សមត្ថកិច្ចបានបង្ហាញមុខក្រុមចោររឆក់ចំនួន ៤នាក់ ដែលតែងធ្វើសកម្មភាពឆក់យ៉ាងសកម្ម នៅក្នុងភូមិសាស្ត្ររាជធានីភ្នំពេញ។ ការបង្ក្រាបក្រុមជនសង្ស័យទាំង ០៤នាក់នេះ ធ្វើឡើងដោយកម្លាំងនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ សហការជាមួយនគរបាលខណ្ឌចំការមន ដែលបំបែកករណីទាំងនេះ ដោយប្រើពេលវេលាមិនដល់កន្លះថ្ងៃឡើយ។ អ្នកនាំពាក្យស្នងការដ្ឋាននគរបាលរាជធានី លោកវរសេនីយ៍ឯក សំ វិច្ឆិកា បានប្រាប់បណ្តាញសារព័ត៌មាននៅថ្ងៃទី២៧កុម្ភៈនេះថា ជនសង្ស័យជាចោរឆក់ទាំងបួននេះ គឺជាមុខសញ្ញាដែលសមត្ថកិច្ចបានតាមជាយូរមកហើយ និងក្រុមទាំងនេះ គឺជាដែលធ្លាប់ជាប់ក្នុងពន្ធនាគារ កាលពីពេលមុននោះមកទៀត។

ឧបការីរងរដ្ឋមន្ត្រីការពារជាតិអាមេរិកលោក Jed Royal បានជួបពិភាក្សាជាមួយនឹងអគ្គមេបញ្ជាការកងយោធពលខេមរភូមិន្ទ នាយឧត្តមសេនីយ៍ វង្ស ពិសេន ដែលកិច្ចពិភាក្សាបានផ្តោតលើកិច្ចសហប្រតិបត្តិរវាងកម្ពុជា និងអាមេរិក។ កិច្ចពិភាក្សានេះ បានធ្វើនៅថ្ងៃទី២៦ កុម្ភៈ ឆ្នាំ២០២៤ នាបញ្ជាការដ្ឋានកងយោធពលខេមរភូមិន្ទ។ អប្សរាណិតរាយការណ៍

បុណ្យទន្លេជាលើកដំបូងក្នុងខេត្តសៀមរាប ដែលជិតមកដល់ក្នុងពេលខាងមុខនេះ នឹងអញ្ជើញចូលរួមអធិបតីដ៏ខ្ពង់ខ្ពស់ពីសម្តេចធិបតីនាយករដ្ឋមន្ត្រី និងលោកជំទាវ។ បុណ្យទន្លេលើកទី៨ ដែលត្រៀមនឹងរៀបចំធ្វើនៅតាមដងស្ទឹងសៀមរាប នឹងប្រារព្ធធ្វើឡើងរវាងពីថ្ងៃទី១៦ ដល់១៧ មីនា ឆ្នាំ២០២៤។ គណៈកម្មការអន្តរក្រសួងដើម្បីរៀបចំពិធីបុណ្យទន្លេ បានថ្លែងថា ក្នុងរយៈពេល២ថ្ងៃ នៃការរៀបចំនោះ នឹងមានការសម្តែងសិល្បៈ, ការប្រគុំតន្ត្រីដែលនឹងចូលរួមពីសិល្បករ និងសិល្បការីនីជាតិ និងអន្តរជាតិល្បីៗ, មានការដុតកាំជ្រួច, ការតាំងពិព័រណ៍ផលិតផលទេសចរណ៍ និងផលិតផលទូទៅ, មានមហោស្រពម្ហូបអាហារមេគង្គ ព្រមទាំងសកម្មភាពកំសាន្តនានាជាច្រើនដទៃទៀត។ បុណ្យទន្លេបានចាប់ផ្តើមធ្វើលើកដំបូងក្នុងឆ្នាំ២០១៥ នៅក្នុងខេត្តក្រចេះ, ក្រោយមកនៅកំពង់ចាម និងត្បូងឃ្មុំ ឆ្នាំ២០១៦, នៅខេត្តស្ទឹងត្រែងឆ្នាំ២០១៧, នៅក្រុងតាខ្មៅខេត្តកណ្តាល ឆ្នាំ២០១៨, នៅកំពង់ឆ្នាំង ឆ្នាំ២០១៩, នៅបាត់ដំបង ឆ្នាំ២០២០, នៅកំពង់ធំ ឆ្នាំ២០២៣ និងនៅឆ្នាំ២០២៤នេះ ក្នុងខេត្តសៀមរាប។

សម្តេចធិបតី ហ៊ុន ម៉ាណែត បានជួបជាមួយមន្ត្រីជាន់ខ្ពស់ក្រសួងបរទេសអាមេរិក ដែលកិច្ចពិភាក្សាបានផ្តោតលើ «វឌ្ឍនភាពនៃទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ»។ ស្ថានទូតអាមេរិក នៅជាមួយគ្នានេះបានថ្លែងថា កិច្ចពិភាក្សារវាងលោក ដានីញ៉ែល គ្រីថិនប្រ៊ីង និងសម្តេចធិបតីនាយករដ្ឋមន្ត្រីកាលពីថ្ងៃទី២៦ កុម្ភៈ ឆ្នាំ២០២៤ បានផ្តោតលើទំហំប្រតិបត្តិការ ដែលមានស្រាប់ នៃប្រទេសទាំង២។ អប្សរាណិតរាយការណ៍

គណៈកម្មាធិការជាតិរៀបចំការបោះឆ្នោត បានបញ្ចប់ការត្រួតពិនិត្យ និងផ្ទៀងផ្ទាត់ក្នុងការបញ្ជាក់ភាពត្រឹមត្រូវ នូវលទ្ធផលបោះឆ្នោតជ្រើសតាំងព្រឹទ្ធសភា និងបានបញ្ជាក់ថា «ក្រុមត្រួតពិនិត្យមិនបានរកឃើញកំហុស ឬភាពមិនប្រក្រតីណាមួយ» ឡើយ។ ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ ថ្ងៃទី២៥កុម្ភៈ មានគណបក្សនយោបាយចូលរួមចំនួន៤ គឺគណបក្សប្រជាជនកម្ពុជា, គណបក្ស ឆន្ទៈខ្មែរ, គណបក្សហ៊្វុនស៊ិនប៉ិច និងគណបក្សកម្លាំងជាតិ។ យោងតាមការប្រកាសលទ្ធផលបឋម, គណបក្សប្រជាជនកម្ពុជាទទួលបានសំឡេងគាំទ្រ ក្នុងមណ្ឌលភូមិភាគទាំង៨ នូវសំឡេងឆ្នោតសរុបចំនួន ១ម៉ឺន ៥២សំឡេង ដែលនឹងរំពឹងទទួលបានអាសនៈចំនួន ៥៥អាសនៈ។ គណបក្សដែលទទួលបានអសនៈក្នុងការបោះឆ្នោតនោះដែរ គឺគណបក្សឆន្ទៈខ្មែរ មានសំឡេងឆ្នោតគាំទ្រ ១ពាន់ ៣៩៤សំឡេង និងរំពឹងថា ទទួលបានចំនួន ៣អាសនៈ។ ចំណែកគណបក្សហ៊្វុនស៊ិនប៉ិច និងគណបក្សកម្លាំងជាតិ ដែលចូលរួមក្នុងការប្រកួតប្រជែង មិនទទួលបានអាសនៈឡើយ។ មន្ត្រីគជប នៅក្នុងថ្ងៃទី២៧ដែលមានការត្រួតពិនិត្យផ្ទៀងផ្ទាត់លទ្ធផលនេះ បានប្រាប់បណ្តាញសារព័ត៌មាន ជុំវិញកិច្ចការដែលបាន និងកំពុងធ្វើដោយគណៈកម្មាធិការជាតិរៀបចំការបោះឆ្នោត។ សេចក្តីប្រកាសព័ត៌មានរបស់គជបថ្ងៃទី២៧កុម្ភៈ បានសរសេរថា «ជាលទ្ធផលក្រុមត្រួតពិនិត្យ មិនបានរកឃើញកំហុស ឬភាពមិនប្រក្រតីណាមួយពាក់ព័ន្ធនឹងការគណនាតួលេខលទ្ធផល សំឡេងឆ្នោតគាំទ្រគណបក្សនយោបាយនីមួយៗ» ឡើយ។

សម្តេចធិបតីនាយករដ្ឋមន្ត្រី និងគណៈប្រតិភូរាជរដ្ឋាភិបាល បានបំពេញទស្សនកិច្ចមួយថ្ងៃ ប្រកបដោយជោគជ័យនៅក្នុងប្រទេសម៉ាឡេស៊ី។ ថ្នាក់ដឹកនាំនៃប្រទេសទាំង២ បានសម្តែងភាពសុទិដ្ឋិនិយមថា ទំនាក់ទំនងរវាងកម្ពុជា-ម៉ាឡេស៊ី នឹងកាន់តែរឹងមាំ និងឈានដល់កម្រិតទំនាក់ទំនងខ្ពស់ជាបន្ថែមទៀត។ អប្សរាណិតរាយការណ៍

រាជរដ្ឋាភិបាលកម្ពុជាបានប្រកាសថ្ងៃទី២៧កុម្ភៈ ជាថ្ងៃកាន់ទុក្ខជាផ្លូវការ នៃការចូលទីវង្គតសម្ដេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស។ សារាចរណែនាំចុះហត្ថលេខាដោយសម្តេចធិបតី ហ៊ុន ម៉ាណែត បានណែនាំ «គ្រប់ក្រសួង ស្ថាប័ន សាលារៀន មន្ទីរពេទ្យរបស់រដ្ឋ និងឯកជនទាំងអស់ និងមន្ត្រីរាជការកងកម្លាំងប្រដាប់អាវុធគ្រប់ប្រភេទ គ្រប់ទីវត្តអារាម ព្រមទាំងប្រជាជនទូទាំងប្រទេស ត្រូវបង្ហូតទង់ជាតិត្រឹមពាក់កណ្តាល នៃដងទង់ជាតិ នៅថ្ងៃទៅ២៧ កុម្ភៈ ឆ្នាំ២០២៤។ សារាចរណែនាំ បានសរសេរទៀតថា «គ្រប់ស្ថានីយ៍វិទ្យុ និងទូរទស្សន៍ជាតិ និងឯកជនទាំងអស់ ត្រូវផ្អាកការសម្តែង និងចាក់ផ្សាយនូវទស្សនីយភាពផ្សេងៗ ដែលមានលក្ខណៈសប្បាយ គគ្រឹកគគ្រេង នៅថ្ងៃទី២៧ កុម្ភៈ ឆ្នាំ២០២៤។ សម្ដេចព្រះអគ្គមហាសង្ឃរាជាធិបតី ទេព វង្ស ព្រះជន្ម៩៣ព្រះវស្សា បានចូលព្រះទីវង្គត នាល្ងាចថ្ងៃចន្ទទី២៦កុម្ភៈ។ ព្រះមហាក្សត្រខ្មែរ ក្នុងព្រះរាជសំណេរតាមហ្វេសប៊ុកជាផ្លូវការមួយរបស់ព្រះអង្គ បានមានព្រះរាជបន្ទូលថា «សូមក្រាបថ្វាយព្រះរាជកុសលថ្វាយសម្តេចអគ្គព្រះមហាសង្ឃរាជរាជាធិបតី ទេព វង្ស សម្តេចព្រះមហាសង្ឃរាជគណៈមហានិកាយ នៃព្រះរាជាណាចក្រកម្ពុជា សូមស្តេចយាងគង់ប្រថាប់ក្នុងទីស្ថានព្រះបរមសុខ»។ ព្រះសពរបស់ព្រះអង្គត្រូវបានតម្កល់ទុកក្នុងឧណ្ណាលោម ដើម្បីធ្វើបុណ្យទក្ខិនុប្បទានឧទ្ទិស ព្រះរាជមហាកុសលថ្វាយព្រះវិញ្ញាណក្ខ័ន្ធព្រះសពតាមប្រពៃណីពុទ្ធសាសនាខ្មែរ រហូតដល់ថ្ងៃថ្វាយព្រះភ្លើង។ កាលបរិច្ឆេទ្ធនៃព្រះរាជពិធីថ្វាយព្រះភ្លើង នៅមិនទាន់បានកំណត់ថ្ងៃណាមួយនៅឡើយទេ។…

ជនសង្ស័យជាតិតៃវ៉ាន់ចំនួន៣នាក់ រួមនិងគ្រឿងញៀនជាង ១៦គីឡូក្រាម និងសារធាតុគីមីផ្សំជាង ៥គីឡូក្រាម ត្រូវបានសមត្ថកិច្ចបង្ក្រាបនៅភូមិសាស្ត្ររាជធានីភ្នំពេញ។ មន្ត្រីនគរបាលជាន់ខ្ពស់មន្ទីរប្រឆាំងបទល្មើសគ្រឿងញៀន បានថ្លែងនៅថ្ងៃទី២៥ ខែកុម្ភៈថា ការបង្ក្រាបបានធ្វើនៅចំណុចគោលដៅចំនួន២ក្នុងរាជធានី។ គោលដៅទី១៖ នៅខាងមុខហាងស៊ូស៊ែងយាន ផ្លូវបេតុង សង្កាត់ទន្លេបាសាក់ ខណ្ឌចំការមន និងគោលដៅទី២៖ នៅក្នុងខុនដូ PALM HOUSE ជាន់ទី១ បន្ទប់លេខ១០២ ផ្លូវលេខ៦៣ សង្កាត់បឹងកេងកង១ ក្នុងខណ្ឌបឹងកេងកង។ ជនសង្ស័យចិនតៃវ៉ាន់ទាំងបី ត្រូវបានគេបញ្ចេញអត្តសញ្ញាណរួមមាន១ឈ្មោះ អ៊ូ ចុងវ័យ អាយុ២៤ឆ្នាំ, ២៖ ឈ្មោះ លីន អ៊ីងគ័ង អាយុ៣១ឆ្នាំ, និង៣៖ ឈ្មោះ ង សឹកខៃ អាយុ២១ឆ្នាំ។ វត្ថុតាងដែលចាប់បានរួមមានសារធាតុញៀនអ៊ិចស្តាស៊ី MDMA ១៦គីឡូ និង១៣៦.១២ក្រាម, សារធាតុញៀនកេតាមីន ៣៦០ក្រាម និងសារធាតុញៀនអ៊ិនីមេតាហ្សេប៉ាម ១.៩៨ក្រាម។ ដោយឡែកសមត្ថកិច្ចនៅបានរឹបអូសសារធាតុមិនទាន់បញ្ជាក់ច្បាស់លាស់ចំនួន ៥គីឡូ និង៦២២ក្រាមថែមទៀត។

បណ្តាគណបក្សនយោបាយនានា បានគាំទ្រដំណើរការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ និងអបអរសាទរគណបក្សប្រជាជនកម្ពុជា ដែលទទួលបានជ័យជំនះ លើការបោះឆ្នោត យោងតាមលទ្ធផលប្រកាសបឋមរបស់គជប។ ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ ថ្ងៃទី២៥កុម្ភៈ មានគណបក្សនយោបាយចូលរួមចំនួន៤ គឺគណបក្សប្រជាជនកម្ពុជា, គណបក្សឆន្ទៈខ្មែរ, គណបក្សហ៊្វុនស៊ិនប៉ិច និងគណបក្សកម្លាំងជាតិ។ យោងតាមការប្រកាសលទ្ធផលបឋម, គណបក្សប្រជាជនកម្ពុជាទទួលបានសំឡេងគាំទ្រ ក្នុងមណ្ឌលភូមិភាគទាំង៨ នូវសំឡេងឆ្នោតសរុបចំនួន ១ម៉ឺន ៥២សំឡេង ដែលនឹងរំពឹងទទួលបានអាសនៈចំនួន ៥៥អាសនៈ។ គណបក្សដែលទទួលបានអសនៈក្នុងការបោះឆ្នោតនោះដែរ គឺគណបក្សឆន្ទៈខ្មែរ មានសំឡេងឆ្នោតគាំទ្រ ១ពាន់ ៣៩៤សំឡេង និងរំពឹងថា ទទួលបានចំនួន ៣អាសនៈ។ ចំណែកគណបក្សហ៊្វុនស៊ិនប៉ិច និងគណបក្សកម្លាំងជាតិ ដែលចូលរួមក្នុងការប្រកួតប្រជែង មិនទទួលបានអាសនៈឡើយ។ ក្រោយការប្រកាសលទ្ធផលបឋមនេះ, បណ្តាគណបក្សនយោបាយនានា ដួចជាគណបក្សកម្លាំងប្រជាធិបតេយ្យ, គណបក្សបំណងពលរដ្ឋ, គណបក្សយុវជនកម្ពុជា, គណបក្សម៉ូលីណាកា, គណបក្សខ្មែរអភិវឌ្ឍន៍សេដ្ឋកិច្ច, គណបក្សមហាសាមគ្គីជាតិ និងគណបក្សធម្មាធិបតេយ្យ បានធ្វើសេចក្តីថ្លែងការណ៍ អបអរសាទរគណបក្សប្រជាជនកម្ពុជា ដែលទទួលបានជ័យជំនះ ពីការបោះឆ្នោតព្រឹទ្ធសភានេះ។

ក្រសួងការបរទេសកម្ពុជាបានថ្លែងថា សម្តេចធិបតី ហ៊ុន ម៉ាណែត និងលោកជំទាវ ក្នុងដំណើរទស្សនកិច្ចថ្ងៃទី២៧កុម្ភៈ នៅប្រទេសម៉ាឡេស៊ី នឹងបានអញ្ជើញចូលក្រាបបង្គំគាល់ព្រះមហាក្សត្រម៉ាឡេស៊ី ព្រះចៅស៊ុលតង់ អ៊ីប្រាហ៊ីម នៅក្នុងព្រះបរមរាជវាំងអ៊ីស្តាណា ណេហ្គេរ៉ា Istana Negara។ សម្តេចធិបតីនាយករដ្ឋមន្ត្រីនឹងអញ្ជើញជួបជាមួយប្រធានព្រឹទ្ធសភាម៉ាឡេស៊ី ដាទុក មូតាំង តាហ្គាល់ និងជួបប្រធានរដ្ឋសភា តាន់ស៊្រី ដាទុក នាវិមានរដ្ឋសភានៃប្រទេសម៉ាឡេស៊ី។ សម្តេចធិបតីនឹងអញ្ជើញជួបពិភាក្សាទ្វេភាគីជាមួយនឹងនាយករដ្ឋមន្ត្រីម៉ាឡេស៊ី លោក អាន់ វ៉ា អ៊ីប្រាហ៊ីម ដែលនឹងផ្តោតលើកិច្ចសហប្រតិបត្តិការរវាងប្រទេសទាំង២ រួមទាំងកត្តាសន្តិសុខ នយោបាយ, ពាណិជ្ជកម្មនិងការបណ្តាក់ទុន, ទេសចរណ៍, ពលកម្ម, វិស័យអាហារបួស «ហាឡាល់» និងវិស័យបច្ចេកវិទ្យាឌីជីថល និងសន្តិសុខថាមពល ដែលជាផលប្រយោជន៍រវាងប្រទេសទាំង២។ នាយករដ្ឋមន្ត្រីនៃប្រទេសទាំង២ នឹងធ្វើជាសាក្សីនៃពិធីចុះហត្ថលេខាលើកិច្ចព្រមព្រៀងអនុស្សារណៈ MOU រវាងធនាគារជាតិ នៃប្រទេសទាំង២ ថែមទៀត។ ក្នុងដំណើរទស្សនកិច្ចមួយថ្ងៃទី២៧កុម្ភៈនោះផងដែរ, សម្តេចធិបតីនឹងចួលរួមក្នុងវេទិកាធុរកិច្ច កម្ពុជា ម៉ាឡេស៊ី ដែលសម្តេចនឹងថ្លែងសុន្ទរកថាគន្លឹះមួយ ក្នុងវេទិកានោះ និងអញ្ជើញធ្វើជាសាក្សី នៃពិធីចុះហត្ថលេខា MOU នៃកិច្ចសហប្រតិបត្តិការពាណិជ្ជកម្មរវាងសភាពាណិជ្ជកម្ម នៃប្រទេសទាំង២។…