ភ្នំពេញ ៖ គោរពច្បាប់ចរាចរណ៍ស្មើនឹងគោរពជីវិតខ្លួនឯង ! គ្រោះថ្នាក់ចរាចរណ៍ផ្លូវគោកទូទាំងប្រទេសនៅថ្ងៃទី២១ ខែមីនា ឆ្នាំ២០២៣ ម្សិលមិញ បណ្តាលឲ្យមនុស្សស្លាប់ ៦នាក់ របួសធ្ងន់ ១៦នាក់ និងស្រាល ១១នាក់ ។ យោងតាមទិន្នន័យគ្រោះថ្នាក់ចរាចរណ៍ផ្លូវគោកទូទាំងប្រទេស ចេញដោយនាយកដ្ឋាននគរបាលចរាចរណ៍ និងសណ្តាប់សាធារណៈ នៃអគ្គស្នងការដ្ឋាន នគរបាលជាតិ នៅថ្ងៃទី២១ ខែមីនា បានបញ្ជាក់ថាគ្រោះថ្នាក់ដែលបង្កឲ្យមានមនុស្សស្លាប់ និងរបួសសរុបចំនួន ៣៣នាក់ គឺកើតឡើងដោយសារការប៉ះទង្គិច គ្នាចំនួន ១៣លើក មានកត្តាល្បឿន ៤លើក មិនគោរពសិទ្ធ ៥លើក មិនប្រកាន់ស្តាំ ៣លើក និងប្រជែងគ្រោះថ្នាក់ ១លើក ៕ដោយ ៖ ភារ៉ា និងប៊ុនធី

ភ្នំពេញ៖ សម្តេចតេជោ ហ៊ុន សែន បានបញ្ជាក់ថា នៅពេលខាងមុខ អាចនឹងមានសាកលវិទ្យាល័យនៅប្រទេសអង់គ្លេសមកបើកនៅប្រទេសកម្ពុជា។ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងដូចនេះ ក្នុងពិធីប្រគល់សញ្ញាបត្រជូននិស្សិតវិទ្យាស្ថានវ៉ាន់ដា ចំនួន ៤,៧០៥នាក់ នារី ៤,២២១នាក់ នាព្រឹកថ្ងៃទី២២ ខែមីនា ឆ្នាំ២០២៣ នៅមជ្ឈមណ្ឌលសន្និបាត និងពិព័រណ៍កោះពេជ្រ។ សម្ដេចតេជោ ហ៊ុន សែន បានបញ្ជាក់ថា ឯកអគ្គរាជទូតអង់គ្លេស បានជម្រាបជូនសម្ដេចថា សាកលវិទ្យាល័យ នៃប្រទេសអង់គ្លេស នឹងមកបើកនៅក្នុងប្រទេសកម្ពុជា ដែលនេះគឺជាឱកាសសម្រាប់ឲ្យអ្នកដែលពុំមានលទ្ធភាពបញ្ជូននិស្សិត ទៅសិក្សានៅក្រៅប្រទេស ហើយក៏ល្អសម្រាប់អ្នកដែលឲ្យកូនរៀនភាសាអង់គ្លេសពីតូច មានឱកាសបានចូលរៀនតាមសាកលវិទ្យាល័យបរទេស នៅកម្ពុជា ។ សម្ដេចតេជោ នាយករដ្ឋមន្ត្រី បានបញ្ជាក់ថា ការចេញទៅសិក្សានៅក្រៅប្រទរស គឺត្រូវចំណាយច្រើនជាងនៅក្នុងស្រុក ៕ អត្ថបទ ៖ វណ្ណលុក, រូបភាព៖ វ៉េង លីមហួត និង សួង ពិសិដ្ឋ

កំពង់ស្ពឺ៖ ក្នុងជំនួបសាកសួរសុខទុក្ខ ស្រ្តីជាកម្មការិនីរោងចក្រស៊ីគ្លូ ដែលទើបសម្រាលកូនរួច នាថ្ងៃទី២១ ខែមីនា ឆ្នាំ២០២៣ អភិបាលខេត្តកំពង់ស្ពឺ បានស្នើសុំឱ្យកម្មករ កម្មការិនីបញ្ឈប់ការចោលសម្រាម ពាសវាល ពាសកាល ដើម្បីជួយលើកកម្ពស់មុខមាត់ និងសោភ័ណភាពខេត្តស៊ីវិល័យមួយនេះ ។ ឯកឧត្តម វ៉ី សំណាង អភិបាលខេត្តកំពង់ស្ពឺ មានប្រសាសន៍ថា ស្ត្រីជាសសរស្តម នៃគ្រួសារ ទាំងការរកលុយ ទាំងការមើលកូនៗក្នុងបន្ទុក គប្បីយើងផ្តល់តម្លៃឲ្យស្ត្រីឲ្យបានប្រសើរ ហើយត្រូវចាត់ទុកស្រ្តី គាត់ជាមេគ្រួសារដ៏សំខាន់ និងជាភាពកក់ក្តៅបំផុតសម្រាប់កូនដែលចាំបាច់ត្រូវការម្តាយឯកឧត្តមបានបញ្ជាក់ថា ខេត្តរបស់យើងត្រូវបានគេផ្តល់រហ័សនាមថា ជាខេត្តស៊ីវិល័យ ក្រោយពីខេត្តនេះបានរងការរិះគន់អស់ជាច្រើនឆ្នាំជាខេត្តក្រីក្រគ្មានទ្រព្យធន។ ដោយសក្តានុពលរបស់ខេត្ត និងក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រី បាននាំមក នូវសុខសន្តិភាព ស្ថិរភាពនយោបាយ ធ្វើឱ្យអ្នកវិនិយោគទុនបានដាក់ទុនរកស៊ីនៅក្នុងខេត្តយើងនេះ ហើយផ្តល់ឱកាសការងារដល់កូនក្មួយប្រមាណជាង ១៥ម៉ឺននាក់សម្រាប់បច្ចុប្បន្ន ។ ឯកឧត្តម អភិបាលខេត្ត ក៏បានស្នើសុំដោយទទូចត្រូវរួមគ្នាបញ្ឈប់ការចោលសម្រាម ពាសវាល ពាសកាលដែលធ្វើឱ្យប៉ះពាល់យ៉ាងធ្ងន់ធ្ងរដល់មុខមាត់និងបរិស្ថានខេត្ត ពិសេសប៉ះពាល់ដល់ភ្ញៀវទេស ចរណ៍ជាតិ-អន្តរជាតិ ដែលគេមកលេងរមណីយដ្ឋានដ៏សំបូរបែបក្នុងខេត្តយើង។ ហើយមួយទៀតខេត្ត កំពង់ស្ពឺ ក៏ទើបនិងទទួលបានរំដួលពីរទងជាទីក្រុងស្អាតផងដែរ ។…

ភ្នំពេញ៖ ប្រជាពលរដ្ឋទូទាំងខេត្តឧត្តរមានជ័យ ត្រូវបានរំពឹងថា នឹងមានអគ្គិសនីប្រើប្រាស់ទាំងអស់កំឡុងខែមិថុនាខាងមុខនេះ ខណៈបច្ចុប្បន្នអាជ្ញាធរខេត្តនេះប្តេជ្ញាថា នឹងជំរុញឱ្យពលរដ្ឋនៅថ្នាក់មូលដ្ឋាន អគ្គិសនីប្រើប្រាស់គ្រប់ៗគ្នា ដើម្បីរួមចំណែក ក្នុងការកាត់បន្ថយភាពក្រីក្រ និងជំរុញកំណើនសេដ្ឋកិច្ចជាតិ។ ឯកឧត្តម ប៉ែន កុសល្យ អភិបាលខេត្តឧត្តរមានជ័យ បានលើកឡើងក្នុងសន្និសីទសារព័ត៌មាន ស្ដីពី «ភាពជោគជ័យក្នុងរយៈពេល៥ឆ្នាំកន្លងមក» របស់រដ្ឋបាលខេត្តឧត្តរមានជ័យ នាពីថ្ងៃទី២១ ខែ មីនា ឆ្នាំ២០២៣ ថា គិតមកដល់ពេលនេះ ប្រជាពលរដ្ឋរស់នៅទូទាំងខេត្ត ចំនួនជាងបីម៉ឺនគ្រួសារ មានអគ្គិសនីប្រើប្រាស់ ខណៈបច្ចុប្បន្នរដ្ឋបាលខេត្ត និងភាគីអ្នកពាក់ព័ន្ធ កំពុងពន្លឿនធ្វើការពង្រីកការតភ្ជាប់បណ្តាញអគ្គិសនីបន្ថែមទៀត។ ឯកឧត្តមបានឱ្យដឹងថា ៖ «ជារួមក្នុងចំណោម ប្រជាពលរដ្ឋ ៦៤ ៦៥៦គ្រួសារយើងមាន ៣៣ ០៩៣គ្រួសារ ស្មើនឹង ៩០,៤៧ភាគរយ មានមានអគ្គិសនីប្រើប្រាស់ ហើយចំនួនដែលនៅសល់ តាមការរំពឹងទុកនឹងមានអគ្គិសនីប្រើប្រាស់ទាំងអស់ក្នុងកំឡុងខែមិថុនាខាងមុខ ដោយបច្ចុប្បន្នក្រុមការងារកំពុងធ្វើការពង្រីកការតភ្ជាប់បណ្តាញអគ្គិសនីបន្ថែមទៀតដល់គ្រប់មូលដ្ឋានភូមិឃុំជាពិសេសនៅតាមតំបន់ជនបទដាច់ស្រយាល»។ ជាមួយគ្នានេះដែរ ក្រៅពីការងារពង្រីកការតភ្ជាប់បណ្តាញអគ្គិសនីហើយនោះ លោកអភិបាលខេត្តបានអះអាងទៀតថា ចំពោះវិស័យទឹកស្អាត ដែលជាការងារអាទិភាពមួយទៀតនោះ រដ្ឋបាលខេត្តកំពុងអនុវត្ត គឺបន្តខិតខំប្រឹងប្រែងកែលម្អ និងលើកកម្ពស់ជីវភាពរស់នៅរបស់ បងប្អូនប្រជាពលរដ្ឋតាមរយៈការកែលម្អហេដ្ឋារចនាសម្ព័ន្ធគមនាគមន៍ឱ្យកាន់តែប្រសើរថែមទៀត ដូចជាការ ស្តារប្រព័ន្ធធារាសាស្រ្តដែលមានសក្តានុពលនៅក្នុងខេត្តឡើងវិញបន្ថែមទៀត។…

ភ្នំពេញ៖ នៅថ្ងៃអង្គារ៍ ទី២១ ខែមីនា ឆ្នាំ ២០២៣នេះ ក្រសួងពាណិជ្ជកម្ម នៃកម្ពុជា បានចេញសេចក្ដីជូនដំណឹងស្ដីពីថ្លៃលក់រាយប្រេងឥន្ធនៈនៅតាមស្ថានីយ៍ ចាប់ពីថ្ងៃទី ២១ ដល់ថ្ងៃទី ៣១ ខែមីនា ឆ្នាំ ២០២៣ នឹងត្រូវលក់ ៤ ៤៦៣រៀលលីត្រ សម្រាប់សាំងធម្មតា EA92 និង ៤ ៣១៣រៀលលីត្រ សម្រាប់ប្រេងម៉ាស៊ូត DO 50ppm ។ នេះគឺដើម្បីជួយសម្រួលដល់ជីវភាពរបស់ប្រជាជន និងដោយមានការចូលរួមចំណែក ពីក្រុមហ៊ុនចែកចាយប្រេងឥន្ធនៈនៅកម្ពុជា សម្ដេចតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ចុះតម្លៃលក់រាយប្រេងឥន្ធនៈនៅកម្ពុជាចំនួន ៦,៥សេនដុល្លារ ។ ដូច្នេះថ្លៃលក់រាយប្រេងឥន្ធនៈសម្រាប់អនុវត្តចាប់ពីថ្ងៃទី ២១ ដល់ថ្ងៃទី ៣១ ខែមីនា ឆ្នាំ ២០២៣ និងចុះមក ៤ ២០០រៀលលីត្រ សម្រាប់សាំងធម្មតា EA92 និង ៤ ០៥០រៀលលីត្រ សម្រាប់ប្រេងម៉ាស៊ូត DO 50ppm។…