ប្រជាពលរដ្ឋខ្មែរដែលរស់នៅក្រៅប្រទេសបានបន្តផ្ញើសារបញ្ជាក់ការត្រៀមធ្វើដំណើរ ទៅកាន់ក្រុងញូយ៉ក ដើម្បីជួបស្វាគមន៍ដំណើរទស្សនកិច្ចរបស់សម្តេចមហាបវរធិបតី ហ៊ុន ម៉ាណែត និងគណៈប្រតិភូដែលនឹងអញ្ជើញចូលរួមក្នុងមហាសន្និបាត ប្រចាំឆ្នាំរបស់អង្គការសហប្រជាជាតិ។ សម្តេចធិបតីគ្រោងនឹងឡើងថ្លែងសុន្ទរកថា នារសៀលថ្ងៃទី២២ កញ្ញា ឆ្នាំ២០២៣ ដែលត្រូវនឹងវេលាទាបភ្លឺថ្ងៃទី២៣កញ្ញា ម៉ោងក្នុងប្រទេសកម្ពុជា។ សារជាសម្លេងរបស់ពលរដ្ឋខ្មែរ បានធ្វើតាមបណ្តាញសង្គម និងត្រូវបានគេបង្ហោះជាច្រើន រៀងរាល់ថ្ងៃតាមបណ្តាញសង្គម។ នេះជាការដកស្រង់ខ្លះ នៃសម្លេងស្វាគមន៍របស់ពលរដ្ឋខ្មែរ ពីសហរដ្ឋអាមេរិកនៅថ្ងៃទី១៨កញ្ញា។ សម្តេចធិបតី ហ៊ុន ម៉ាណែត និងគណៈប្រតិភូជាន់ខ្ពស់រាជរដ្ឋាភិបាល គ្រោងនឹងចាកចេញពីកម្ពុជា នៅថ្ងៃទី២១កញ្ញា សប្តាហ៍នេះហើយ។ ក្នុងដំណើរទស្សនកិច្ចក្រៅប្រទេសជាលើកទី៣ ខាងមុខនេះ, សម្តេចធិបតីនឹងមានកម្មវិធីជួបសំណេះសំណាលជាមួយពលរដ្ឋខ្មែរ នៅក្រៅប្រទេស និងជួបជាមួយបណ្តាឥស្សរជននយោបាយបរទេស និងមានកម្មវិធីផ្សេងៗដទៃទៀត។ នេះគឺជាសារដកស្រង់ខ្លះពីការស្វាគមន៍របស់ពលរដ្ឋខ្មែររស់នៅក្នុងប្រទេសកាណាដា។

ពលរដ្ឋក្រីក្រចំនួន ៥០គ្រួសារ បានទទួលអំណោយពីក្រុមសប្បុរសជន ដឹកនាំដោយឯកឧត្តមបណ្ឌិត ស៊ាង ប៊ុនលាង ក្នុងឱកាសអញ្ជើញចុះសាកសួរសុខទុក្ខ អ្នកភូមិដាច់ស្រយាល នាចំណុចភ្នំ១៥០០ ក្នុងភូមិដីក្រហម ឃុំអន្លង់រាប ស្រុកវាលវែង ខេត្តពោធិ៍សាត់។ ឃុំអន្លង់រាប ស្រុកវាលវែង គឺជាតំបន់ដែលមានភូមិសាស្ត្រ សិ្ថតនៅភាគបស្ចឹមប្រទេស ក្នុងតំបន់ភ្នំឆ្ងាយដាច់ស្រយាលមួយ នៃខេត្តពោធិ៍សាត់ និងក៏ជាតំបន់ដែលស្ថិតជាប់នឹងតំបន់ព្រំដែនដែលមានប្រជាពលរដ្ឋភាគច្រើន គឺជាកសិករធ្វើស្រែចំការ។ សូមទស្សនាសេចក្តីរាយការណ៍

កិច្ចពិភាក្សាអំពីប្រាក់ឈ្នួលអប្បបរមាសម្រាប់ឆ្នាំ២០២៤ សម្រាប់កម្មករ និងនិយោជិត នៅតែមិនទាន់ត្រូវគ្នានៅឡើយ ប៉ុន្តែភាគីនយោជកបានបង្ហាញសម្បទានបន្តិចថែមទៀត ខណៈដែលខាងសហជីពនៅតែរក្សាជំហរដដែល។ យោងតាមក្រសួងការងារ និងបណ្តុះបណ្តាលវិជ្ជាជីវៈ, ការចរចាប្រាក់ឈ្នួលអប្បបរមាជាលើកទី៤ នៅថ្ងៃទី១១ កញ្ញា ឆ្នាំ២០២៣, ភាគីម្ចាស់ក្រុមហ៊ុនបានបង្កើនតួលេខកន្លះដុល្លារថែមទៀត ដែលនាំឱ្យការស្នើតម្លើងនេះមានចំនួន១ដុល្លារកន្លះហើយ។ បើសិនជាសហជីពយល់ព្រមនឹង តួលេខតម្លើងនេះ, ប្រាក់ឈ្នួលអប្បបរមានឹងឡើងចំនួន២០១ដុល្លារកន្លះ។ ប៉ុន្តែភាគីសហជីព មិនបានយល់ព្រមឡើយ។ ភាគីសហជីពនៅតែទាមទារក្នុងតម្លៃឡើង១៥ដុល្លារជាដដែល សម្រាប់ប្រាក់ឈ្នួលអប្បបរមាឆ្នាំ២០២៤។ យោងតាមសំណើរបស់សម្តេចធិបតី ហ៊ុន ម៉ាណែត តួលេខកំណត់ចុងក្រោយ នៃប្រាក់ឈ្នួលអប្បរមានឹងរំពឹងដឹងនៅមុនពិធីបុណ្យភ្ជុំបិណ្ឌ ដែលនឹងមកដល់នៅថ្ងៃទី១៣, ១៤ និង១៥តុលា។ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានថ្លែងមុននេះថា កិច្ចប្រជុំដើម្បីការចរចាប្រាក់ឈ្នួលនេះ នឹងមានមួយថ្ងៃចុងក្រោយទៀត គឺនៅថ្ងៃទី២៥កញ្ញា ដែលជាថ្ងៃប្រជុំពិភាក្សាបិទបញ្ចប់ជាចុងក្រោយ។

អគ្គនាយកមជ្ឈមណ្ឌលជាតិរក្សាសន្តិភាព បានកោតសរសើរ និងវាយតម្លៃខ្ពស់ចំពោះលំហាត់ហ្វឹកហ្វឺនប្រតិបត្តិការពហុជាតិលើទីលានសកម្មភាពមីនមនុស្សធម៌ដែលចូលរួមពីប្រទេសចំនួន១៤ មកពីអាស៊ី, អឺរ៉ុប, អូស្យានី និងសហរដ្ឋអាមេរិក។ នាយឧត្តមសេនីយ៍ សែម សុវណ្ណនី បានថ្លែងនៅថ្ងៃទី១៨កញ្ញានេះ ក្នុងឱកាសចុះពិនិត្យលំហាត់សមយុទ្ធទាំង១៤ប្រទេស នៅសាលាហ្វឹកហ្វឺនកងកម្លាំងរក្សាសន្តិភាពពហុសាសន៍ខេត្តកំពង់ស្ពឺ ដោយបញ្ជាក់ថាប្រតិបត្តិការក្នុងលំហាត់នេះ បានដំណើរការយ៉ាងល្អគ្រប់ជ្រុងជ្រោយ និងតាមលក្ខណៈបច្ចេកទេស។ លោកបានថ្លែងកត់សម្គាល់ទៀតថា បទពិសោធន៍របស់សិក្ខាកាមនៃប្រទេសនីមួយៗ បានចែករំលែកគ្នាទៅវិញទៅមក ដែលជាធាតុផ្សំសម្រាប់កិច្ចការបោសសម្អាតមីនមនុស្សធម៌ផងដែរ។ កម្ពុជាកំពុងធ្វើជាម្ចាស់ផ្ទះលើកដំបូងបំផុត នៃលំហាត់ហ្វឹកហ្វឺនប្រតិបត្តិការពហុជាតិ លើទីលានសកម្មភាពមីនមនុស្សធម៌ ក្រោមប្រធានបទ «មាតុភូមិដ៏បវរ-ឆ្នាំ២០២៣» ។ គិតត្រឹមថ្ងៃទី១៨កញ្ញា លំហាត់សមយុទ្ធដែលចូលរួមពីអូស្ត្រាលី, ព្រុយណេ, កម្ពុជា, ចិន, ឥណ្ឌា, ឥណ្ឌូណេស៊ី, ជប៉ុន, កូរ៉េខាងត្បូង, ឡាវ, ហ្វីលីពីន, រុស្ស៊ី, សឹង្ហបុរី, សហរដ្ឋអាមេរិក និងប្រទេសវៀតណាម បានប្រព្រឹត្តទៅរយៈពេល៥ថ្ងៃហើយ។ លំហាត់ហ្វឹកហ្វឺនដែលនឹងមានរយៈពេល១០ថ្ងៃលើទឹកដីកម្ពុជានេះ ត្រូវគេចាត់ទុកថា បានរួមចំណែកយ៉ាងសំខាន់ ក្នុងដំណើរឆ្ពោះទៅកាន់កម្ពុជា គ្មានមីន នាឆ្នាំ២០២៥ និងជាការគាំទ្រនូវគំនិតផ្តួចផ្តើមរបស់សម្តេចតេជោ ហ៊ុន សែន ក្នុង “ការផ្តល់ដីប្រកបដោយសុវត្ថិភាព បង្កើតស្នាមញញឹម”។ នាយឧត្តមសេនីយ៍…

អគារទីស្ដីការថ្មីនៃក្រសួងមហាផ្ទៃត្រៀមសម្ពោធដាក់ឱ្យប្រើប្រាសជាផ្លូវការនៅខែវិច្ឆិកា ឆ្នាំ២០២៣ខាងមុខនេះហើយ។ រដ្ឋលេខាធិការប្រចាំការក្រសួងមហាផ្ទៃសន្ដិបណ្ឌិត ម៉ៅ ច័ន្ទតារា បានមានប្រសាសន៍ថា ពិធីសម្ពោធអគារទីស្ដីការក្រសួងមហាផ្ទៃនឹងធ្វើនៅថ្ងៃទី៦ វិច្ឆិកា ក្រោមអធិបតីភាពដ៏ខ្ពង់ខ្ពស់របស់សម្ដេចមហាបវរធិបតី ហ៊ុន ម៉ាណែត។ សំណង់អគារទីស្តីការក្រសួងមហាផ្ទៃថ្មី ដែលបានកសាងឡើងកាលពីថ្ងៃ១១ ខែវិច្ឆិកា ឆ្នាំ២០២១ មានតម្លៃប្រមាណ៦០លានដុល្លារ ស្ថិតនៅតាមបណ្ដោយផ្លូវព្រះនរោត្តម ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។ អគារទីស្តីការរបស់ក្រសួមហាផ្ទៃនេះមានទំហំ ១៥៣ម៉ែត្រ គុណ៨៣ម៉ែត្រ មានកម្ពស់៩ជាន់ មិនរាប់បញ្ចូលជាន់ផ្ទាល់ដី និងជាន់សម្រាប់ចំណតរថយន្ត ដែលអាចចតរថយន្តក្នុងអគារ បានសរុបចំនួន៣៣០គ្រឿង។ សំណង់អគារនេះ ធ្វើឡើងតាមប្រភេទស្ថាបត្យកម្មក្លាសិក រចនាប័ទ្មខ្មែរ ដំបូលប្រក់ក្បឿង ស្រកាលិញ មានបុស្បបុកចំនួន៥ តាមលំនាំប្រាសាទអង្គរវត្តកំពូលប្រាំ។

ក្រសួងធម្មការបានចេញសេចក្ដីណែនាំគ្រប់វត្តអារាម, វិហារសាសនា, មណ្ឌលវិបស្សនា អាស្រម, សាលាបុណ្យ, សាលារៀនដែលមានចរឹតសាសនា ត្រូវវាយគង, ទូងស្គរ ដើម្បីអបអរសារប្រាសាទកោះកេរ ដែលត្រូវបានចុះបញ្ជីជាសម្បត្តិបេតិកភណ្ឌពិភពលោក របស់អង្គការយូណេស្កូ។ ការវាយគង, វាយឃ្មោះ, រគាំង និងទូងស្គរបន្លឺនៅទូទាំងព្រះរាជាណាចក្រកម្ពុជា គ្រោងនឹងធ្វើនាថ្ងៃពុធ ទី២០ ខែកញ្ញាវេលាម៉ោង៧ព្រឹក។ គណៈកម្មាធិការបេតិកភណ្ឌពិភពលោក នៃអង្គការយូណេស្កូ ក្នុងសម័យប្រជុំលើកទី៤៥ នៅទីក្រុងរីយ៉ាដ នៃប្រទេសអារ៉ាប៊ីសាអូឌីត ក្នុងថ្ងៃទី១៧ កញ្ញា បានសម្រេចបញ្ចូលរមណីយដ្ឋានប្រាសាទកោះកេរ របស់ខ្មែរជាសម្បត្តិបេតិកភណ្ឌពិភពលោក។ ការចុះបញ្ជីប្រាសាទកោះកេរជាបេតិកភណ្ឌវប្បធម៌ពិភពលោក របស់អង្គការយូណេស្កូ ត្រូវគេចាត់ទុកថា គឺជាមោទនភាពជាតិខ្មែរយ៉ាងធំធេងមួយទៀត បន្ទាប់ពីប្រាសាទអង្គរវត្ត ត្រូវបានចុះបញ្ជីបេតិកភណ្ឌវប្បធម៌ពិភពលោកកាលពីថ្ងៃទី១៤ ខែធ្នូ ឆ្នាំ១៩៩២, ប្រាសាទព្រះវិហារ បានចុះបញ្ជីបេតិកភណ្ឌពិភពលោក នៅថ្ងៃទី០៧ ខែកក្កដា ឆ្នាំ២០០៨ ហើយនិងប្រាសាទសំបូរព្រៃគុហ៍ បានចុះក្នុងបញ្ជីបេតិកភណ្ឌពិភពលោក កាលពីថ្ងៃទី៨ ខែកក្កដា ឆ្នាំ២០១៧៕