កំណាត់ផ្លូវជាតិលេខ១ គ្រោងនឹងបិទចរាចរណ៍រថយន្តធន់ធ្ងន់នៅថ្ងៃទី៣ ខែសីហា ក្នុងឱកាសរៀបចំពិធីសម្ពោធដាក់សម្ពោធផ្លូវក្រវ៉ាត់ក្រុងខ្សែទី៣ ក្រោមអធិបតីភាពសម្តេចតេជោ ហ៊ុន សែន។ មន្ទីរសាធារណការ និងដឹកជញ្ជូនខេត្តកណ្ដាល បានចេញសេចក្ដីប្រកាសព័ត៌មាន ស្ដីពីការបិទចរាចរណ៍រថយន្តធន់ធ្ងន់នៅលើកំណាត់ផ្លូវជាតិលេខ១ ចាប់ពីចំណុចផ្លូវបំបែកផ្លូវជាតិលេខ១បេ រាជធានីភ្នំពេញ ដល់គីឡូម៉ែត្រ ៣០បូក១៤០ ឃុំបន្ទាយដែក ស្រុកកៀនស្វាយ ចាប់ពីម៉ោង៣រំលងអធ្រាត្រ ដល់ម៉ោង១រសៀលថ្ងៃទី៣ ខែសីហា ឆ្នាំ២០២៣ រហូតទល់ពិធីនឹងបិទបញ្ចប់។ ផ្លូវក្រវ៉ាត់ក្រុងខ្សែទី៣ គឺជាផ្លូវប្រវែងសរុប ៥៣គីឡូនិង៩៨៣ម៉ែត្រ, ទទឹង២២ ម៉ែត្រ។ សម្រាប់រថយន្តធន់ធ្ងន់មកពីអ្នកលឿង ត្រូវធ្វើដំណើរវាងតាមផ្លូវក្រវ៉ាត់ក្រុងខ្សែទី៣ ត្រង់គីឡូលេខ៣០បូក១៤០ ផ្លូវជាតិលេខ១ ក្នុងភូមិកណ្ដាលលើ ឃុំបន្ទាយដែក ស្រុកកៀនស្វាយ។ ចំណែករថយន្តធុនធ្ងន់មកពីភ្នំពេញ ត្រូវវាងតាមផ្លូវជាតិលេខ២១បេ ទៅតាមផ្លូវលេខ ១១០ ឡើងទៅផ្លូវក្រវ៉ាត់ក្រុងខ្សែទី៣ នៃកោះអន្លង់ចិន ក្រុងតាខ្មៅ ខេត្តកណ្ដាល។ ផ្លូវក្រវាត់ក្រុងខ្សែទី៣ គឺផ្លូវដ៏សំខាន់ និងទំនើបថ្មីមួយ ក្នុងជួយកាត់បន្ថយការកកស្ទះចរាចរណ៍ និងជួយសម្រួលដល់ការធ្វើដំណើរ និងចរាចរណ៍ក្នុងរាជធានីភ្នំពេញបន្ថែមទៀត។ ផ្លូវក្រវ៉ាត់ក្រុងខ្សែទី៣នេះជាផ្លូវតភ្ជាប់ពីផ្លូវជាតិលេខ៦ លេខ៥ លេខ៤ លេខ៣ លេខ២ រហូតដល់ផ្លូវជាតិលេខ១ កាត់ភូមិសាស្រ្តរាជធានីភ្នំពេញ…

ក្រសួងវប្បធម៌ គ្រោងនឹងរៀបចំមហោស្រពចាប៉ីដងវែងទូទាំងប្រទេស ឆ្នាំ២០២៣ ក្រោមប្រធានបទ “វប្បធម៌សន្តិភាព”។ យោងតាមសេចក្តីជូនដំណឹងរបស់ក្រសួងវប្បធម៌ថ្ងៃនេះ មហោស្រពចាប៉ីដងវែងទូទាំងប្រទេស គ្រោងនឹងប្រព្រឹត្តទៅចាប់ពីថ្ងៃទី២-៣-៤ ខែតុលា ឆ្នាំ២០២៣។ ក្រសួងវប្បធម៌ បានអំពាវនាវបេក្ខជនទាំងឡាយ ដែលមានបំណងចូលរួមប្រលងប្រជែង សមត្ថភាពចាប៉ីដងវែង សូមអញ្ជើញដាក់ពាក្យចាប់ពីថ្ងៃផ្សាយដំណឹងនេះតទៅ។ ចាប៉ីដងវែង គឺជាឧបករណ៍កេសដេញ និងជាទ្រព្យបេតិកភណ្ឌ ដែលដូនតាបានបន្សល់ទុកក្នុងសង្គមខ្មែរ។ ចាប៉ីដងវែង ត្រូវបានបញ្ចូលជាសម្បតិ្តបេតិកភណ្ឌ អរូបី នៃមនុស្សជាតិ របស់អង្គការយូណេស្កូ កាលពីថ្ងៃទី៣០ ខែវិច្ឆិកា ឆ្នាំ២០១៦ ក្នុងគោលបំណងថែរក្សា ការពារ និងលើកស្ទួយសិល្បៈ ចាប៉ីដងវែង។ មហោស្រពចាប៉ីដងវែង នឹងរៀបចំឡើងនៅសាលមហោស្រពនាយកដ្ឋានសិល្បៈទស្សនីយភាព ដែលនឹងមានការផ្សាយផ្ទាល់តាមរយៈបណ្ដាញសង្គមហ្វេសប៊ុកផេក ផ្លូវការរបស់ក្រសួងវប្បធម៌ និងវិចិត្រសិល្បៈ៕

ក្រសួងធនធានទឹក និងឧតុនិយម បានចេញសេចក្តីជូនដំណឹងដល់ពលរដ្ឋ ដែលរស់នៅតាមដងទន្លេមេគង្គផ្នែកខាងលើ ប្រុងប្រយ័ត្ននឹងកម្ពស់ទឹកទន្លេមេគង្គស្ទុះឡើង ដោយសារតែការធ្លាក់ភ្លៀងជាបន្តបន្ទាប់ច្រើនថ្ងៃមកនេះ។ ក្រសួងធនធានទឹកថ្លែងថា ទឹកជំនន់ទន្លេមេគង្គនឹងចាប់ផ្តើមកើតមាន ក្នុងសប្ដាហ៍ទៅមុខនេះ ខណៈពេលដែលមានឥទ្ធិពល នៃប្រព័ន្ធសម្ពាធទាប ITCZ ដែលបណ្តាលឱ្យនៅតំបន់ផ្ទៃរងទឹកភ្លៀង នៃទន្លេមេគង្គ ក្នុងប្រទេសថៃ ឡាវ និងប្រទេសកម្ពុជា មានភ្លៀងធ្លាក់ច្រើននៅក្នុងអាងទន្លមេគង្គ។ កម្ពស់ទឹកផ្នែកខាងលើដងទន្លេមេគង្គនឹងចាប់ផ្តើមកើតមានក្នុងរយៈពេលរវាងពី៣ទៅ៤ថ្ងៃខាងមុខនេះ ដូចជានៅខេត្តស្ទឹងត្រែង ទឹកនឹងអាចឡើងដល់កម្ពស់ចំនួន៧ម៉ែត្រ និង៦៥សង្ទីម៉ែត្រ, ខណៈខេត្តក្រចេះ ទឹកនឹងអាចឡើងដល់កម្ពស់១៦ម៉ែត្រ ៧០សង្ទីម៉ែត្រ និងខេត្តកំពង់ចាម ទឹកនឹងអាចឡើងដល់កម្ពស់ ៩ម៉ែត្រ ៩០សង្ទីម៉ែត្រ។ កម្ពស់ទឹកនេះ នៅមិនទាន់ដល់កម្រិតប្រកាសអាសន្ននោះទេ ប៉ុន្ដែតាមរយៈកម្ពស់ទឹកទាំងនេះ នឹងអាចឱ្យលិចតំបន់ទំនាបមួយចំនួន ដែលអមដងទន្លេ និងហូរចូលទៅតាមបណ្តាព្រែកមួយចំនួនថែមទៀត។ ក្រសួងធនធានទឹក និងឧតុនិយម បានដាស់តឿនដល់ប្រជាពលរដ្ឋទាំងអស់ ត្រូវបង្កើនការប្រុងប្រយ័ត្នខ្ពស់ ចំពោះករណីជំនន់ទឹកភ្លៀងនេះផងទៀត។

ចុងទំនប់បារាំងក្នុងក្រុងកំពង់ឆ្នាំង នៃខេត្តកំពង់ឆ្នាំង បានបាក់បណ្តាលឱ្យមានទឹកហៀរហូរជន់លិចថ្នល់។ អាជ្ញាធរបានបិទបណ្តោះអាសន្នការធ្វើចរាចណ៍លើកំណាត់ផ្លូវ ដែលលិចនៅថ្ងៃទី៣១កក្កដានេះ។ អប្សរាណិតរាយការណ៍

ខេត្តដែលមិនជាប់មាត់សមុទ្ទមួយចំនួនត្រូវគេរាយការណ៍ថា ក៏បានរងប៉ះពាល់នឹងជំនន់ទឹកភ្លៀងនាប៉ុន្មានថ្ងៃនេះផងដែរ។ នៅក្នុងខេត្តកំពង់ស្ពឺ យោងតាមរបាយការណ៍ស្នងការដ្ឋាននគរបាលខេត្ត គិតត្រឹមម៉ោង៣រសៀលថ្ងៃទី៣១កក្កដា ចំណុចដែលជន់លិចលើកំណាត់ផ្លូវខ្លះ លើជាតិលេខ៤ក្នុងខេត្ត បានស្រកទៅវិញ និងចរាចរណ៍បានប្រព្រឹត្តជាធម្មតា។ នៅចំណុចស្ពានអូរគគីរ នៃចំណុចគីឡូម៉ែត្រលេខ១០៦ និង១០៧ ទឹកភ្លៀងមិនប៉ះពាល់ដល់ការធ្វើចរាចរណ៍ទៀតឡើយ, ចំណែកចំណុចស្ទឹងស្រែខ្លុង នៃចំណុចគីឡូម៉ែត្រ៧៦ និង៧៧ លើផ្លូវជាតិលេខ៤នោះ ទឹកភ្លៀងធ្លាក់ខ្សោយ និងមិនបង្កការប៉ះពាល់ដល់ការធ្វើចរាចរណ៍ទេ។ ដោយឡែកផ្លូវលំមួយចំនួននៅក្នុង ឃុំត្រែងត្រយឹង, ឃុំយាយម៉ៅពេជ្រនិល, ឃុំដំបូករូង, ឃុំជាំសង្កែ, ឃុំចំបក់, ឃុំតាំងសំរោង, ឃុំព្រៃរំដួល, ឃុំតាំងស្យា នៃស្រុកភ្នំស្រួច ទឹកជំនន់បានធ្វើបង្កឱ្យមានការខូចខាតផ្លូវខ្លះប្រវែង៣០០ម៉ែត្រ និងផ្ទះប្រជាពលរដ្ឋរងប៉ះពាល់១៩១ គ្រួសារ, ប៉ះពាល់ស្រូវ៩៥ហិកតា និងដំណាំរួមផ្សំ២២ហិកតា។ សេចក្តីរាយការណ៍បានបង្ហាញថា ទឹកបានហូរធ្លាក់ចុះមកខាងក្រោមសម្តៅមកក្រុងច្បារមន, មកស្រុកសំរោងទង និងបន្តធ្លាក់មកឃុំជាប់ដែនសណ្តរស្ទឹងព្រែកត្នោត ឆ្ពោះមកកាន់ខេត្តកណ្តាល។ នៅក្នុងខេត្តព្រះវិហារនោះវិញ ទឹកភ្លៀងបានស្រកវិញហើយនៅថ្ងៃទី៣១កក្កដានេះ បន្ទាប់ពីមានភ្លៀងមួយយប់ទល់ភ្លឺនៅចំណុចមុំបី នៃព្រំដែនកម្ពុជាថៃ និងឡាវ បានរងដោយការធ្លាក់ភ្លៀងកម្រិត១៥០មីលីម៉ែត្រ។ ទឹកភ្លៀងបានលិចផ្លូវគ្រួសក្រហមនៅក្នុងភូមិសែនរុងរឿង និងបានលិចផ្ទះពលរដ្ឋជាច្រើន និងមិនទាន់មានសេចក្តីរាយការណ៍ទំហំខូចខាតនៅឡើយទេ។

ខេត្តដែលស្ថិតជាប់នឹងមាត់សមុទ្ទដូចជាខេត្តកំពត ខេត្តកោះកុង ខេត្តព្រះសីហនុ និងខេត្តកែប បានរងនឹងការវាយលុកដោយជំនន់ទឹកភ្លៀង ដែលកន្លែងខ្លះបង្កការស្លាប់ និងបាត់ខ្លួនមនុស្សផងដែរ។ អប្សរាណិតធ្វើសេចក្តីរាយការណ៍

ក្រុមប្រឹក្សាធម្មនុញ្ញបានប្រកាសតម្កល់សេចក្តីសម្រេចរបស់គណៈកម្មាធិការជាតិរៀបចំការបោះឆ្នោត ជុំវិញការផ្តន្ទាទោសលើករណីបុគ្គលញុះញង់គូសបំផ្លាញសន្លឹកឆ្នោត។ ការប្រកាសតម្កល់រក្សាសេចក្តីសម្រេចនេះ បានធ្វើឡើងនៅថ្ងៃទី៣១ កក្កដា ឆ្នាំ២០២៣ ដោយប្រធានក្រុមប្រឹក្សាធម្មនុញ្ញ កិត្តិនីតិកោសលបណ្ឌិត អ៊ឹម ឈុនលឹម ក្រោយសវនាការលើបណ្តឹងតវ៉ាជំទាស់ ចំនួន២សំណុំរឿង ទៅលើសេចក្តីសម្រេចរបស់ គ.ជ.ប ពាក់ព័ន្ធនឹងសកម្មភាពណែនាំ និងញុះញង់ឲ្យអ្នកបោះឆ្នោតគូសបំផ្លាញ ឬធ្វើឲ្យខូចសន្លឹកឆ្នោត អំឡុងការបោះឆ្នោតជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣។ យោងតាមច្បាប់បន្ទាប់ពី គ.ជ.ប ចេញសេចក្តីសម្រេចរបស់ខ្លួន, តំណាងដើមចោទ ឬចុងចោទអាចបន្តប្តឹងជំទាស់ទៅក្រុមប្រឹក្សាធម្មនុញ្ញ ក្នុងរយៈពេល៧២ម៉ោង។ ការដោះស្រាយបណ្តឹងរួចរាល់នេះ គឺជាការបើកផ្លូវមួយសម្រាប់ គ.ជ.ប ដែលគ្រោងនឹងធ្វើការប្រកាសលទ្ធផលបណ្តោះអាសន្នការបោះឆ្នោតសកល នៅថ្ងៃទី៥ សីហា និងលទ្ធផលជាផ្លូវការ ដែលនឹងប្រកាសនាថ្ងៃទី៩ សីហាខាងមុខនេះ។