បន្ទាយមានជ័យ៖មន្រ្តីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ បានផ្តល់ជាអនុសាសន៍ថា ការផលិតកសិផល បានទាន់ពេលវេលាតាម​តម្រូវការទីផ្សារ ជាមូលដ្ឋានចាំបាច់បំផុតសម្រាប់សហគមន៍កសិកម្មទំនើប។ ក្នុងកិច្ចប្រជុំបូកសរុបលទ្ធផលការងារគណបក្សប្រជាជនកម្ពុជាខេត្តបន្ទាយមានជ័យ​ឆ្នាំ២០២៤​នាទីស្នាក់ការ​គណបក្សខេត្តកាលពីថ្ងៃទី៧ ខែកុម្ភៈឯកឧត្តម មាស ពិសិទ្ធ រដ្ឋលេខាធិការក្រសួងកសិកម្មបានបញ្ជាក់ថា ឆ្លើយតបទៅ​នឹង​សេដ្ឋកិច្ចទីផ្សារ ប្រជាកសិករ ឬសហគមន៍កសិកម្មទំនើប ត្រូវធ្វើការដាំដុះ​ដំណាំកសិកម្មនីមួយៗដែលធានាបាន​ទាំងបរិមាណ គុណភាព ពេលវេលា និងតម្រូវការទីផ្សារ។នេះជាមូលដ្ឋានចាំបាច់បំផុតសម្រាប់កសិកម្មទំនើប ។ ឯកឧត្តម មាស ពិសិទ្ធ បន្តថា ទន្ទឹមនឹងការផលិតបានឆ្លើយតបទីផ្សារ អ្នកដឹកនាំសហគមន៍កសិកម្មទំនើប​ក៏ត្រូវមាន​ភាពឈ្លាសវៃផងដែរ។ឯកឧត្តមនិយាយបន្ថែមថា ក្រសួងកសិកម្ម​បាននិងកំពុងរកដៃគូពាក់​ព័ន្ធវិស័យកសិកម្ម​និងគាំទ្រ​ទុនដល់ការផលិតកម្មរបស់សហគមន៍​កសិកម្មទំនើបតាមរយៈ រដ្ឋឬឯកជនដោយភ្ជាប់ទំនាក់ទំនងរវាងគ្នា។ ចូលរួមផ្តល់អនុសាសន៍ក្នុងឱកាសនេះឯកឧត្តម កែ គឹមយ៉ាន សមាជិក​គណៈអចិន្ត្រៃយ៍ គណៈកម្មាធិការកណ្តាលគណបក្ស​ប្រជាជនកម្ពុជានិង​ប្រធាន​ក្រុមការងាគណបក្ស ចុះមូលដ្ឋានខេត្តបន្ទាយមានជ័យបានជំរុញដល់ រដ្ឋបាលខេត្ត ក្រុង ស្រុក អាជ្ញាធរមូលដ្ឋាន ខិតខំលើកទឹកចិត្តកសិករចូលរួម​ចង​ក្រងជាសហគមន៍កសិកម្មទំនើប ប្រយោជន៍ធានានូវការផលិត​សម្រាប់ទី​ផ្សារកសិផល និងធានានូវប្រាក់ចំណូល​ដែលជាកម្មវិធីនយោបាយរបស់​រាជរដ្ឋាភិបាល ។ឯកឧត្តមបន្តដោយ​យកចិត្តទុកដាក់ កែលំអសហគមន៍​កសិកម្មដែលមានស្រាប់ជាង១ ២០០​សហគមន៍​ទូទាំងប្រទេស​និងចងក្រងថ្មី​ឱ្យទៅ​ជាសហគមន៍​កសិកម្មទំនើប ៕ដោយ ៖គៀន ច័ន្ទហ៊ីន

(ភ្នំពេញ)៖ អ្នកជំនាញសេដ្ឋកិច្ច និងសមាគមវាយនភណ្ឌ សម្លៀក​បំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC) បានលើកឡើងថា កម្ពុជានៅតែអាចរក្សាកំណើនការនាំ​ចេញ​សម្លៀក​បំពាក់ ស្បែកជើង និងផលិតផលធ្វើដំណើររបស់ខ្លួន​ទៅកាន់សហភាពអឺរ៉ុបបាន បើទោះបីការអនុគ្រោះពន្ធមួយចំនួ​ន​ត្រូវបានកាត់ផ្តាច់ និងមិនទាន់ត្រូវបានកាត់ផ្តាច់ទាំងស្រុង​យ៉ាងណាក៏ដោយ។ លោកបណ្ឌិត គី សេរីវឌ្ឍន៍ អ្នកវិភាគសេដ្ឋកិច្ច នៃរាជបណ្ឌិត្យសភា​កម្ពុជាមើលឃើញថា ការរក្សាបាននូវកំណើនការនាំចេញ​សម្លៀក​បំពាក់ ស្បែកជើង និងផលិតផលធ្វើដំណើរ គឺមានកត្តាជាច្រើន ក្នុងនោះតំណែងនៅក្នុងការប្រកួតប្រជែងទីផ្សាររបស់កម្ពុជានៅលើឆាកអន្តរជាតិនៅតែរក្សាបាន, ផលិតភាពរបស់កម្ពុជានៅ​តែខ្ពស់​ដដែល។ ទន្ទឹមនឹងនេះ កម្ពុជាក៏បានក្លាយជាប្រទេសទទួល​បានការ​បញ្ជាទិញខ្ពស់ដដែល បន្ទាប់ពីបណ្តាប្រទេសមួយចំនួនមានវិបត្តិ​នយោបាយ និងសេដ្ឋកិច្ច ដោយសារភាពចលាចលក្នុងប្រទេស។ អ្នកជំនាញសេដ្ឋកិច្ចរូបនេះ បានគូសបញ្ជាក់បន្ថែមថា កម្ពុជា​នៅតែ​អាចរក្សាកំណើននៃការនាំចេញរបស់ខ្លួនបានល្អ បើទោះបីការកាត់​ប្រព័ន្ធអនុគ្រោះពន្ធពីសហភាពអឺរ៉ុបមួយចំនួន (EBA) និងទាំង​ស្រុង​របស់សហរដ្ឋអាមេរិក (GSP) យ៉ាងណាក៏ដោយ។ ពិតណាស់វាមិន​ធ្វើឱ្យប៉ះពាល់ការនាំចេញរបស់កម្ពុជាទាំងស្រុងនោះទេ។ លោកបានសង្កត់ធ្ងន់ថា បើទោះបីជាយ៉ាងណាក៏ដោយរាជ​រដ្ឋាភិ​បាល​កម្ពុជាត្រូវតែត្រៀមខ្លួនដើម្បីរក្សាបាននូវផលិតភាព និង​កំណើននៃការនាំចេញរបស់ខ្លួន តាមរយៈ​ការបង្កើន​សមត្ថភាព​ជំនាញរបស់ពលរដ្ឋ ដើម្បីត្រៀមទទួលយកការវិនិយោគបែបថ្មី និងមានទ្រង់ទ្រាយធំជាមុន។ ចំណែក អគ្គលេខាធិការរងនៃសមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC) លោក កាំង ម៉ូនីកា ក៏បានមើលឃើញដែរថា កម្ពុជាបានត្រៀមខ្លួន…

បាត់ដំបង៖រដ្ឋាករទឹកបាត់ដំបងបានចាប់ផ្តើមបើកការដ្ឋានថ្មី ដើម្បីពង្រីក​បណ្តាញ​ចែកចាយទឹកស្អាតបន្ថែមទៀត ដើម្បី​តភ្ជាប់ទុយោបំពង់ដែកមេ និងជាបណ្តាញមេ ចេញពីស្ថានីយក្នុងក្រុងបាត់ដំបង និងចែកចាយផ្គត់ផ្គង់ទឹក​ស្អាតដោយ​ឆ្លងកាត់សង្កាត់ចំនួន២ក្នុងក្រុងបាត់ដំបង និងឃុំចំនួនមួយ របស់ស្រុកថ្មគោល។ ទន្ទឹមនឹងសកម្មភាពបើកការដ្ឋានថ្មីចាប់ផ្តើមកាលពីថ្ងៃទី៣ ខែកុម្ភៈ ឆ្នាំ២០២៥ ឯកឧត្តម អ៊ុត ក្លឹង អគ្គ នាយករដ្ឋាករទឹក​បាត់ដំបងនិងក្រុមការងារបាន​អញ្ជើញ​ពិនិត្យមើលការដ្ឋានសាងសង់ភ្ជាប់បណ្តាញទុយោមេថ្មីនេះ ស្ថិតនៅភូមិបល្ល័ង្គ សង្កាត់វត្តគរ ក្រុងបាត់ដំបង ។ តាមការបញ្ជាក់របស់ឯកឧត្តម អ៊ុត ក្លឹង បានឱ្យដឹងថា នៅដើមឆ្នាំ២០២៥នេះ រដ្ឋាករទឹកបាត់ដំបង បាននិងកំពុងតែ​រៀបចំ​ប្រព័ន្ធទុយោមេបណ្តាញ​ទឹកស្អាត​ទៅកាន់មូលដ្ឋានគោលដៅ ស្រុក-ក្រុង មួយចំនួនបន្ថែមទៀតជំរុញការ​ផ្គត់ផ្គង់ទឹកស្អាត​ជូនប្រជាពលរដ្ឋបានប្រើប្រាស់ឆាប់ៗខាងមុខ។ជាក់ស្តែងការ​បើកការដ្ឋានថ្ងៃនេះយើងបានពង្រីកវិសាលភាព​ក្នុងការ​ចែក​ចាយ និងផ្គត់ផ្គង់ទឹក​ស្អាត ដោយបានភ្ជាប់បណ្តាញបំពង់ទុយោមេខ្នាតមុខកាត់០,៦០ម៉ែត្រ និងមាន​ប្រវែងពីរពាន់​ម៉ែត្រ​នៅទីនេះ ដោយឆ្លងកាត់ក្នុងសង្កាត់វត្តគរ សង្កាត់អូរម៉ាល់ ក្រុងបាត់ដំបង និងឆ្លងកាត់ឃុំជ្រៃ ស្រុកថ្មគោល ។ការងារ​នេះ​​គ្រោងនឹង​បញ្ចប់​ក្នុងរយៈពេលមួយខែគិតចាប់ពីការចាប់​ផ្តើម បើកការដ្ឋានថ្ងៃនេះ។ ឯកឧត្តមអគ្គនាយករដ្ឋាករទឹកបាត់ដំបង ក៏បានបន្ថែមឱ្យដឹងទៀតថា បន្ទាប់​ពីស្ថានីយផលិតទឹកស្អាតទី៣ ស្ថិតនៅភូមិ​កំពង់សីមា សង្កាត់វត្តគរ ក្រុងបាត់ដំបង​​ដែលកំពុងតែពន្លឿន ហើយនឹង​ត្រូវបិទបញ្ចប់ការ​សាងសង់​នៅ​ក្នុងឆ្នាំ២០២៥នេះដែរ រដ្ឋាករទឹកបាត់ដំបងនឹងបន្តជំរុញ​ការពង្រីកតភ្ជាប់​បណ្តាញ​បំពង់ទុយោទឹកមេខ្នាតធំបែបនេះ ឆ្ពោះទៅ​កាន់​បណ្តា​ឃុំនៅជិតគោល​ដៅដូចជា ឃុំភ្នំសំពៅ នៃ ស្រុកបាណន់ ជាដើម។ សូមជម្រាបថា ស្ថានីយផលិតទឹកស្អាតទី៣ ដែលកំពុងសាងសង់បាន​ប្រមាណ​ពី៨៥ទៅ៩០…

ក្រចេះ៖ក្នុងឱកាសចុះពិនិត្យកិច្ចការងារនៅមូលដ្ឋានខេត្តក្រចេះ កាលពីចុងសបា្តហ៍កន្លងទៅនេះ រដ្ឋមន្ត្រីក្រសួងព័ត៌មាន និងជាប្រធានក្រុមការងាររាជរដ្ឋាភិបាល ចុះមូលដ្ឋានខេត្តក្រចេះ ឯកឧត្តម នេត្រ ភក្ត្រា បានអំពាវនាវដល់ប្រជាពលរដ្ឋ រួមទាំងអាជ្ញាធរមូលដ្ឋាន ឱ្យចូលរួមការពារ និងអភិរក្សសត្វផ្សោតនៅតាមដងទន្លេមេគង្គ ដើម្បីអភិរក្សជីវៈចម្រុះដ៏សម្បូរបែប នៃទន្លេមេគង្គឱ្យបានគង់វង្ស និងផ្តល់ផលប្រយោជន៍ជូនសហគមន៍មូលដ្ឋាន តាមរយៈការលើកកម្ពស់ទេសចរណ៍ធម្មជាតិ ដើម្បីបង្កើនចំណូលជូនដល់ប្រជាពលរដ្ឋ នៅថ្នាក់មូលដ្ឋាន ផងដែរ។ ឯកឧត្តមរដ្ឋមន្ត្រី នេត្រ ភក្ត្រា បានថ្លែងថា សត្វផ្សោតជាសម្បត្តិធម្មជាតិដ៏មានតម្លៃសម្រាប់កម្ពុជា និងសម្រាប់ជីវៈចម្រុះ​ពិភព​លោក ហើយបច្ចុប្បន្ន សត្វផ្សោតនៅកម្ពុជាមានចំនួនប្រមាណ ១០៥ ក្បាលដែលរស់នៅទន្លេមេគង្គក្នុងភូមិសាស្ត្រ​ខេត្តក្រចេះ និងខេត្តស្ទឹងត្រែង ជាពិសេសនៅតំបន់អភិរក្សព្រែកកាំពី ក្នុងស្រុកចិត្របុរី ជាកន្លែងទេសចរណ៍សត្វផ្សោត​ដ៏សំខាន់ ហើយមួយថ្ងៃៗ មានទេសចរជាតិ និងអន្តរជាតិ បានអញ្ជើញទៅទស្សនាកម្សាន្ត ដែលផ្តល់នូវការងារ និងចំណូល​ជូនដល់សហគមន៍មូលដ្ឋាន។ ខេត្តក្រចេះមានទីតាំងទេសចរណ៍ ប្រកបដោយសក្តានុពលជាច្រើន ដូចជា អន្លង់សត្វផ្សោតព្រែកកាំពី ស្ថិតក្នុងស្រុកចិត្របុរី, រមណីយដ្ឋានឆ្នេរខ្សាច់វត្ដសសរ១០០ ស្ថិតនៅក្នុងស្រុកសំបូរ, តំបន់សហគមន៍ទេសចរណ៍សហគមន៍កោះទ្រង់ ស្ថិត​ក្នុងក្រុងក្រចេះ និងរមណីយដ្ឋានទឹកជួរទន្លេមេគង្គកាំពី។ ជាមួយគ្នានេះ ខេត្តក្រចេះក៏មាននូវផលិតផលសំខាន់ៗទាក់​ទាញភ្ញៀវទេសចរជាច្រើន ដូចជា ក្រឡានថ្មគ្រែ, ក្រូចថ្លុងកោះទ្រង់ ប៉ិកួៈនៅស្រុកឆ្លូង…

ភ្នំពេញ៖រដ្ឋបាលរាជធានីភ្នំពេញកាលពីចុងសប្ដាហ៍កន្លងទៅនេះ បានដាក់ឱ្យ​ដំណើរ​ការសាកល្បងជាលើក​ដំបូង​រយៈពេល​២ថ្ងៃ នូវផ្លូវថ្មើរជើង ឬ walk street គឺនៅថ្ងៃសៅរ៍ទី១ ខែកុម្ភៈ និងថ្ងៃអាទិត្យទី២ ខែកុម្ភៈ ឆ្នាំ២០២៥​ ចាប់ពីម៉ោង ៦ល្ងាច រហូតដល់ម៉ោង១១ យប់ នៅតាមបណ្តោយតិរវិថី​ព្រះ​ស៊ីសុវត្ថិ ចាប់ពីវិថីបក្សីចាំក្រុង (ផ្លូវលេខ៩៤) រហូតដល់មុខ​ព្រះបរម​រាជវាំង ក្នុងខណ្ឌដូនពេញ ។បន្ទាប់ពីដាក់ដំណើរការសាកល្បង​រួច ជាលទ្ធ​ផល គឺទទួល​បាន​គាំទ្រពីភ្ញៀវជាតិ និងអន្តរជាតិ ។ការគាំទ្រតាមរយៈការបង្ហាញនូវវត្តមាន​អ្នកធ្វើដំណើរកម្សាន្តចម្រុះជាសាសន៍ មានចំនួនយ៉ាងច្រើនកុះករ ខុសពីពេលធម្មតា ។ លោកស្រី ដោ សម្ផស្ស នាយិការរងរដ្ឋបាល និងជាអ្នកនាំពាក្យរដ្ឋបាលរាជធានី​ភ្នំពេញបានឱ្យដឹងថា ផ្លូវថ្មើរជើង (walk street)ដែលបានបើកឱ្យដំណើរការ​សាកល្បងក្នុងរយៈពេល២ថ្ងៃនេះ ឃើញថា មានបងប្អូនប្រជាពលរដ្ឋ ភ្ញៀវជាតិ​និង​អន្តរជាតិ​មកដើរកំសាន្តច្រើន។ ទោះជាមិនបានបង្ហាញពីចំនួនតួលេខ​ក៏ដោយ ​លោកស្រីអ្នកនាំពាក្យដដែលបាន​បង្ហាញ​នូវការប្រៀបធៀបថា ថ្ងៃទី២​នៃការបើកឱ្យដំណើរការសាកល្បង គឺមានបងប្អូនប្រជាពលរដ្ឋ, ភ្ញៀវជាតិនិង​អន្តរជាតិដើរ​លេងកំសាន្តច្រើនជាងថ្ងៃទី១។នេះបង្ហាញឱ្យឃើញពី​សន្ទស្សន៍​នៃកើនឡើង។ ការបញ្ជាក់របស់លោកស្រី ដោ សម្ផស្ស ពិតជាសមស្រប ខណៈ​ដែល​នៅលើបណ្ដាញសង្គមនានា ជាលក្ខណៈឯកជនបានបង្ហាញ​ឱ្យ​​ឃើញ​នូវការចាប់ចំពោះផលិតផលទេសចរណ៍ថ្មីនេះ ជាមួយរូបភាពអ្នកដើរ​កម្សាន្តទស្សនាដងទន្លេសាបប្រកប​ដោយជំនោរខ្យល់ត្រជាក់ស្រេង, ទស្សនាការតុបតែងតាមដងតិរវិថី និងវិថី ។ពិសេសគយគន់សម្រស់ និងភាពអស្ចារ្យនៃព្រះបរមរាជវាំង…