ក្រសួងមហាផ្ទៃ បានអនុញ្ញាតឱ្យសមាគមគ្រូបង្រៀនកម្ពុជាឯករាជ្យធ្វើការហែរធម្មយាត្រា ពីភ្នំពេញទៅខេត្តពោធិ៍សាត់ ដោយមានសមាជិកចូលរួម៥០នាក់។ ការអនុញ្ញាតនេះ បានធ្វើតាមលិខិតរបស់ក្រសួងមហាផ្ទៃថ្ងៃទី២៦មករាឆ្នាំ២០២៣តបតាមសំណើរបស់ប្រធានសមាគមគ្រូបង្រៀនកម្ពុជាឯករាជ្យលោកស្រី អ៊ុក ឆាយ៉ាវី។ យោងតាមគំរោង, ការហែរធម្មយាត្រា ដែលមនុស្សខ្លះគឺជាមនុស្សដែលមានជំនឿលើសាសនាគ្រឹស្ត នឹងគ្រោងធ្វើដំណើរចាកចេញនៅថ្ងៃទី១ ខែកុម្ភៈ ឆ្នាំ២០២៣ ពីរាជធានីភ្នំពេញ ឆ្ពោះទៅខេត្តពោធិ៍សាត់ ដោយឆ្លងកាត់ខេត្តកណ្តាល ខេត្តកំពង់ស្ពឺ និងខេត្តកំពង់ឆ្នាំង។ ក្រសួងមហាផ្ទៃបានស្នើឱ្យប្រធានសមាគមគ្រូបង្រៀនកម្ពុជាឯករាជ្យនោះ ត្រូវធ្វើការសម្របសម្រួល និងសហការជាមួយរដ្ឋបាលរាជធានី និងខេត្តពាក់ព័ន្ធ ដើម្បីកំណត់អំពីទីតាំងជួបជុំ, តម្រាយផ្លូវធ្វើដំណើរឆ្លងកាត់ និងទីកន្លែងបញ្ចប់ការដង្ហែក្បួនធម្មយាត្រា ដើម្បីធានាបាននូវសុវត្ថិភាពចរាចរណ៍តាមដងផ្លូវ និងសណ្តាប់ធ្នាប់សាធារណៈ ព្រមទាំងត្រូវគោរព និងអនុវត្តនូវវិធានសុខាភិបាល ដែលបានដាក់ចេញដោយអាជ្ញាធរមានសមត្ថកិច្ចក្នុងការប្រយុទ្ធប្រឆាំង នឹងជំងឺឆ្លងនានាផងដែរ។

ឆ្នាំ២០២៣ គឺជាឆ្នាំនៃការបោះឆ្នោតសកលសម្រាប់នីតិកាលពី៧នៃរដ្ឋសភា។ ឆ្នាំ២០២៣នេះ ក៏ជាឆ្នាំចុងក្រោយនៃការអនុវត្តកម្មវិធីនយោបាយរបស់រាជរដ្ឋាភិបាលសម្រាប់នីតិកាលពី៦ នៃរដ្ឋសភាផងដែរ។ តើរយៈពេល៥ឆ្នាំកន្លងមកនេះ ការអនុវត្តគោលនយោបាយរបស់រាជរដ្ឋាភិបាល ក្រោមការកាច់ចង្កូតរបស់គណបក្សប្រជាជនកម្ពុជាបានទទួលលទ្ធផលអ្វីខ្លះ? អប្សរាណិតមានបទវិចារណកថាមួយក្រោមចំណងជើងថា «ជោគជ័យនៃការអនុវត្តកម្មវិធី នយោបាយរបស់រាជរដ្ឋាភិបាលសម្រាប់នីតិកាលទី៦នៃរដ្ឋសភា»

មេបញ្ជាការកងទ័ពជើងគោកលោកឧត្តមសេនីយ៍ឯក ហ៊ុន ម៉ាណែត បានអញ្ជើញជាអធិបតី ជាមួយអនុប្រធានទី១នៃអាជ្ញាធរមីន លោក លី ធុជ ក្នុងពិធីចុះហត្ថលេខាលើកិច្ចសន្យា ស្តីពីការបោសសម្អាតមីនគាំទ្រពី “មូលនិធិកម្ពុជា គ្មានមីន ឆ្នាំ២០២៥”។ ពិធីចុះហត្ថលេខាលើកិច្ចសន្យានេះបានធ្វើឡើងនាព្រឹកថ្ងៃទី២៦ ខែមករា ឆ្នាំ២០២៣ នៅទីស្នាក់ការអាជ្ញាធរមីន។ ពិធីចុះហត្ថលេខានេះ គឺរវាងអាជ្ញាធរមីន ជាមួយនឹងបញ្ជាការដ្ឋានកងទ័ពជើងគោក, មជ្ឈមណ្ឌលសកម្មភាពកំចាត់មីនកម្ពុជាស៊ីម៉ាក់, និងមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាពបោសសម្អាតមីន និងកាកសំណល់សង្រ្គាម។ មន្ត្រីរៀបចំបានថ្លែងថាគោលបំណង នៃការចុះហត្ថលេខា គឺដើម្បីធ្វើការបោសសម្អាតមីនក្នុងទំហំផ្ទៃដីសរុបប្រមាណ ១៨០លាន២៧ម៉ឺន៨ពាន់៨១៧ម៉ែត្រក្រឡា ដោយប្រើប្រាស់ថវិកាសរុបចំនួន ៣០ លានដុល្លារអាមេរិក តាមរយៈ “មូលនិធិកម្ពុជា គ្មានមីន ឆ្នាំ២០២៥” ។ យោងតាមកិច្ចសន្យា ចុះហត្ថលេខា កងទ័ពជើងគោកនៃកងយោធពលខេមរភូមិន្ទ នឹងធ្វើការបោសសម្អាតលើផ្ទៃ ដីប្រមាណ៤៦លាន៨៤ម៉ឺន៣ពាន់៧៤០ ម៉ែត្រក្រឡានៅក្នុងស្រុកភ្នំស្រួច ខេត្តកំពង់ស្ពឺ, នៅស្រុកស្វាយចេក ខេត្តបន្ទាយមានជ័យ និងនៅក្នុងក្រុងសំរោង ខេត្តឧត្តរមានជ័យ។ ចំណែកមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាពបោសសម្អាតមីន និងកាកសំណល់សង្រ្គាម នឹងធ្វើការបោសសម្អាតមីនលើផ្ទៃដីប្រមាណ ២៧លាន១១ម៉ឺន៦រយ៩៧ ម៉ែត្រក្រឡា នៅក្នុងស្រុកស្នួល ខេត្តក្រចេះ, ស្រុកគិរីសាគរ និងស្រុកកោះកុង…

សម្តេចតេជោ ហ៊ុន សែន បានថ្លែងថាកម្ពុជាបើកចំហរនៅក្នុងការទទួលបណ្តុះបណ្តាលលើ វិស័យដោះមីនដល់គ្រប់ប្រទេសទាំងអស់លើសកលលោក មិនមែនមានត្រឹមតែប្រទេសអ៊ុយក្រែននោះទេ។ ប្រសាសន៍ដែលបានបញ្ជាក់នៅថ្ងៃទី២៦ មករា ឆ្នាំ២០២៣ គឺជាការបកស្រាយមួយ តបចំពោះការផ្សាយព័ត៌មានមួយរបស់ Channel Telegram ដេម៉ូក្រាហ្វីយ៉ា យូប៉ាឡា «Demografiya upala» ដែលនិយាយថាកម្ពុជាបានគាំទ្រផ្នែកយោធាដល់ប្រទេសអ៊ុយក្រែន។ ការផ្សាយរបស់កាសែតបរទេសនេះ ត្រូវគេរាយការណ៍ថាបានផ្អែកលើអ្វីដែលកម្ពុជាបានជួយ បណ្តុះបណ្តាលផ្នែកបច្ចេកទេសដោះគ្រាប់មីនដល់អ៊ុយក្រែន។ សម្តេចតេជោ ហ៊ុន សែន បានថ្លែងបញ្ជាក់ថាការជួយបណ្តុះបណ្តាលរបស់កម្ពុជាលើផ្នែកដោះមីនដល់មន្ត្រីអ៊ុយក្រែនមិនមែនមានន័យថាកម្ពុជាបានគាំទ្រប្រទេសអ៊ុយក្រែនលើជំនួយផ្នែកយោធានោះឡើយ។ ក្រសួងការបរទេសកម្ពុជាក្នុងសប្តាហ៍នេះ បានស្នើឱ្យ Channel Telegram ដេម៉ូក្រាហ្វីយ៉ា យូប៉ាឡា ត្រូវកែតម្រូវព័ត៌មានរបស់ខ្លួនសាឡើងវិញ ដោយសារការផ្សាយនោះមិនត្រឹមតែមិនពិតប៉ុណ្ណោះទេ ប៉ុន្តែថែមទាំងបង្កភាពប៉ះពាល់ដល់ឈ្មោះ នៃប្រទេសកម្ពុជា ដែលជាប្រទេសស្រឡាញ់សន្តិភាព និងដែលតែងប្រកាន់ខ្ជាប់ចំពោះគោលនយោបាយបរទេសអព្យាក្រឹត្យដូចបានចែងក្នុងរដ្ឋធម្មនុញ្ញរបស់ខ្លួន។

គណបក្សប្រជាជនកម្ពុជាដែលកំពុងកាន់អំណាចត្រៀមនឹងបើក «មហាសន្និបាតតំណាងទូទាំងប្រទេស» រយៈពេល២ថ្ងៃ នៃថ្ងៃចុងសប្តាហ៍នេះ ដើម្បីធ្វើការជជែករៀបចំគោលនយោបាយសម្រាប់រយៈពេល៥ឆ្នាំ២០២៣ និង២០២៨។ «មហាសន្និបាតទូទាំងប្រទេស» នៅថ្ងៃសៅរ៍ និងថ្ងៃអាទិត្យខាងមុខនេះ បានធ្វើឡើងសម្រាប់ត្រៀមទុកជាមុនខណៈឆ្នាំ២០២៣នេះ គឺជាឆ្នាំចុងក្រោយហើយ នៃការអនុវត្តកម្មវិធីនយោបាយរបស់រាជរដ្ឋាភិបាលសម្រាប់នីតិកាលពី៦ នៃរដ្ឋសភាផងដែរ។ សម្តេចតេជោ ហ៊ុន សែន បានមានប្រសាសន៍នៅថ្ងៃទី២៦ មករា ឆ្នាំ២០២៣ ជុំវិញការត្រៀមបើកមហាសន្និបាតរយៈពេល២ថ្ងៃ។ គណបក្សប្រជាជនកម្ពុជា បានកាន់អំណាចបន្តបន្ទាប់ជាប់គ្នារយៈពេល៦អាណ្ណត្តិមកហើយ។ ក្នុងអាណ្ណត្តិទី៦នេះ បើទោះបីជាសភាពការណ៍ពិភពលោកបានប្រឈមនឹងភាពតានតឹង ដោយសារវិបត្តិនៃសង្គ្រាមអ៊ុយក្រែន, ភាពប្រឈមមុខរវាងប្រទេសមហាអំណាចដោយសារ មហិច្ឆិតាប្រជែងភូមិសាស្ត្រនយោបាយក្នុងតំបន់ និងវិបត្តិឆ្លងជម្ងឺកូវីដ១៩ក៏ដោយ, កម្ពុជា នៅតែបន្តភាពរឹងមាំរបស់ខ្លួនជាដដែល។ កម្ពុជាមុនការឈានចូលមកដល់នៃវិបត្តិឆ្លងកូវីដ-១៩ សម្រេចបានកំណើនសេដ្ឋកិច្ច ៧,៥% នៅឆ្នាំ២០១៨ និង៧,១% នៅឆ្នាំ២០១៩។

ក្រសួងបរិស្ថាន និងអង្គការដៃគូបានកំណត់យកថ្ងៃទី៣ខែមីនាក្នុង «យុទ្ធនាការអន្ទាក់សូន្យ នៅក្នុងតំបន់ការពារធម្មជាតិកម្ពុជា» នៅខេត្តចំនួន៥ ។ ការកំណត់នេះបានធ្វើឡើង ឱកាសកិច្ចប្រជុំមួយនារសៀលថ្ងៃទី២៥ ខែមករា ឆ្នាំ២០២៣ ដឹកនាំដោយរដ្ឋលេខាធិការក្រសួងបរិស្ថានលោក នេត្រ ភក្ត្រា ដោយមានការចូលរួមមន្ត្រីពាក់ព័ន្ធ និងពីតំណាងអង្គការដៃគូ នានានៅក្នុងក្រសួងបរិស្ថាន។ ខេត្តទាំង៥ដែលបានកំណត់ក្នុងការធ្វើ «យុទ្ធនាការអន្ទាក់សូន្យនៅក្នុងតំបន់ការពារធម្មជាតិកម្ពុជា» ដំណាក់កាលទី២នោះ រួមមាន ខេត្តកំពង់ស្ពឺ ខេត្តពោធិ៍សាត់ ខេត្តកោះកុង ខេត្តបាត់ដំបង និងប៉ៃលិន។ យុទ្ធនាការនោះ នឹងមានរយៈពេល ៥ខែគឺចាប់ពីខែមីនា ដល់ខែកក្កដា ឆ្នាំ២០២៣។ លោក នេត្រ ភក្ត្រា បានផ្តល់បច្ចុប្បន្នភាពថា ក្នុងឆ្នាំ២០២២អន្ទាក់ចំនួន ៣ម៉ឺន៤ពាន់អន្ទាក់ ត្រូវបានដោះចេញពីតំបន់ការពារធម្មជាតិកម្ពុជា ខណៈអន្ទាក់ដែលគេបានដោះក្នុងឆ្នាំ២០២១ មានចំនួនច្រើនដល់ទៅ ៦ម៉ឺន១ពាន់៦១១ អន្ទាក់ ។ លោករដ្ឋលេខាធិការក្រសួងបរិស្ថាន បានគូសបញ្ជាក់ថា៖ «លទ្ធផលនេះជាសូចនាករមួយ ដែលអាចបញ្ជាក់បានអំពីហេតុប៉ះពាល់ដោយផ្ទាល់ចេញពីការអនុវត្តយុទ្ធនាការដ៏មានសារៈសំខាន់ក្នុងការផ្សព្វផ្សាយពីផលវិបាកនៃការដាក់អន្ទាក់, ការបរិភោគ និងការជួញដូរសាច់សត្វ ព្រៃដើម្បីផ្លាស់ប្តូរឥរិយាបថរបស់ប្រជាពលរដ្ឋឱ្យបញ្ឈប់ការដាក់អន្ទាក់ បញ្ឈប់ការបរិភោគ និងបញ្ឈប់ជួញដូរសត្វព្រៃ ដែលទង្វើទាំងនេះសុទ្ធសឹងជាទង្វើដែលបង្កមហន្តរាយដល់ មនុស្សនិងសត្វព្រៃគ្រប់ប្រភេទ»។ វិបត្តិអន្ទាក់មិនមែនកើតឡើងតែក្នុងប្រទេសកម្ពុជាទេ។ ផ្អែកតាមរបាយការណ៍ឆ្នាំ២០២០…

ការប្រកួតកីឡាស៊ីហ្គេមលើកទី៣២ នឹងឈានមកដល់វេលា៩៩ថ្ងៃទៅមុខទៀតនេះដែលនឹង ក្លាយជាព្រឹត្តិការណ៍ប្រវត្តិសាស្ត្រលើកដំបូងរបស់កម្ពុជាក្នុងរយៈពេល៦៤ឆ្នាំកន្លងមកនេះ។ ស៊ីហ្គេមមានប្រភពដំបូងមកពីកីឡាឧបទ្វីបអាស៊ីអាគ្នេយ៍ South East Asian Peninsular ដែលពេលនោះរួមមានប្រទេស៦រួមទាំងកម្ពុជាផងដែរដែលជាស្ថាបនិក។ ប្រទេសទាំង៦រួម មីយ៉ាន់ម៉ា, កម្ពុជា, ឡាវ, ម៉ាឡេស៊ី, ថៃ និងវៀតណាម បានយល់ព្រមរៀបចំឱ្យមានកីឡាជាអន្តរជាតិ ក្នុងតំបន់នេះកើតឡើងក្នុងរវាង២ឆ្នាំម្តង ដោយចាប់ផ្តើមដំបូងក្នុងខែធ្នូឆ្នាំ១៩៥៩។ សម្តេចតេជោ ហ៊ុន សែន បានថ្លែងថា កម្ពុជាបានរង់ចាំប្រមាណ៦៤ឆ្នាំមកហើយចាប់តាំងពីថ្ងៃប្រកួតដំបូងនោះមក ដែលកម្ពុជាទើបបានក្លាយជាប្រទេសនៃម្ចាស់ផ្ទះជាលើកដំបូង។ កម្ពុជាដែលជាសមាជិកអាស៊ាន ជាច្រើនដងរួចមកហើយ បានបោះបង់សិទ្ធិ ធ្វើជាម្ចាស់ផ្ទះ នៃការរៀបចំកីឡាស៊ីហ្គេមនេះ ដោយសារតែកម្ពុជាមិនទាន់មានលទ្ធភាព គ្រប់គ្រាន់នៅក្នុង ការត្រៀមរៀបចំលក្ខណៈធ្វើការប្រកួត និងម្យ៉ាងទៀតដោយសារ តែកម្ពុជាមានតម្រូវការសន្សំ ថវិកាដើម្បីផ្តោតលើការអភិវឌ្ឍន៍លើវិស័យចាំបាច់ជាបន្ទាន់ជាងនេះ បន្ទាប់ពីប្រទេសអស់ សង្គ្រាមស៊ីវិលនោះរួចមក។ យោងតាមកម្មវិធីដែលរៀបចំកីឡាស៊ីហ្គេមលើកទី៣២ ជាប្រវត្តិសាស្ត្ររបស់កម្ពុជា នឹងប្រព្រឹត្តទៅរវាងពីថ្ងៃទី៥ ខែឧសភា ដល់ថ្ងៃទី១៧ ខែឧសភា ឆ្នាំ២០២៣ ។ បន្ទាប់ពីព្រឹត្តិការណ៍កីឡាស៊ីហ្គេម, កម្ពុជានឹងបន្តការប្រកូតកីឡា អាស៊ានប៉ារ៉ាហ្គេមលើកទី១២ថែមទៀតរវាង ពីថ្ងៃទី៣ ដល់ថ្ងៃទី៩ ខែមិថុនា ឆ្នាំ២០២៣។

សម្តេចតេជោ ហ៊ុន សែន បានថ្លែងថាភាពរីកចំរើនយឺតរបស់កម្ពុជា បើប្រៀបធៀបនឹងប្រទេសដទៃមួយចំនួន គឺដោយសារតែកត្តាធនធានមនុស្សមានកម្រិត, ហើយការបំផ្លាញធនធានមនុស្សនៅក្នុងប្រទេសកម្ពុជានេះ បានចាប់ផ្តើមពីការធ្វើរដ្ឋប្រហារថ្ងៃទី១៨ មីនា ឆ្នាំ១៩៧០ ទម្លាក់អតីតព្រះប្រមុខរដ្ឋសម្តេចព្រះនរោត្តមសីហនុ។ សម្តេចតេជោបានថ្លែងនៅថ្ងៃទី២៦ មករា ឆ្នាំ២០២៣ ក្នុងពិធីប្រគល់សញ្ញាបត្រជូននិស្សិតសាកលវិទ្យាល័យវេស្ទើន បង្ហាញថាកម្ពុជា បច្ចុប្បន្នធនធានមនុស្សនៅមានកម្រិតដែលមិនទាន់អាចប្រើប្រាស់អស់លទ្ធភាពក្នុងការទាញ យកភោគទ្រព្យជាតិទាំងអស់ដែលមានក្នុងប្រទេសកម្ពុជានេះឡើយ។ សម្តេចបានបន្ទោសលើទង្វើរដ្ឋប្រហារថ្ងៃទី១៨ មករា ឆ្នាំ១៩៧០ ដែលបានធ្វើឱ្យដំណើរអភិវឌ្ឍន៍ របស់កម្ពុជាដើរយឺតជាងប្រទេសដទៃដែលគ្មានប្រវត្តិសង្គ្រាម។ សង្គ្រាមដែលផ្តើមចេញពីរដ្ឋប្រហារថ្ងៃទី១៨ មីនា ឆ្នាំ១៩៧០នោះហើយ បាននាំកម្ពុជាធ្លាក់ចូលក្នុងរណ្តៅ នៃរបបកាប់សម្លាប់ខ្មែរក្រហមប៉ុលពត រយៈពេល៣ឆ្នាំ៨ខែ២០ថ្ងៃ។ ក្នុងរបបខ្មែរក្រហមប៉ុលពតនោះ, និស្សិត, បញ្ញវ័ន្ត, សាស្ត្រាចារ្យ បណ្តាអ្នករៀនសូត្រចេះដឹងខ្ពង់ខ្ពស់ គឺជាមុខសញ្ញាកម្ទេចរបស់អង្គការស្លៀកខោអាវខ្មៅ នៃរបបប៉ុលពត។ មនុស្សស្លាប់ច្រើនលាននាក់ ភាគច្រើនគឺជានិស្សិតនិងបញ្ញវ័ន្ត, អតីតមន្ត្រីរដ្ឋការនៃរបបសាធារណរដ្ឋខ្មែរលោកលន់នល់។ សម្តេចតេជោបានថ្លែងថានោះហើយគឺជាកំហុសនយោបាយដែលធ្វើឱ្យកម្ពុជាបានក្លាយជាប្រទេសដែលមានការរីកចំរើនយឺតយ៉ាវជាងគេ។ សង្គ្រាមស៊ីវិលក្នុងប្រទេសកម្ពុជារយៈពេល២៨ឆ្នាំ ត្រូវបានពន្លត់អស់ទាំងស្រុងក្រោមយុទ្ធសាស្ត្រឌីហ្វីដ នៃនយោបាយឈ្នះឈ្នះ របស់សម្តេចតេជោ ហ៊ុន សែន។ ធនធានមនុស្សរបស់កម្ពុជាទើបតែមានខ្លះសាឡើងវិញ បន្ទាប់ពីប្រទេសអស់សង្គ្រាមជាមួយការជម្រុញ និងកែទម្រង់លើវិស័យសិក្សាធិការ ក្រោមគោលនយោបាយដឹកនាំរបស់រាជរដ្ឋាភិបាល ដឹកនាំដោយគណបក្សប្រជាជនកម្ពុជា ក្នុងសម័យមានសន្តិភាពពិតប្រាកដនេះទេ។

តួលេខឆ្លងថ្មីកូវីដ១៩ ក្នុងប្រទេសអាស៊ាននៃរយៈពេល ២៤ម៉ោងចុងក្រោយនេះ បានកើនឡើងចំនួន ១៣ករណី បើប្រៀបធៀបនឹងតួលេខឆ្លងកាលពីម្សិលមិញ ។ តួលេខឆ្លងកូវីដ១៩ នៅអាស៊ាន បើទោះបីជាថ្ងៃនេះ បានកើនច្រើនជាងម្សិលមិញបន្តិចមែន ប៉ុន្តែក្នុងរយៈពេល ២ថ្ងៃចុងក្រោយនេះ បានធ្លាក់ចុះច្រើនគួរឲ្យកត់សម្គាល់ ។ តួលេខឆ្លងប្រចាំថ្ងៃអាស៊ានមុននេះ ធ្លាប់តែស្ថិតនៅចំនួន ៤ខ្ទង់ ពេលនេះបានមកនៅត្រឹមតែ ៣ខ្ទង់ប៉ុណ្ណោះ ។ តួលេខឆ្លងថ្មីកូវីដ១៩ នៅអាស៊ានរយៈពេល ២៤ម៉ោងចុងក្រោយនេះ មានចំនួនតែ ៥៧៧ ករណីប៉ុណ្ណោះ ។ ការឆ្លងថ្ងៃនេះ បានកើតលើប្រទេសចំនួន៨ នៅអាស៊ាន រួមមានប្រទេស ឥណ្ឌូនេស៊ី, ម៉ាឡេស៊ី, វៀតណាម, មីយ៉ាន់ម៉ា, សឹង្ហបុរី, ហ្វីលីពីន, កម្ពុជា និងប្រទេសឡាវ ។ ប្រទេសឥណ្ឌូនេស៊ី គឺជាប្រទេសដែលមានតួលេខឆ្លងច្រើនជាងគេ ដែលមានចំនួន ២១៨ ករណី ។ តួលេខឆ្លងតិចជាងគេ គឺប្រទេសកម្ពុជា ដែលមានចំនួនឆ្លងតែ ២ករណីប៉ុណ្ណោះ ។ ប្រទេសថៃ និងប្រទេសប្រុយណេ គឺជាប្រទេសដែលគ្មានសេចក្តីរាយការណ៍ជុំវិញតួលេខឆ្លង…