ប្រធានរដ្ឋសភានៃប្រទេសកម្ពុជា បានអនុញ្ញាតទទួលជួបសម្តែងការគួរសមជាមួយនឹងឯកអគ្គរដ្ឋទូតអាមេរិក លោក Patrick Murphy ដែលបានអបអររាជរដ្ឋាភិបាលកម្ពុជាលើនយោបាយចាក់វ៉ាក់សាំង។

ប្រជាពលរដ្ឋដែលបានទទួលការចាក់វ៉ាក់សាំងក្នុងរយៈពេល២៤ម៉ោងកន្លងមកនេះ មានចំនួន ៧ពាន់ ៦១៥នាក់ ក្នុងនោះការចាក់វ៉ាក់សាំងលើមនុស្សអាយុលើសពី១៨ឆ្នាំមានចំនួន៣ពាន់៦៥៥នាក់។ កម្ពុជាបានដាក់ផែន ការណ៍ចាក់លើមនុស្ស១០លាននាក់ ដែលមានវ័យពី១៨ឆ្នាំឡើងទៅ ចាប់តាំងពីខែកុម្ភៈនោះមក និងគិតត្រឹមថ្ងៃ ទី២៨តុលានេះ តួលេខចាក់លើមនុស្សអាយុលើសពី១៨ឆ្នាំ បានចំនួន ៩លាន៩សែន៨ម៉ឺន៩ពាន់៨០៤នាក់ដែល នៅសល់១ម៉ឺន ១៩៦នាក់ទៀត នឹងគ្រប់ផែនការណ៍ចំនួន១០លាននាក់។

តួលេខឆ្លងកូវីដ១៩ក្នុងរយៈពេល២៤ម៉ោងចុងក្រោយនេះបានបន្តធ្លាក់ចុះតិចតួចថែមទៀត ប៉ុន្តែក្នុងរង្វង់តួលេខ ជាង១០០ករណីជាដដែល។

ទីក្រុងទេសចរណ៍រាជធានី បានបន្តការផ្អាកបណ្តោះអាសន្នរយៈពេល១៤ថ្ងៃទៅមុខនេះថែមទៀត ទោះបីជា មានផែនការរៀបចំបើកដំណើរការសេដ្ឋកិច្ចសាឡើងវិញនាចុងឆ្នាំនេះក៏ដោយ។

ប្រមុខរាជរដ្ឋាភិបាលកម្ពុជា បានថ្លែងស្វាគមន៍ការប្តេជ្ញាចិត្តរបស់រុស្ស៊ីលើផ្នែកប្រយុទ្ធប្រឆាំងអំពើភេរវកម្ម, ប្រឆាំងអំពើឧក្រិដ្ឋឆ្លងដែន, បញ្ហាសន្តិសុខបច្ចេកវិទ្យា, គមនាគមន៍និងព័ត៌មាន។ ប្រសាសន៍ថ្លែងស្វាគមន៍ នេះ បានធ្វើឡើងនៅថ្ងៃទី២៨តុលានេះ ក្នុងសុន្ទរកថាអន្តរាគមន៍នាកិច្ចប្រជុំកំពូលអាស៊ានរុស្ស៊ីលើក៤ ។

រាជរដ្ឋាភិបាលកម្ពុជាបានចូលរួមជាមួយបណ្តាប្រទេសក្នុងតំបន់ជុំវិញសេចក្តីស្នើនិងការចង់ឃើញតំបន់អាស៊ី អាគ្នេយ៍ គឺជាតំបន់សន្តិភាពនិងរីកចំរើនប្រកបដោយឋាមពល។ សេចក្តីស្នើនិងបំណងប្រាថ្នាទាំងនេះ ត្រូវបាន លើកឡើងដោយប្រមុខរាជរដ្ឋាភិបាលកម្ពុជាសម្តេចតេជោហ៊ុនសែន នៅក្នុងកិច្ចប្រជុំកំពួលអាស៊ីបូព៌ាលើកទី១៦ ដែលទើបនឹងបញ្ចប់នាពេលថ្មីៗនេះ។

ការបង្ក្រាបលើសកម្មភាពល្មើសក្នុងរយៈពេល២៤ម៉ោងកន្លងមកនេះមិនបានកើតឡើងលើជនណាម្នាក់ឡើយ ទាំងវិធានការសុខាភិបាល, វិធានការរដ្ឋបាលនិងវិធានការច្បាប់ ខណៈការផ្សព្វផ្សាយច្បាប់របស់គណៈកម្មការ អន្តរក្រសួង ដើម្បីប្រយុទ្ធនឹងជម្ងឺកូវីដ១៩ បានធ្វើជារៀងរាល់ថ្ងៃបន្តបន្ទាប់មកនេះ ។