ការដាច់ភ្លើងនៅចុងសប្តាហ៍ បានមកដល់ទៀតហើយ ដែលមានរយៈពេល៤ថ្ងៃ គឺមាននៅថ្ងៃព្រហស្បតិ៍ ថ្ងៃសុក្រ ថ្ងៃសៅរ៍ និងថ្ងៃអាទិត្យ។ ការដាច់ភ្លើងនេះ គឺបានកើតឡើងនៅក្នុងរាជធានីភ្នំពេញ ដែលនឹងមានរយៈពេលពី ៦ម៉ោង ទៅ៩ម៉ោង។ តើការដាច់ភ្លើងប្រចាំសប្តាហ៍នេះ មាននៅទីណាខ្លះ? សូមស្ដាប់សេចក្ដីរាយការណ៍

ព្រលានយន្តហោះសៀមរាបអង្គរថ្មី គ្រោងនឹងធ្វើតេស្តការហោះហើរ មុននឹងដាក់ដំណើរការទទួលជើងហោះហើរលើកដំបូង នាពាក់កណ្តាលខែតុលា ឆ្នាំ២០២៣។ យោងតាមមន្ត្រីអាកាសចរស៊ីវិល ការធ្វើតេស្តហោះហើរ នឹងធ្វើនៅថ្ងៃទី៥តុលា, ចំណែកការទទួលជើងហោះហើរលើកដំបូងជាអន្តរជាតិ នឹងគ្រោងធ្វើនៅថ្ងៃទី១៦តុលា។ មន្ត្រីនាំពាក្យអាកាសចរស៊ីវិល លោក ស៊ីន ចាន់សិរីវុត្ថា បានបញ្ជាក់ថាពិធីទទួលជើងហោះហើរលើកដំបូង ជាអន្តរជាតិ នៅថ្ងៃទី១៦តុលា នឹងប្រព្រឹត្តទៅក្រោមវត្តមានរបស់រដ្ឋមន្ត្រី ម៉ៅ ហាវណ្ណាល់ ដែលទទួលបន្ទុករដ្ឋលេខាធិការដ្ឋានអាកាសចរស៊ីវិល។ មន្ត្រីនាំពាក្យដដែលបានថ្លែងបញ្ជាក់ទៀតថា អាកាសយាន្តដ្ឋានអន្តរជាតិសៀមរាបអង្គរនេះ នឹងគ្រោងដាក់សម្ពោធជាផ្លូវការ ក្រោមអធិបតីភាពសម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា នៅថ្ងៃទី១ ធ្នូ ឆ្នាំ២០២៣។ អាកាសយាន្តដ្ឋានអន្តរជាតិសៀមរាបអង្គរថ្មីនេះ មានចំណតសម្រាប់ចតអាកាសយានចំនួន ៣៨ចំណត និងអាចទទួលអ្នកដំណើរតាមផ្លូវអាកាសបាន ៧លាននាក់ក្នុងមួយឆ្នាំ និងឈានទៅទទួលអ្នកដំណើរបាន ១២លាននាក់ ក្នុងមួយឆ្នាំចាប់ពី២០៤០។ អាកាសយានដ្ឋានអន្តរជាតិសៀមរាប-អង្គរ បានចាប់ផ្តើមសាងសង់កាលពីខែមីនា ឆ្នាំ២០២០ ក្រោមទុនវិនិយោគប្រមាណ ១ពាន់ ១០០លានដុល្លារអាមេរិក៕

ចរាចរណ៍លើកំណាត់ផ្លូវជាតិលេខ៤ ត្រង់ចំណុចចន្លោះគីឡូម៉ែត្រលេខ១៥៣ និង១៥៤ ត្រូវបានផ្អាកបណ្តោះអាសន្នសិនចាប់ពីថ្ងៃនេះទៅ ដោយសារការជន់លិចដោយជំនន់ទឹកភ្លៀង។ អាជ្ញាធរខេត្តព្រះសីហនុ នៅថ្ងៃទី២៧កញ្ញា បានជូនដំណឹងការផ្អាកធ្វើចរាចរនេះ ខណៈចំណុចចន្លោះគីឡូម៉ែត្រ ដែលជូនដំណឹងនោះ មានទឹកជន់លិចប្រមាណជាង១២០ម៉ែត្រ។ សេចក្តីជូនដំណឹងរបស់រដ្ឋបាលខេត្តបញ្ជាក់ថា «ស្ថានភាពបែបនេះមិនអាចអនុញ្ញាតឱ្យយានយន្តគ្រប់ប្រភេទ ធ្វើដំណើរឆ្លងកាត់ទីតាំងនោះបានទៀតទេ»។ សេចក្តីជូនដំណឹងដដែល បានណែនាំការធ្វើដំណើរមកកាន់ខេត្តព្រះសីហនុ សូមធ្វើដំណើរតាមផ្លូវល្បឿនលឿន ឬតាមផ្លូវជាតិលេខ៣។ ការបើកដំណើរចរាចរឡើងវិញ នឹងត្រូវរង់ចាំការបញ្ជាក់ពីរដ្ឋបាលខេត្តសាជាថ្មី។

រដ្ឋាភិបាលជប៉ុនបានបញ្ជាក់នូវការប្តេជ្ញាជួយអភិវឌ្ឍកំពង់ផែខេត្តព្រះសីហនុរបស់កម្ពុជា ឱ្យក្លាយទៅជាកំពង់ផែ ដែលធំជាងគេនៅតំបន់អាស៊ីអាគ្នេយ៍។ ការប្តេជ្ញានេះ បានធ្វើឡើងដោយឯកអគ្គរាជទូតជប៉ុនប្រចាំកម្ពុជាលោក អ៊ុអិណូ អាត់ស៊ូស៊ី ក្នុងឱកាសរំលឹកទំនាក់ទំនងរវាងកម្ពុជា និងជប៉ុន ដែលមានរយៈពេល៧០ឆ្នាំហើយ គិតត្រឹមឆ្នាំ២០២៣។ អប្សរាណិតធ្វើសេចក្តីរាយការណ៍

រដ្ឋមន្ត្រីក្រសួងបរិស្ថាន បណ្ឌិត អ៊ាង សុផល្លែត បានប្រាប់មន្ត្រីក្រោមបង្គាប់ត្រូវបញ្ចប់នូវវប្បធម៌ «ធ្វើកិច្ចសន្យាហើយដោះលែង»។ ប្រសាសន៍ដាស់តឿននេះ បានធ្វើឡើងកាលពីថ្ងៃទី២៦កញ្ញា ក្នុងឱកាសជួបប្រជុំណែនាំដល់មន្ត្រីរាជការ នៃក្រសួងបរិស្ថានទាំងអស់ ដែលកន្លងមកបានអនុវត្តនូវវប្បធម៌ចាប់អ្នកប្រព្រឹត្តបទល្មើសបំផ្លាញធនធានធម្មជាតិហើយ តម្រូវឱ្យធ្វើកិច្ចសន្យា និងដោះលែងឱ្យរួចខ្លួន។ លោករដ្ឋមន្ត្រី អ៊ាង សុផល្លែត បានព្រមានថា គេត្រូវតែបញ្ចប់នូវវប្បធម៌នោះចោលចេញ។ លោកបានបញ្ជាក់ប្រាប់ថ្នាក់ដឹកនាំ មន្រ្តីរាជការ នៃអគ្គនាយកដ្ឋានតំបន់ការពារធម្មជាតិ ក្នុងកិច្ចប្រជុំថ្ងៃអង្គារនៅទីស្តីការក្រសួងបរិស្ថានថា «គ្រប់ករណីប្រព្រឹត្តបទល្មើសទាំងឡាយ ឱ្យតែចាប់បាន គឺមិនអនុញ្ញាតឱ្យធ្វើកិច្ចសន្យាហើយដោះលែងនោះទេ។ គឺត្រូវតែកសាងសំណុំរឿង និងដាក់បន្តទៅតុលាជាដាច់ខាត»។ លោកបានបញ្ជាក់ថា «ប្រសិនជាករណីទាំងនោះ មានពាក់ព័ន្ធនឹងកត្តានយោបាយ សូមផ្តល់ព័ត៌មាន និងផ្តល់សិទ្ធិឱ្យឯកឧត្តមរដ្ឋមន្រ្តីជាអ្នកសម្រេច»។

ប្រមុខរាជរដ្ឋាភិបាលកម្ពុជា បានចូលរួមអបអរសាទរទិវាទេសចរណ៍ពិភពលោកឆ្នាំ២០២៣ និងបានកោតសរសើរការងើបឡើងវិញ នៃវិស័យទេសចរណ៍កម្ពុជា ក្រោយពីបានប៉ះពាល់ធ្ងន់ធ្ងរដោយវិបត្តិឆ្លងកូវីដ១៩។ ប្រសាសន៍ចូលរួមអបអរសាទររបស់សម្តេចមហាបវរធិបតី ហ៊ុន ម៉ាណែត បានធ្វើឡើងក្នុងឱកាសដែលកម្ពុជា និងពិភពលោក បានចូលរួមអបអរទិវាទេសចរណ៍ពិភពលោក ថ្ងៃទី២៧ កញ្ញា ក្រោមប្រធានបទ «ទេសចរណ៍ និងការវិនិយោគបៃតង»។ អប្សរាណិតធ្វើសេចក្តីរាយការណ៍

មន្ត្រីដែលគ្រប់គ្រងអ្នកទោសគ្រឿងញៀន និងអ្នកជាប់ឃុំក្នុងពន្ធនាការ នឹងតម្រូវឱ្យធ្វើតេស្តរកសារធាតុញៀន យោងតាមសេចក្តីណែនាំមួយ របស់ក្រសួងមហាផ្ទៃ ចុះថ្ងៃទី២៧ កញ្ញា ឆ្នាំ២០២៣។ ការតម្រូវធ្វើតេស្តទាំងអ្នកជាប់ពន្ធនាគារ និងអ្នកគ្រប់គ្រងអ្នកទោសគ្រឿងញៀន បានធ្វើឡើងក្រោយមានការរិះគន់ខ្លះដែលនិយាយថា មានគ្រឿងញៀនចែកចាយក្នុងពន្ធនាគារ និងមានអ្នកទោសអាចបញ្ជាចេញពីក្នុងគុក លើការធ្វើចរាចរគ្រឿងញៀននៅខាងក្រៅបានទៀត។ សេចក្តីណែនាំបានបញ្ជាក់ថា ការធ្វើតេស្តរកសារធាតុញៀននេះ គឺ «ដើម្បីធានាប្រសិទ្ធភាព ការអនុវត្តការងាររបស់មន្ត្រីពន្ធនាគារ នៅតាមមណ្ឌលអប់រំកែប្រែ និងពន្ធនាគាររាជធានីខេត្ត ឱ្យកាន់តែមានប្រសិទ្ធភាព និងទទួលបានការជឿទុកចិត្តពីមជ្ឈដ្ឋានទូទៅ…»។ សេចក្តីណែនាំដដែលបានព្រមានថា «ក្នុងករណីរកឃើញថា មន្ត្រីពន្ធនាគារមានចេតនាគេចវេសក្នុងការមិនចូលរួមសហការធ្វើតេស្ត ឬរកឃើញមានសារធាតុញៀន, អគ្គនាយកដ្ឋានពន្ធនាគារ នឹងគោរពស្នើសុំគោលការណ៍សម្រេចពីក្រសួង ដើម្បីអនុវត្តនូវវិធានការរដ្ឋបាលនានា និងវិធានការផ្លូវច្បាប់ជាធរមាន»។

ក្រុមប្រឹក្សាធម្មនុញ្ញ នឹងពិនិត្យនិងសម្រេចលើសំណើធម្មនុញ្ញភាព លើច្បាប់ស្ដីពីការបង្កើតក្រសួងអធិការកិច្ច និងការបង្កើតរដ្ឋលេខាធិការដ្ឋានកិច្ចការព្រំដែន នៅថ្ងៃទី២៨ កញ្ញា ឆ្នាំ ២០២៣។ សេចក្តីព្រាងច្បាប់ស្ដីពីការបង្កើតក្រសួងអធិការកិច្ច និងច្បាប់ស្តីពីការបង្កើតរដ្ឋលេខាធិការដ្ឋានកិច្ចការព្រំដែន ត្រូវបានរដ្ឋសភាបានអនុម័តនៅថ្ងៃទី១៤កញ្ញា…និងសេចក្តីព្រាងច្បាប់ទាំង២ដដែលនេះ ត្រូវបានបញ្ជូនមកស្ថាប័នព្រឹទ្ធសភា ដែលបានឯកភាពទាំងស្រុងនៅថ្ងៃទី២១កញ្ញា។ ក្រសួងអធិការកិច្ច គឺជាអតីតក្រសួងទំនាក់ទំនងព្រឹទ្ធសភា និងរដ្ឋសភា…ចំណែករដ្ឋលេខាធិការដ្ឋានកិច្ចការព្រំដែន គឺរដ្ឋលេខាធិការដ្ឋានបង្កើតលើកដំបូង សម្រាប់ការដោះស្រាយកិច្ចព្រំដែន រវាងប្រទេសដែលជាប់នឹងកម្ពុជា រួមមានវៀតណាម, ឡាវ និងថៃ។ កិច្ចប្រជុំក្រុមប្រឹក្សាធម្មនុញ្ញវេលាថ្ងៃទី២៨ កញ្ញា ឆ្នាំ២០២៣ នឹងប្រព្រឹត្តទៅក្រោមអធិបតីភាពកិត្តិនីតិកោសលបណ្ឌិត អ៊ឹម ឈុនលឹម ដែលជាប្រធានក្រុមប្រឹក្សាធម្មនុញ្ញ។

កម្ពុជា និងសហរដ្ឋអាមេរិក បានចាប់ដៃគ្នាបញ្ជាក់ការបន្តកិច្ចសហប្រតិបត្តិការ រវាងប្រទេសទាំង២ទៅវិញទៅមក លើចំណុចមួយចំនួនដែលត្រូវបានអាក់ខានកន្លងមកនេះ។ ការចាប់ដៃគ្នា បញ្ជាក់ការបន្តកិច្ចសហប្រតិបត្តិការនេះ បានធ្វើឡើងរវាងជំនួបពិភាក្សាគ្នាមួយរវាងឯកអគ្គរដ្ឋទូតសហរដ្ឋអាមេរិកប្រចាំកម្ពុជា ជាមួយនឹងប្រមុខថ្មីដឹកនាំរាជរដ្ឋាភិបាលសម្តេចមហាបវរធិបតី ហ៊ុន ម៉ាណែត នាវិមានសន្តិភាព នៅថ្ងៃទី២៧ កញ្ញា ឆ្នាំ២០២៣។ តើកិច្ចពិភាក្សានេះ បានឯកភាពលើចំណុចអ្វីខ្លះ? អប្សរាណិតធ្វើសេចក្តីរាយការណ៍

ការឆ្លងជំងឺកូវីដ១៩ នៅអាស៊ានក្នុងរយៈពេល ២៤ម៉ោងកន្លងមកនេះ មានចំនួន ៧២ករណី ដែលបានកើតឡើងលើប្រទេសចំនួន ៤។ តួលេខឆ្លងនៅអាស៊ានថ្ងៃនេះ បានកើនឡើងមកវិញចំនួន ៩២ករណី បើប្រៀបធៀបនឹងការឆ្លងកាលពីថ្ងៃម្សិលមិញ។ ប្រទេសកម្ពុជាមិនមានរកឃើញអ្នកឆ្លងថ្មីឡើយនៅថ្ងៃនេះ។ ប្រទេសទាំង៤ នៅអាស៊ាន ដែលរកឃើញមានឆ្លងថ្មីថ្ងៃនេះ រួមមានប្រទេសវៀតណាម, មីយ៉ាន់ម៉ា, ថៃ និងប្រទេសឡាវ។ ប្រទេសថៃ មានការឆ្លងចំនួន ៣៦ករណី ច្រើនជាងគេ ខណៈប្រទេសឡាវ មានការឆ្លង ២ករណី តិចជាងក្នុងចំណោមប្រទេសទាំង ៤។ ប្រទេសអាស៊ានរយៈពេល ២៤ម៉ោងចុងក្រោយនេះ មានអ្នកស្លាប់ដោយសារជំងឺកូវីដ១៩ ម្នាក់ ដែលជាពលរដ្ឋនៃប្រទេសថៃ។ គិតសរុបរួម នៃប្រទេសទាំង១០ អាស៊ាននាពេលនេះ ការឆ្លងសរុបមានចំនួន ៣៦លាន ៣៧ម៉ឺន ៧ពាន់ ៥៧៧ករណី, និងការស្លាប់សរុបមានចំនួន ៣៦ម៉ឺន ៨ពាន់ ៨១៨នាក់។ បើគិតសរុបនៅលើសាកលលោកនោះវិញ ការឆ្លងវីរុសកូវីដ១៩ សរុបមានចំនួនជាង ៦៩៥លានករណី, និងការស្លាប់មានជាង ៦លាន ៩១ម៉ឺននាក់៕