ប្រធានាធិបតីចិនលោក ស៊ី ជីនពីង បានជួបជាមួយសម្តេចមហាបវរធិបតី ហ៊ុន ម៉ាណែត នៅថ្ងៃសុក្រ ទី១៥ កញ្ញា និងបានចាត់ទុកដំណើររបស់ប្រមុខថ្មីដឹកនាំរាជរដ្ឋាភិបាល កាន់តែបានលើកកម្ពស់កាន់តែខ្លាំងនូវទំនាក់ទំនងរវាងប្រទេសចិន និងកម្ពុជា «ឱ្យកាន់តែមានលក្ខណៈស៊ីជម្រៅ និងកាន់តែជាក់លាក់ពិតប្រាកដ»។ សម្តេចបវរធិបតី ហ៊ុន ម៉ាណែត បានដឹកនាំគណៈប្រតិភូរាជរដ្ឋាភិបាលថ្មីជាលើកដំបូង បំពេញទស្សនកិច្ចក្នុងប្រទេសចិនតបតាមការអញ្ជើញរបស់នាយករដ្ឋមន្ត្រីចិន លោក លី ឈាង។ ដំណើរបំពេញទស្សនកិច្ចបួនថ្ងៃចាប់ផ្តើមពីថ្ងៃទី១៤ កញ្ញា ក៏នឹងរួមមានទាំងការអញ្ជើញចូលរួមពិព័រណ៍អាស៊ានចិនលើកទី២០ នៅទីក្រុងណាននីង តំបន់ស្វយ័តជនជាតិក្វាងស៊ី។ អប្សរាណិតរាយការណ៍

ប្រទេសកម្ពុជាដែលបាត់មិនមានការឆ្លងកូវីដ១៩ រយៈពេលជាង ៥សប្តាហ៍មកហើយនោះ ថ្ងៃនេះបានរកឃើញឆ្លង ១ករណីមកវិញ។ ប្រទេសក្នុងអាស៊ានរយៈពេល២៤ម៉ោងកន្លងមក បានរកឃើញការឆ្លងលើប្រទេសចំនួន ៥ ដែលមានការឆ្លងចំនួន ៥៧១ករណី ជាតួលេខឆ្លងកើនឡើងចំនួន ៥០៥ករណី បើប្រៀបធៀបនឹងការឆ្លងកាលពីម្សិលមិញ។ ប្រទេសទាំង ៥ នៅអាស៊ានដែលមានការឆ្លងថ្ងៃនេះ គឺប្រទេសវៀតណាម, មីយ៉ាន់ម៉ា, សឹង្ហបុរី, កម្ពុជា និងប្រទេសឡាវ។ ប្រទេសសឹង្ហបុរី មានការឆ្លងចំនួន ៥២៥ករណី ច្រើនជាងគេ, វៀតណាមមាន ការឆ្លងចំនួន ៤៣ករណី និងប្រទេសឡាវ, កម្ពុជា និងមីយ៉ាន់ម៉ាមានការឆ្លង ១ករណីដូចគ្នាតិចជាងគេ។ នៅអាស៊ានរយៈពេល ២៤ម៉ោងកន្លងមកនេះ មិនមានអ្នកស្លាប់ដោយសារកូវីដ១៩ ឡើយ។ គិតសរុបរួមនៃប្រទេសទាំង១០ អាស៊ាននាពេលនេះ ការឆ្លងសរុបមានចំនួន ៣៦លាន ៣៦ម៉ឺន ៨៣៣ករណី, និងការស្លាប់សរុបមានចំនួន ៣៦ម៉ឺន ៨ពាន់ ៨០៥នាក់ដដែល។ បើគិតសរុបនៅលើសាកលលោកនោះវិញ ការឆ្លងវីរុសកូវីដ១៩ សរុបមានចំនួនជាង ៦៩៥លានករណី, និងការស្លាប់មានជាង ៦លាន ៩១ម៉ឺននាក់៕

ការដាច់ភ្លើងនៅចុងសប្តាហ៍ បានមកដល់ទៀតហើយ ដែលមានរយៈពេល៤ថ្ងៃ គឺមាននៅថ្ងៃព្រហស្បតិ៍ ថ្ងៃសុក្រ ថ្ងៃសៅរ៍ និងថ្ងៃអាទិត្យ។ ការដាច់ភ្លើងនេះ បានកើតឡើងនៅក្នុងរាជធានីភ្នំពេញ និងខេត្ដកណ្ដាល ដែលនឹងមានរយៈពេលពី៦ម៉ោង ទៅ៩ម៉ោង។ តើការដាច់ភ្លើងប្រចាំសប្តាហ៍នេះ មាននៅទីណាខ្លះ? សូមស្ដាប់សេចក្ដីរាយការណ៍

ទំហំពាណិជ្ជកម្មរវាងកម្ពុជា និងសហរដ្ឋអាមេរិក ក្នុងរយៈពេល៨ខែឆ្នាំ២០២៣ សម្រេចបាន ៦ពាន់ ២៧២លានដុល្លារ។ យោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា, តួលេខនេះ មានការថយចុះ ៥.៦% បើធៀបនឹងរយៈដូចគ្នាឆ្នាំ២០២២។ យោងតាមរបាយការណ៍ដដែល ក្នុងរយៈពេល ៨ខែដើមឆ្នាំនេះ, កម្ពុជាបាននាំទំនិញចេញទៅអាមេរិក ទទួលបានទឹកប្រាក់ជាង ៦ពាន់ ១១១លានដុល្លារ ខណៈការនាំចូលពីអាមេរិកវិញ ក្នុងទំហំទឹកប្រាក់ជាង ១៦០លានដុល្លារ។ ផលិតផលសំខាន់ៗ ដែលកម្ពុជាបាននាំចេញទៅអាមេរិក មានដូចជាសម្លៀកបំពាក់, សម្ភារៈសម្រាប់ការធ្វើដំណើរដូចជាវ៉ាលីស, កាបូប, កង់ និងសម្ភារៈប្រើប្រាស់មួយចំនួនទៀត។ ចំណែកកម្ពុជា នាំចូលពីអាមេរិកវិញ មានដូចជារថយន្ត គ្រឿងយន្ត គ្រឿងអលង្ការ គ្រឿងសំអាង សម្ភារៈអគ្គិសនី, គ្រឿងអេឡិចត្រូនិក និងសម្ភារៈប្រើប្រាស់មួយចំនួនទៀត។ ទំហំពាណិជ្ជកម្មកម្ពុជា-អាមេរិក នៅឆ្នាំ២០២២ សម្រេចបានចំនួន ៩ពាន់ ២៨១លានដុល្លារ កើនឡើង១៨.៦ភាគរយ បើប្រៀបធៀបជាមួយនឹងឆ្នាំ២០២១ ដែលមានចំនួន ៧ពាន់ ៨២៦លានដុល្លារ។

កម្ពុជា និងថៃ បានប្តេជ្ញាការបោសសំអាតគ្រាប់មីន តាមបណ្តោយព្រំដែន នៃប្រទេសទាំង២ ដើម្បីប្រែក្លាយតំបន់ព្រំដែន ជាតំបន់មានសុវត្ថិភាពគ្មានគ្រាប់មីន។ តំបន់ព្រំដែនកម្ពុជាថៃ គឺជាតំបន់ដែលធ្លាប់មានមីនច្រើនស្អេកស្កះបន្សល់ទុក ពីអតីតកាលសង្គ្រាមស៊ីវិល ប៉ុន្តែក្រោយកម្ពុជាមានសន្តិភាពសាឡើងវិញ ក្រោមនយោបាយឈ្នះឈ្នះ របស់សម្តេចតេជោ ហ៊ុន សែន, តំបន់តាមបណ្តោយព្រំដែន ត្រូវបានសំអាតឡើងវិញជាបណ្តើរ។ ទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន នៅថ្ងៃទី១៣ ខែកញ្ញា ឆ្នាំ២០២៣ បានអនុញ្ញាតឱ្យឯកអគ្គរាជទូតថៃប្រចាំកម្ពុជាលោក ឆឺតគាត អឌ្ឍកោ និងអគ្គនាយក នៃមជ្ឈមណ្ឌលសកម្មភាពកំចាត់មីនថៃ លោកឧត្តមសេនីយ៍ ស៊ូប៉ាថាត់ ណារិនដារ៉ា ផាកឌីបានចូលសម្តែងការគួរសម និងជួបពិភាក្សាការងារស្តីពីកិច្ចសហប្រតិបត្តិការបោសសម្អាតមីន តាមតំបន់ព្រំដែនកម្ពុជា-ថៃ។ ទេសរដ្ឋមន្ត្រី លី ធុជ បានលើកឡើងជុំវិញការអនុវត្តទស្សនវិស័យ និងសេចក្តីសម្រេចរវាងនាយករដ្ឋមន្ត្រី នៃប្រទេសទាំងពីរ ដែលបានឯកភាពគ្នាជំរុញធ្វើការបោសសម្អាតមីនឲ្យអស់នៅតាមបណ្តោយព្រំដែនកម្ពុជា-ថៃ ដើម្បីប្រែក្លាយតំបន់ព្រំដែនជាមួយប្រទេសទាំងពីរ ជាតំបន់សន្តិភាព ស្ថេរភាព សុវត្ថិភាព និងការអភិវឌ្ឍ។ អនុប្រធានទី១ អាជ្ញាធរមីនកម្ពុជា បានជម្រុញឲ្យក្រុមការងារបច្ចេកទេសសកម្មភាពមីន នៃប្រទេសទាំងពីរ បន្តជួបពិភាក្សាគ្នាជាលក្ខណៈបច្ចេកទេស និងតាមការចាំបាច់លើទីតាំង ដែលត្រូវបោសសម្អាត…

ប្រជាពលរដ្ឋខ្មែរដែលរស់នៅក្រៅប្រទេសបានបន្តផ្ញើសារបញ្ជាក់ ការត្រៀមធ្វើដំណើរទៅកាន់ក្រុងញូយ៉ក ដើម្បីជួបស្វាគមន៍ដំណើរទស្សនកិច្ច របស់សម្តេចមហាបវរធិបតី ហ៊ុន ម៉ាណែត និងគណៈប្រតិភូ ដែលនឹងអញ្ជើញចូលរួមក្នុងមហាសន្និបាតប្រចាំឆ្នាំរបស់អង្គការសហប្រជាជាតិ។ សារជាសម្លេងរបស់ពលរដ្ឋខ្មែរ បានធ្វើតាមបណ្តាញសង្គម និងត្រូវបានគេបង្ហោះជាច្រើន រៀងរាល់ថ្ងៃតាមបណ្តាញសង្គម។ នេះជាការដកស្រង់ខ្លះ នៃសម្លេងស្វាគមន៍របស់ពលរដ្ឋខ្មែរ ពីសហរដ្ឋអាមេរិកនៅថ្ងៃទី១៣កញ្ញា។ យោងតាមប្រតិទិនរៀបចំ, សម្តេចធិបតីនាយករដ្ឋមន្ត្រី នឹងគ្រោងឡើងថ្លែងសុន្ទរកថាលើវេទិកាពិភពលោក នៅថ្ងៃទី២២ កញ្ញា ឆ្នាំ២០២៣ និងមានកម្មវិធីជួបសំណេះសំណាលជាមួយពលរដ្ឋខ្មែរនៅក្រៅប្រទេស និងជួបជាមួយបណ្តាឥស្សរជននយោបាយបរទេស និងមានកម្មវិធីផ្សេងៗដទៃទៀត។ នេះគឺជាសារដកស្រង់ខ្លះពីការស្វាគមន៍របស់ពលរដ្ឋខ្មែររស់នៅក្នុងប្រទេសកាណាដា។ ដំណើរបេសកកម្មក្រៅប្រទេសរបស់សម្តេចធិបតី ហ៊ុន ម៉ាណែត ដើម្បីចូលរួមមហាសន្និបាតប្រចាំឆ្នាំរបស់អង្គការសហប្រជាជាតិ នឹងក្លាយជាដំណើរបំពេញបេសកកម្មក្រៅប្រទេស ជាលើកទី៣ ក្រោយរាជរដ្ឋាភិបាលថ្មី បានបង្កើតឡើងកាលពីថ្ងៃទី២២ សីហា ឆ្នាំ២០២៣។

កម្ពុជាកំពុងធ្វើជាម្ចាស់ផ្ទះលើកដំបូងបំផុត នៃលំហាត់ហ្វឹកហ្វឺនប្រតិបត្តិការពហុជាតិលើទីលានសកម្មភាពមីនមនុស្សធម៌ ដែលមានការចូលរួមពីប្រទេសចំនួន ១៤ មកពីអាស៊ី, អឺរ៉ុប, អូស្យានី និងសហរដ្ឋអាមេរិក។ ពិធីបើកលំហាត់ហ្វឹកហ្វឺនប្រតិបត្តិការពហុជាតិលើទីលាន សកម្មភាពមីនមនុស្សធម៌ បានប្រព្រឹត្តទៅនៅថ្ងៃទី១៣ កញ្ញា ឆ្នាំ២០២៣ នៅលើទឹកដីខេត្តកំពង់ស្ពឺ ក្រោមប្រធានបទ «មាតុភូមិដ៏បវរ-ឆ្នាំ២០២៣» ។ អប្សរាណិតធ្វើសេចក្តីរាយការណ៍