ក្រសួងធនធានទឹក និងឧតុនិយម បានចេញសេចក្តីជូនដំណឹងដល់ពលរដ្ឋ ដែលរស់នៅតាមដងទន្លេមេគង្គផ្នែកខាងលើ ប្រុងប្រយ័ត្ននឹងកម្ពស់ទឹកទន្លេមេគង្គស្ទុះឡើង ដោយសារតែការធ្លាក់ភ្លៀងជាបន្តបន្ទាប់ច្រើនថ្ងៃមកនេះ។ ក្រសួងធនធានទឹកថ្លែងថា ទឹកជំនន់ទន្លេមេគង្គនឹងចាប់ផ្តើមកើតមាន ក្នុងសប្ដាហ៍ទៅមុខនេះ ខណៈពេលដែលមានឥទ្ធិពល នៃប្រព័ន្ធសម្ពាធទាប ITCZ ដែលបណ្តាលឱ្យនៅតំបន់ផ្ទៃរងទឹកភ្លៀង នៃទន្លេមេគង្គ ក្នុងប្រទេសថៃ ឡាវ និងប្រទេសកម្ពុជា មានភ្លៀងធ្លាក់ច្រើននៅក្នុងអាងទន្លមេគង្គ។ កម្ពស់ទឹកផ្នែកខាងលើដងទន្លេមេគង្គនឹងចាប់ផ្តើមកើតមានក្នុងរយៈពេលរវាងពី៣ទៅ៤ថ្ងៃខាងមុខនេះ ដូចជានៅខេត្តស្ទឹងត្រែង ទឹកនឹងអាចឡើងដល់កម្ពស់ចំនួន៧ម៉ែត្រ និង៦៥សង្ទីម៉ែត្រ, ខណៈខេត្តក្រចេះ ទឹកនឹងអាចឡើងដល់កម្ពស់១៦ម៉ែត្រ ៧០សង្ទីម៉ែត្រ និងខេត្តកំពង់ចាម ទឹកនឹងអាចឡើងដល់កម្ពស់ ៩ម៉ែត្រ ៩០សង្ទីម៉ែត្រ។ កម្ពស់ទឹកនេះ នៅមិនទាន់ដល់កម្រិតប្រកាសអាសន្ននោះទេ ប៉ុន្ដែតាមរយៈកម្ពស់ទឹកទាំងនេះ នឹងអាចឱ្យលិចតំបន់ទំនាបមួយចំនួន ដែលអមដងទន្លេ និងហូរចូលទៅតាមបណ្តាព្រែកមួយចំនួនថែមទៀត។ ក្រសួងធនធានទឹក និងឧតុនិយម បានដាស់តឿនដល់ប្រជាពលរដ្ឋទាំងអស់ ត្រូវបង្កើនការប្រុងប្រយ័ត្នខ្ពស់ ចំពោះករណីជំនន់ទឹកភ្លៀងនេះផងទៀត។

ចុងទំនប់បារាំងក្នុងក្រុងកំពង់ឆ្នាំង នៃខេត្តកំពង់ឆ្នាំង បានបាក់បណ្តាលឱ្យមានទឹកហៀរហូរជន់លិចថ្នល់។ អាជ្ញាធរបានបិទបណ្តោះអាសន្នការធ្វើចរាចណ៍លើកំណាត់ផ្លូវ ដែលលិចនៅថ្ងៃទី៣១កក្កដានេះ។ អប្សរាណិតរាយការណ៍

ខេត្តដែលមិនជាប់មាត់សមុទ្ទមួយចំនួនត្រូវគេរាយការណ៍ថា ក៏បានរងប៉ះពាល់នឹងជំនន់ទឹកភ្លៀងនាប៉ុន្មានថ្ងៃនេះផងដែរ។ នៅក្នុងខេត្តកំពង់ស្ពឺ យោងតាមរបាយការណ៍ស្នងការដ្ឋាននគរបាលខេត្ត គិតត្រឹមម៉ោង៣រសៀលថ្ងៃទី៣១កក្កដា ចំណុចដែលជន់លិចលើកំណាត់ផ្លូវខ្លះ លើជាតិលេខ៤ក្នុងខេត្ត បានស្រកទៅវិញ និងចរាចរណ៍បានប្រព្រឹត្តជាធម្មតា។ នៅចំណុចស្ពានអូរគគីរ នៃចំណុចគីឡូម៉ែត្រលេខ១០៦ និង១០៧ ទឹកភ្លៀងមិនប៉ះពាល់ដល់ការធ្វើចរាចរណ៍ទៀតឡើយ, ចំណែកចំណុចស្ទឹងស្រែខ្លុង នៃចំណុចគីឡូម៉ែត្រ៧៦ និង៧៧ លើផ្លូវជាតិលេខ៤នោះ ទឹកភ្លៀងធ្លាក់ខ្សោយ និងមិនបង្កការប៉ះពាល់ដល់ការធ្វើចរាចរណ៍ទេ។ ដោយឡែកផ្លូវលំមួយចំនួននៅក្នុង ឃុំត្រែងត្រយឹង, ឃុំយាយម៉ៅពេជ្រនិល, ឃុំដំបូករូង, ឃុំជាំសង្កែ, ឃុំចំបក់, ឃុំតាំងសំរោង, ឃុំព្រៃរំដួល, ឃុំតាំងស្យា នៃស្រុកភ្នំស្រួច ទឹកជំនន់បានធ្វើបង្កឱ្យមានការខូចខាតផ្លូវខ្លះប្រវែង៣០០ម៉ែត្រ និងផ្ទះប្រជាពលរដ្ឋរងប៉ះពាល់១៩១ គ្រួសារ, ប៉ះពាល់ស្រូវ៩៥ហិកតា និងដំណាំរួមផ្សំ២២ហិកតា។ សេចក្តីរាយការណ៍បានបង្ហាញថា ទឹកបានហូរធ្លាក់ចុះមកខាងក្រោមសម្តៅមកក្រុងច្បារមន, មកស្រុកសំរោងទង និងបន្តធ្លាក់មកឃុំជាប់ដែនសណ្តរស្ទឹងព្រែកត្នោត ឆ្ពោះមកកាន់ខេត្តកណ្តាល។ នៅក្នុងខេត្តព្រះវិហារនោះវិញ ទឹកភ្លៀងបានស្រកវិញហើយនៅថ្ងៃទី៣១កក្កដានេះ បន្ទាប់ពីមានភ្លៀងមួយយប់ទល់ភ្លឺនៅចំណុចមុំបី នៃព្រំដែនកម្ពុជាថៃ និងឡាវ បានរងដោយការធ្លាក់ភ្លៀងកម្រិត១៥០មីលីម៉ែត្រ។ ទឹកភ្លៀងបានលិចផ្លូវគ្រួសក្រហមនៅក្នុងភូមិសែនរុងរឿង និងបានលិចផ្ទះពលរដ្ឋជាច្រើន និងមិនទាន់មានសេចក្តីរាយការណ៍ទំហំខូចខាតនៅឡើយទេ។

ខេត្តដែលស្ថិតជាប់នឹងមាត់សមុទ្ទដូចជាខេត្តកំពត ខេត្តកោះកុង ខេត្តព្រះសីហនុ និងខេត្តកែប បានរងនឹងការវាយលុកដោយជំនន់ទឹកភ្លៀង ដែលកន្លែងខ្លះបង្កការស្លាប់ និងបាត់ខ្លួនមនុស្សផងដែរ។ អប្សរាណិតធ្វើសេចក្តីរាយការណ៍

ក្រុមប្រឹក្សាធម្មនុញ្ញបានប្រកាសតម្កល់សេចក្តីសម្រេចរបស់គណៈកម្មាធិការជាតិរៀបចំការបោះឆ្នោត ជុំវិញការផ្តន្ទាទោសលើករណីបុគ្គលញុះញង់គូសបំផ្លាញសន្លឹកឆ្នោត។ ការប្រកាសតម្កល់រក្សាសេចក្តីសម្រេចនេះ បានធ្វើឡើងនៅថ្ងៃទី៣១ កក្កដា ឆ្នាំ២០២៣ ដោយប្រធានក្រុមប្រឹក្សាធម្មនុញ្ញ កិត្តិនីតិកោសលបណ្ឌិត អ៊ឹម ឈុនលឹម ក្រោយសវនាការលើបណ្តឹងតវ៉ាជំទាស់ ចំនួន២សំណុំរឿង ទៅលើសេចក្តីសម្រេចរបស់ គ.ជ.ប ពាក់ព័ន្ធនឹងសកម្មភាពណែនាំ និងញុះញង់ឲ្យអ្នកបោះឆ្នោតគូសបំផ្លាញ ឬធ្វើឲ្យខូចសន្លឹកឆ្នោត អំឡុងការបោះឆ្នោតជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣។ យោងតាមច្បាប់បន្ទាប់ពី គ.ជ.ប ចេញសេចក្តីសម្រេចរបស់ខ្លួន, តំណាងដើមចោទ ឬចុងចោទអាចបន្តប្តឹងជំទាស់ទៅក្រុមប្រឹក្សាធម្មនុញ្ញ ក្នុងរយៈពេល៧២ម៉ោង។ ការដោះស្រាយបណ្តឹងរួចរាល់នេះ គឺជាការបើកផ្លូវមួយសម្រាប់ គ.ជ.ប ដែលគ្រោងនឹងធ្វើការប្រកាសលទ្ធផលបណ្តោះអាសន្នការបោះឆ្នោតសកល នៅថ្ងៃទី៥ សីហា និងលទ្ធផលជាផ្លូវការ ដែលនឹងប្រកាសនាថ្ងៃទី៩ សីហាខាងមុខនេះ។

មានប្រទេសតែ ៤ ប៉ុណ្ណោះនៅអាស៊ាន ក្នុងរយៈពេល ២៤ម៉ោងចុងក្រោយនេះ ដែលមានករណីឆ្លង និងស្លាប់ ដោយសារកូវីដ១៩។ ដោយឡែកប្រទេសកម្ពុជា នៅថ្ងៃនេះ មិនមានរកឃើញករណីឆ្លងថ្មីឡើយ ដែលនាំឲ្យការមិនមានអ្នកឆ្លងសោះមានរយៈពេល ១០ថ្ងៃបន្តបន្ទាប់ជាប់គ្នាមកហើយ។ តួលេខឆ្លងថ្មីកូវីដ១៩ ក្នុងប្រទេសអាស៊ាននៃរយៈពេល ២៤ម៉ោងចុងក្រោយនេះ មានចំនួន ២៦៩ករណី ដែលជាតួលេខឆ្លងបន្តកើនឡើងថែមទៀតចំនួន ១០ករណី បើប្រៀបធៀបការឆ្លងកាលពីថ្ងៃម្សិលមិញ។ ការឆ្លងក្នុងរយៈពេល ២៤ម៉ោងកន្លងមកនេះ បានកើតលើប្រទេសចំនួន ៤នៅអាស៊ាន រួមមានប្រទេសហ្វីលីពីន, វៀតណាម, មីយ៉ាន់ម៉ា និងប្រទេសឡាវ។ ប្រទេសហ្វីលីពីន គឺជាប្រទេសដែលមានតួលេខឆ្លងច្រើនជាងគេ ដែលមានការឆ្លងចំនួន ២២៣ករណី។ តួលេខឆ្លងតិចជាងគេ គឺប្រទេសឡាវ ដែលមានការឆ្លងចំនួន ៤ករណីដូចគ្នា។ ប្រទេសឥណ្ឌូនេស៊ី, ម៉ាឡេស៊ី, ថៃ, សឹង្ហបុរី, កម្ពុជា និងប្រទេសប្រុយណេ គឺជាប្រទេសដែលគ្មានសេចក្តីរាយការណ៍ជុំវិញតួលេខឆ្លង និងស្លាប់ឡើយ ក្នុងរយៈពេល ២៤ម៉ោងចុងក្រោយនេះ។ ការស្លាប់ដោយសារកូវីដ១៩ នៅអាស៊ាននារយៈពេល២៤ម៉ោងចុងក្រោយនេះ មាន ៩នាក់ ដែលជាពលរដ្ឋនៃប្រទេសហ្វីលីពីន។ គិតសរុបរួមនៃប្រទេសទាំង១០ អាស៊ាននាពេលនេះ ការឆ្លងសរុបមានចំនួន…

ភ្លៀងនៅតែបន្តធ្លាក់ក្នុងខេត្តកំពង់ឆ្នាំងនៅថ្ងៃសុក្រនេះទៀត ដោយធ្វើឱ្យផ្លូវមួយចំនួន ក្នុងស្រុករលាប្អៀរបានលិចលង់។ អប្សរាណិតរាយការណ៍

មន្ទីរអភិវឌ្ឍន៍ជនបទខេត្តមណ្ឌលគិរី និងក្រុមហ៊ុនរ៉ែមាសអូរខ្វាវ ដែលធំជាងគេនៅកម្ពុជា បានសហការគ្នាធ្វើការជួសជុលផ្លូវលំមួយខ្សែ ដែលរងការខូចខាតដោយសារជំនន់ទឹកភ្លៀង។ សេចក្តីរាយការណ៍បានបង្ហាញថាខេត្តមណ្ឌលគិរី ក្នុងរយៈពេល៧ថ្ងៃជាប់គ្នាមកនេះ បានរងនឹងការធ្លាក់ភ្លៀងគ្មានពេលលោះ ដោយសារតែឥទ្ធិពលព្យុះបោកបក់ ក្នុងប្រទេសវៀតណាម។ ផ្លូវមួយខ្សែប្រវែង ៦៥គឺឡូម៉ែត្រភ្ជាប់ពីឃុំចំនួន៤ គឺឃុំពូត្រុំ, ឃុំរម្យនា, ឃុំមេម៉ង និងឃុំចុងផ្លាស់ បានរងនឹងការខូចខាត ដែលជំរុញឱ្យមន្ទីរអភិវឌ្ឍន៍ជនបទខេត្តមណ្ឌលគិរី និងក្រុមហ៊ុនរ៉ែមាសអូរខ្វាវ សហការគ្នាធ្វើការជួសជុល បើទោះបីជាមេឃបន្តការធ្លាក់ភ្លៀងយ៉ាងណាក៏ដោយ។ ការខូចខាតផ្លូវដ៏សំខាន់នេះ ត្រូវគេរាយការណ៍ថាបានធ្វើឱ្យមានការស្ទះចរាចរណ៍ ផ្លូវធ្វើដំណើរពីមូលដ្ឋានទៅកាន់ទីរួមខេត្ត។ ក្រុមជំនាញជួសជុលផ្លូវបានបញ្ជាក់ថា ផ្លូវមួយខ្សែនេះនឹងត្រូវចាក់ថ្មភ្នំបង្ហាប់តាមកន្លែងខូចខាតជាច្រើននិងរំពឹងថារយៈពេល ៣ទៅ៤ថ្ងៃទៀតប៉ុណ្ណោះ ផ្លូវនេះនឹងចរាចរណ៍បានធម្មតាវិញ។ កម្ពុជាក្នុងសប្តាហ៍នេះ បានទទួលរងនូវឥទ្ធិពលពីប្រព័ន្ធសម្ពាធទាប អូសបន្លាយលើអាងទន្លេមេគង្គភាគខាងលើកាត់ប្រទេសថៃ ឡាវ និងភាគកណ្តាលវៀតណាម ជាមួយនិងខ្យល់មូសុងនិរតីក្នុងកម្រិតមធ្យមផង និងប្រឈមឥទ្ធិពលព្យុះទី៥ ឈ្មោះ ដុក ស៊ូរី ដែលកំពុងបោកបក់ ទៅរកទិសដៅចុងក្រោយរបស់ខ្លួននៅភាគអាគ្នេយ៍ នៃប្រទេសចិន បន្ទាប់ពីបានសម្លាប់មនុស្ស ៣៩នាក់ក្នុងប្រទេសហ្វីលីពីន និងបានផ្តាច់ភ្លើងអគ្គិសនី ធ្វើឱ្យពលរដ្ឋចិនតៃវ៉ាន់ជិត ៥ម៉ឺននាក់ បានប្រឈមនឹងការគ្មានភ្លើង។