ប្រជាពលរដ្ឋជាង១០០គ្រួសារ បានប្តឹងឧកញ៉ារកស៊ីលក់ដីឈ្មោះ ហ៊ី គឹមហុង ក្រោយសមត្ថកិច្ចបានចាប់ខ្លួន ក្នុងហេតុការណ៍មួយ ដែលមានអ្នកក្រោមបង្គាប់បានប្រើកម្លាំងហិង្សាដាក់លើសមត្ថកិច្ច។ ប្រជាពលរដ្ឋដែលបានដាក់ពាក្យបណ្តឹង បានចោទថាឧកញ៉ាដែលជាអគ្គនាយកក្រុមហ៊ុនដីមាសនោះ បានបោកប្រាស់ពួកគេច្រើនម៉ឺនដុល្លារដោយសារតែជំនួញដីទុច្ចរិត។ អប្សរាណិតរាយការណ៍

អ្នកនាំពាក្យគណបក្សប្រជាជនកម្ពុជា បានថ្លែងថាក្នុងអាណ្ណត្តិ៥ឆ្នាំទៅមុខទៀតនេះ គណបក្សប្រជាជនកម្ពុជា ដែលកាន់អំណាចនឹងដាក់ចេញគោលការណ៍បញ្ចកោណ ដែលនឹងត្រូវអនុវត្តដោយគណរដ្ឋមន្ត្រីថ្មី ក្រោមការដឹកនាំរបស់បណ្ឌិត ហ៊ុន ម៉ាណែត។ លោកបានថ្លែងថា សមាសភាពជួរអ្នកដឹកនាំរាជរដ្ឋាភិបាលថ្មី គឺសុទ្ធតែជាមនុស្សមានសមត្ថភាព ដែលប្រសូតចេញពីជួរចង្កោមទំពាំងស្នងឫស្សី របស់គណបក្សប្រជាជនកម្ពុជា។ អប្សរាណិតរាយការណ៍

ភាពអបអរសាទររបស់ពលរដ្ឋក្នុង និងក្រៅប្រទេស ដែលគាំទ្របណ្ឌិត ហ៊ុន ម៉ាណែត ជានាយករដ្ឋមន្ត្រីថ្មី នៃប្រទេសកម្ពុជានៅតែបន្តថែមទៀតក្នុងថ្ងៃទី៨ សីហា ឆ្នាំ២០២៣។ ពលរដ្ឋខ្មែរដែលជាពលករបំរើការក្នុងប្រទេសកូរ៉េខាងត្បូង បានធ្វើសារតាមបណ្តាញសង្គមរៀងៗខ្លួន ស្វាគមន៍ដល់នាយករដ្ឋមន្ត្រីថ្មី នៃប្រទេសកម្ពុជា ជាមួយនឹងការរំពឹងថាកម្ពុជានឹងកាន់តែវិវត្តន៍រកភាពរីកចម្រើនថ្មីថែមទៀត ក្រោមការដឹកនាំរបស់បណ្ឌិត ហ៊ុន ម៉ាណែត។ បណ្ឌិត ហ៊ុន ម៉ាណែត អាយុ ៤៥ឆ្នាំ គឺជាជនជាតិខ្មែរលើកដំបូងគេបំផុត ដែលបានប្រឡងជាប់ចូលសិក្សានៅសាលាបណ្ឌិតយោធា West Point សហរដ្ឋអាមេរិក។ លោកបានបញ្ចប់ថ្នាក់អនុបណ្ឌិតសេដ្ឋកិច្ចនៅសាកលវិទ្យាល័យ New York និងបានបញ្ចប់ថ្នាក់បណ្ឌិតសេដ្ឋកិច្ចនៅសកលវិទ្យាល័យ Bristol ក្នុងចក្រភពអង់គ្លេស។ យុវជនពីក្រៅស្រុក បានអបអរសាទរ ចំពោះបណ្ឌិត ហ៊ុន ម៉ាណែត ដែលនឹងក្លាយជាមេដឹកនាំប្រទេសកម្ពុជា ក្នុងពេលឆាប់ៗខាងមុខនេះ។ បណ្ឌិត ហ៊ុន ម៉ាណែត នឹងក្លាយជានាយករដ្ឋមន្ត្រីពេញលេញនៅថ្ងៃទី២២ សីហា ឆ្នាំ២០២៣ ដែលជាថ្ងៃនៃថ្នាកដឹកនាំរបស់គណរដ្ឋមន្ត្រីថ្មី ត្រូវចូលស្បថឡើងកាន់តំណែង។

ថ្នាក់ដឹកនាំគណៈកម្មាធិការមជ្ឈិមបក្សប្រជាជនបដិវត្តន៍ឡាវ បានអបអរបណ្ឌិត ហ៊ុន ម៉ាណែត ក្នុងឱកាសទទួលបានការត្រាស់បង្គាប់តែងតាំងពីព្រះមហាក្សត្រខ្មែរ ក្លាយជានាយករដ្ឋមន្ត្រីថ្មី នៃព្រះរាជាណាចក្រកម្ពុជា។ លោក ថងលុន ស៊ីសុលីត ដែលជាប្រធានរដ្ឋនៃប្រទេសឡាវ ក្នុងជំនួបតាមប្រព័ន្ធវីដេអូជាមួយនឹងប្រធានគណបក្សប្រជាជនកម្ពុជា សម្តេចតេជោ ហ៊ុន សែន នៅថ្ងៃទី៨ សីហា ឆ្នាំ២០២៣ បានចាត់ទុកព្រឹត្តិការណ៍តែងតាំងនោះ គឺជាប្រវត្តិសាស្ត្រដែលមាន «ការគាំទ្រយ៉ាងពេញទំហឹងពីប្រជាជនកម្ពុជា»។ លោកបានថ្លែងថាគណបក្សប្រជាជនបដិវត្តន៍ឡាវ «ជឿជាក់យ៉ាងមុតមាំ និងគាំទ្រយ៉ាងពេញទំហឹងចំពោះរាជរដ្ឋាភិបាលអាណ្ណត្តិទី៧ ក្នុងការបន្តកសាង និងអភិវឌ្ឍន៍ប្រទេសកម្ពុជាឱ្យកាន់តែរីកចំរើនថែមទៀត»។ យោងតាមសេចក្តីប្រកាសព័ត៌មានមួយរបស់គណបក្សប្រជាជនកម្ពុជា បន្ទាប់ពីជំនួបតាមប្រព័ន្ធវីដេអូនោះរួចមក, ថ្នាក់ដឹកនាំបក្ស និងរដ្ឋនៃប្រទេសឡាវ បានសន្យា និង «ប្តេជ្ញាថានឹងបន្តពង្រឹងទំនាក់ទំនងដ៏ល្អប្រសើររវាងគណបក្ស, រដ្ឋាភិបាល និងប្រជាជននៃប្រទេសទាំង២»។ សម្តេចតេជោ ហ៊ុន សែន ក្នុងប្រសាសន៍តបទៅវិញ បានថ្លែងអំណរគុណចំពោះថ្នាក់ដឹកនាំបក្ស និងរដ្ឋនៃប្រទេសឡាវ «ដែលបានអបអរសាទរ និងគាំទ្រយ៉ាងពេញទំហឹង ចំពោះគណបក្សប្រជាជនកម្ពុជា និងរាជរដ្ឋាភិបាលថ្មី «ដែលនឹងដឹកនាំដោយបណ្ឌិត ហ៊ុន ម៉ាណែត និងថា «ជាការឆ្លុះបញ្ចាំងនូវភាតរភាព និងសាមគ្គីភាពដ៏រឹងមាំ និងភាពជាដៃគូយុទ្ធសាស្ត្រគ្រប់ជ្រុងជ្រោយ និងយូរអង្វែងរវាងប្រទេសទាំង២»។

ព្រះមហាក្សត្រខ្មែរបានត្រាស់បង្គាប់ផ្តល់គោរមងារបណ្ឌិត ហ៊ុន ម៉ាណែត ជា «កិត្តិទេសាភិបាលបណ្ឌិត»។ ព្រះរាជបន្ទូលត្រាស់បង្គាប់នេះ បានធ្វើឡើងតាមព្រះរាជក្រឹត្យចុះថ្ងៃទី៨ សីហា ឆ្នាំ២០២៣។ ព្រះរាជក្រឹត្យ បានត្រាស់បង្គាប់ថា «ផ្តល់គោរមងារកិត្តិយសពិសេសដ៏ឧត្តុងឧត្តមបំផុត នៃរាជបណ្ឌិតសភាកម្ពុជា ជាកិត្តិទេសាភិបាលបណ្ឌិត ជូនឯកឧត្តមបណ្ឌិត ហ៊ុន ម៉ាណែត តែមួយគត់»។ ព្រះរាជក្រឹត្យត្រាស់បង្គាប់ផ្តល់គោរមងារនេះ គឺនៅមួយថ្ងៃ បន្ទាប់ពីព្រះអង្គបានចេញព្រះរាជក្រឹត្យតែងតាំងឯកឧត្តមបណ្ឌិត ហ៊ុន ម៉ាណែត ជានាយករដ្ឋមន្ត្រីនៃប្រទេសកម្ពុជា។

សម្តេចម៉ែ បានធ្វើព្រះរាជសារកោតសរសើរបណ្ឌិត ហ៊ុន ម៉ាណែត និងរំពឹងថា ក្នុងរយៈពេលដឹកនាំ៥ឆ្នាំខាងមុខនេះ, ប្រទេសកម្ពុជាកាន់តែទទួលបានជោគជ័យបន្ថែមទៀត ដើម្បីជាប្រយោជន៍របស់ប្រជាជាតិ។ បណ្ឌិត ហ៊ុន ម៉ាណែត បានថ្លែងប្តេជ្ញាថានឹងខិតខំអស់ពីសមត្ថភាព ដើម្បីការពារព្រះរាជបល្ល័ង្គ, ការពារសុខសន្តិភាព និងការអភិវឌ្ឍន៍ជាតិ។ អប្សរាណិតរាយការណ៍

តួលេខឆ្លងកូវីដ១៩ក្នុងប្រទេសអាស៊ាន កាន់តែធ្លាក់ចុះ។ ប្រទេសកម្ពុជា ក្នុងរយៈពេល ៧២ម៉ោងចុងក្រោយនេះ ក៏បានរកឃើញអ្នកឆ្លងថ្មី ២នាក់។ យោងតាមក្រសួងសុខាភិបាលកម្ពុជា ការឆ្លងថ្មី២ករណី ក្នុងរយៈពេល ៣ថ្ងៃចុងក្រោយនេះ គឺបានកើតឡើងនៅថ្ងៃសៅរ៍ ១ករណី និងថ្ងៃអាទិត្យ១ករណី។ តួលេខឆ្លងថ្មីកូវីដ១៩ ក្នុងប្រទេសអាស៊ាននៃរយៈពេល ៧២ម៉ោងចុងក្រោយនេះ មានចំនួន ៣៤៧ករណី ដែលជាតួលេខឆ្លងបន្តថយចុះថែមទៀតច្រើនដល់ ៩៧៧ករណី បើប្រៀបធៀបការឆ្លងបីថ្ងៃដូចគ្នាកាលពីសប្តាហ៍មុន។ ការឆ្លងក្នុងរយៈពេល ៧២ម៉ោងកន្លងមកនេះ បានកើតលើប្រទេសចំនួន ៧ នៅអាស៊ាន រួមមានប្រទេសហ្វីលីពីន, ឥណ្ឌូនេស៊ី, វៀតណាម, មីយ៉ាន់ម៉ា, កម្ពុជា, ប្រុយណេ និងប្រទេសឡាវ។ ប្រទេសហ្វីលីពីន គឺជាប្រទេស ដែលមានតួលេខឆ្លងច្រើនជាងគេ ដែលមានការឆ្លងចំនួន ១៥៤ករណី។ តួលេខឆ្លងតិចជាងគេ គឺប្រទេសកម្ពុជា ដែលមានការឆ្លងចំនួន ២ករណី។ ប្រទេសសឹង្ហបុរី, ម៉ាឡេស៊ី និងប្រទេសថៃ គឺជាប្រទេសដែលគ្មានសេចក្តីរាយការណ៍ជុំវិញតួលេខឆ្លង និងស្លាប់ឡើយ ក្នុងរយៈពេល ៧២ម៉ោងចុងក្រោយនេះ។ តួលេខស្លាប់ដោយសារកូវីដ១៩ ក្នុងប្រទេសអាស៊ានរយៈពេល ៧២ម៉ោងចុងក្រោយនេះ មាន ១៨នាក់…

កម្ពុជានាំចេញអង្ករជាង៣៦ម៉ឺនតោន ដោយរកចំណូលបានជាង២៥៣លានដុល្លារ ក្នុងរយៈពេល៧ខែ។ យោងតាមរបាយការណ៍របស់សហព័ន្ធស្រូវអង្ករកម្ពុជា, ក្នុងរយៈពេល ៧ខែ ឆ្នាំ២០២៣នេះ, ការនាំចេញអង្ករចេញ បានជិត៥២% នៃផែនការ៧០ម៉ឺនតោនតែប៉ុណ្ណោះ។ កម្ពុជាបានដាក់ចេញនូវផែនការនាំអង្ករចេញ១លានតោនតាំងពីឆ្នាំ២០១៥ ប៉ុន្តែរយៈពេល ៨ឆ្នាំមកនេះ មិនទាន់បានបំពេញផែនការនោះបាននៅឡើយទេ។ ក្នុងរយៈពេល៧ខែកន្លងមកនេះ ក្រុមហ៊ុនចំនួន៥២ បាននាំចេញអង្ករចេញទៅកាន់គោលដៅផ្សេងៗ ដែលក្នុងនោះសម្រាប់ប្រទេសចិន បានចំនួនជាង១៤ម៉ឺនតោន ដែលគិតជាទឹកប្រាក់បានចំនួន ៩០លានដុល្លារ។ចំណែកការនាំចេញអង្ករទៅទៅកាន់ប្រទេសនៅក្នុងទ្វីបអឺរ៉ុបចំនួន ២៥ប្រទេស បានចំនួនជាង ១៤ម៉ឺនតោន គិតជាទឹកប្រាក់ចំនួន ១០០លានដុល្លារ, ទៅកាន់៤ប្រទេសជាសមាជិកអាស៊ាន បានចំនួនជាង៣ម៉ឺនតោន គិតជាទឹកប្រាក់ចំនួន ២០លានដុល្លារ, ទៅកាន់២២ប្រទេសផ្សេងៗទៀត បានចំនួនជិត ៥ម៉ឺនតោន ដែលគិតជាទឹកប្រាក់បានចំនួន ៤២លានដុល្លារ។ កម្ពុជាក្រៅពីអង្ករ នៅបាននាំចេញស្រូវចំនួនជាង ២លានតោនកន្លះផងដែរ ដែលគិតជាទឹកប្រាក់បានចំនួនជាង ៦៦៣លានដុល្លារ។

ពលរដ្ឋ២១គ្រួសារនៅខេត្តក្រចេះ ដែលរងគ្រោះដោយសារទឹកជំនន់ បានទទួលអំណោយពីកាកបាទក្រហមកម្ពុជា។ អំណោយកាកបាទក្រហម ដែលនាំយកមកចែកជូនពលរដ្ឋនៅថ្ងៃទី៧សីហាននេះ បានដឹកនាំដោយអភិបាលរងខេត្ត លោក គង់ គីមនី ។ អាជ្ញាធរមូលដ្ឋានបានបញ្ជាក់ថា ប្រជាពលរដ្ឋដែលរងគ្រោះដោយសាទឹកជំនន់ ដែលបានជម្លៀសមកទីទួលសុវត្ថិភាពនោះ គឺមានចំនួន២១គ្រួសារ ក្នុងនោះស្ត្រីមានផ្ទៃពោះ ៦នាក់ ស្ថិតនៅក្នុងភូមិបល្លង្គ័ ឃុំដំរីផុង ស្រុកឆ្លូង នៃខេត្តក្រចេះ។ ចំពោះអំណោយជាគ្រឿងឧបភោគបរិភោគដែលចែកជូននោះ គឺក្នុងមួយគ្រួសារ ទទួលបានអង្ករ២៥ គីឡូក្រាម, មុងគ្រែ១, មុងអង្រឹង៣,ធុងចំរោះទឹក១,ទឹកសុទ្ធ១ដបធំ,មី១កេះ, ត្រីខ១ យួរ,សាប៊ូ, ថ្នាំដុសធ្មេញ កន្សែង, សំឡីអនាម័យនារី១ប្រអប់, តង់១ដុំ, ថ្នាំក្លរ៉ាមីន២០គ្រាប់ និង ថវិកា៥ម៉ឺនរៀល។

ការប្រកួតកីឡាប៉ូលីស និងកងពន្លត់អគ្គិភ័យពិភពលោក ក្នុងប្រទេសកាណា បានបញ្ចប់ហើយ ដោយកម្ពុជាទទួលបានមេដាយសរុបចំនួន៧១គ្រឿង។ ព្រឹត្តិការណ៍ប្រកួតកីឡានគរបាលនេះ បានធ្វើនៅក្នុងក្រុងវីនីផេក រវាងពីថ្ងៃទី២៨ កក្កដា ដល់៦ សីហា ដោយមានការចូលរួមពីកីឡាករប៉ូលីស មកពីប្រទេសជាង៧០ នៅលើសកលលោក។ យោងតាមក្រសួងមហាផ្ទៃ, ក្នុងចំណោមមេដាយ៧១គ្រឿង ដែលក្រុមកីឡានគរបាលជាតិកម្ពុជា ដណ្តើមបាន រួមមាន មេដាយមាស៣៣, ប្រាក់២៨ ,និងសំរឹទ្ធ ៩គ្រឿង។ សម្ដេចក្រឡាហោម ស ខេង បានថ្លែងអំណរគុណ និងកោតសរសើរចំពោះអគ្គលេខាធិការដ្ឋានក្រុមប្រឹក្សាកីឡាក្រសួងមហាផ្ទៃ ដែលបានរៀបចំប្រភេទកីឡា និងត្រៀមចេញទៅចូលរួមប្រកួតនៅប្រទេសកាណាដា។ សម្ដេចបានចាត់ទុកបេសកកម្មនេះថា ជាការរួមចំណែកលើកតម្កើងមោទនភាពជាតិថ្មីមួយបន្ថែមទៀត បន្ទាប់ពីកម្ពុជាសម្រេចបានជោគជ័យលើការរៀបចំធ្វើជាម្ចាស់ផ្ទះព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេម។ ក្នុងការប្រកួតរយៈពេល៩ថ្ងៃដែលមានវិញ្ញាសារសរុប៦៣កីឡា, កម្ពុជាបានបញ្ជូនក្រុមកីឡានគរបាលជាតិតែចំនួន៤៨នាក់សម្រាប់តែ វិញ្ញាសារចំនួន១៣ប៉ុណ្ណោះ គឺកីឡាវាយសី, កីឡាលើកទម្ងន់, កីឡាយូដូ, កីឡាជឺជិតស៊ូ, កីឡាការ៉ាតេ, កីឡាហែលទឹក, កីឡាវាយកូនឃ្លីលើតុ, កីឡាបាល់ទះក្នុងសាល, កីឡាបាល់ទះឆ្នេរខ្សាច់, កីឡាចំបាប់, កីឡាចំបាប់កាច់ដៃ, កីឡាវាយកូនគោល, កីឡាលើកទម្ងន់សាច់ដុំ Bench Press និងកីឡាទាញសាច់ដុំ Push Pull…