ស្វាយរៀង៖ ក្នុងចំណោមទិសដៅមួយចំនួនក្នុងកិច្ចប្រជុំបូក​សរុបលទ្ធផលការងារប្រចាំឆមាសទី១ និងលើកទិសដៅ​ការងារ​​ឆមាស​ទី២ ឆ្នាំ២០២៤ របស់រដ្ឋបាលខេត្តកាលពី​រសៀល​ថ្ងៃទី២៥ ខែមិថុនាឆ្នាំ២០២៤នេះ ឯកឧត្តម ប៉េង ពោធិ៍សា អភិបាលខេត្ត​ស្វាយរៀងបានណែនាំដល់មន្ទីរ​កសិកម្ម និងអាជ្ញាធរពាក់ព័ន្ធត្រូវយកចិត្តទុកដាក់តាមដាន​ពីបញ្ហាដង្កូវហ្វូងដែលបំផ្លាញស្រូវ​ និងផលដំណាំផ្សេងៗរបស់​ប្រជាពលរដ្ឋ​ ដោយត្រូវចុះពិនិត្យ និងមានវិធានការទប់ស្កាត់​ឱ្យបានទាន់ពេលវេលា ឯកឧត្តមអភិបាលខេត្តបានដាក់ចេញនៅទិសដៅសំខាន់ៗមួយចំនួន។ក្នុងនោះអាជ្ញាធរក្រុង ស្រុក ត្រូវខិតខំដោះស្រាយ​ទំនាស់​នានារបស់បងប្អូនប្រជាពលរដ្ឋឱ្យអស់ពីលទ្ធភាពនៅ​ក្រៅប្រព័ន្ធតុលាការ រាល់សំណើរសំណូមពរ បញ្ហាផ្សេងៗរបស់​ប្រជាពលរដ្ឋ​ត្រូវតែលើកយកមកធ្វើការដោះស្រាយមិនត្រូវទុក​ចោលឡើយ។មន្ទីរធនធានទឹកនឹងឧតុនិយមខេត្តត្រូវពិនិត្យ​តាមដានពីបញ្ហា​អាកាស​ធាតុនៅក្នុងរដូវវស្សានេះអោយ​បានជាប់ជាប្រចាំ។ ឯកឧត្តមបន្តថា មន្ទីរពាក់ព័ន្ធ អាជ្ញាធរក្រុង-ស្រុក ត្រូវមាន​ចលនាបំផុសស្មារតី និងសកម្មភាពដាំដើមឈើឱ្យបានច្រើន នៅតាម​បណ្តោយផ្លូវក្នុងមូលដ្ឋានរបស់ខ្លួនឬទីតាំង​ផ្សេងៗ​ដែលអាចដាំបាន។អាជ្ញាធរក្រុង-ស្រុក និងកង​កម្លាំងគ្រប់​មូលដ្ឋានទាំងអស់​បន្តយកចិត្តទុកដាក់សហការ​បង្ក្រាប​រាល់ក្មេងទំនើងដែលបង្ករការអុកឡុកប៉ះពាល់ដល់សណ្តាប់ធ្នាប់និងរបៀបរៀបរយក្នុងសង្គមមិនត្រូវលើកលែងឡើយ។បន្តការផ្សព្វផ្សាយដល់បងប្អូនប្រជាពលរដ្ឋឱ្យមានការប្រុងប្រយ័ត្នចំពោះគ្រោះធម្មជាតិ ដែលបង្ករដោយ​ខ្យល់កន្ត្រាក់ ផ្គរន្ទះជាដើម នៅក្នុងរដូវវស្សានេះ។ ឯកឧត្តមបន្តថា អាជ្ញាធរគ្រប់លំដាប់ថ្នាក់ ត្រូវពង្រឹង​ការទប់​ស្កាត់​ការជួញដូរចែក​ចាយ និងប្រើប្រាស់គ្រឿងញៀន​នៅ​តាមមូលដ្ឋាន​ម៉ឺងម៉ាត់។​ អាជ្ញាធរក្រុង-ស្រុក និងមូលដ្ឋាន​ត្រូវតាមដានពិនិត្យទប់ស្កាត់រាល់ការទន្ទ្រានកាន់ដីរដ្ឋដោយខុសច្បាប់៕ ដោយ៖នុត នាង

កែប៖ ឯកឧត្តមបណ្ឌិត សោម ពិសិដ្ឋ អភិបាលខេត្តបានលើក​ទឹកផងនិងសំណូមពរផង​ដល់​ប្រជាពលរដ្ឋឱ្យមានសហការ​ជាមួយ​​អាជ្ញាធរ​មូលដ្ឋាន ពិសេសប៉ុស្តិ៍នគរបាលរដ្ឋបាល ក្នុង​ចាត់វិធានការលើទីតាំងល្បែង​ខុសច្បាប់​គ្រប់ប្រភេទ ការសេព​គ្រឿងញៀន​ក្មេងទំនើង ការជួញដូរមនុស្ស និងសកម្មភាពលួច​ឆក់ប្លន់ផងដែរ។  ក្នុងកិច្ចប្រជុំពិភាក្សា ស្តីពី “ការគ្រប់គ្រងល្បែងផ្សងសំណាង និងការគ្រប់គ្រងផលប៉ះពាល់ពីល្បែងស៊ីសងខុសច្បាប់គ្រប់ប្រភេទ កាលពីថ្ងៃទី២៥ ខែមិថុនាឆ្នាំ២០២៤នៅសាលាខេត្តកែប​ឯកឧត្តមអភិបាលខេត្តបានបន្តទៀតថាអនុវត្តបែបនេះ ដើម្បី​ធានាបាន​នូវការអនុវត្តគោលនយោបាយភូមិ ឃុំ សង្កាត់​ មាន​សុវត្ថិភាព ជាពិសេសការបង្រ្កាប​ឱ្យខាងតែបាននូវទី​តាំងល្បែង​ស៊ីសងក្នុងមូល​ដ្ឋាននោះ។ ក្នុងពិធីនេះដែរឯកឧត្តម រស់ ភីរុណ អគ្គលេខាធិការនៃគណៈ​កម្មការគ្រប់គ្រងល្បែងពាណិជ្ជកម្មកម្ពុជា (គ.ល.ក) បាន​និយាយ​ថា​ កិច្ចប្រជុំពិភាក្សានេះរៀបចំឡើងក្នុងគោលបំណង បង្កើតឱ្យមានវេទិកាពិភាក្សាពិគ្រោះ និងផ្លាស់ប្តូរមតិយោបល់​រវាងអគ្គលេខាធិការ​ដ្ឋាននៃ គ.ល.ក និងអាជ្ញាធរមានសមត្ថកិច្ច​ពាក់ព័ន្ធនៅក្នុងខេត្តកែប ដើម្បីកំណត់ដោះស្រាយនូវបញ្ហា​ប្រឈម និងផលប៉ះពាល់ ពីល្បែងស៊ីសងខុសច្បាប់គ្រប់​ប្រភេទ។ ព្រមទាំងបង្កើននិងលើកកម្ពស់ការយល់ដឹង​ឱ្យទូលាយ​នូវច្បាប់ និងលិខិតបទដ្ឋានគតិយុត្តជា​ធរមាន ពាក់ព័ន្ធនឹងការគ្រប់គ្រងអាជីវកម្មល្បែងផ្សងសំណាង ដើម្បី​ជំរុញអនុលោមភាព និងការទទួលខុសត្រូវរបស់​ប្រតិបត្តិករ​ល្បែងផ្សងសំណាង៕ ដោយ៖ សិលា សារិន

កំពង់ស្ពឺ៖ ឯកឧត្តម ស៊ិន វិរៈ ព្រះរាជអាជ្ញាអមសាលាដំបូង​ខេត្តកំពង់ស្ពឺ បានដឹកនាំព្រះរាជអាជ្ញារង ចំនួនបី​រូបមកធ្វើបទ​បង្ហាញ​អំពីក្រមនីតិវិធីព្រហ្មទណ្ឌដល់មន្ត្រីនគរបាល​យុត្តិធម៌​នៃបញ្ជាការដ្ឋានកងរាជអាវុធហត្ថខេត្តចំនួន៧៦នាក់។បទបង្ហាញមាន៖ តួនាទីភារកិច្ចរបស់មន្ត្រីនគរបាលយុត្តិធម៌ , មុខវិជ្ជា ,តួនាទីអយ្យការ ,កិច្ចស៊ើបអង្កេត-សហប្រតិបត្តិ​ការនៃកងរាជអាវុធហត្ថ ។ បទបង្ហាញកាលពីព្រឹកថ្ងៃទី២៥ ខែមិថុនា ឆ្នាំ២០២៤ គឺតប​តាម​ការអញ្ជើញរបស់ឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាជ​អាវុធហត្ថខេត្តកំពង់ស្ពឺ ក្នុងគោលបំណងដើម្បីពង្រឹង​ការអនុវត្តតួនាទី ភារកិច្ចការងាររបស់មន្ត្រីនគរបាលយុត្តិធម៌​ក្នុងពេល​ប្រតិបត្តិ​ការ ការងារស្រាវជ្រាវបទល្មើសឱ្យត្រូវតាម​ក្រមនីតិវិធីព្រហ្មទណ្ឌ ។ ព្រះរាជអាជ្ញាអមសាលាដំបូងខេត្តកំពង់ស្ពឺ បានបញ្ជាក់ថា ក្នុងនាមជាមន្ត្រីអនុវត្តច្បាប់ ដែលពាក់ព័ន្ធក្រមនីតិវិធីព្រហ្ម​ទណ្ឌដែលមាន ៦១២មាត្រា មន្ត្រីនគរបាលយុត្តិធម៌ត្រូវ​ស្វែងយល់ឱ្យបានច្បាស់លាស់ ក្នុងពេលអនុវត្តតួនាទី ភារកិច្ច​ជៀសវាងមានការប្តឹងមន្ត្រី​នគរបាលយុត្តិធម៌ ឬមោឃភាព​នីតិវិធី។ ឯកឧត្តមព្រះរាជអាជ្ញាបន្តថា បើមន្ត្រីនគរបាល​យុត្តិធម៌ បើមានចម្ងល់ក្នុងការអនុវត្តនីតិវិធី ត្រូវទំនាក់ទំនង​មកកាន់ព្រះរាជអាជ្ញាផ្ទាល់បាន ដើម្បីជៀសវាងរាល់កំហុស​ឆ្គងក្នុងនីតិធីវិធី ។ ឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថ​ខេត្តកំពង់ស្ពឺបានលើកឡើងថា ក្នុងការអនុវត្តកន្លងមក​កងកម្លាំងរបស់​​លោកនៅមានចំណុចចខ្វះចន្លោះជា​ច្រើន ដែលធ្វើឱ្យសំណុំរឿងមិនទាន់គ្រប់ជ្រុងជ្រោយនៅឡើយ តែដោយមាន​ការ​សម្រប​សម្រួលពីស្ថាប័នអយ្យការ ទើបដំណើរការរឿងនីមួយៗសម្រេចទៅដោយរលូន ៕ ដោយ៖ម៉ុន សំអាត

កំពង់ឆ្នាំង៖លោកវរសេនីយឯក ហ៊ុល វាសនា ស្នងការរង​នគរបាលទទួលបន្ទុកប្រឆាំងបទល្មើសគ្រឿងញៀននៃស្នងការនគរបាលខេត្តកំពង់ឆ្នាំងបានឱ្យដឹង​ថា រយៈពេលប្រាំខែ​ដើម​ឆ្នាំ២០២៤នេះ សមត្ថកិច្ចខេត្តកំពង់ឆ្នាំង បង្ក្រាបគ្រឿង​ញៀនសរុប​ចំនួន ៨០ករណី ក្នុងនោះកងរាជអាវុធហត្ថបង្ក្រាប​បានចំនួនប្រាំករណីឃាត់ខ្លួនជនសង្ស័យចំនួនប្រាំមួយនាក់ (ស្រី ០១នាក់) និងដក​ហូតវត្ថុតាងរួមមាន ម្សៅក្រាមពណ៌​សថ្លា​សង្ស័យជាសារធាតុញៀនប្រភេទមេតំហ្វេតាមីន (ICE) ចំនួន ៤៤ កញ្ចប់ ទម្ងន់​ចំនួន ១៥៧,០៩ក្រាម ។ ប្រភពដដែលបន្តថា ដោយឡែកសមត្ថកិច្ចនគរបា​លបង្ក្រាប​បានចំនួន ៧៥ ករណី និងឃាត់ខ្លួនជនសង្ស័យ ចំនួន ១៦៤នាក់ (ស្រី ១២នាក់) និងដកហូតវត្ថុតាងរួមមានៈ” ម្សៅក្រាមពណ៌សថ្លា សង្ស័យជាសារធាតុញៀន ប្រភេទ​មេតំហ្វេតាមីន (ICE) ចំនួន ៤២៣ កញ្ចប់ ទម្ងន់សរុបចំនួន ១.៧២៦,៩៧ក្រាម ។បើប្រៀបធៀបទៅនឹងរយៈពេលដូចគ្នា​នាឆ្នាំ២០២៣ មានការថយចុះចំនួន ២០ករណី គឺស្មើ ៧៥លើ៩៥ ករណី។ លោកវរសេនីយឯក ហ៊ុល វាសនា ថ្លែងឱ្យដឹងដូចនេះកាល​ពីព្រឹកថ្ងៃទី២៥ ខែមិថុនា ឆ្នាំ២០២៤ ក្នុងពិធីទិវាអន្តជាតិ​ប្រយុទ្ធប្រឆាំង​គ្រឿងញៀន ក្រោមប្រធានបទ”រួមគ្នាវិនិយោគ​លើការបង្ការទប់ស្កាត់និងលើកកម្ពស់ការអប់រំដើម្បីសហគមន៍គ្មានគ្រឿងញៀន”។ ពិធីដែលប្រារព្ធក្នុងបរិវេណវិទ្យាល័យក្រុងកំពង់ឆ្នាំង ភូមិទី៨…

(ភ្នំពេញ)៖ ឯកឧត្តម ឃឹម ហ្វីណង់ អនុរដ្ឋលេខាធិការក្រសួងកសិកម្ម ទទួលបន្ទុកខេត្តពោធិ៍សាត់ បានដឹកនាំមន្ត្រីជំនាញចុះពិនិត្យ វាយតម្លៃលទ្ធផលនៃការអន្តរាគមន៍ និងនាំយកដ្រូនដើម្បីបាញ់ថ្នាំកសិកម្មកម្ចាត់ដង្កូវហ្វូងបង្ហាញប្រជាកសិករ នៅភូមិត្បែងជ្រុំ ឃុំត្នោតជុំ ស្រុកក្រគរ ខេត្តពោធិ៍សាត់។ ក្រសួងកសិកម្មរុក្ខាប្រមាញ់ និងនេសាទបានឱ្យដឹងថានៅក្នុងការបន្តចុះពិនិត្យ​អន្តរាគមន៍ធ្វើឡើងនៅថ្ងៃទី២៥ ខែមិថុនា ឆ្នាំ២០២៤ របស់មន្រ្តីជាន់ខ្ពស់របស់ក្រសួងនេះក្នុងគោលបំណងសិក្សា និងវាយតម្លៃលើការរាតត្បាតរបស់ដង្កូវហ្វូង ហើយណែនាំដល់ប្រជាកសិករដែលចូលរួមប្រមាណជិត២០០គ្រួសារ អំពីរបៀបប្រើថ្នាំកសិកម្មបាញ់កម្ចាស់ដង្កូវ ក្នុងតម្លៃសមរម្យ ហើយមិនប៉ះពាល់ដល់បរិស្ថាន និងសុខភាពប្រជាពលរដ្ឋ ស្របតាមស្តង់ដារបច្ចេកទេសត្រឹមត្រូវ ប្រកបដោយប្រសិទ្ធភាព និងប្រសិទ្ធផលខ្ពស់។ គួរបញ្ជាក់ថា ខេត្តពោធិ៍សាត់រងផលប៉ះពាល់ដោយសារដង្កូវហ្វូងបំផ្លាញ​ដំណាំ​ស្រូវប្រជាកសិករតិចជាងគេ ក្នុងចំណោម១៥ផ្សេងទៀត ដោយសារមានការទប់ស្កាត់​បានទាន់ពេល ធ្វើឱ្យកាត់ផ្តាច់ការវាយលុកនិងការរីករាលដាលរបស់ដង្កូវ ទាំងតំបន់​ដែល​ដង្កូវវាយលុក និងតំបន់ផ្សេងៗដែលកសិករបាញ់ថ្នាំកសិកម្មទប់ស្កាត់។ ទោះជាយ៉ាងណាឯកឧត្តមក៏អំពាវនាវទៅដល់កសិករទាំងអស់ត្រូវចុះពិនិត្យស្រែជាប្រចាំ ដោយសារបច្ចុប្បន្ននេះ ស្ថិតនៅក្នុងដំណាក់កាលផ្ទុះឡើងនៅដង្កូវហ្វូងនៅឡើយ។ បើសិនជាប្រជាកសិករមានភាពយឺតយ៉ាវក្នុងការចុះពិនិត្យឱ្យបានទាន់ពេលទេ ដង្កូវ​ហ្វូង​នោះអាចបំផ្លាញដំណាំស្រូវក្នុងរយៈពេល២ទៅ៣ថ្ងៃអស់តែម្តង។ ឯកឧត្ត​មបន្ថែមថា បើប្រជាកសិករជួបប្រទះនិងដង្កូវបំផ្លាញដំណាំស្រូវ ត្រូវរាយ​ការណ៍ ឬទំនាក់ទំនងទៅអាជ្ញាធរមូលដ្ឋានដែលនៅជិតបំផុត ឬអាចទំនាក់ទំន​ងទៅមន្ត្រីកសិកម្មនៅតាមឃុំ-ស្រុក ដើម្បីឱ្យពួកគាត់ជួយផ្តល់ការណែនាំ​ផ្នែក​បច្ចេកទេស ឬរបៀបនៃការជ្រើសរើសថ្នាំសម្រាប់បាញ់សម្លាប់ដង្កូវនោះផងដែរ។ បើមិនមានការប្រែប្រួលទេ ឯកឧត្តបញ្ជាក់ថា តាមការបញ្ជាផ្ទាល់ពីឯកឧត្តម ឌិត ទីណា រដ្ឋមន្ត្រី ចាប់ពីថ្ងៃនេះ ថ្ងៃស្អែក និងថ្ងៃបន្តបន្ទាប់ទៀត…