រួប​ចម្លាក់​តោ​ថ្មចំនួន​២ ដែល​យក​ពី​កំពង់ទឹក​របស់​ស្ពាន​ហាល​ចូល​ប្រាសាទ​អង្គរ​វត្ត តាំង​ពី​ឆ្នាំ​១៩៩៧ ត្រូវ​បាន​យក​ទៅ​ដាក់​នៅ​ទីតាំង​ដើម​វិញ​ហើយ កាល​ពី​ថ្ងៃ​ទី​៤ ខែ​វិច្ឆិកា ឆ្នាំ​២០២២​កន្លង​ទៅ បន្ទាប់ពី​ការ​ជួសជុល​ត្រូវ​បាន​បិទ​បញ្ចប់​ជា​ស្ថាពរ​។ នេះ​បើ​តាម​ការ​ឱ្យ​ដឹង​ពី​អាជ្ញាធរ​ជាតិ​អប្សរា។ បើ​តាម​អាជ្ញាធរ​ជាតិ​អប្សរា ចម្លាក់​តោ​ដែល​មាន​កម្ពស់​ជាង​២​ម៉ែត្រ និង​មាន​ទម្ងន់​ជិត​៣​តោន ត្រូវ​បាន​យក​ទៅ​រក្សា​ទុក​នៅ​អភិរក្សដ្ឋាន​អង្គរ​ដើម្បី​ជួស​ជុល។ លោក ឡុង ណារី ប្រធានក្រុមការងារអភិរក្សថ្មនៃនាយកដ្ឋានអភិរក្សប្រាសាទ និងបុរាណវិទ្យា មានប្រសាសន៍ថា ក្រុមការងាររបស់លោកចាប់ផ្តើមជួសជុលចម្លាក់ទាំងនេះ ពីខែមេសា ឆ្នាំ២០២២ រហូតដល់ពេលនេះរយៈពេល៦ខែ។ ដំបូង ក្រុមការងារបានរៀបចំធ្វើឯកសារ និងប្រមូលបំណែកតូចធំរបស់ចម្លាក់ដើមមកផ្គុំគ្នា។ មកដល់ពេលនេះ ចម្លាក់តោទាំងគូ មានភាពរឹងមាំឡើងវិញហើយ  ដោយបានបំពេញនូវកន្លែងខូចខាតនឹងបានបង់ថ្មមួយចំនួនដូចជា ជើងទម្រ ជើង ដងខ្លួន និងផ្នែកផ្សេងៗរបស់តោដែលចាំបាច់សម្រាប់ធានាភាពយូរអង្វែងរបស់តោ ជៀសវាងការខូចខាតបន្តទៀត។ លោក ឡុង ណារី បានលើកឡើងថា ចម្លាក់តោថ្មនេះ មុនការជួសជុលមានសភាពទ្រុឌទ្រោម បែកបាក់រូបរាងជាអន្លើរ នៅផ្នែកជើងទម្រ ជើង ទ្រូង និងផ្នែកខាងក្រោយជាដើម។ នៅសម័យបារាំង ចម្លាក់តោនេះ ត្រូវបានជួសជុលដោយប្រើស៊ីម៉ង់ត៍ និងដែកបិទភ្ជាប់ដើម្បីឱ្យមានលំនឹងអាចឈរបានប៉ុណ្ណោះ  ប៉ុន្តែក្រោយមក វាក៏បានបែកបាក់ ជាបន្តបន្ទាប់តាមអាយុកាលស៊ីម៉ងត៍។ លោកបញ្ជាក់ថា ក្នុងការជួសជុល…

សារមន្ទីរជាតិ​កម្ពុជា និងសារមន្ទីរ​ឧក្រិដ្ឋកម្មប្រល័យពូជសាសន៍ទួលស្លែង នឹងបើកឱ្យមានការចូលទស្សនានាពេល​ថ្ងៃ​ត្រង់​ឡើង​វិញ ចាប់​ពី​ថ្ងៃ​ទី​១៤ ខែ​វិច្ឆិកា​ខាង​មុខ​តទៅ។ នេះ​បើ​តាម​សេចក្ដី​ជូន​ដំណឹង​របស់​ក្រសួង​វប្បធម៌ និង​វិចិត្រសិល្បៈ ចុះ​ថ្ងៃ​ទី​០៤ ខែ​វិច្ឆិកា ឆ្នាំ​២០២២។ ការ​ទស្សនា​នា​ពេល​ថ្ងៃ​ត្រង់ ចាប់​ផ្ដើម​ពីចន្លោះពីម៉ោង១១និង៣០នាទីព្រឹក ដល់ម៉ោង១និង៣០នាទីរសៀល។ បើ​តាម​ក្រសួង​វប្បធម៌​និង​វិចិត្រ​សិល្បៈ ការបើក​ឱ្យ​ចូល​ទស្សនានា​ពេល​ថ្ងៃ​ត្រង់​ឡើង​វិញ​នេះ ធ្វើ​ឡើង​បន្ទាប់​ពី​សារមន្ទីរ​សង្កេត​ឃើញ​ថា ចំនួន​ភ្ញៀវ​ទេសចរណ៍​ជាតិ-អន្ដរជាតិ មាន​ការ​កើន​ឡើង​ជា​បន្ត​បន្ទាប់​ក្នុង​រយៈ​ពេល​កន្លង​មក​នេះ​។ សូម​រំឭក​ថា តាម​រយៈ​ការ​ថយ​ចុះ​នៃ​ចំនួន​ភ្ញៀវ​ទេសចរ ជា​ពិសេស​ទេសចរ​បរទេស​ដែល​ចូលមក​ទស្សនា​នៅ​កម្ពុជា ក្នុង​អំឡុង​ពេល​ជំងឺ​កូវីដ-១៩ អុកឡុក​ប្រទេស​កម្ពុជា ក្រសួង​វប្បធម៌​និង​វិចិត្រសិល្បៈ​បាន​សម្រេច​បិទ​ការ​ចូល​ទស្សនា​សារមន្ទីរ​ជាតិ និង​ផ្អាក​ដំណើរការ​រោងភាពយន្ត​នៅទូទាំង​ប្រទេស កាល​ពី​ខែ​វិច្ឆិកា​ឆ្នាំ​២០២០។ គឺ​រហូត​ទាល់​តែស្ថានភាព​រាតត្បាត​នៃ​ជំងឺ​កូវីដ​១៩​បាន​ធូរ​ស្រាល ទើប​ក្រសួង​វប្បធម៌សម្រេច​​អនុញ្ញាត​ឱ្យ​បើក​ដំណើរ​ការ​ឡើង​វិញ​ នូវ​ការ​ចូល​ទស្សនា​សារមន្ទីរ​ រោង​ភាព​យន្ត​ និង​រោង​សម្ដែង​សិល្បៈ ក្នុង​ភូមិ​សាស្ត្រ​រាជ​ធានី​ភ្នំពេញ នៅ​​ថ្ងៃ​ទី​៣០ តុលា ឆ្នាំ​២០២១​។ ចំណែក​ការ​ចូល​ទស្សនា​សារមន្ទីរ​ រោង​ភាព​យន្ត​ និង ​រោង​សម្ដែង​សិល្បៈ​ នៅ​តាម​បណ្ដា​ខេត្ត​នានា នៅ​ទូទាំង​កម្ពុជា​ បាន​ចាប់​ដំណើរការ​ឡើង​វិញ ចាប់​ពី​ថ្ងៃ​ទី​១៨ ខែវិច្ឆិកា ឆ្នាំ​២០២១​តទៅ​។​ យ៉ាង​ណា​ក៏​ដោយ នៅក្នុង​អំឡុង​ពេល​នៃ​ការ​បិទ​ដំណើរការជា​បណ្ដោះ​អាសន្នអស់​មួយ​រយៈ​នា​ពេល​​កន្លង​មក​នេះ ក្រុម​ការងារ​នៃ​សារមន្ទីរ​ជាតិ ក៏​ដូច​ជា​សារមន្ទីរ​ឧក្រិដ្ឋកម្ម​ប្រល័យ​ពូជសាសន៍​ទួល​ស្លែង នៅតែ​បន្ត​សកម្មភាព​កែ​លម្អ​ហេដ្ឋា​រចនា​សម្ព័ន្ធ និងបំពេញបន្ថែមនូវព័ត៌មានទាក់ទងនឹងប្រវត្តិសារមន្ទីរជាប់ជា​ប្រចាំ​៕ កែវ កិរិយា

ភ្នំពេញ៖ «អូណូដា – មួយម៉ឺនរាត្រីនៅក្នុងព្រៃ» ជាខ្សែភាពយន្តអំពីជីវិតពិតរបស់ទាហានជនជាតិជប៉ុនម្នាក់ ក្នុងសង្គ្រាមលោកលើកទី២ ដែលថតនៅក្នុងប្រទេសកម្ពុជា ដោយក្រុមការងារខ្មែរជាង៦០នាក់ នឹងមានចាក់បញ្ចាំងនៅតាមរោងភាពយន្តទូទាំងប្រទេសកម្ពុជា ចាប់ពីថ្ងៃទី២៥ ខែតុលា ឆ្នាំ២០២២ តទៅ។ ដឹកនាំដោយលោក Arthur Harari ខ្សែភាពយន្តនេះ បានថតនៅក្នុងប្រទេសកម្ពុជាកាលពីចុងឆ្នាំ២០១៨ នៅតាមតំបន់មួយចំនួនក្នុងខេត្តកំពត ខេត្តកែប និងខេត្តព្រះសីហនុ ដោយមានក្រុមការងារខ្មែរដែលមានជំនាញនិងទេពកោសល្យជាង៦០នាក់ ចូលរួមធ្វើការជាមួយក្រុមការងារដទៃទៀត មកពីប្រទេសជប៉ុន បារាំង ប៊ែលហ្សិក ថៃ និងហ្វីលីពីន។ ខ្សែភាពយន្តខ្នាតធំរឿង «អូណូដា- មួយម៉ឺនរាត្រីនៅក្នុងព្រៃ» ជាខ្សែភាពយន្តដែលផ្អែកទៅលើរឿងពិត របស់ទាហានជនជាតិជប៉ុនម្នាក់ឈ្មោះ ហ៊ីរ៉ូ អូណូដា កំឡុងពេលសង្គ្រាមលោកលើកទី២ ដែលបានលាក់ខ្លួននៅក្នុងព្រៃនៅលើកោះមួយក្នុងប្រទេសហ្វីលីពីន អស់ពេលជាង៣០ឆ្នាំ ដោយមិនដឹងថា សង្គ្រាមបានបិទបញ្ចប់នោះឡើយ។ ខ្សែភាពយន្តនេះអាចផលិតទៅបានជោគជ័យដោយមានការគាំទ្រយ៉ាងពេញទំហឹងពីរាជរដ្ឋាភិបាលកម្ពុជា រួមមាន ក្រសួងវប្បធម៌ និងវិចិត្រសិល្ប: ក្រសួងការពារជាតិ ក្រសួងមហាផ្ទៃ ក្រសួងបរិស្ថាន នាយកដ្ឋានសិល្បៈភាពយន្តនិងផ្សព្វផ្សាយវប្បធម៌នៃក្រសួងវប្បធម៌និងវិចិត្រសិល្ប: (Cambodia Cinema Department) មជ្ឈមណ្ឌលបណ្តុះបណ្តាលជំនាញ និងទទួលការថតភាពយន្តនៅកម្ពុជា (Film Commission)…

ពលរដ្ឋខ្មែរមួយគ្រួសារដែលកំពុងរស់នៅឯប្រទេសកាណាដា បានស្ម័គ្រចិត្តរួមគ្នាបរិច្ចាគថវិកាមួយចំនួន ដើម្បីជួយដល់ដំណើរការជួសជុលរូបចម្លាក់ថ្មទេវតាទាញព្រ័ត្រចំនួនមួយនៅខ្លោងទ្វារតាកាវនៃក្រុងអង្គរធំ ជាមួយអាជ្ញាធរជាតិអប្សរា ដោយសារតែទឹកចិត្តស្រឡាញ់ មានបំណងចង់ចូលរួមអភិរក្សប្រាង្គប្រាសាទបុរាណ និងជាសម្បត្តិបេតិកភណ្ឌដែលជាស្នាដៃដ៏មានតម្លៃរបស់បុព្វបុរសខ្មែរឱ្យស្ថិតនៅគង់វង្សជាបន្តទៀតសម្រាប់កូនខ្មែរជំនាន់ក្រោយ។ ស្ថាបត្យករ និងជាក្រុមការងារបច្ចេកទេសជួសជុលខ្លោងទ្វារតាកាវ កញ្ញា ម៉េង សុវណ្ណលីលីន បានសម្តែងការត្រេកអរ និងថ្លែងអំណរគុណ ចំពោះពលរដ្ឋខ្មែរ ដែលកំពុងរស់នៅប្រទេសកាណាដា បានជួយឧបត្ថម្ភចំពោះដំណើរការជួសជុល អភិរក្សនៅខ្លោងទ្វារតាកាវនេះ។ បច្ចុប្បន្ន ក្រុមការងារនៃអាជ្ញាធរជាតិអប្សរា កំពុងបន្តជួសជុលរូបចម្លាក់ទេវតាទាញព្រ័ត្រតួទី៨តាមរយៈជំនួយថវិកាពីសប្បុរសជនខ្មែរ នៅប្រទេសកាណាដានេះ។ ប៉ុន្តែការងារជួសជុលរូបទេវតាទាញព្រ័ត្រនេះ មិនអាចធ្វើបន្តត្រឹមតែតួទី៨ប៉ុណ្ណោះទេ គឺចាំបាច់ទាមទារឱ្យមានការជួសជុលតួទី៩ ស្របពេលជាមួយគ្នា ពីព្រោះតែរចនាសម្ពន្ធខ្លួននាគទី៨ និងទី៩មានទំនាក់ទំនងនិងគ្នា។ គម្រោងជួសជុលខ្លោងទ្វារតាកាវមានពីរផ្នែក គឺដំណាក់កាលទី១ ក្រុមការងារបានជួសជុលពង្រឹងតួខ្លោងទ្វារ និងដំណាក់កាលទី២ គឺជួសជុលចម្លាក់ទេវតានិងចម្លាក់អសុរាទាញព្រ័ត្រនៅអមសងខាងស្ពានហាលបានចំនួន៧តួរួចហើយ។ សូមជម្រាបថា ស្ពានហាលខ្លោងទ្វារតាកាវ របស់ក្រុងអង្គរធំ មានអាយុកាលច្រើនរយឆ្នាំមកហើយ មកដល់សព្វថ្ងៃទទួលរងការគំរាមកំហែងពីអាកាសធាតុ សង្គ្រាម កង្វះការថែទាំ និងការដុះដាលនៃដើមឈើធំៗ បណ្តាលឱ្យរូបចម្លាក់បង្កាន់ដៃយក្ស និងទេវតាជាច្រើនបានដួលរលំ។ ដោយសារភាពទ្រុឌទ្រោមខ្លាំងនេះ បច្ចុប្បន្នខ្លោងទ្វារតាកាវ បានបិទជាបណ្ដោះអាសន្ន មិនឱ្យអ្នកដំណើរឆ្លងកាត់ទេ ទីមួយគឺដើម្បីសុវត្ថិភាពអ្នកដំណើរ និងទី២ដោយសារតែក្រុមអ្នកជំនាញកំពុងបន្តអនុវត្តដំណើរការជួសជុលឱ្យប្រសើរឡើងវិញ៕ ចាន់ វិចិត្រ