កងកម្លាំងមួកខៀវកម្ពុជាចំនួន២កងពីប្រទេសម៉ាលី បានធ្វើមាតុភូមិនិវត្តន៍មកវិញហើយ ក្រោយការប្តូរវេនរបស់កម្លាំងថ្មី។ ពិធីទទួលកងកម្លាំងមួកខៀវនេះ បានធ្វើឡើងនៅព្រឹកថ្ងៃទី៨ ខែធ្នូ ឆ្នាំ២០២២នេះ ក្រោមអធិបតីភាពនាយឧត្តមសេនីយ៍ សែម សុវណ្ណនី នៅអាកាសយានដ្ឋានអន្តរជាតិភ្នំពេញ។ កងកម្លាំងមួកខៀវទាំង២កងដែលវិលត្រឡប់មកវិញនេះ រួមមាន កងកម្លាំងវិស្វកម្មព្រលានយន្តហោះ និងកងកម្ទេចគ្រឿងផ្ទុះ។ នាយឧត្តមសេនីយ៍ សែម សុវណ្ណនី ដែលជាអគ្គនាយកមជ្ឈមណ្ឌលរក្សាសន្តិភាព បានថ្លែងក្នុងពិធីថា កងកម្លាំងទាំង២កងនេះ «បានចូលរួមអនុវត្តបំពេញភារកិច្ចប្រកបដោយផ្លែផ្កា ទទួលបានជោគជ័យដ៏ត្រចះត្រចង់ ព្រមជាមួយនឹងលទ្ធផលគួរជាទីមោទនៈថ្មីៗបន្ថែមទៀត»។ លោកបញ្ជាក់ថា « កងកម្ទេចគ្រាប់ មិនទាន់ផ្ទុះ និងកងវិស្វកម្មព្រលានយន្តហោះរបស់កម្ពុជា បានបំពេញការងារមិនខ្លាចនឿយហត់ ក្រោមព្យុះខ្សាច់សាហារ៉ា, អាកាសធាតុក្តៅហួតហែង ដែលមានសីតុណ្ហភាពរហូតដល់ ៥៣អង្សាសេ»។ មិនមានការបញ្ជាក់ជុំវិញកងកម្លាំងមួកខៀវបីនាក់ ដែលបានរងរបួសក្នុងបេសកកកម្មនៅក្នុងប្រទេសម៉ាលីថ្មីៗកន្លងមកនេះឡើយ។ កម្ពុជាគិតចាប់តាំងពីឆ្នាំ២០០៦ រហូតមកដល់ពេលនេះ បានបញ្ជូនកងកម្លាំងរក្សាសន្តិភាព ចំនួន៨ពាន់៤៧៥នាក់ ទៅបំពេញបេសកកម្មមនុស្សធម៌ ជាមួយអង្គការសហប្រជាជាតិ នៅក្នុងប្រទេសចំនួន៩ រួមមាន៖ ស៊ូដង់ ស៊ូដង់ខាងត្បូង, ឆាដ, លីបង់, ស៊ីរី, ម៉ាលី, អាហ្វ្រិកកណ្តាល, សាយប្រឺស និងយ៉េមែន។

កម្ពុជានឹងធ្វើការចុះហត្ថលេខាទទួលឥណទានសម្បទានពីកូរ៉េខាងត្បូងដែលក្នុងនោះរួមមាន ឥណទានថវិកាសម្រាប់កសាងស្ពាន «មិត្តភាពកម្ពុជា សាធារណរដ្ឋកូរ៉េ» ពីផ្សារចាស់ទៅ ជ្រោយចង្វារ និងពីជ្រោយចង្វារទៅអរិយក្សត្រ។ យោងតាមសេចក្តីប្រកាសព័ត៌មានរបស់ក្រសួងការបរទេសការចុះហត្ថលេខាទទួលឥណទានសម្បទាននេះ នឹងគ្រោងធ្វើនៅថ្ងៃទី៩ ធ្នូ ឆ្នាំ២០២២ ក្រោមអធិបតីភាពសម្តេចនាយករដ្ឋមន្ត្រី ហ៊ុន សែន។ សេចក្តីប្រកាសបញ្ជាក់ថាឥណទានសម្បទាននេះ នឹងចុះហត្ថលេខា២ផ្សេងគ្នា ក្នុងនោះឥណទាន នៃថវិកាតម្លៃ១ពាន់៥០០ លានដុល្លារ នឹងត្រូវហត្ថលេខារវាងឧបនាយករដ្ឋមន្ត្រី ប្រាក់ សុខុន ដែលជារដ្ឋមន្ត្រីក្រសួងការបរទេស ជាមួយនឹងឯកអគ្គរដ្ឋទូតកូរ៉េ លោក ប៉ាក ហ៊ឹងឃ្យុង។ ឥណទានថវិកាតម្លៃ១ពាន់ ៥០០លានដុល្លារ សម្រាប់មូលនិធិសហប្រតិបត្តិការអភិវឌ្ឍន៍សេដ្ឋកិច្ចសម្រាប់ឆ្នាំ២០២២ដល់ ឆ្នាំ២០២៦។ ការចុះហត្ថលេខាទី២លើឥណទានសម្បទានតម្លៃ២៤៥លាន៩០ម៉ឺន៩ពាន់ សម្រាប់សាងសង់ស្ពានមិត្តភាពកម្ពុជា សាធារណរដ្ឋកូរ៉េ» ពីផ្សារចាស់ទៅ ជ្រោយចង្វារ និងពីជ្រោយចង្វារទៅអរិយក្សត្រ, និងឥណទានសម្បទានតម្លៃ៧០លានដុល្លារ នៃគម្រោងពង្រឹង សមត្ថភាពប្រព័ន្ធបណ្តាញបញ្ជូនអគ្គិសនីនៅខេត្តព្រះសីហនុ។ ការចុះហត្ថលេខាទី២ នៃឥណទានសម្បទានតម្លៃសរុប៣១៥លាន៩០ម៉ឺន៩ពាន់នាក់ នឹងធ្វើរវាងលោកឧបនាយករដ្ឋមន្ត្រី អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជាមួយនឹងលោកស្រី មីនី ជ័យ ប្រធានមូលនិធិសម្រាប់កិច្ចសហប្រតិបត្តិការអភិវឌ្ឍន៍សេដ្ឋកិច្ច នៃធនាគារនីហរណអាហរណ កូរ៉េប្រចាំកម្ពុជា។ ក្រសួងការបរទេសកម្ពុជា បានថ្លែងថា…

តួលេខឆ្លងថ្មីកូវីដ១៩ ក្នុងប្រទេសអាស៊ាននៃរយៈពេល ២៤ម៉ោងចុងក្រោយនេះ មានការថយចុះចំនួន ១ពាន់ ៩៨៦ករណី បើប្រៀបធៀបនឹងតួលេខឆ្លងសរុបកាលពីថ្ងៃម្សិលមិញ ។ តួលេខឆ្លងថ្មីកូវីដ១៩ ក្នុងរយៈពេល ២៤ម៉ោងមកនេះមានចំនួន ៨ពាន់ ៥៥៣ករណី ដែលឆ្លងលើប្រទេសចំនួន ៨ នៅអាស៊ាន រួមមានប្រទេសឥណ្ឌូនេស៊ី, ម៉ាឡេស៊ី, វៀតណាម, មីយ៉ាន់ ម៉ា, សឹង្ហបុរី, ហ្វីលីពីន, ឡាវ និង ប្រទេសកម្ពុជា ។ ប្រទេសឥណ្ឌូនេស៊ី ជាប្រទេសដែលមានតួ លេខឆ្លងច្រើនជាងគេ ដែលមានចំនួន ៣ពាន់ ៧៤៤ករណី ។ តួលេខឆ្លងតិចជាងគេ គឺប្រទេសកម្ពុជា ដែលមានចំនួនតែ ១២ករណីប៉ុណ្ណោះ ។ ប្រទេសព្រុយណេ និងប្រទេសថៃ ជាប្រទេសដែលគ្មានសេចក្តីរាយការណ៍ជុំវិញតួលេខឆ្លង និងស្លាប់ឡើយ ក្នុងរយៈពេល ២៤ ម៉ោងចុងក្រោយនេះ ។ តួលេខស្លាប់ដោយសារកូវីដ១៩ ក្នុងប្រទេសអាស៊ានរយៈពេល ២៤ម៉ោងចុងក្រោយនេះ មានចំនួន ៨២នាក់ ក្នុងនោះប្រទេសឥណ្ឌូណេស៊ី មានមនុស្សស្លាប់ចំនួន ៤៥នាក់…

តួលេខឆ្លងថ្មីកូវីដ១៩ នៅកម្ពុជានៅថ្ងៃនេះ បានថយចុះចំនួន ៧ករណីមកវិញ បន្ទាប់ពីមាន ការកើនឡើងជាបន្តបន្ទាប់ជាប់គ្នាប៉ុន្មានថ្ងៃមកនេះ។ យោងតាមក្រសួងសុខាភិបាល ក្នុងរយៈ ពេល២៤ម៉ោងចុងក្រោយនេះ ការឆ្លងថ្មីកូវីដ១៩ មានចំនួន ១២ករណី ដែលកើតឡើងក្នុង រង្វង់សហគមន៍ទាំងអស់ ។ កម្ពុជានៅតែបន្តការចាក់វ៉ាក់សាំងកូវីដ១៩ ជាដដែល ដើម្បីជម្រុញភាពស៊ាំក្នុងសហគមន៍ ។ តួលេខអ្នកចាក់វ៉ាក់សាំងដូសមូលដ្ឋានទូទាំងប្រទេសគិតត្រឹមថ្ងៃទី៧ ធ្នូ បានកើនដល់ចំនួន ១៥លាន ២៣ម៉ឺន ៤៧៧នាក់ ដែលស្មើនឹង ៩៥,១៩ ភាគរយ ៕

អគ្គនាយកដ្ឋានពន្ធដារកម្ពុជា និងរដ្ឋបាលសារពើពន្ធកូរ៉េ បានចុះអនុស្សរណៈយោគយល់គ្នា ដែលកិច្ចព្រមព្រៀងទ្វេភាគីនេះ ត្រូវគេរាយការណ៍ថានឹងផ្តល់ផលប្រយោជន៍យ៉ាងច្រើនដល់ កិច្ចសហការគ្នារវាងប្រទេសទាំង២លើវិស័យពន្ធដា។ អនុស្សរណ:ដែលមានចំណុចសំខាន់ ចំនួនបួន ត្រូវបានចុះនៅថ្ងៃទី៦ ធ្នូ ឆ្នាំ២០២២ រវាងអគ្គនាយកដ្ឋានពន្ធដារកម្ពុជាលោក គង់ វិបុល និងលោក គីម ឆាងគី អគ្គនាយករដ្ឋបាលសារពើពន្ធនៃសាធារណរដ្ឋកូរ៉េ។ ចំណុចទាំង ៤គឺកិច្ចសហប្រតិបត្តិការបន្ថែមលើការអនុវត្តកិច្ចព្រមព្រៀង DTA), ការពង្រឹងការផ្លាស់ប្តូរ ព័ត៌មាន EoI, ការផ្តល់វគ្គបណ្តុះបណ្តាលសម្រាប់មន្ត្រីពន្ធដារ GDT និងការរៀបចំសិក្ខាសាលាជាប្រចាំដោយអគ្គនាយកដ្ឋានពន្ធដារ ដើម្បីជួយឱ្យធុរជនកូរ៉េ ដែលប្រកបធុរកិច្ចនៅកម្ពុជា បង្កើនការយល់ដឹងអំពីកាតព្វកិច្ច និងអនុលោមភាពពន្ធ។ លោក គង់ វិបុល បានបញ្ជាក់ឱ្យដឹងដែរថា កម្ពុជានិងសាធារណរដ្ឋកូរ៉េ ធ្លាប់បានចុះហត្ថលេខា លើកិច្ចព្រមព្រៀង DTA ដោយជោគជ័យនៅថ្ងៃទី២៥ ខែវិច្ឆិកា ឆ្នាំ២០១៩ ហើយកិច្ចព្រមព្រៀង នោះមានប្រសិទ្ធភាពចាប់ពីថ្ងៃទី១ ខែមករា ឆ្នាំ២០២២។ លោបញ្ជាក់ថា កិច្ចព្រមព្រៀងទ្វេភាគីនោះ បាននាំមកនូវផលប្រយោជន៍យ៉ាងច្រើនដល់អ្នកជាប់ពន្ធ និងអ្នកវិនិយោគនៃប្រទេសទាំងពីរ។

ធនាគារពិភពលោក World Bank បានព្យាករណ៍ថាកំណើនសេដ្ឋកិច្ចកម្ពុជាក្នុងឆ្នាំ២០២២នេះ នឹងមានក្នុងរង្វង់ ៤,៨ភាគរយ។ របាយការណ៍ថ្ងៃទី៧ ខែធ្នូនេះ បានសរសេរថាកំណើននេះ គឺផ្អែកលើការងើបឡើងវិញនៃសេដ្ឋកិច្ចដែលមានលក្ខណៈទូលំទូលាយជាងមុន។ ធនាគារពិភពលោកបន្តថា ការកើនឡើងនៃការនាំចេញ-ជាពិសេសសម្លៀកបំពាក់, ស្បែកជើង, ទំនិញធ្វើដំណើរ និងការផលិតកង់…ការងើបឡើងវិញនៃឧស្សាហកម្មទេសចរណ៍ និងការវិលត្រលប់មកវិញ នៃលំហូរវិនិយោគដោយផ្ទាល់បរទេស បានជួយទ្រទ្រង់ការងើបឡើងវិញនៃសេដ្ឋកិច្ចនៅឆ្នាំ២០២២នេះ។ ទោះជាយ៉ាងណាក៏ដោយ ការព្យាណ៍សម្រាប់ឆ្នាំ២០២៣ ត្រូវបានបន្ទាបមកត្រឹម ៥,២ ភាគរយដោយសារតែ ទស្សនវិស័យសកលមិនសូវអំណោយផល។ របាយការណ៍ព្យាករណ៍ថា អតិផរណាត្រូវបានគេរំពឹងថានឹងធ្លាក់ចុះដល់ ៤,២ ភាគរយនៅ ឆ្នាំ២០២៣, និងបន្តធ្លាក់ចុះ៣,៨ភាគរយនៅក្នុងឆ្នាំ២០២៤ ខណៈភាពក្រីក្រត្រូវបានគេរំពឹងថានឹង ធ្លាក់ចុះ ដោយសារតែការស្តារសេដ្ឋកិច្ចដែលបានព្យាករណ៍ និងអតិផរណាកម្រិតមធ្យម៕

ការពិនិត្យបញ្ជីឈ្មោះ និងការចុះឈ្មោះបោះឆ្នោតថ្មីនឹងត្រូវបញ្ចប់នៅថ្ងៃ៨ធ្នូនេះហើយ បន្ទាប់មានដំណើរការរយៈពេល៥០ថ្ងៃ។ សេចក្តីរាយការណ៍បានបង្ហាញថាក្នុងរយៈពេល ២៤ម៉ោងចុងក្រោយនេះ ពលរដ្ឋដែលបានមកចុះបញ្ជីឈ្មោះមានចំនួន ៩ពាន់២៩៣នាក់។ យោងតាមគណៈកម្មាធិការជាតិរៀបចំការបោះឆ្នោត, រយៈពេល៤៩ថ្ងៃកន្លងមកនេះ ប្រជាពលរដ្ឋដែលបានមកពិនិត្យបញ្ជីឈ្មោះ និងការចុះឈ្មោះថ្មីមានចំនួន ៥៦ម៉ឺន ៥ពាន់៥៧នាក់ , អ្នកដែលនឹងត្រូវលុបឈ្មោះចេញពីបញ្ជីបោះឆ្នោតសរុបមានចំនួន ២៥ម៉ឺន៣ពាន់៣៦៧នាក់, អ្នកដែលបានកែតម្រូវទិន្នន័យសរុប មានចំនួន ៥ម៉ឺន៩ពាន់៦៨៩នាក់ និងអ្នកដែលបានផ្ទេរទីលំនៅចូលក្នុងឃុំ សង្កាត់ថ្មីសរុបចំនួន ១៧ម៉ឺន៣ពាន់ ២៤៣នាក់។

ពលរដ្ឋខ្មែរដែលរស់នៅក្នុងទ្វីបអឺរ៉ុប បានបន្តផ្ញើសារជាច្រើនមកថែមទៀតនៅថ្ងៃនេះ ដែលបញ្ជាក់ការស្វាគមន៍រង់ចាំទទួលសម្តេច ដែលនឹងអញ្ជើញដល់ទ្វីបបអឺរ៉ុបសប្តាហ៍ក្រោយនេះហើយ។ ពលរដ្ឋនិងនិស្សិតខ្មែរក្នុងប្រទេសបារាំង, ស្វីស, អូទ្រីស និងប្រទេសហុងគ្រី បានថ្លែងតាមសារសម្លេងនៅថ្ងៃនេះថា ការត្រៀមទៅទទួលស្វាមន៍សម្តេចតេជោ ហ៊ុន សែន នៅក្នុងក្រុងប្រុចសែល នៃប្រទេសបែលហ្ស៊ីក គឹជាការពេញចិត្ត, គ្មានការបង្ខិតបង្ខំ ឬការទិញទឹកចិត្តដូចអ្វីដែលក្រុមប្រឆាំងនៅក្រៅស្រុក តែងតែធ្វើការចោទប្រកាន់នោះឡើយ។ សម្តីបញ្ជាក់របស់ពលរដ្ឋខ្មែរដែលរស់នៅក្នុងទ្វីបអឺរ៉ុបជាបន្តបន្ទាប់នេះ បានធ្វើឡើងមុនពេល ដំណើរទស្សនកិច្ចរបស់សម្តេចតេជោ ហ៊ុន សែន ដែលនឹងអញ្ជើញមកចូលរួមក្នុងកិច្ចប្រជុំកំពូលអាស៊ីអឺរ៉ុបលើកទី៤៥ប្រព្រឹត្តទៅរវាងពីថ្ងៃទី១៤ដល់១៥ ធ្នូ ក្នុងក្រុងប្រុចសែល នៃប្រទេសបែលហ្ស៊ីក។ យោងតាមកម្មវិធី, សម្តេចតេជោ ហ៊ុន សែន នឹងអញ្ជើញចាកចេញពីកម្ពុជានៅថ្ងៃទី១២ ធ្នូ។ អាស៊ាន និងអឺរ៉ុប បានក្លាយជាដៃគូសន្ទនានឹងគ្នាចាប់តាំងពីឆ្នាំ១៩៧៧។ សហភាពអឺរ៉ុបដែល រួមមាន២៧ប្រទេសជាមួយនឹងប្រជាជន៤៤៧លាននាក់ គឺជាមជ្ឈមណ្ឌលសេដ្ឋកិច្ច និងនយោបាយដ៏ទូលំទូលាយមួយរបស់ពិភពលោក។ ចំណែកអាស៊ានដែលមានប្រទេសចំនួន១០ ជាមួយនឹងពលរដ្ឋជាង៦៨៤លាននាក់ ក៏ជាមជ្ឈមណ្ឌលនៃភាពរីកចំរើនដំណើរការសេដ្ឋកិច្ច និងក៏ជាតំបន់ដែលរួមចំណែកដល់កត្តាស្ថិរភាព និងនយោបាយក្នុងតំបន់ក៏ដូចជាពិភពលោកផងដែរ។

បេក្ខភាពអនាគតនាយករដ្ឋមន្ត្រីរបស់គណបក្សប្រជាជនកម្ពុជា បានថ្លែងទទួលស្គាល់នូវភាពមិនទាន់ល្អឥតខ្ចោះរបស់គណបក្សប្រជាជនកម្ពុជា ដែលកាន់អំណាច ប៉ុន្តែបានប្តេជ្ញាថានឹងធ្វើការកែលំអចំពោះភាពខ្វះខាតទាំងឡាយណា ដើម្បីបំពេញសេចក្តីត្រូវការរបស់ប្រជាជន។ គណបក្សប្រជាជនកម្ពុជា ក្នុងរយៈកាលជាង៤០ឆ្នាំដែលបាននិងកំពុងកាច់ចង្កូតដឹកនាំប្រទេស បានហែលឆ្លងកាត់ឧបសគ្គធំៗទាំងឡាយជាមួយនឹងប្រជាជនដោយមិនបានរត់ចោល ប្រជាជនខ្លួនឯងនោះឡើយ។ ឆ្លងតាមរយៈការបោះឆ្នោតសកលដែលចាប់ផ្តើមតាំងពីលើកដំបូង នៃខែឧសភា ឆ្នាំ១៩៩៣, សម្លេងឆ្នោតគាំទ្រពីប្រជាពលរដ្ឋម្តងឡើង, ម្តងចុះ ប៉ុន្តែគណបក្សប្រជាជនកម្ពុជាតែងតែនៅជាប់ជានិច្ចរស់នៅជាមួយប្រជាជនរួមសុខនិងទុក្ខ។ បណ្ឌិត ហ៊ុន ម៉ាណែត ថ្លែងក្នុងពិធីសាសនាមួយដែលបានរៀបចំធ្វើក្នុងស្រុកកោះធំ ខេត្តកណ្តាលនា ពេលថ្មីៗកន្លងមកនេះ បានថ្លែងថាគណបក្សប្រជាជនកម្ពុជាតែងទទួលស្គាល់ការពិត នៃភាពមិនទាន់ល្អឥតខ្ចោះបើទោះបីជា មានសម្លេងគាំទ្រច្រើនលើសលុបពីពលរដ្ឋជាងបណ្តាគណបក្សនយោបាយនានាក៏ដោយ។ ប្រមុខដឹកនាំគណបក្សប្រជាជនកម្ពុជាសម្តេចតេជោ ហ៊ុន សែន ដើម្បីការជួយកែលំអភាពខ្វះខាត ជាពិសេសលើមន្ត្រីរបស់ខ្លួនដែលមានតំណែងក្នុងមន្ត្រីរាជការ បានដាក់ចេញនូវអភិក្រម ចំនួន៥។ អភិក្រមសម្រាប់កែជួយកែលំអភាពខ្វះខាតដោយផ្ទាល់ខ្លួនឯងនោះរួមមាន ងូតទឹក, ឆ្លុះកញ្ចក់, ដុះក្អែល, ព្យាបាល និងវះកាត់។ គណបក្សប្រជាជនកម្ពុជាគឺជាគណបក្សតែមួយគត់ ដែលបានដឹកនាំជួយធ្វើឱ្យប្រទេសជាតិ អស់សង្គ្រាមស៊ីវិលទាំងស្រុងនាចុងឆ្នាំ១៩៩៨ តាមរយៈគោលនយោបាយឈ្នះឈ្នះ ដាក់ចេញដោយសម្តេចតេជោ ហ៊ុនសែន។ តាមរយៈនយោបាយឈ្នះឈ្នះបញ្ចប់សង្គ្រាមស៊ីវិលនោះហើយ បានធ្វើឱ្យកម្ពុជាមានសុខសន្តិភាពពិតប្រាកដ និងមានការអភិវឌ្ឍន៍ប្រទេសរីកចំរើន ដូចសព្វថ្ងៃ។