(តាកែវ) ៖ ក្នុងសិក្ខាសាលាផ្សព្វផ្សាយរបាយការណ៍ជាតិស្តីពីការអនុវត្តកតិកាសញ្ញាអន្តរជាតិ ស្តីពីសិទ្ធិសេដ្ឋកិច្ច សង្គម និងវប្បធម៌ (ICESCR) នាថ្ងៃ១៥ ខែកញ្ញា ឆ្នាំ២០២៥ នៅសាលាខេត្តតាកែវ ឯកឧត្តម កែវ រ៉េមី ទេសរដ្ឋមន្ត្រី ទទួលបន្ទុកបេសកកម្មពិសេស ប្រធានគណៈ កម្មាធិការសិទ្ធិមនុស្សកម្ពុជា បានគូសបញ្ជាក់ថា គ្មានទេសិទ្ធិមនុស្ស ដរាបណាប្រទេសគ្មានសន្តិភាព ដូច្នេះមានតែពួកយើងទាំងអស់គ្នាខិតខំជួយថែរក្សាសុខសន្តិភាពឱ្យបាន ។ ឯកឧត្តមទេសរដ្ឋមន្ត្រី បានលើកឡើងថា សិទ្ធិសេដ្ឋកិច្ច សង្គម និងវប្បធម៌ គឺជាសិទ្ធិមូលដ្ឋានគោលដ៏សំខាន់របស់មនុស្ស ក្នុងចំណោមសិទ្ធិសំខាន់ៗដទៃទៀត ដែលត្រូវបានការពារ និងលើកកម្ពស់ដូចមានចែងក្នុងកតិកាសញ្ញាអន្តរជាតិស្ដីពីសិទ្ធិសេដ្ឋកិច្ច សង្គម និងវប្បធម៌ ។ ទន្ទឹមគ្នា នេះរាជរដ្ឋាភិបាលកម្ពុជាក៏បានដាក់ចេញនូវគោលនយោបាយ ផែនការយុទ្ធសាស្រ្ត ព្រមទាំងវិធានការនានាតាមវិស័យ សំដៅធានាការលើកកម្ពស់សិទ្ធិសេដ្ឋកិច្ច សង្គម និងវប្បធម៌ ក៏ដូចជាការអនុវត្តកតិកាសញ្ញាអន្តរជាតិនេះផងដែរ ។ ឯកឧត្តមទេសរដ្ឋមន្រ្តី កែវ រ៉េមី បានលើកឡើងថា សភាពការណ៍នៅលើសកលលោកនាពេលបច្ចុប្បន្ន មានទំនោរបង្កាត់ភ្លើងសង្គ្រាម ដែលបានប៉ះពាល់ដល់សិទ្ធិមនុស្សយ៉ាងខ្លាំង ព្រោះសូម្បីតែសិទ្ធិរស់រានមានជីវិត ដែលជាសិទ្ធិចម្បងគេ ក៏មិនត្រូវបានធានាដែរ ហេតុនេះ…

(ភ្នំពេញ)៖ និយ័តករទូរគមនាគមន៍កម្ពុជា(ន.ទ.ក.) សង្កេតឃើញពីការកើនឡើង​នៃការផ្ញើសារឆបោកតាមរយៈ ផ្ទាលតេឡេក្រាម (Telegram) ដោយជនឆបោក​ទាំង​នោះបានប្រើប្រាស់វិធីសាស្ត្រក្នុងទម្រង់និងរូបភាពផ្សេងៗ ដូចជា÷ ប្រើប្រាស់​ឈ្មោះ​និងរូបភាពរបស់បុគ្គលសាធារណៈល្បីៗ ថ្នាក់ដឹកនាំក្រសួងស្ថាប័ន ឬថ្នាក់​ដឹកនាំ ក្រុម​ហ៊ុន បង្កើតកម្មវិធីវិនិយោគក្លែងក្លាយ ដើម្បីអូសទាញសាធា​រណជនឱ្យ​ធ្វើការ​វិនិយោគ ដោយសន្យាថានឹងទទួលបានផលចំណេញខ្ពស់ក្នុងរយៈពេលដ៏ខ្លី។នេះ​បើ​យោងតាមសេចក្តីជូនដំណឹងរបស់និយ័តករទូរគមនាគមន៍កម្ពុជា កាលពីថ្ងៃទី​១៥ ខែសីហា ឆ្នាំ២០២៥ ។ ជនឆបោកទាំងនោះបានប្រើប្រាស់វិធីសាស្ត្រក្នុងទម្រង់និងរូបភាពផ្សេងៗ ដូចជា ផ្ញើសារជូនដំណឹងអំពីការឈ្នះរង្វាន់ និងតម្រូវឱ្យអ្នកទទួលបានសារទាំងនោះ​ផ្តល់​ព័ត៌មាន ផ្ទាល់ខ្លួន និងព័ត៌មានហិរញ្ញវត្ថុ ដើម្បីអាចទទួលបានរង្វាន់ទាំងនោះ។ សូមអានខ្លឹមសារទាំងស្រុងដូចខាងក្រោម ដោយ៖ង៉ាន់ ទិត្យ

(ភ្នំពេញ)៖ ចាប់ផ្តើម​រាប់ថយក្រោយ ឆ្ពោះទៅកម្មវិធី​ពិព័រណ៍ផលិតផលខ្មែរ ក្រោម​ប្រធាន​បទ «ខ្មែរធ្វើបាន​៖ ចូលរួម ជំរុញ​ គាំទ្រ​ផលិត​ផលក្នុងស្រុក»​​ រៀបចំដោយ​សហភាពសហព័ន្ធ​យុវជនកម្ពុជា​​​​ ការជ្រើសរើសប្រើប្រាស់និងគាំទ្រផលិតផលដែលផលិតផលដែលបង្កើតឡើងដោយកម្លាំង និងចំណេះដឹងរបស់ប្រជាជនខ្មែរ គឺជាការចូលរួមដ៏សំខាន់​ក្នុងការបង្កើត​អនា​គត​ដ៏រឹងមាំសម្រាប់ជាតិ។ ការគាំទ្រនេះបានបង្កើតឱកាសការងារ ជំរុញសេដ្ឋកិច្ច និង​ស្ថិរភាពសង្គម ព្រមទាំងជាកត្តាជំរុញឱ្យមានការពង្រឹងគុណភាពផលិតកម្ម​ក្នុងស្រុក​ដើម្បីអាចប្រកួតប្រជែងលើទីផ្សារអន្តរជាតិ។ ជ្រើសរើសប្រើប្រាស់ផលិតផលក្នុងស្រុកថ្ងៃនេះ ដើម្បីអនាគតរុងរឿងរបស់កម្ពុជា! ដោយ ៖ ង៉ាន់ ទិត្យ

(ភ្នំពេញ)៖ ពួកយើងមានមោទនភាពក្នុងការចែករំលែកអំពីកម្មវិធីអភិរក្សសត្វខ្សឹប​ប្រកបដោយជោគជ័យរបស់ពួកយើងដែលកំពុងតែបំផុសក្តីសង្ឃឹមទៅដល់ប្រទេសផ្សេងៗទៀត។ មជ្ឈមណ្ឌលអង្គរសម្រាប់ការអភិរក្សជីវចម្រុះបានឱ្យដឹងថា ប្រទេសនេប៉ាល់ ​កំពុង​ពិចារណាទៅលើកម្មវិធីបង្កាត់ពូជនៅក្រៅដែនជម្រកធម្មជាតិសម្រាប់សត្វខ្សឹបដែលជាប្រភេទរងគ្រោះជិតផុតពូជបំផុត ដោយទាញយកការបំផុសគំនិតនូវគំរូប្រកប​ដោយ​ជោគជ័យរបស់មជ្ឈមណ្ឌលអង្គរសម្រាប់ការអភិរក្សជីវចម្រុះ (ACCB) បន្ទាប់​ពីដំណើរទស្សនកិច្ចរបស់អង្គការអភិរក្សសត្វស្លាបប្រទេសនេប៉ាល់ (Bird Conservation Nepal – BCN) មកកាន់មជ្ឈមណ្ឌលមួយនេះ កាលពីពេលកន្លង​ទៅ​។ អង្គការមួយនេះបានឱ្យដឹងដែរថានាពេលបច្ចុប្បន្ន ចំនួនប្រជាសាស្ត្រសត្វខ្សឹបសេស​សល់​តិចជាង ១,០០០ ក្បាលនៅទូទាំងពិភពលោក។ហេតុនេះ រាល់កិច្ចខិតខំប្រឹង​ប្រែង​ក្នុងការអភិរក្សទាំងអស់សុទ្ធតែមានសារៈសំខាន់។ ប្រភេទសត្វស្លាបដ៏ពិសិដ្ឋ​ដែលរស់នៅតាមតំបន់វាលស្មៅទាំងនេះកំពុងប្រឈមទៅនឹងសម្ពាធកើនឡើងពីការបាត់បង់ទីជម្រក ការប្រើប្រាស់ថ្នាំសម្លាប់សត្វល្អិត និងការរំខានពីសកម្មភាព​របស់​មនុស្ស។ គួរបញ្ជាក់ថា កន្លងមកនេះមជ្ឈមណ្ឌលអង្គរសម្រាប់ការអភិរក្សជីវចម្រុះបានទទួល​ជោគជ័យ​ក្នុងការ បង្កាត់ពូជនៅក្រៅដែនជម្រកធម្មជាតិនៅកម្ពុជា។ យ៉ាងណាក្តី ក្រុមអ្នកជំនាញបានបញ្ជាក់ថា សត្វខ្សឹបងាយនឹងទទួល​រងភាពតានតឹង​ខ្លាំងណាស់ ដែលបណ្តាលឱ្យប្រតិបត្តិការនេះផុយស្រួយងាយនឹងបរាជ័យ ដូច្នេះទាម​ទារ​ជំនាញឯកទេសដ៏ពិតប្រាកដ។ មជ្ឈមណ្ឌលអង្គរសម្រាប់ការអភិរក្សជីវចម្រុះបានលើកឡើងដែរថា”ភាពជោគជ័យនៃការអភិរក្សដ៏ពិតប្រាកដទាមទារវិធីសាស្ត្រគ្រប់ជ្រុងជ្រោយ ដែលរួមបញ្ចូលទាំង​ការការពារ ព្រមទាំងការគ្រប់គ្រងនូវទីជម្រកតំបន់វាលស្មៅ ការការពារតំបន់មិន​មែន​ជាជម្រកពងកូន ឬ (បង្កាត់ពូជ)នៅក្នុងទីវាលទំនាបកសិកម្ម ការចូលរួមជាមួយ​សហគមន៍​មូលដ្ឋានជាដៃគូក្នុងការអភិរក្ស និងការកាត់បន្ថយផលប៉ះពាល់នានា​នៃការប្រើប្រាស់ថ្នាំសម្លាប់សត្វល្អិត”។ មជ្ឈមណ្ឌលអង្គរសម្រា​ប់ការអភិរក្សជីវៈចម្រុះ (ACCB) បានធ្វើការប្តេជ្ញាចិត្តចែក​រំលែក​ចំណេះដឹងរបស់ខ្លួន និងគាំទ្រដល់កិច្ចខិតខំប្រឹងប្រែងក្នុងការអភិរក្ស​នៅ​គ្រប់​ទីកន្លែងដែលត្រូវការ។កិច្ចខិតខំប្រឹងប្រែងទាំងនេះនឹង ធានាបានថាសត្វស្លាប​ដ៏អស្ចារ្យ​ទាំងនេះនឹងនៅបន្តលម្អសម្រស់វាលស្មៅរបស់ពួកយើងសម្រាប់មនុស្ស​ជំនាន់ក្រោយៗទៀត៕ ដោយ៖ម៉ាដេប៉ូ

កែប៖មន្ត្រីរាជការ មន្ត្រីជាប់កិច្ចសន្យានៃសាលាខេត្តកែប​ទាំងអស់​  ក្នុងនាមជាមន្ត្រីរាជការគឺត្រូវបំពេញកាតព្វកិច្ច របស់ខ្លួនឱ្យបានល្អ ដោយអនុវត្តសមត្ថភាពរបស់ខ្លួនឱ្យក្លាយទៅជាមន្ត្រីពូកែ ស្អាតស្អំ ដែលពលរដ្ឋត្រូវកា។រ ដោយឡែក ក្នុងការដឹកនាំក៏ត្រូវធ្វើខ្លួនជាគំរូល្អសម្រាប់មន្ត្រីក្រោមឱវាទ និងប្រកាន់យកគោលការណ៍ដឹកនាំល្អ ប្រកបដោយ គុណធម៌ សីលធម៌ ។ នេះជាប្រសាសន៍របស់ឯកឧត្តមបណ្ឌិត សោម ពិសិដ្ឋ អភិបាលខេត្តកែប​ក្នុងពិធីជួបសំណេះសំណាលជាមួយមន្ត្រី​រាជការមន្ត្រី​កិច្ចសន្យានៃសាលាខេត្តកែបកាលពីរសៀលថ្ងៃទី១៥ ខែកញ្ញា ឆ្នាំ២០២៥ ដោយមានការអញ្ជើញចូលរួម​ជាអធិបតីពីឯកឧត្តម អ៊ុក ថា ប្រធានក្រុមប្រឹក្សាខេត្ត។ ក្នុងពិធីសំណេះសំណាលនេះដែរ​ ឯកឧត្តម​ប្រធាន​ក្រុម​ប្រឹក្សា​ខេត្ត​ និងឯកឧត្តមបណ្ឌិត​ អភិបាល​ខេត្ត​ ក៏បានផ្ដល់​ជូននូវកុំព្យូទ័រ​ដែលជាអំណោយរបស់​ឯកឧត្តម​ឧបនាយករដ្ឋមន្ត្រី​ សាយ​ សំអាល់​ ប្រធាន​ក្រុមការងារ​រាជរដ្ឋាភិបាល​ចុះមូលដ្ឋានខេត្តកែប​ ដល់រដ្ឋបាលក្រុង​ ស្រុក​ សាលាឃុំ​ សង្កាត់​ អង្គភាព​ពាក់ព័ន្ធ​ដើម្បីយកទៅប្រើបាស់ម្រាប់​បម្រើសេវាសាធារណ:ជូនប្រជាពលរដ្ឋឱ្យកាន់តែល្អប្រសើរ៕ដោយ៖ សិលា សារិន

ព្រះវិហារ៖ ស្ថានទូតជប៉ុនប្រចាំនៅកម្ពុជាបាននាំយកកញ្ចប់ជំនួយបន្ទាន់ ដែលជាអំណោយរបស់រដ្ឋាភិបាល និងប្រជាជន ជប៉ុនទៅប្រគល់ជូនដល់ជនភៀសសឹកចំនួន២០០គ្រួសារ ដែលកំពុងស្នាក់នៅមណ្ឌលសុវត្ថិភាពវត្តកំពង់សង្កែ ស្ថិតក្នុងស្រុកឆែប ខេត្តព្រះវិហារ។ ពិធីប្រគល់ជំនួយនេះធ្វើឡើងនៅថ្ងៃទី១៥ ខែកញ្ញា ឆ្នាំ២០២៥ ក្រោមវត្តមានឯកឧត្តម គីម រិទ្ធី អភិបាលខេត្តព្រះវិហារ និងលោក Nagashe Kensuke ឧបទូត និងជាអនុប្រធានបេសកកម្ម នៃស្ថានទូតជប៉ុនប្រចាំកម្ពុជា រួមជាមួយតំណាង​អង្គការយូនីសេហ្វ (UNICEF) និងអង្គការ IOM ប្រចាំនៅកម្ពុជា។ លោក Nagashe Kensuke បានថ្លែងថា ជំនួយនេះគឺដើម្បីឆ្លើយតបទៅនឹងតម្រូវការចាំបាច់របស់ប្រជាពលរដ្ឋ ដែលរងផលប៉ះពាល់ជម្លោះព្រំដែន។ លោកបន្តថា ជំនួយនេះត្រូវបានផ្តល់តាមរយៈអង្គការយូនីសេហ្វ និង IOM ដោយផ្តោតលើការផ្តល់សម្ភារៈចាំបាច់ ទីជម្រកបណ្តោះអាសន្ន ទឹកស្អាត និងការគាំទ្រផ្នែកផ្លូវចិត្ត ហើយលោកសង្ឃឹមថា ជំនួយនេះនឹងជួយឱ្យជនភៀសខ្លួន អាចកសាងជីវិតរបស់ពួកគេឡើងវិញបានឆាប់រហ័ស។ ឯកឧត្តមអភិបាលខេត្តព្រះវិហារបានថ្លែងអំណរគុណយ៉ាងជ្រាលជ្រៅ ដល់រដ្ឋាភិបាល និងប្រជាជនជប៉ុន ដែលបាន​បង្ហាញ​ពីភាពជាមិត្តដ៏ល្អ ដៃគូអភិវឌ្ឍន៍ដ៏សំខាន់របស់កម្ពុជា និងកិច្ចសហប្រតិបត្តិការដ៏យូរអង្វែងរបស់ជប៉ុនក្នុងការជួយ​ដល់កម្ពុជា៕ដោយ៖ឡុង សំបូរ