(ភ្នំពេញ)៖ គណៈកម្មការរៀបចំការប្រឡងប្រជែងបានបញ្ជាក់ថា “ទោះបីជាមានផលរំខាននានានៅមណ្ឌលប្រឡងទាំងពីរដែលបណ្តាលមកពីអាកាសធាតុ និងភ្លៀងធ្លាក់ខ្លាំងយ៉ាងណាក្តី ក៏ក្រុមការងារបានញាប់ដៃញាប់ជើង ក្នុងការរៀបចំស្ថានការណ៍ឱ្យប្រសើរឡើងវិញ ដើម្បីធានាដល់ការប្រឡងប្រជែងដំណើរការបានជាប្រក្រតី។” នេះបើតាមការបង្ហោះលើទំព័រផ្លូវការរបស់ក្រសួងមុខងារសាធារណៈ។ គួរបញ្ជាក់ដែរថា ខណៈដែលក្រុមការងារបាននិងកំពុងរៀបចំឡើងវិញនៅទីតាំងផ្ទាល់ វត្តមានរបស់ឧបនាយករដ្ឋមន្ត្រី ហ៊ុន ម៉ានី និងថ្នាក់ដឹកនាំទាំងអស់ បានអញ្ជើញចុះពិនិត្យស្ថានភាពជាក់ស្តែង និងចេញបទបញ្ជាដោះស្រាយបញ្ហាភ្លាមៗ នៅនឹងកន្លែង ដើម្បីសម្រួលដល់ការប្រឡងឱ្យប្រព្រឹត្តទៅបានដោយរលូន និងជោគជ័យតាមការគ្រងទុក។ ជាមួយគ្នានេះ គណៈកម្មការរៀបចំការប្រឡងប្រជែងក៏បានរំលឹកដល់បេក្ខជន និងអាណាព្យាបាលបេក្ខជនដែលអញ្ជើញមកកាន់មណ្ឌលប្រឡង សូមឱ្យមានការកត់សម្គាល់ ប្រុងប្រយ័ត្ន និងយកចិត្តទុកដាក់ខ្ពស់បំផុតស្របពេលដែលស្ថានភាពអាកាសធាតុអាចនឹងមានការប្រែប្រួល ជាពិសេសឱកាសដែលអាចនឹងមានភ្លៀងធ្លាក់ក្នុងអំឡុងពេលបេក្ខជន មកដល់មណ្ឌលប្រឡង និងខណៈពេលត្រួតពិនិត្យមុនចូលមណ្ឌលប្រឡង៕ ដោយ ៖ ង៉ាន់ ទិត្យ

(សៀមរាប)៖ ក្រុមការងារនាយកដ្ឋានអភិរក្សប្រាសាទ និងបុរាណវិទ្យា នៃអាជ្ញាធរជាតិអប្សរា បានប្រទះឃើញបំណែករូបព្រះពុទ្ធបដិមាធ្វើពីថ្មភក់ប្រមាណជាង ១០០បំណែក នៅក្នុងបរិវេណរបស់ប្រាសាទតាព្រហ្ម ខណៈពេលដែលជីកដីធ្វើកំណាយសម្រាប់ស្រាវជ្រាវ កាលពីពេលថ្មីៗ។ បំណែកបដិមាទាំងនោះ មានដូចជា រូបព្រះពុទ្ធគង់ភ្នែនប្រក់នាគ រូបលោកកេស្វរៈ រូបព្រះពុទ្ធគង់ភ្នែនប្រក់នាគសមាធិ រូបប្រាជ្ញាបារមិតា រូបព្រះកេសព្រះពុទ្ធប្រក់នាគមួយកំណាត់ ដាច់ត្រឹម ក បាល័ង្ល និងបំណែកដៃជើងជាដើម។ បុរាណវិទូ លោកស្រី នេត ស៊ីមន ឱ្យដឹងថា ដំបូងឡើយ គឺក្រុមការងារបានទៅធ្វើការសម្អាតគំនរដី ដែលស្ថិតផ្នែកខាងត្បូង នៃកំពែងថ្មបាយក្រៀមរបស់រោងទងទី៣ នៃប្រាសាទតាព្រហ្ម ដើម្បីរៀបចំសម្រង់ប្លង់បំណែកថ្មដែលរាយប៉ាយ ព្រមទាំងមានការថតរូប ចុះបញ្ជីចូលទៅក្នុងប្លង់រួមរបស់ប្រាសាទឱ្យមានសណ្ដាប់ធ្នាប់ ដោយសារតែនៅទីនោះ មានថ្មរាយប៉ាយច្រើន។ កំឡុងពេលសម្អាត ក្រុមការងារ ក៏បានប្រទះឃើញបំណែករូបបដិមាជាច្រើននៅទីនោះ។ លោកស្រី ស៊ីមន បន្តទៀតថា ដោយសារតែក្រុមការងារប្រទះឃើញបំណែកបដិមាកប់នៅក្នុងដីជម្រៅពី ១០ ទៅ ១៥សង់ទីម៉ែត្រ កាន់តែច្រើននោះ ក៏សម្រេចស្នើសុំយោបល់ពីថ្នាក់លើ ធ្វើរណ្តៅកំណាយ ដើម្បីស្រាវជ្រាវរកនៅក្រោមដីបន្ថែមទៀត។ នៅពេលជីកកាយដីជ្រៅបន្តិច ក៏ប្រទះឃើញបំណែករូបបដិមាកាន់តែច្រើន សរុបប្រហែលជាង ១០០បំណែក ។ រហូតមកដល់ពេលនេះ…

(ខេត្តព្រះវិហារ)៖ ប្រជាពលរដ្ឋរងគ្រោះដោយខ្យល់កន្ត្រាក់ ៧គ្រួសារ នៅក្នុងសង្កាត់ពីរ នៃក្រុងព្រះវិហារ ទទួលបានការយកចិត្តទុកដាក់ ពីថ្នាក់ដឹកនាំខេត្ត និងអាជ្ញាធរក្រុង ក្រោយជួបឧបទ្ទវហេតុខ្យល់កន្ត្រាក់បំប៉ើងដំបូលផ្ទះ ដោយលាយឡំជាមួយភ្លៀងកក់ខែមួយធំ ដែលជាការធ្លាក់ភ្លៀងលើកដំបូងបង្អស់ នៅក្នុងរដូវប្រាំងដែលបានអូសបន្លាយដ៏វែងនេះ ។ ដោយមើលឃើញពីការរងទុក្ខលំបាក របស់ប្រជាពលរដ្ឋនៅក្នុងមូលដ្ឋាន គ្រាដែលវិបត្តិសេដ្ឋកិច្ចជាសកល កំពុងរងនូវការស្រុតចុះយ៉ាងគំហុកនោះ និងស្របពេលដែលគ្រោះធម្មជាតិ បានយាយីគ្របដណ្តប់មកលើលំនៅដ្ឋានប្រជាពលរដ្ឋ ក៏ដូចនឹងការចង់ដោះទុក្ខលំបាកប្រជាពលរដ្ឋ នៅក្នុងមូលដ្ឋានមួយគ្រាផងនោះ នៅរសៀលថ្ងៃទី២៩មេសា២០២៤ គណៈកម្មាធិការអនុសាខាកាកបាទក្រហមកម្ពុជា ក្រុងព្រះវិហារ ដឹកនាំដោយ លោក ប៉ុក ងួន អភិបាលក្រុងព្រះវិហារ និងលោក នូ តារាមុន្នី ប្រធានគណៈកម្មាធិការអនុសាខាកាកបាទក្រហមក្រុងព្រះវិហារ បានដឹកនាំក្រុមការងារ នាំយកអំណោយមនុស្សធម៌ កាកបាទក្រហមកម្ពុជា ខេត្តព្រះវិហារ ផ្តល់ជូនគ្រួសារដែលរងផលប៉ះពាល់ដោយខ្យល់កន្ត្រាក់ ៧គ្រួសារ ស្ថិតនៅក្នុងភូមិភារកិច្ច សង្កាត់ប៉ាលហាល ៦គ្រួសារ និង នៅក្នុងភូមិគោកបេង សង្កាត់កំពង់ប្រណាក ១គ្រួសារ ដែលរងផលប៉ះពាល់ធ្ងន់ពីខ្យល់កន្ត្រាក់ ដោយក្នុង ១គ្រួសារៗ ទទួលបានអង្ករ ២៥គីឡូក្រាម, មី១កេស, ត្រីខកំប៉ុង១យួរ, តង់១ និងទឹកស៊ីអ៊ីវ១យួរ…

(ភ្នំពេញ)៖ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការនៃក្រសួងសុខាភិបាលបានបង្ហាញការព្រួយបារម្ភបន្ទាប់ពីកំដៅបានឡើងកំដៅខ្លាំងនៅថ្ងៃទី០៥ ខែឧសភានេះដោយកើនឡើងរហូតដល់ ៤៦អង្សាសេដែលមិនធ្លាប់មាននៅកម្ពុជា។ លោកជំទាវវេជ្ជបណ្ឌិត ឱ វណ្ណឌីនបានបញ្ចេញសារក្នុងទំព័រហ្វេសប៊ុកផ្ទាល់ខ្លួនដោយបញ្ជាក់ថា៖”នៅកម្ពុជាពេលនេះ គឺអាកាសធាតុបានប្រែទៅជាក្តៅបំផុតមិនធ្លាប់មានពីមុនមកនោះឡើយ។ សូមបងប្អូនមានការប្រុងប្រយ័ត្នខ្ពស់លើសុខភាព ដែលអាចនឹងមានការដួលសន្លប់ ឬលេសឡាស់ដោយខ្វះជាតិទឹកក្នុងខ្លួនជាដើម។ ការប្រែប្រួលអាកាសធាតុ នាពេលនេះ គឺជាការពិត ហើយ។ ថ្ងៃនេះកំដៅកើនឡើងអាចដល់ ៤៦ អង្សារសេទៅហើយ”។ ជាមួយការបញ្ជាក់បែបនេះ លោកជំទាវរដ្ឋលេខាធិការក៏បានស្នើសុំឱ្យប្រជាពលរដ្ឋ យកចិត្តទុកដាក់ខ្ពស់ក្នុងការការពារសុខភាពផ្ទាល់ខ្លួនឱ្យបានត្រឹមត្រូវតាមការណែនាំរបស់ក្រសួងសុខាភិបាលដែលបានចេញផ្សាយជូនសាធារណជនរួចហើយ ដែលលោកអ្នកអាចស្វែងរកមើលបានតាមទំព័រហ្វេសប៊ុករបស់ក្រសួងផងដែរ។ លោកជំទាវវេជ្ជបណ្ឌិត បានលើកឡើងថា” អ្វីដែលសំខាន់នៅពេលនេះ គឺមិនត្រូវស្ថិតនៅក្រោមពន្លឺថ្ងៃក្តៅខ្លាំងនេះក្នុងរយ:ពេលយូរពេក ដែលនាំឱ្យរលាកស្បែក បែកញើសខ្លាំងពេកធ្វើឱ្យខ្វះជាតិទឹកក្នុងខ្លួន សរីរាង្គកាយមិនអាចទ្រាំទ្របានដែលអាចឱ្យលេសឡាស់ ដង្ហក់ ឬដួលសន្លប់ ហើយគាំងបេះដូងស្លាប់ជាដើម។ ត្រូវរកទីតាំងម្លប់ជ្រក បើនៅក្រៅផ្ទះ ឬអគារ រកកន្សែង ឬក្រម៉ាជ្រលក់ទឹកគ្រប់ដណ្តប់ខ្លួន ឧស្សាបាញ់ទឹកនៅជុំវិញខ្លួន ពិសារទឹកស្អាតឱ្យបានគ្រប់គ្រាន់ពី ២-៣លីត្រក្នុងមួយថ្ងៃ សូមកុំពិសារភេសជ្ជផ្អែមដែលធ្វើឱ្យកំដៅខ្លួនបុគ្គលកើនថែមក្នុងពេលដែលក្តៅខ្លាំងនេះ និងប្រេីសម្លៀកបំពាក់ស្រាលស្តើង ដៃវែង ពាក់មួកការពារកំដៅថ្ងៃ អាចប្រើឡូស្យុងការពារកំដៅថ្ងៃ ឬប្រើឆ័ត្របាំងកំដៅថ្ងៃ។ បើនៅក្នុងផ្ទះ ឬអគារ អាចប្រើកង្ហា ឬម៉ាស៊ីនត្រជាក់ កាត់បន្ថយកំដៅ។ ចៀសវាងការបរិភោគផ្អែមពេក…

សៀមរាប៖ សិស្សានុសិស្ស១៥០នាក់ បានទទួលបានវិញ្ញាបនបត្របញ្ជាក់ការសិក្សាភាសាចិន និងបណ្ណសរសើរពីសាលាភាសាជីងហ៊ួ បន្ទាប់ពីបញ្ចប់វគ្គសិក្សា។ ពិធីប្រគល់នេះ បានប្រារព្ធនៅសាលាភាសាចិនជីងហួរ ស្ថិតនៅសង្កាត់ស្វាយដង្គុំ ក្រុងសៀមរាប កាលពីថ្ងៃទី២៦ ខែមេសា ឆ្នាំ២០២៤។ លោក ថាប់ សេងហុក ស្ថាបនិកសាលាភាសាចិនជីងហ៊ួរ បានថ្លែងថា សាលាភាសាចិនជីងហ៊ួរនេះ មិនត្រឹមតែបង្រៀនសិស្សឱ្យមានចំណេះលើភាសាចិន ភាសាអង់គ្លេស កុំព្យូទ័រ និងតៃក្វាន់ដូប៉ុណ្ណោះទេ ថែមទាំងបានចូលរួមជាមួយសង្គមក្នុងការផ្ដល់អាហាររូបករណ៍ដល់សិស្សានុសិស្ស និស្សិត ជិត១០០នាក់ ដែលខ្វះខាតនិងគ្មានលទ្ធភាពបង់ថ្លៃសិក្សាជារៀងរាល់ឆ្នាំផងដែរ។ លោកស្រី សូ ចិន្ដា មន្ដ្រីទទួលបន្ទុកអប់រំកុមារ នៃការិយាល័យអប់រំយុវជន និងកីឡាក្រុងសៀមរាបបានលើកឡើងថា វិស័យអប់រំមានតួនាទីយ៉ាងសំខាន់ ក្នុងការបណ្តុះបណ្តាលធនធានមនុស្ស សម្រាប់ធ្វើការអភិវឌ្ឍប្រទេសជាតិ។ដើម្បីឱ្យកុមារបានទទួលបានការបណ្តុះបណ្តាលគ្រប់ៗគ្នា រាជរដ្ឋាភិបាលបានខិតខំធ្វើការនិងផ្ដល់ឱ្យវិស័យឯកជនបណ្ដុះបណ្ដាល់ជំនាញដល់សិស្សានុសិស្សនៅតាមសាលាជនដើម្បីទទួលបានចំណេះដឹងបន្ថែមទៀត ពីសាលារៀនរដ្ឋ។លោកស្រីបន្ដថា យើងទទួលស្គាល់សាលាភាសាចិនជីងហ៊ួរ ពិតជាបានផ្ដល់ចំណេះដឹងនិងជំនាញជាច្រើនផ្នែក ទាំងភាសាចិន កុំព្យូទ័រ ភាសាអង់គ្លេសដល់សិស្សានុសិស្សាបានយ៉ាងល្អប្រសើរ៕ដោយ:ស៊ាន សុផាត