(ភ្នំពេញ)៖ នាព្រឹកថ្ងៃចន្ទ ទី១១ ខែវិច្ឆិកា ឆ្នាំ២០២៤ ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានដឹកនាំកិច្ចប្រជុំកម្រិតថ្នាក់ដឹកនាំលើកទី១ នៃខែវិច្ឆិកា ដើម្បីពិនិត្យវឌ្ឍនភាពការងារ និងលើកទិសដៅកិច្ចការបន្ត ដែលមានការអញ្ជើញចូលរួមពី ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ ទីប្រឹក្សាក្រសួង អគ្គនាយក អគ្គនាយករង និងគ្រប់ប្រធានអង្គភាពថ្នាក់កណ្តាលក្រោមឱវាទក្រសួងសុខាភិបាល ប្រធានមន្ទីរសុខាភិបាលរាជធានីភ្នំពេញ និងតាមប្រព័ន្ធ Zoom ប្រធានមន្ទីរសុខាភិបាលខេត្ត។ ឯកឧត្តមសាស្រ្តាចារ្យរដ្ឋមន្រ្តី ណែនាំដល់ថ្នាក់ដឹកនាំទទួលបន្ទុក សូមត្រៀមលក្ខណៈក្នុងការពារសុខភាពជូនប្រជាពលរដ្ឋ ដែលនឹងចូលរួមទស្សនាក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នាថ្ងៃទី១៤ ១៥ ១៦ ខែវិច្ឆិកា ឆ្នាំ២០២៤ខាងមុននេះ។ ក្នុងនោះដែរ ឯកឧត្តមសាស្រ្តាចារ្យរដ្ឋមន្រ្តី បានណែនាំដល់អង្គភាពពាក់ព័ន្ធ សូមបង្កើនការផ្សព្វផ្សាយគ្រប់មធ្យោបាយនូវសារអប់រំ ព័ត៌មាននិងទីតាំងស្តង់ក្រុមគ្រូពេទ្យប្រចាំការ និងរថយន្តគិលានុសង្រ្គោះបន្ទាន់ ដើម្បីងាយស្រួលក្នុងការស្វែងរក។ ទន្ទឹមនឹងនេះ នៅតាមអង្គភាព ត្រូវត្រៀមលក្ខណៈគ្រប់ពេលវេលានូវសម្ភារវេជ្ជសាស្រ្ត និងឱសថសារវន្តសម្រាប់គាំទ្រ ដោយត្រូវរៀបចំផែនការឱ្យទុកជាមុន ដើម្បីឆ្លើយតបនឹងគ្រោះអាសន្នណាមួយយថាហេតុ។ ឯកឧត្តមសាស្រ្តាចារ្យរដ្ឋមន្រ្តី ពាំនាំដល់មន្រ្តីក្រោមឱវាទទាំងអស់ ដោយត្រូវមានភាពបុរេសកម្មនឹងការងារ ដោយត្រូវមានការឆ្លុះបញ្ចាំងគ្រប់រូបភាពការងារឱ្យក្លាយជាសកម្មភាពការងារ។…

(ភ្នំពេញ)៖ សត្វកស ឬ កុកពាក់អំបោះ(Woolly-necked Stork) ជាប្រភេទបក្សីដែលនិយមរស់នៅតំបន់ដីសើម ជាពិសេសនៅតាមបណ្ដាខេត្តជាប់ទន្លេសាបនៃប្រទេសកម្ពុជា។ កន្លែងពងកូនធំជាងគេរបស់កុកពាក់អំបោះ គឺស្ថិតនៅតំបន់ព្រែកទាល់ ក្នុងបឹងទន្លេសាប។ សត្វស្លាបប្រភេទនេះ ត្រូវបានចាត់ចូលក្នុងបញ្ជីរក្រហមពិភពលោក IUCN ជាប្រភេទសត្វជិតរងការគំរាមកំហែង ហើយចំនួនរបស់វានៅលើពិភពលោកកំពុងមានការធ្លាក់ចុះអាស្រ័យដោយការរំខានពីមនុស្ស ការបរបាញ់ និងការបាត់បង់ទីជម្រកជាដើម។ អង្គការជីវិតធម្មជាតិនៅកម្ពុជា (NatureLife Cambodia)បានឱ្យដឹងថាដែនជម្រកសត្វព្រៃលំផាត់ ខេត្ត រតនគិរី ជាទីតាំងជម្រកដ៏សំខាន់និងមានសុវត្តិភាពរបស់បក្សីប្រភេទនេះ និងជីវចម្រុះដ៏ទៃផ្សេងទៀត។ បក្សីដ៏គួឲ្យស្រលាញ់នេះត្រូវបានរកឃើញមានការបន្តពូជជារៀងរាល់ឆ្នាំនៅដែនជម្រកសត្វព្រៃលំផាត់។ ប្រភពខាងលើនេះបានបញ្ជាក់បន្ថែមថានារដូវបន្តពូជរបស់បក្សីនេះ គឺចាប់ពីខែកក្កដា រហូតដល់ខែធ្នូ ពួកវាចូលចិត្តធ្វើសំបុកលើដើមឈើធំៗ ដែលដុះនៅតាមមាត់ទន្លេ ឬអូរ។ ក្នុងរដូវបន្តពូជឆ្នាំ២០២៤នេះ គិតមកត្រឹមខែតុលាឆ្នាំ២០២៤ សំបុកសត្វកុកពាក់អំបោះចំនួន ៥សំបុកនិងមានកូនសរុបចំនួន ៩ក្បាល ត្រូវបានកត់ត្រាបាននៅដែនជម្រកសត្វព្រៃលំផាត់ដែលជាទីតាំងដែលយើងបានធ្វើការអភិរក្សនិងការពារយ៉ាងសកម្មតាមរយ:គម្រោងរេដបូក។ គួរបញ្ជាក់ថាបក្សីប្រភេទនេះរស់នៅតាមទំនាបលិចទឹក និងតំបន់ដីសើមក្នុងព្រៃល្បោះ។កុកពាក់អំបោះមានទំហំចាប់ពី៧៥-៩១សង់ទីម៉ែត្រ ហើយខ្លួនទាំងមូលរបស់វាមានពណ៌ខ្មៅរលោង លើកលែងតែ ក ផ្នែកខាងក្រោមពោះ និងក្រោមកន្ទុយរបស់វាមានពណ៌ស៕ ដោយ ៖ ម៉ាដេប៉ូ

(ខេត្តបន្ទាយមានជ័យ) ៖ នៅថ្ងៃទី១០ ខែវិច្ឆិកា ឆ្នាំ២០២៤ ពុទ្ធបរិស័ទចំណុះជើងវត្តសីលានិមិត្តគោកកីឃុំទឹកជោរ ស្រុកព្រះនេត្រព្រះ ខេត្តបន្ទាយមានជ័យ បានឯកភាពគ្នាជាឯកច្ឆន្ទផ្តួចផ្តើមធ្វើបុណ្យកឋិនទានសាមគ្គី ដើម្បីដង្ហែវេរប្រគេនព្រះសង្ឃគង់ចាំព្រះវស្សាអស់កាលត្រីមាសក្នុងពុទ្ធសីមាវត្តសីលានិមិត្តគោកកី ហៅវត្តគោកកីស្ថិតនៅភូមិគោកកី ឃុំទឹកជោរ ស្រុកព្រះនេត្រព្រះ ខេត្តបន្ទាយមានជ័យ ដើម្បីប្រមូលបច្ច័យសម្រាប់កសាងព្រះវិហារថ្មី ។ កឋិនសាមគ្គីដង្ហែរចូលទៅកាន់វត្តគោកកីនាឆ្នាំនេះ ទទួលបានបច្ច័យសរុបចំនួន ២៩.៤៩៥.០០០រៀល (ម្ភៃប្រាំបួនលានបួនសែនប្រាំបួនមឺនប្រាំពាន់រៀលគត់) ។ ចប្ច័យទាំងអស់បានប្រគល់ជូន គណៈកម្មការវត្តសីលានិមិត្តគោកកីដើម្បីសម្រួលដល់ព្រះភិក្ខុសង្ឃ ដែលគង់ចាំវស្សាអស់រយៈពេល បីខែ និងសម្រាប់កសាងព្រះវិហារថ្មីដែលមានបណ្តោយ ២២ម៉ែត្រ×១២ម៉ែត្រ បច្ចុប្បន្នកំពុងដំណើរការសាងសង់បាន ២០%ហើយ ។ លោក ដាំ ហុង ប្រធានអាចារ្យវត្ត ក៏ដូចគណៈកម្មការវត្តសីលា និមិត្តគោកកី បានថ្លែងអំណរគុណ និងជូនពរចំពោះម្ចាស់ទាន ទាំងអស់ ដែលបានរួមចំណែកបរិច្ចាគទាំងថវិកាលើកស្ទួយវិស័យព្រះពុទ្ធសាសនា ពុទ្ធចក្រ និងអាណាចក្រ មានការរីកចម្រើនព្រមៗគ្នាខណៈដែលប្រទេសជាតិមានសន្តិភាពពេញលេញ ក្រោមការដឹកនាំប្រកបដោយគតិបណ្ឌិតសម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងជាប្រធាន ព្រឹទ្ធសភាកម្ពុជា ហើយបច្ចុប្បន្នសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបន្តស្នាដៃ និងជំរុញបន្ថែមក្នុងការអភិវឌ្ឍមានការរីកចម្រើនលើគ្រប់វិស័យ ៕…

(សៀមរាប)៖ ភ្ញៀវទេសចរអាចទស្សនាជីវភាពរស់នៅប្រចាំថ្ងៃរបស់ប្រជាជន នៅតាមមាត់បឹងទន្លេសាប, ទស្សនាផ្ទះសង់ខ្ពស់ៗ នៅលើផ្ទៃទឹក, អុំទូកទស្សនាក្នុងភូមិ, ទស្សនាព្រៃលិចទឹក, ទស្សនាផ្ទៃបឹងទន្លេសាបដ៏ធំល្វឹងល្វើយ, ភោជនីយដ្ឋានបណ្តែតទឹក, បែចិញ្ចឹមត្រី ជាពិសេសផ្តិតយកនូវរូបភាពស្អាតៗទិដ្ឋភាពថ្ងៃរៀបលិចដ៏ស្រស់ស្អាតនៅលើផ្ទៃបឹងទន្លេសាប ។ នេះជាប្រសាសន៍លើកឡើងរបស់ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ នារសៀលថ្ងៃទី១០ ខែវិច្ឆិកា ឆ្នាំ២០២៤ ខណៈអញ្ជើញជួបសំណេះសំណាលជាមួយសហគមន៍ទេសចរណ៍ធម្មជាតិកំពង់ភ្លុក ខេត្តសៀមរាប ។ ឯកឧត្តម ហួត ហាក់ បន្តថា គោលបំណងសំខាន់របស់គណៈប្រតិភូ គឺដើម្បីសាកសួរសុខទុក្ខប្រជាពលរដ្ឋ, ចុះពិនិត្យទិដ្ឋភាពពិតជាក់ស្តែងនៅគោលដៅទេសចរណ៍ធម្មជាតិកំពង់ភ្លុក, ពិនិត្យហេដ្ឋារចនាសម្ព័ន្ធទ្រទ្រង់ដល់សកម្មភាពទេសចរណ៍ និងបរិស្ថានជុំវិញ ព្រមទាំងស្តាប់នូវបញ្ហាប្រឈម និងសំណូមពររបស់លោកប្រធានសហគមន៍ លោកមេឃុំ ក៏ដូចជាបងប្អូនអុំទូកនៅក្នុងសហគមន៍ដែលភាគច្រើនជាស្ត្រី ក្នុងគោលដៅស្វែងរកនូវដំណោះស្រាយរួមគា្នដើម្បីទាក់ទាញទេសចរជាតិនិងអន្តរជាតិចូលទស្សនាកម្សាន្តនៅគោលដៅទេសចរណ៍កំពង់ភ្លុក ឱ្យបានកាន់តែច្រើនថែមទៀត ៕ ដោយ ៖ ហេង សម្បត្តិ+ថេត វិចិត្រ