(ភ្នំពេញ)៖ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយក​ធនាគារអភិវឌ្ឍន៍ជនបទនិងកសិកម្ម ARDB និងជាអនុប្រធានក្រុមការងារថ្នាក់កណ្តាល ចុះជួយស្រុកខ្សាច់កណ្តាល ទទួលបន្ទុកការងារយុវជន កាលពីថ្ងៃទី៣១ ខែសីហា ឆ្នាំ២០២៤នេះបានអញ្ជើញចូលរួមក្នុងពិធីសំណេះសំណាល ជាមួយគ្រូបំប៉នសិស្ស​ថ្នាក់ទី១២ និងសិស្សរៀនបំប៉នត្រៀមប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ០៨ តុលា ២០២៤។កម្មវិធីនេះមានការចូលរួមពី លោក ចេង ឌីណា អភិបាលនៃគណៈអភិបាល ស្រុកខ្សាច់ តំណាងរដ្ឋបាលស្រុកខ្សាច់កណ្តាល តំណាងការិយាល័យ អប់រំ យុវជន និងកីឡានៃរដ្ឋបាលស្រុក ខ្សាច់កណ្តាល និងតំណាងអាជ្ញាធរមូលដ្ឋានផងដែរ។ ឯកឧត្តមបណ្ឌិត កៅ ថាច បានថ្លែងបញ្ជាក់ថា វិទ្យាល័យ ហ៊ុន សែន-ROTA ខ្សាច់​កណ្តាល​មានវាសនាល្អណាស់ ដោយសារទី១ មានការយកចិត្តទុកដាក់ពីថ្នាក់ដឹកនាំ​ជាពិសេស ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រី​ក្រសួងសេដ្ឋកិច្ចនិងហិរញ្ញវត្ថុ តែងតែយក ចិត្តទុកដាក់ណាស់ដូចជាកសាងវិទ្យាល័យ ឲ្យបានធំទូលាយនិងមានផាសុខភាព។ លើសពីនេះឯកឧត្តមបណ្ឌិតបានថ្លែងអំអរគុណដល់លោកគ្រូ អ្នកគ្រូ ដែលបាន​ខិតខំ​បង្រៀនដល់ថ្នាក់បំប៉នទី១២ កន្លងមក ចំពោះប្អូនៗសិស្សានុសិស្ស ដើម្បីឲ្យ​ប្រល​ង​ជាប់និទ្ទេសល្អ បានច្រើនជាពិសេស…

(ភ្នំពេញ)៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និង​ជា​ប្រធានក្រុមការងាររាជរដ្ឋាភិបាលចុះមូលដ្ឋានខណ្ឌពោធិ៍សែនជ័យ នៅថ្ងៃសៅរ៍ ទី៣១ ខែសីហា ឆ្នាំ២០២៤នេះ បានបើកវេទិកាផ្សព្វផ្សាយ និងពិគ្រោះយោបល់របស់ក្រុម​ប្រឹក្សា​ខណ្ឌពោធិ៍សែនជ័យ អាណត្តិទី៤ នៅបរិវេណវត្តតិក្ខប្បញ្ញោ នៃសង្កាត់សំរោង​ក្រោម​ដែល​មានប្រជាពលរដ្ឋប្រមាណជិត ៦០០នាក់ចូលរួម ។ វេទិកាផ្សព្វផ្សាយ និងពិគ្រោះយោបល់នេះ បានផ្តល់ព័ត៌មានជូនក្រុមប្រឹក្សាសង្កាត់ សហគមន៍ ប្រជាពលរដ្ឋ និងអ្នកពាក់ព័ន្ធអំពីសកម្មភាពនានារបស់ខណ្ឌក្នុងការឆ្លើយតប​ទៅនឹងសំណើនានារបស់ក្រុមប្រឹក្សាសង្កាត់ និងប្រជាពលរដ្ឋ ដើម្បីប្រមូលនិងពិភាក្សា​អំពីសំណើ និងមតិយោបល់នានាសម្រាប់សកម្មភាពឆ្នាំខាងមុខ។ បន្ថែមពីនេះ វេទិកា​ក៏បានផ្តល់ឱកាសជូនប្រជាពលរដ្ឋ និងអ្នកពាក់ព័ន្ធដើម្បីលើកជាសំណើ សំណូមពរ អនុសាសន៍ និងបញ្ហាដែលបានជួបប្រទះនៅក្នុងមូលដ្ឋានផងដែរ។ ជាមួយគ្នានេះ វេទិកាផ្សព្វផ្សាយ និងពិគ្រោះយោបល់ ក៏បានផ្តល់ឱកាសជូន​ប្រជាពលរដ្ឋ​បានប្រាស្រ័យទាក់ទងគ្នាទៅវិញទៅមករវាងរដ្ឋបាលខណ្ឌជាមួយរដ្ឋបាលសង្កាត់ និងប្រ​ជាពលរដ្ឋតំណាងសង្គមស៊ីវិល និងវិស័យឯកជន ក្រុមប្រឹក្សាប្រភេទផ្សេងៗគ្នា ដើម្បី​ផ្លាស់​ប្តូរ​នូវបទពិសោធន៍និងផ្តល់ប្រឹក្សាអំពីអាទិភាពនៃការអភិវឌ្ឍខណ្ឌប្រកបដោយ​ចីរភាព និងប្រសិទ្ធភាព៕ ដោយ ៖ ង៉ាន់ ទិត្យ

(ភ្នំពេញ)៖ ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានចុះពិនិត្យ​ទីតាំង​ត្រៀមបញ្ចុះបឋមសិលាសាងសង់អគារមជ្ឈមណ្ឌលកណ្តាល នៃមន្ទីរពេទ្យ​កាល់​ម៉ែត កាល​ពីរសៀលថ្ងៃទី៣០ ខែសីហា ឆ្នាំ២០២៤ ។ ឯកឧត្តមសាស្ត្រាចារ្យរដ្ឋមន្ត្រី បានពាំនាំប្រសាសន៍សួរសុខទុក្ខពីប្រមុខរាជរដ្ឋាភិបាល ដែលផ្តោតការយកចិត្តទុកដាក់យ៉ាងខ្លាំងមកលើការអភិវឌ្ឍន៍នៃវិស័យសុខាភិបាល ជូនដល់បុគ្គលិកមន្ត្រីរាជការនៃមន្ទីរពេទ្យ ព្រមទាំងថ្នាក់ដឹកនាំ។ ឯកឧត្តមសាស្ត្រាចារ្យ ក៏បានផ្តល់ជាអនុសាសន៍គន្លឹះសំខាន់ៗ ណែនាំដល់ថ្នាក់ដឹកនាំ និងទីប្រឹក្សារបស់មន្ទីរពេទ្យ ដើម្បីយកទៅអនុវត្តក្នុងការប្រតិបត្តិការងារ ធ្វើយ៉ាង​ណា​សំដៅប្រសិទ្ធភាពខ្ពស់ និងជម្រុញការអភិវឌ្ឍន៍សេវាសុខាភិបាលផ្តល់ជូនប្រជាពលរដ្ឋ ឆ្ពោះទៅរកការគ្របដណ្តប់សុខភាពជាសកល។ ឯកឧត្តមសាស្រ្តាចារ្យ រដ្ឋមន្រ្តីក្រសួងសុខាភិបាល ក៏បានឆ្លៀតពេលចុះសួរសុខទុក្ខ បងប្អូនអ្នកជំងឺ និងក្រុមគ្រួសារ ដែលកំពុងសម្រាកព្យាបាល នៅមន្ទីរពេទ្យកាល់ម៉ែត។ ឯកឧត្តមសាស្ត្រាចារ្យ បានសំដែងមនោសញ្ចេតនាគោរពដឹងគុណជូនដល់​បងប្អូនអ្នក​ជំងឺ និងក្រុមគ្រួសារដែលបានផ្តល់ទំនុកចិត្តយ៉ាងខ្លាំងមកលើ​សេវាសុខាភិបាល នៃមន្ទីរពេទ្យកាល់ម៉ែត ក៏ដូចជានៅគ្រប់បណ្តាមូលដ្ឋានសុខាភិបាលទូទាំប្រទេស ដែលបងប្អូនញាត្តិមិត្តបានអញ្ជើញទៅដល់។ ឯកឧត្តមសាស្រ្តាចារ្យរដ្ឋមន្រ្តី ក៏បានជួបសំណេះសំណាលជាមួយថ្នាក់ដឹកនាំ មន្រ្តីរាជ​ការ ដេីម្បីសួរសុខទុក្ខនិងសំណេះសំណាល ព្រមទាំងផ្តល់អនុសាសន៍មួយចំនួន ក្នុងការ​ផ្តល់សេវាប្រកបដោយគុណភាព ស័ក្តិសិទ្ធភាព ចូលរួមជំរុញការអភិវឌ្ឍន៍សេវា​សុខា​ភិបាលជូនប្រជាពលរដ្ឋ ឆ្ពោះទៅរកការគ្របដណ្តប់សុខភាពជាសកល។ ឯកឧត្តមសាស្ត្រាចារ្យ បានពាំនាំប្រសាសន៍សួរសុខទុក្ខពីប្រមុខ​រាជរដ្ឋាភិបាលកម្ពុជា ដែលផ្តោតការយកចិត្តទុកដាក់យ៉ាងខ្លាំង មកលើការអភិវឌ្ឍន៍នៃវិស័យសុខាភិបាល ៕ ដោយ ៖ ហេង សម្បត្តិ

កំពង់ធំ៖ឯកឧត្ដម នួន ផារ័ត្ន អភិបាលខេត្តកំពង់ធំ ក្នុងសប្ដាហ៍នេះ​បានអញ្ជើញប្រគល់រថយន្តមួយគ្រឿង(រថយន្តស៊ីរ៉ែន) ដល់បញ្ជាការ​ដ្ឋាន​កងរាជអាវុធហត្ថខេត្តកំពង់ធំ ទុកបម្រើកិច្ចការងារនៅក្នុង​អង្គភាព។ លោកឧត្តមសេនីយ៍ត្រី មេបញ្ជាការកងរាជអាវុធហត្ថខេត្តបានថ្លែង​អំណរ​គុណយ៉ាងជ្រាលជ្រៅចំពោះ ឯកឧត្ដម នួន ផារ័ត្ន អភិបាល​ខេត្តកំពង់ធំ ដែលមានចិត្តសប្បុរសឧបត្ថម្ភរថយន្តដល់កងកម្លាំង​សម្រាប់បំពេញការងារ៕ដោយ៖​ប៊ុន​រដ្ឋា

ស្ទឹងត្រែង៖ក្នុងកិច្ចប្រជុំរវាងក្រុមការងារអន្តរក្រសួងនៃក្រសួងសេដ្ឋកិច្ច និង ហិរញ្ញវត្ថុ ជាមួយរដ្ឋបាលខេត្តស្ទឹងត្រែង កាលពីថ្ងៃទី៣០ ខែសីហា ឆ្នាំ២០២៤ឯកឧត្តមបណ្ឌិត ផាន់ ផល្លា រដ្ឋលេខាធិការនិងជាអគ្គលេ ខា ធិការនៃអគ្គលេខាធិការ គណៈកម្មាធិការគោល​នយោបាយសេដ្ឋកិច្ច និងហិរញ្ញវត្ថុ បានលើកឡើងថា សម្តេចធិបតី ហ៊ុន ម៉ាណែត នាយក រដ្ឋមន្រ្តីកម្ពុជាបានដាក់កម្មវិធីអភិវឌ្ឍន៍​នៅដើមឆ្នាំ២០២៥ ដោយ សម្តេចធិបតី ចង់ឱ្យមានការទាក់ទាញវិនិយោគិន មកវិនិយោគលើ ខេត្តទាំងបួនរួមមាន ខេត្តស្ទឹងត្រែង ខេត្តក្រចេះ ខេត្តរតនគិរី និងខេត្តមណ្ឌលគិរី ។ ឯកឧត្តមបន្តថា យោងតាមអនុសាសន៍ដ៏ខ្ពង់ខ្ពស់របស់សម្តេចធិបតីក្នុង ពិធីសំណេះសំណាល និងពិសា ភោជនា​ហារសាមគ្គីមហា គ្រួសារ ឧកញ៉ា កម្ពុជា និងសមាគមអ្នកអភិវឌ្ឍន៍លំនៅដ្ឋាននៅ កម្ពុជា កាល ពីថ្ងៃទី២ ខែសីហាកន្លងទៅ បានឱ្យគណៈកម្មាធិការ គោលនយោបាយ សេដ្ឋកិច្ច និងហិរញ្ញវត្ថុ (គ.ស.ហ.)សិក្សា និងរៀបចំដាក់ចេញនូវកម្មវិធី ពិសេសជំរុញ​ការវិនិយោគក្នុងខេត្តទាំង បួន នៅភូមិភាគឦសាន ។ ក្នុងឱកាសនេះដែរលោក ធូ…

ស្ទឹងត្រែង៖ សម្តេចព្រះសាក្យមុនី រ័ត្ន សារឿន ព្រះអគ្គាធិការរងនៃ អគ្គាធិការដ្ឋានពុទ្ធិកសិក្សាជាតិ និងជាសមាជិកថេរសភា​ព្រះពុទ្ធ​សាសនា កាលពីរសៀលថ្ងៃទី៣០ ខែសីហា ឆ្នាំ២០២៤បាន​និមន្តសំណេះសំណាលជាមួយព្រះមន្ត្រីសង្ឃទូទាំងខេត្តស្ទឹងត្រែង។ខណៈនេះជំនួបនេះសម្ដេចបានក្រើនរំលឹកអំពីការប្រតិបត្តិធម៌វិន័យ ការគ្រប់គ្រងអប់រំ ការប្រើប្រាស់ប្រព័ន្ធទំនាក់ទំនងសង្គម និងការពង្រឹងតួនាទីភារកិច្ចរបស់មន្ត្រីសង្ឃនៅក្នុងខេត្ត។ ក្នុងពិធីនេះដែរ ឯកឧត្តម អន ធាងអាន រដ្ឋលេខាធិការតំណាង លោក បណ្ឌិត ចាយ បូរិន រដ្ឋមន្ត្រីក្រសួងធម្មការនិង​សាសនាបាន​ទូល​​ប្រគេននូវក្តីគោរពពីឯកឧត្តមរដ្ឋមន្រ្តីដល់មន្រ្តីសង្ឃ ព្រះសង្ឃ អាចារ្យ គណៈកម្មការវត្តទូទាំងខេត្ត។ឯកឧត្តម​បានទូលដល់​មន្រ្តីសង្ឃ និងព្រះចៅអធិការវត្តសូមចូលរួមគ្រប់គ្រងវត្តឱ្យបានល្អស្របទៅតាមតួនាទីភារកិច្ចរបស់ព្រះមន្រ្តីសង្ឃ។ ពិសេសការ​គ្រប់គ្រងព្រះសង្ឃ គណៈកម្មការ ក្មេងវត្តឱ្យ​បានច្បាស់លាស់ជៀសវាងនូវអធិករណ៍ ឬបញ្ហាផ្សេងៗដែលនាំ​ប៉ះប៉ះពាល់​តម្លៃព្រះ​ពុទ្ធសាសនា ។ព្រះសង្ឃ គ្រប់អង្គដែល ប្រើប្រាស់ បណ្តាញសង្គមនានាឱ្យបានត្រឹមត្រូវ ដើម្បីជាឧត្តមប្រយោជន៍ ព្រះពុទ្ធ សាស​​នា​ជៀសវាងការ​ចែករំលែក នូវសកម្មភាពដែលនាំឱ្យប៉ះពាល់ ដល់សន្តិសុខសង្គម និងនយោបាយ ។ ចំណែកសម្ដេចព្រះសាក្យមុនី រ័ត្ន សារឿន បានរំលឹកថា អ្នកបួស ត្រូវរៀនធម៌វិន័យ និងប្រតិបត្តិធម៌វិន័យទៅតាម​សមគួរដល់​ធម៌វិន័យ ហើយត្រូវយកធម៌វិន័យទាំងនោះទៅអប់រំដល់ប្រជាពុទ្ធបរិស័ទគ្រប់គ្រប់រូប។សូមព្រះចៅអធិការគ្រប់វត្តទាំងអ​ស់ ធ្វើការណែនាំពង្រឹងធម៌វិន័យ និងជំរុញការសិក្សារៀនសូត្រដល់ភិក្ខុ សាមណេរ ៕ដោយ៖ដេង ម៉ាវិន

កំពង់ធំ៖ ក្នុងកិច្ចប្រជុំនិងពិនិត្យលើវឌ្ឍនភាពការងារ និងលើក​ទិសដៅបន្ត នៅមន្ទីរព័ត៌មានខេត្តកំពង់ធំកាលព្រឹកថ្ងៃទី៣០ ខែសីហា ឆ្នាំ២០២៤ឯកឧត្តម អ៊ីវ  ផល្លី អនុរដ្ឋលេខាធិការក្រសួងព័ត៌មាន ទទួលបន្ទុកគ្រប់គ្រងវិស័យព័ត៌មាន ក្នុងខេត្តកំពង់ធំ បានលើក​ឡើងថា សមត្ថភាពសរសេរព័ត៌មាននិងធ្វើបទយកការណ៍របស់មន្ត្រី គឺជាផ្នែក​មួយដែលសំខាន់ជាងគេ ។ដូច្នេះ​មន្ទីរត្រូវយក​ចិត្តទុកដាក់លើការ​បណ្តុះបណ្តាលមន្ត្រី ដើម្បីលើកកម្ពស់វិស័យព័ត៌មាននៅមូលដ្ឋាន។ មន្ត្រីជាន់ខ្ពស់រូបនេះបានបន្តថា រូបភាពគឺត្រូវតែបង្ហាញពីខ្លឹមសារ​នៃអត្ថបទ ។ការថតរូបត្រូវតែមានជំនាញក្នុងការចាប់ប្លង់ និង​គុណភាព​រូបផងដែរ ។ចំណងជើងអត្ថបទ ក៏ត្រូវតែមានភាពទាក់ទាញ បង្កើន​ចំណាប់អារម្មណ៍របស់អ្នកអាន។ មួយវិញទៀត ខ្លឹម​សារ​នៃអត្ថបទ ត្រូវសរសេរឱ្យមានខ្លឹមសារ និងមានន័យគ្រប់គ្រាន់ ចៀសវាងអត្ថបទ​ធ្វើឱ្យអ្នកអាន មិនយល់ន័យ និងលែងចូល​ចិត្តការសរសេររបស់យើង៕ដោយៈប៊ុន រដ្ឋា