ការផ្សព្វផ្សាយមួយតាមបណ្តាញសង្គម ដែលនិយាយថា សណ្តែកកួរដែលនាំមកពីវៀតណាម ចូលមកស្រុកខ្មែរ ថ្លៃជាងសណ្តែកកួរក្នុងស្រុកនោះ បានប្រញាប់ឱ្យមន្ត្រីក្រសួងកសិកម្ម ធ្វើការបកស្រាយបំភ្លឺឆ្លើយតប។ អប្សរាណិតរាយការណ៍

សមយុទ្ធនាគមាសលើកទី៦ រវាងកងទ័ពកម្ពុជា និងកងទ័ពរំដោះប្រជាជនចិន ត្រូវនឹងចាប់ផ្តើមក្នុងសប្តាហ៍នេះហើយ រយៈពេល១៥ថ្ងៃ។ មន្ត្រីនាំពាក្យអគ្គបញ្ជាការដ្ឋានកងយោធពលខេមរភូមិន្ទ លោកឧត្តមសេនីយ៍ទោ ថោង សូលីម៉ូ បានថ្លែងបញ្ជាក់ក្នុងសន្និសីទកាសែតមួយ នាថ្ងៃទី១៣ឧសភាថា សមយុទ្ធនាគមាស គឺដើម្បីការផ្លាស់ប្តូរបទពិសោធន៍គ្នាទៅវិញទៅមក និងបង្កើនសមត្ថភាពកងទ័ព ឲ្យកាន់តែល្អប្រសើរជាបន្ថែមទៀត និងវាពុំមែនជាសមយុទ្ធធ្វើឡើង ដើម្បីជាការគំរាមកំហែង ឬធ្វើឲ្យប៉ះពាល់ដល់អ្នកណា ឬប្រទេសណាមួយនោះឡើយ។ អប្សរាណិតរាយការណ៍

ការប្រើប្រាស់ប្រព័ន្ធទូទាត់ «បាគង» ដែលបានផ្តល់ផលប្រយោជន៍ដល់ស្ត្រីកម្ពុជា បានទទួលពានរង្វាន់សកល នៅក្នុងកិច្ចប្រជុំកំពូលស្រ្តីពិភពលោក ឆ្នាំ២០២៤។ ក្រសួងកិច្ចការនារី និងធនាគារជាតិនៃកម្ពុជា ក្នុងសេចក្តីប្រកាសព័ត៌មានរួមបញ្ជាក់ថា ស្ថាប័នជាតិទាំង២ របស់កម្ពុជានេះ បានទទួលពានរង្វាន់សកលថ្នាក់ក្រសួង លើ «គម្រោងដែលមានផលជះវិជ្ជមានចំពោះស្រ្តី និងក្មេងស្រី» តាមរយៈការប្រើប្រាស់ប្រព័ន្ធទូទាត់ «បាគង» ពីកិច្ចប្រជុំកំពូលស្ត្រីពិភពលោកឆ្នាំ២០២៤ រៀបចំឡើងនៅទីក្រុងម៉ាឌ្រីដ នៃប្រទេសអេស្ប៉ាញ កាលពីថ្ងៃទី១០ ឧសភា ឆ្នាំ២០២៤។ សេចក្តីប្រកាសព័ត៌មានដដែលបានឱ្យដឹងថា រដ្ឋមន្ត្រីក្រសួងកិច្ចការនារី លោកជំទាវ អ៊ឹង កន្ថាផាវី បាននាំយលគម្រោងបង្កើនភាពភាពអង់អាចផ្នែកសេដ្ឋកិច្ចដល់ស្ត្រី តាមរយៈការប្រើប្រាស់ប្រព័ន្ធទូទាត់ «បាគង» អភិវឌ្ឍដោយធនាគារជាតិ នៃកម្ពុជានេះ បង្ហាញជូនដល់អង្គប្រជុំនៅក្នុងវេទិកាតុមូលថ្នាក់រដ្ឋមន្ត្រី នៃកិច្ចប្រជុំកំពូលស្រ្តីពិភពលោក ឆ្នាំ២០២៤»។

សម្តេចធិបតីនាយករដ្ឋមន្ត្រីកម្ពុជា គ្រោងនឹងអញ្ជើញបំពេញទស្សនកិច្ចផ្លូវការ នៅសាធារណរដ្ឋកូរ៉េ រយៈពេល៥ថ្ងៃ ដើម្បីពង្រឹងពង្រីកទំនាក់ទំនងកិច្ចសហប្រតិបត្តិការ និងជំរុញការវិនិយោគពាណិជ្ជកម្ម។ ការិយាល័យប្រធានាធិបតីកូរ៉េខាងត្បូង បានថ្លែងថា ក្នុងដំណើរទស្សនកិច្ចនោះ ថ្នាក់ដឹកនាំនៃប្រទេសទាំង២ នឹងត្រូវជួបប្រជុំកំពូលជាមួយគ្នា នៅថ្ងៃព្រហស្បតិ៍ ទី១៦ ឧសភា ដែលនឹងផ្តោតលើការជំរុញកិច្ចសហប្រតិបត្តិការ ក្នុងវិស័យការពារជាតិ, ពាណិជ្ជកម្ម, ការអភិវឌ្ឍន៍ និងសំណង់ហេដ្ឋារចនាសម្ព័ន្ធ និងលើបញ្ហាជាច្រើនទៀត។ អប្សរាណិតរាយការណ៍

ក្រុមប្រឹក្សាអភិវឌ្ឍន៍កម្ពុជាបានថ្លែងថា គេបានអនុម័តលើគម្រោងថ្មីចំនួន២២ ដែលមានទុនវិនិយោគជាង ៣០៩លានដុលា្លរ។ យោងតាមសេចក្តីប្រកាសព័ត៌មានថ្ងៃទី៧ ខែឧសភា ឆ្នាំ២០២៤ ក្នុងចំណោមគម្រោងវិនិយោគទាំង ២២គម្រោង រួមមានគម្រោងចំនួន ១៤ ដែលស្ថិតនៅក្រៅតំបន់សេដ្ឋកិច្ចពិសេស មានទុនវិនិយោគប្រមាណ ៩លានដុល្លារ និងគម្រោងចំនួន ៨ ដែលស្ថិតនៅក្នុងតំបន់សេដ្ឋកិច្ចពិសេស មានទុវិនិយោគប្រមាណជាង ២០០លានដុល្លារ និងអាចបង្កើតការងារបាន ២ម៉ឺន ៣ពាន់កន្លែង។ សេចក្តីរាយការណ៍បង្ហាញថា ការវិនិយោគមកពីប្រទេសចិន ស្ថិតនៅលំដាប់លេខរៀងទី១ ដោយបានរួមចំណែកសរុបរហូតដល់ទៅ ៩៨ភាគរយ នៃទុនវិនិយោគសរុប។

សមត្ថកិច្ចកំពុងស្វែងរកបុរសម្នាក់ដែលបានប្រើប្រាស់កាំភ្លើងខ្លីបាញ់ជាច្រើនគ្រាប់ បណ្តាលឱ្យយុវជនម្នាក់រងរបួសធ្លុះចង្កេះពីម្ខាងទៅម្ខាង។ ហេតុការណ៍នេះ បានកើតឡើងវេលាម៉ោងមួយ រំលងអាធ្រាត្រឈានចូលថ្ងៃទី៧ឧសភា ស្ថិតនៅស្តុបR3 ច្រកចូលបឹងកក់ សង្កាត់ស្រះចក ខណ្ឌដូនពេញ រាជធានីភ្នំពេញ។ បុរសម្នាក់ជិះរថយន្តម៉ាក ហាយឡាក់ វីហ្គោ បានដកកាំភ្លើងបាញ់យុវជនមួយក្រុម ដែលកំពុងអង្គុយលេងនៅចំណុចស្តុបR3 នោះ។ ការបាញ់ចំនួន ៦គ្រាប់ បានបណ្តាលឱ្យយុវជនម្នាក់ រងរបួសធ្ងន់ធ្លុះចំត្រគាក គ្រាដែលគ្រាប់ដទៃទៀត ហោះខុសគោលដៅ។ បុរសជិះរថយន្តនោះ ក្រោយការបាញ់បានបើករថយន្តគេចចេញពីកន្លែងកើតហេតុ ចូលទៅក្នុងតំបន់បឹងកក់។ សមត្ថកិច្ចនគរបាលរាជធានីបានថ្លែងថា គេកំពុងតាមស្រាវជ្រាវតាមចាប់ជនសង្ស័យម្នាក់នោះហើយ និងបានដាក់បញ្ជាដល់អធិការដ្ឋាននគរបាលខណ្ឌទាំង១៤ ត្រូវចាប់ជនសង្ស័យរូបនោះ ដើម្បីផ្តន្ទាទោសតាមច្បាប់។ មិនមានសេចក្តីរាយការណ៍ថា តើការបាញ់នោះ បណ្តាលមកពីរឿងអ្វីពិតប្រាកដទេ។

ក្រុមនិស្សិត និងពលរដ្ឋខ្មែរ ដែលកំពុងស្នាក់នៅក្នុងសាធារណរដ្ឋកូរ៉េ បានថ្លែងរំពឹងថា ដំណើរទស្សនកិច្ចរបស់សម្តេចធិបតី ហ៊ុន ម៉ាណែត និងលោកជំទាវ ក្នុងរដ្ឋធានីសេអ៊ូល ក្នុងសប្តាហ៍ក្រោយនេះ នឹងផ្តល់ផលប្រយោជន៍ជាច្រើនចំពោះប្រទេសកម្ពុជា។ កម្ពុជានិងកូរ៉េខាងត្បូង មានទំនាក់ទំនងការទូតរវាងគ្នាក្នុងឆ្នាំ១៩៧០ ប៉ុន្តែកាត់ផ្តាច់ដោយរបបដឹកនាំខ្មែរក្រហមឆ្នាំ១៩៧៥។ ចំណងការទូតសាឡើងវិញរវាងប្រទេសទាំង២ បានចាប់ផ្តើមនៅក្នុងឆ្នាំ១៩៩៧។ ដំណើរទស្សនកិច្ចក្នុងក្រុងសេអ៊ូល នាពាក់កណ្តាលខែឧសភានេះ គឺតបតាមការអញ្ជើញរបស់ប្រធានាធិបតីកូរ៉េខាងត្បូង លោក យូន សុកយុល។ កម្ពុជាក្រោមកិច្ចសហការជាមួយរដ្ឋាភិបាលកូរ៉េខាងត្បូង បានបញ្ជូនពលករខ្មែរ ទៅធ្វើការនៅទីនោះមានចំនួនច្រើនម៉ឹននាក់។ ពលរដ្ឋ និងនិស្សិតខ្មែរនៅក្នុងប្រទេសកូរ៉េខាងត្បូង បានថ្លែងថា គេមានក្តីរំភើបក្នុងការរងចាំទទួលស្វាគមន៍ដំណើរទស្សនកិច្ចរបស់សម្តេចធិបតី និងលោកជំទាវ។ សម្តេចមហាបវរធិបតី ហ៊ុន ម៉ាណែត បានមានប្រសាសន៍បញ្ជាក់កាលពីខែមីនាថា ក្នុងដំណើរទស្សនកិច្ចជាផ្លូវការក្នុងប្រទេសកូរ៉េខាងត្បូង សម្តេចនឹងជួបជជែកអំពីការជំរុញរកការបណ្តាក់ទុនពីវិនិយោគិនកូរ៉េ មកកាន់ប្រទេសកម្ពុជា។ យោងតាមរបាយការណ៍របស់រាជរដ្ឋាភិបាល ចាប់ពីខែកញ្ញាឆ្នាំ២០២៣ ដល់ខែកុម្ភៈ ឆ្នាំ២០២៤ មានក្រុមហ៊ុនបរទេសសរុបចំនួន ១៧៣ បានវិនិយោគទឹកប្រាក់ ៤ពាន់ ១៥០លានដុល្លារនៅកម្ពុជា។ ការបណ្តាក់ទុនវិនិយោគទាំងនេះ ត្រូវគេរំពឹងថា នឹងបង្កើតការងារសម្រាប់ពលរដ្ឋជាង ១៧ម៉ឺននាក់។

ក្រសួងអប់រំបានណែនាំគ្រឹះស្ថានសិក្សារបស់រដ្ឋ មិនត្រូវបង្ខិតបង្ខំសិស្សឱ្យរៀនគួរ និងយកមេរៀន ឬលំហាត់បង្រៀនគួរ ដើម្បីធ្វើជាវិញ្ញាសាប្រឡងនោះឡើយ។ ការណែនាំនេះ បានធ្វើឡើងតាមរយៈការចេញសេចក្តីថ្លែងការណ៍មួយ របស់ក្រសួង នៅថ្ងៃទី៧ឧសភា ក្រោយមានការត្អូញត្អែររបស់មាតា-បិតា អ្នកអាណាព្យាបាលសិស្សមួយចំនួន ពាក់ព័ន្ធនឹងការលំបាកក្នុងការរ៉ាប់រងចំណាយលើការរៀនគួរបន្ថែមក្រៅម៉ោង ទាំងនៅកម្រិតបឋមសិក្សា និងមធ្យមសិក្សា។ អ្វីដែលជាបាតុភាពអវិជ្ជមាននោះ គឺខ្លឹមសារវិញ្ញាសារប្រឡងប្រចាំខែ ឬប្រចាំឆមាសនូវលំហាត់នានា គឺជាខ្លឹមសារដូចទៅនឹងការបង្រៀនគួរ ដែលកត្តានេះធ្វើឱ្យប៉ះពាល់ដល់សតិអារម្មណ៍របស់សិស្ស ដែលក្រីក្រលំបាកមិនបានទៅរៀនគួរ។ ក្រសួងអប់រំដើម្បីទប់ស្កាត់នូវភាពអវិជ្ជមានទាំងនោះ បានដាក់ចេញនូវវិធានការ ៥ចំណុច ក្នុងនោះការដាស់តឿន គ្រូត្រូវប្រកាន់ខ្ជាប់នូវក្រមសីលធម៌វិជ្ជាជីវៈគ្រូបង្រៀន, មិនត្រូវបង្ខិតបង្ខំសិស្សឱ្យរៀនគួរ និងមិនត្រូវយកមេរៀន ឬលំហាត់បង្រៀនគួរ ធ្វើជាវិញ្ញាសាប្រឡង និងបានណែនាំគ្រឹះស្ថានសិក្សា ត្រូវរៀបចំអនុវត្តកម្មវិធីក្រៅម៉ោងសិក្សា ដើម្បីបង្កើនម៉ោងស្វ័យសិក្សា យ៉ាងតិច ២ម៉ោងបន្ថែម។

កម្ពុជាកំពុងជ្រើសរើសយុវជនមានពិការភាព ចូលរួមប្រកួតផ្នែកព័ត៌មានវិទ្យានៅហ្វីលីពីន។ យោងតាមអគ្គលេខាធិការដ្ឋានក្រុមប្រឹក្សាសកម្មភាពជនពិការ នៃក្រសួងសង្គមកិច្ច អតីតយុទ្ធជន និងយុវនីតិសម្បទា, ការប្រកួតប្រជែងក្នុងលក្ខណៈជាអន្តរជាតិនោះ នឹងប្រព្រឹត្តទៅរយៈពេល៥ថ្ងៃ នៅក្នុងខែតុលា ឆ្នាំ២០២៤។ ការប្រកួតប្រជែងនេះមានចំនួន ៦ប្រភេទវិញ្ញាសា គឺ e Tool Presentation, e Tool Spreadsheet, e Life Map, e Content, e Creative-Smart Car និង e Creative IoT។ យុវជនមានពិការភាព អាចដាក់ពាក្យដោយភ្ជាប់ជាមួយលក្ខណ្ឌអាយុចាប់ពីចាប់ពី១៤ ទៅ ២៣ឆ្នាំ, ចេះភាសាអង់គ្លេស ដែលអាចទំនាក់ទំនងបាន, មានចំណេះដឹងកំព្យូទ័រ និងមានស្មាតហ្វូនប្រើប្រាស់, មានលទ្ធភាពធ្វើលិខិតឆ្លងដែន ឬមានលិខិតឆ្លងដែន ដែលអាចប្រើប្រាស់បាន និងមានការអនុញ្ញាតពីគ្រួសារ, អាណាព្យាបាល និងសាលារៀន។ អគ្គលេខាធិការស្តីទី នៃអគ្គលេខាធិការដ្ឋានក្រុមប្រឹក្សាសកម្មភាពជនពិការ លោក អ៊ុង សម្បត្តិ បានថ្លែងថា នេះជាកម្មវិធីដ៏មានសារៈសំខាន់មួយ សម្រាប់ជនមានពិការភាព។ លោកបញ្ជាក់ថា យុវជនមានពិការភាព…

មន្ត្រីរាជការ នៃក្រសួងព័ត៌មាន និងមន្ត្រីជាប់កិច្ចសន្យាចំនួន ១ពាន់ ៨៤០នាក់ បានចាប់ផ្តើមធ្វើតេស្តលើទឹកនោម ដើម្បីការបញ្ជាក់ភាពស្អាតស្អំ នៃមន្ត្រីរាជការ ដែលមិនជាប់ពាក់ព័ន្ធនឹងបញ្ហាគ្រឿងញៀន។ សម្តេចធិបតី ហ៊ុន ម៉ាណែត កាលពីថ្ងៃទី២០ កុម្ភៈ ឆ្នាំ២០២៤ បានដាក់ចេញបទបញ្ជាដាច់ខាត ប្រឆាំងគ្រឿងញៀនខុសច្បាប់នៅតាមក្រសួង ស្ថាប័ន និងរដ្ឋបាលថ្នាក់ក្រោមជាតិ។ មន្ត្រីរាជការណាដែលរកឃើញថា បានជាប់ពាក់ព័ន្ធនឹងបញ្ហាគ្រឿងញៀន ដាច់ខាតត្រូវបញ្ចប់មុខតំណែង និងបណ្តេញចេញពីក្របខណ្ឌ ដោយគ្មានការលើកលែង។ រដ្ឋមន្ត្រីក្រសួងព័ត៌មានលោក នេត្រ ភក្ត្រា បានថ្លែងថា៖ «យើងទាំងអស់គ្នាមានកាតព្វកិច្ច ក្នុងការធ្វើតេស្តរកសារធាតុញៀនទាំងអស់គ្នា រាប់ទាំងរូបខ្ញុំផងដែរ»។ សម្តេចធិបតី ហ៊ុន ម៉ាណែត បានសរសេរក្នុងបណ្តាញសង្គម កាលពីចុងខែមេសារបញ្ជាក់ថា តាមរយៈលទ្ធផលនៃការធ្វើតេស្តលើមន្ត្រីក្រោមឱវាទចំនួន ៥ម៉ឺន ៦ពាន់ ៤៤៥នាក់, មានមន្ត្រី ៧៦នាក់ បានរកឃើញមានសារធាតុញៀន និងត្រូវបានបណ្តេញចេញពីក្របខណ្ឌ។ សម្តេចធិបតី បានសរសេរបន្តថា សម្តេចបានណែនាំដល់សាមីក្រសួង-ស្ថាប័ន ដែលបានបណ្តេញមន្ត្រីរកឃើញវិជ្ជមានគ្រឿងញៀន សូមឱ្យបញ្ជូនពួកគាត់ ទៅទទួលការព្យាបាល និងស្តារនីតិសម្បទា។