គហ្វឹកហាត់ ដែលលំបាក និងសកម្មខ្លាំងជាងមុន ក្នុងនោះមានទាំងការហាត់បាញ់អាវុធ ការសិក្សាមេរៀនសមរភូមិ ដែលប្រើប្រាស់ដោយយោធាអាមេរិក និងការធ្វើប្រតិបត្តិការអាវុធដែលមានអានុភាពខ្ពស់ ដូចជាមីស៊ីលប្រឆាំងយន្តហោះ Stinger និងមីស៊ីលប្រឆាំងរថក្រោះជាដើម។ ទោះបីជាកោះតៃវ៉ាន់មានរដ្ឋាភិបាល រូបិយប័ណ្ណ និងយោធាផ្ទាល់ខ្លួនក៏ដោយ ក៏ប្រទេសចិនបានទាមទារកោះនេះ ជាផ្នែកមួយនៃទឹកដីរបស់ខ្លួន ហើយក្នុងរយៈពេលប៉ុន្មានឆ្នាំថ្មីៗនេះ បានបង្កើនវោហាសាស្ត្រនៃ “ការបង្រួបបង្រួម” ជារឿងជៀសមិនរួច។ ប្រទេសចិនមិនដែលបោះបង់ការប្រើប្រាស់កម្លាំង ដើម្បីព្យាយាម និងនាំយកតៃវ៉ាន់មកនៅក្រោមការគ្រប់គ្រងរបស់ខ្លួនឡើយ ហើយបានរក្សាវត្តមានយោធាស្ទើរតែរាល់ថ្ងៃនៅជុំវិញកោះនេះ៕ ប្រភព៖ AFP ប្រែសម្រួលដោយ៖ ឈឹម ទីណា