ភ្នំពេញ៖ នៅទីស្ដីការក្រសួងមហាផ្ទៃ នាព្រឹកថ្ងៃចន្ទ ទី១២ ខែធ្នូ ឆ្នាំ២០២២នេះ ឯកឧត្តម សក់ សេដ្ឋា រដ្ឋលេខាធិការប្រចាំការ ក្រសួងមហាផ្ទៃ បានអញ្ជើញជាអធិបតីដឹកនាំកិច្ចប្រជុំត្រួតពិនិត្យរថយន្តដែលស្នើសុំលើកលែងពន្ធនាំចូល ព្រមទាំងជម្រះបញ្ជីរថយន្តដែលខូចចាស់ទ្រុឌទ្រោមចេញពីបញ្ជីសារពើភណ្ឌរបស់ក្រសួងមហាផ្ទៃ ។ ឯកឧត្តម សក់ សេដ្ឋា រដ្ឋលេខាធិការប្រចាំការ មានប្រសាសន៍ថា កិច្ចប្រជុំនេះរៀបចំឡើងតបតាមការស្នើសុំរបស់ អគ្គនាយកដ្ឋានភស្តុភារ និងហិរញ្ញវត្ថុ ក្រសួងមហាផ្ទៃ ក្នុងការដកចេញរថយន្តមួយចំនួនចេញពីការលើកលែងពន្ធនាំចូល និងដើម្បីជម្រះបញ្ជីរថយន្តដែលខូចចាស់ទ្រុឌទ្រោមចេញពីបញ្ជីសារពើភណ្ឌ និងបញ្ជូនរថយន្តដែលយកពីស្ថាប័នតុលាការ បញ្ជូនទៅឱ្យតុលាការវិញ។ ឯកឧត្តម សក់ សេដ្ឋា រដ្ឋលេខាធិការប្រចាំការ មានប្រសាសន៍ណែនាំដល់អង្គភាពនីមួយៗត្រូវរៀបចំឯកសារនៃរថយន្តនីមួយឱ្យបានច្បាស់លាស់ ដោយឡែកការជម្រះបញ្ជីរថយន្តដែលខូចចាស់ទ្រុឌទ្រោមចេញពីបញ្ជីសារពើភណ្ឌ ឯកឧត្តមបានណែនាំ ឱ្យអង្គភាពនីមួយៗដែលមានចំនួនរថយន្តខូចខាតលែងប្រើប្រាស់ ត្រូវបញ្ជូនព័ត៌មានទៅកាន់អគ្គនាយកដ្ឋានភស្តុភារ និង ហិរញ្ញវត្ថុ ក្រសួងមហាផ្ទៃ ដើម្បីពិនិត្យលទ្ធភាពក្នុងកាត់តួលេខរថយន្តទាំងនោះ ចេញពីក្នុងបញ្ជីភស្តុភារ ៕ ដោយ-រ៉ាវុធ

ភ្នំពេញ ៖ ក្រុមគ្រូពេទ្យស្ម័គ្រចិត្តនៃមូលនិធិភ្នែក របស់អូស្រ្តាលី និងក្រុមគ្រូពេទ្យបងប្អូនខ្មែរយើងដែលរស់ នៅប្រទេសអូស្រា្តលី បានអញ្ជើញចូលជួបសម្តែងការគួសមជាមួយឯកឧត្តមឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ នៅព្រឹកថ្ងៃទី១២ ខែធ្នូ ឆ្នាំ២០២២ ក្រោយពីបញ្ចប់បេសកកម្មពិនិត្យ និងព្យាបាលជម្ងឺភ្នែកឡើងបាយដោយឥតគិតថ្លៃជូនប្រជាពលរដ្ឋកម្ពុជា រយៈពេល ១សប្តាហ៍។ លោកស្រីវេជ្ជបណ្ឌិត លីហ្សា បានមានប្រសាសន៍ថា ក្រុមគ្រូពេទ្យស្ម័គ្រចិត្តនៃមូលនិធិភ្នែកអូស្ត្រាលី ដែលមកពិនិត្យ និងព្យាបាលភ្នែកជូនប្រជាពលរដ្ឋកម្ពុជា ពិសេសពលរដ្ឋក្នុងខេត្តកំពង់ចាម មានចំនួន ៦៨នាក់ ដោយបានពិនិត្យ និងព្យាបាលជម្ងឺភ្នែកឡើងបាយជូនប្រជាពលរដ្ឋចំនួន ២៧០០នាក់ និងអ្នកជម្ងីត្រចៀកមានចំនួន ៤០២នាក់។លោកស្រីសន្យាថា នៅឆ្នាំក្រោយ ក្រុមគ្រូពេទ្យស្ម័គ្រចិត្តនៃមូលនិធិភ្នែករបស់អូស្ត្រាលី នឹងមកពិនិត្យ និងព្យាបាលជូនប្រជាពលរដ្ឋកម្ពុជាបន្តទៀត។ តាងនាមរាជរដ្ឋាភិបាល និងប្រជាជនកម្ពុជា, ឯកឧត្តមឧបនាយករដ្ឋមន្ត្រី យឹម ឆៃលី បានស្វាគមន៍ និងថ្លែងអំណរគុណយ៉ាងជ្រាលជ្រៅចំពោះក្រុមគ្រូពេទ្យស្ម័គ្រចិត្តនៃមូលនិធិភ្នែករបស់អូស្ត្រាលីដែលបានមកពិនិត្យ និងព្យាបាលជម្ងឺភ្នែកឡើងបាយជូនប្រជាពលរដ្ឋកម្ពុជាដោយឥតគិតថ្លៃ ដែលជាការរួមចំណែករំលែកនូវទុក្ខលំបាករបស់ប្រជាពលរដ្ឋកម្ពុជាបានមួយផ្នែកធំ ហើយក៏បានជាកុសលល្អផងដែរក្នុងផ្លូវព្រះពុទ្ធសាសនា ដែលយើងបានជួយប្រជាជនឱ្យចៀសផុតពីពិការភាពជំងឺភ្នែកទ្បើងបាយ ឱ្យមានភ្នែកភ្លឺ អាចមើលឃើញពីការអភិវឌ្ឍប្រទេសជាតិ និងសង្គមជាតិនៅពេលបច្ចុប្បន្ន និងអនាគត ៕សេឌី

ភ្នំពេញ៖ លោកវរសេនីយ៍ឯក ហ៊ាង ថារ៉េត អធិការនគរបាលខណ្ឌឫស្សីកែវ បានប្រាប់អ្នកយកព័ត៌មានឲ្យដឹងថា កងកម្លាំងជំនាញខណ្ឌ និងប៉ុស្តិ៍ឫស្សីកែវ បានធ្វើការបង្ក្រាបជាក់ស្ដែងករណីប្រើប្រាស់នូវសារធាតុញៀននៅចំណុច ផ្លូវបេតុង ក្រុមទី១០ ភូមិសាមគ្គី សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ នៅថ្ងៃទី១១ ខែ ធ្នូ ឆ្នាំ២០២២ វេលាម៉ោង ១៦និង ៣០នាទី ដោយឃាត់ខ្លួនបានមនុស្សចំនួន ០៥នាក់ ស្រីម្នាក់ និងវត្ថុតាងមួយចំនួន។ បច្ចុប្បន្ន កំលាំងជំនាញខណ្ឌ និងប៉ុស្តិ៍ កំពុងកសាងសំណុំរឿង បញ្ជូន ទៅសាលាដំបូងរាជធានីភ្នំពេញ ដើម្បីអនុវត្តន៍តាមនីតិវិធី ៕ ដោយ ស៊ូ ប៊ុនធី

ភ្នំពេញ៖ ស្ថានីយផូស៊ីលភ្នំធំ (Phnom Thom Fossil Site)ស្ថិត នៅខេត្តបន្ទាយមានជ័យ ក្បែរព្រំប្រទល់ខេត្តបាត់ដំបង ទីតាំងនេះ ក៏ជាទីតាំងផូស៊ីលសត្វសមុទ្រមួយកន្លែងនៅប្រទេសកម្ពុជា ។ បើតាមមន្រ្តីក្រសួងបរិស្ថានបានឱ្យដឹងថា៖ ទីតាំងតំបន់គេរកឃើញផូស៊ីលមួយកន្លែងនេះត្រូវបានក្រុមការងារអ្នកជំនាញក្រសួងបរិស្ថាននិងអ្នកជំនាញពាក់ព័ន្ធបានចុះពិនិត្យកាលពីឆ្នាំ ២០១៩ (រូបទី៥៩)។ ភ្នំនេះត្រូវបានប្រើប្រាស់ជាទីតាំងយកថ្ម សម្រាប់ការដ្ឋានកិនថ្ម។ នៅលើកំពូលភ្នំនេះ មានបុរាណស្ថានមួយផងដែរ ហៅថាល្អាងកី ។ ភ្នំធំជាប្រភេទភ្នំថ្មកំបោរ កកជាស្រទាប់ៗ មានអាយុកាលក្នុងស័ក Paleozoic (ភេលាអូហ្សូអ៊ីក) សម័យកាល Permian (ភ័រមៀន)(២៩៨,៩-២៥១,៩លានឆ្នាំ) យើងបានរកឃើញពពួក Brachiopods (ប្រាក្យូផត) យើងមិនទាន់បានសិក្សាលម្អិតនៅឡើយ ៕ ដោយ ៖ ម៉ាដេប៉ូ

ភ្នំពេញ ៖ កម្លាំងនគរបាល សង្កាត់សំរោងក្រោម នៃអធិការដ្ឋាននគរបាលខណ្ឌពោធិ៍សែនជ័យ បានធ្វេីការឃាត់ខ្លួនជនសង្ស័យចំនួន ៤នាក់ជាមុខសញ្ញា ឆក់ លួច គាស់ផ្ទះប្រជាពលរដ្ឋកាលពីវេលាម៉ោង៩ព្រឹកថ្ងៃទី១២ ខែធ្នូ ឆ្នាំ២០២២ នៅក្នុងភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ ។ ក្រោយពីឃាត់ខ្លួនក្រុមជនសង្ស័យ ខាងលើ សមត្ថកិច្ចបានឆែកបន្ទប់ ទាំង៣របស់ជនសង្ស័យរកឃើញសុទ្ធតែ សោ និងឧបករណ៍សម្រាប់ឆ្កឹះ កាច់សោ សម្ភារប្រើសម្រាប់ប្រព្រឹត្តបទល្មើស កាបូបដាច់ខ្សែជាច្រើនដែលជនសង្ស័យឆក់បាន ត្រូវបានដកហូតទុកជាវត្ថុតាង។ ជនសង្ស័យទាំង ៤នាក់ រួមជាមួយវត្ថុតាងត្រូវបានសមត្ថកិច្ចនាំទៅសាកសួរនៅផ្នែកជំនាញខណ្ឌដើម្បីចាត់ការបន្តតាមនីតិវិធី ៕ ដោយ៖ ជីម ភារ៉ា

ភ្នំពេញ៖ ត្រីគល់រាំង ជាមច្ឆជាតិនិមិត្តរូបនៃព្រះរាជាណាចក្រកម្ពុជា។ ឈ្មោះជាភាសាជាតិ «ត្រីកាហោ ឬត្រីក្បាលឡាន»។ វាមានឈ្មោះវិទ្យាសាស្ត្រ «Catlocarpio siamnsis» និងឈ្មោះជាភាសាអង់គ្លេស «Giant Mekong Barb»។ បើតាមឯកឧត្តម នេត្រ ភក្រ្តា រដ្ឋលេខាធិការ និង ជាមន្រ្តីនាំពាក្យក្រសួងបរិស្ថានបានឱ្យដឹងថា៖ត្រីគល់រាំងវាជាប្រភេទត្រីមានទំហំធំជាងគេក្នុងចំណោមត្រី ៣ ប្រភេទនៅកម្ពុជាក្នុងនោះមានត្រីរាជ ត្រីគល់រាំង និងត្រីបបែលយក្ស។ វាអាចមានទម្ងន់ពី១៥០-៣០០គីឡូក្រាម និងប្រវែងដងខ្លួនពី២-៣ម៉ែត្រ។ ជាប្រភេទត្រីមានស្រកាធំៗគ្របដណ្តប់លើផ្ទៃដងខ្លួនទាំងមូល លើកលែងតែផ្នែកក្បាល និងព្រុយប៉ុណ្ណោះ។ ពណ៌សម្បុរលើដងខ្លួនទាំងមូល មើលឃើញថា មានពីរពណ៌ដាច់ដោយឡែកពីគ្នា ស្រកាដែលនៅលើខ្សែឆ្នូតចំហៀងខ្លួនមានពណ៌ក្រម៉ៅថ្លា។ ដោយឡែក ស្រកាឋិតនៅក្រោមខ្សែឆ្នូតចំហៀងខ្លួនមានពណ៌ប្រាក់។ ត្រីប្រភេទនេះ ត្រូវការពារដោយក្រឹត្យច្បាប់លេខ៣៣ ក្រ.ច ស្តីពី ការគ្រប់គ្រងវិស័យជលផលក្នុងជំពូក២ មាត្រា១៨។ ត្រីគល់រាំងជាប្រភេទត្រីទឹកសាបមានប្រភពនៅក្នុងព្រះរាជាណាចក្រកម្ពុជាយើង។ គេឃើញមានរស់នៅតាមដងទន្លេមេគង្គ ជាពិសេសសំបូរជាងគេនៅបឹងទន្លេសាប។ រូបភាពប្រភេទនេះ ត្រូវបុព្វបុរសខ្មែរយើងឆ្លាក់ជារូបចម្លាក់ដាក់លើប្រាង្គប្រាសាទអង្គរវត្ត។ គេនិយមយកស្រកាត្រីគល់រាំងមកធ្វើជាសីទាត់ក្នុងល្បែងប្រជាប្រិយខ្មែរយើង៕ដោយ៖ ម៉ាដេប៉ូ