(ភ្នំពេញ)៖ រាជរដ្ឋាភិបាលកម្ពុជា ប្តេជ្ញាចិត្តពន្លឿនការធ្វើបរិវត្តកម្មឌីជីថល​សម្រាប់​រដ្ឋា​ភិបាលទាំងមូល ក្នុងគោលដៅលើកកម្ពស់គុណភាពជីវិត និងទំនុកចិត្ត​ប្រជាពល​រដ្ឋ តាមរយៈការបម្រើសេវាសាធារណៈឱ្យកាន់តែល្អប្រសើរ ។ នេះជាប្រសាសន៍របស់ ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និង​ទូរគមនា​គមន៍ និងជាប្រធានគណៈកម្មាធិការរដ្ឋាភិបាលឌីជីថល ក្នុងឱកាសអញ្ជើញ​ជាអធិបតីក្នុងពិធីបើកសិក្ខាសាលាពិគ្រោះយោបល់លើសេចក្តីព្រាងច្បាប់ ស្តីពីរដ្ឋា​ភិបាលឌីជីថលនៃព្រះរាជាណាចក្រកម្ពុជា ដើម្បីពិភាក្សា និងផ្តល់ធាតុចូលលើ​សេចក្តី​ព្រាងច្បាប់នេះ នាថ្ងៃទី២៤ ខែកក្កដា ឆ្នាំ២០២៥ នៅសណ្ឋាគារ​សុខា​ភ្នំពេញ។ សិក្ខាកាមដែលអញ្ជើញចូលរួមក្នុងសិក្ខាសាលានោះ គឺជាថ្នាក់ដឹកនាំ មន្រ្តីរាជការមកពីក្រសួង ស្ថាប័នពាក់ព័ន្ធ តំណាងអង្គទូត ក្រុមហ៊ុនបច្ចេកវិទ្យា គ្រឹះស្ថានអប់រំស្រាវជ្រាវ អង្គការសង្គមស៊ីវិល ដៃគូអភិវឌ្ឍន៍ ដែលមានចំនួនសរុប​១៧០នាក់ ។ ឯកឧត្តមប្រធានគណៈកម្មាធិការរដ្ឋាភិបាលឌីជីថល បានមានប្រសាសន៍ថា ការរៀ​ប​ចំ​សេចក្តីព្រាងច្បាប់ស្តីពីរដ្ឋាភិបាលឌីជីថលនៃព្រះរាជាណាចក្រកម្ពុជា គឺជាការ​បង្ហា​ញ​ពីការប្តេជ្ញាចិត្តរបស់រាជរដ្ឋាភិបាលក្នុងការពន្លឿនការធ្វើបរិវត្តកម្មឌីជីថល​សម្រាប់​រដ្ឋាភិបាលទាំងមូល ក្នុងគោលដៅលើកកម្ពស់គុណភាពជីវិត និងទំនុកចិត្ត​ប្រជាពល​រដ្ឋ តាមរយៈការបម្រើសេវាសាធារណៈឱ្យកាន់តែល្អប្រសើរ។ ចំពោះកិច្ចការនេះ ក្រសួង​បានចាប់ផ្តើមរៀបចំសេចក្តីព្រាងច្បាប់នេះតាំងពីចុងឆ្នាំ២០២៣ ដោយបាន​សិក្សាលម្អិតទៅលើក្របខណ្ឌច្បាប់ និងគោលនយោបាយជាតិ និងអន្តរជាតិពាក់ព័ន្ធ​នឹងរដ្ឋាភិបាលឌីជីថលក្នុងបណ្តាប្រទេសមួយចំនួន ព្រមទាំងឯកសារអន្តរជាតិ​របស់​អង្គការ​សហប្រជាជាតិ (UN) និងអង្គការសម្រាប់កិច្ចសហប្រតិបតិ្តការសេដ្ឋកិច្ច​និ​ង​អភិវឌ្ឍន៍ (OECD) ជាដើម។ ឯកឧត្តមរដ្ឋមន្រ្តី បានអំពាវនាវដល់គ្រប់តួអង្គពាក់ព័ន្ធ និងសិក្ខាកាមទាំង​អស់ចូល​រួមពិភាក្សាផ្លាស់ប្តូរយោបល់ និងផ្តល់ធាតុចូលឱ្យបានផុសផុលដើម្បីធ្វើ​ឱ្យប្រសើរ​ឡើងនូវគុណភាពសេចក្ដីព្រាងច្បាប់នេះ សំដៅឆ្លើយតបនឹងសកម្មភាព​អាទិភាព​របស់ជាតិ…

(ពោធិ៍សាត់)៖ សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់​ព្រះមហា​ក្សត្រ និងជាប្រធានក្រុមប្រឹក្សាជាតិរណសិរ្សសាមគ្គី អភិវឌ្ឍន៍មាតុភូមិកម្ពុជា ដោយ​បាន​ការ​ចូលរួមពី លោក ខូយ រីដា អភិបាលខេត្តពោធិ៍សាត់ ព្រមទាំងថ្នាក់ដឹកនាំ​មួយ​ចំនួន​ទៀត នាល្ងាចថ្ងៃទី២៤ ខែកក្កដា ឆ្នាំ២០២៥នេះ បានចូលមកគោរពបូជា និង​សូម​បួងសួងឱ្យបារមីលោកឧកញ៉ា ឃ្លាំង មឿង និងជំទាវ ខាន់ ខៀវ តាមជួយបីបាច់​ថែ​រក្សាថ្នាក់ដឹកនាំគ្រប់ជាន់ថ្នាក់ មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋ​ទូទាំងប្រទេស ឱ្យទទួលបានសេចក្តីសុខ សេចក្តីចម្រើន ពិសេសក្នុងបេសកកម្ម​ការ​ពារ​បូរណភាពទឹកដី ពីសត្រូវឈ្លានពាន។ បើតាមឯកសារប្រវត្តិសាស្រ្ត នៅក្នុងសៀវភៅមហាវីរៈបុរសខ្មែរ លោកឧកញ៉ា ឃ្លាំង មឿង និងជំទាវ ខាន់ ខៀវ ចាត់ទុកជាវរៈជនស្នេហាជាតិខ្លាំងពូកែ ក្នុងការធ្វើសឹក​សង្គ្រាម ជាមួយទ័ពសៀម ការពារទឹកដីប្រទេសកម្ពុជា។ រូបរាងកាយលោកឧកញ៉ា និង​លោកជំទាវ បានលាចាកលោកទៅក៏ពិតមែន ប៉ុន្តែភាពល្បីល្បាញ និងភាព​ស័ក្តិសិទ្ធិ បានដក់ជាប់នៅក្នុងអារម្មណ៍របស់ប្រជាពលរដ្ឋទូទាំងខេត្ត ក៏ដូចជាទូទាំង​ប្រទេស និងបាននាំគ្នាមកគោរពបូជា ជារៀងរាល់ឆ្នាំ មិនដែលអាក់ខានឡើយ។ ដោយសារបារមីនេះហើយ ទើបថ្នាក់ដឹកនាំខេត្ត…

(ភ្នំពេញ)៖ ក្រោយការវាយប្រហារដោយភាគីថៃមកលើកម្ពុជា កាលពីព្រឹកថ្ងៃទី២៤ កក្កដា ២០២៥ បានបង្កផលលំបាក ទុក្ខវេទនា ដល់ប្រជាពលរដ្ឋប្រមាណ ១ ៥០០គ្រួសារ ក្នុង ១២ភូមិ ៣ឃុំ នៃស្រុកបន្ទាយអំពិល ខេត្តឧត្តរមានជ័យ ដែល​រស់នៅក្បែតំបន់ ប្រឈមកំពុងមានជម្លោះប្រដាប់អាវុធរវាងកងទ័ពកម្ពុជា-ថៃ នៅតំបន់ប្រាសាទ​តា​មាន់ ប្រាសាទតាក្របី និងថ្មដូន បានជម្លៀសចេញពីតំបន់ គ្រោះថ្នាក់ មកទីទួល​សុវត្ថិភាព ដោយសុវត្ថិភាពអស់ហើយ។ សរុបរួម ជនភៀសសឹកមកពីតំបន់ផ្សេងទៀតផង មានប្រមាណជាង ២ ៤០០គ្រួសារ ដែលកំពុងស្ថិតនៅទីទួលសុវត្ថិភាពទាំងអស់តាមបណ្តាស្រុក ក្នុងខេត្តឧត្តរមានជ័យ។ នេះតាមឯកឧត្តម ម៉េត មាសភក្ដី អ្នកនាំពាក្យរដ្ឋបាលខេត្តឧត្តរមានជ័យ ៕

(ភ្នំពេញ)៖ យោធាថៃបានប្រើប្រាស់ អាវុធគ្រប់ប្រភេទ ដោយរាប់ទាំងគ្រប់ផ្លោងនិងការទំលាក់គ្រាប់បែកពីលើយន្តហោះ ប៉ះពាល់ដល់ប្រាសាទព្រះវិហារ រួមមាន ពយតាឌី កូបុរៈទី១ ទី២ ទី៣ ទី៥ ជណ្តើរខាងជើង និងតំបន់ក្បែរប្រាសាទព្រះវិហារ ។ នេះជាឧក្រិដ្ឋកម្មដ៏ធ្ងន់ធ្ងរប្រឆាំងនឹងបេតិកភណ្ឌពិភពលោក និងជាការរំលោភបំពានលើច្បាប់អន្តរជាតិ ៕ ដោយ ៖ ង៉ាន់ ទិត្យ

(ភ្នំពេញ)៖ អ្នកជំនាញជាតិ និងអន្តរជាតិជាង ៤០រូប មកពី៩ប្រទេសផ្សេងគ្នា បានចូលរួមក្នុងកិច្ចប្រជុំពិគ្រោះយោបល់អន្តរជាតិ ក្នុងការបង្កើតផែនការយុទ្ធសាស្រ្ត រយៈពេល ៥ ឆ្នាំសម្រាប់មជ្ឈមណ្ឌលស្រាវជ្រាវសុខភាពសកល ដែលរៀបចំឡើងដោយ សាកលវិទ្យាល័យវិទ្យាសាស្ត្រសុខាភិបាល រយៈពេល២ថ្ងៃ ។ កិច្ចប្រជុំពិគ្រោះយោបល់អន្តរជាតិ ដ៏មានសារៈសំខាន់នេះ បានចាប់ផ្តើមនាព្រឹកថ្ងៃទី២៤ ខែកក្កដា ឆ្នាំ២០២៥ នៅ សាកលវិទ្យាល័យវិទ្យាសាស្ត្រសុខាភិបាល ក្រោមអធិបតីភាព ឯកឧត្តមសាស្ត្រាចារ្យ ឈាង រ៉ា រដ្ឋមន្រ្តីក្រសួងសុខាភិបាល ។ ឯកឧត្តមសាស្រ្តាចារ្យរដ្ឋមន្រ្តី បានសំដែងនូវការថ្លែងអំណរគុណវត្តមានដ៏មានតម្លៃរបស់អ្នកជំនាញជាន់ខ្ពស់ជាតិ និងអន្តរជាតិទាំងអស់ ដែលបានចូលរួមចែករំលែកចំណេះដឹងដ៏សម្បូរបែបរបស់ខ្លួន និងរួមគ្នាបង្កើតឡើងនូវអនាគតមួយដ៏ភ្លឺស្វាង សម្រាប់មជ្ឈមណ្ឌលស្រាវជ្រាវសុខភាពសកលនេះ ដែលនឹងក្លាយជាផ្នែកមួយ សម្រាប់លើកកម្ពស់សុខភាពប្រជាជននៅកម្ពុជា ក្នុងតំបន់ និងអន្តរជាតិ។ ឯកឧត្តមសាស្រ្តាចារ្យរដ្ឋមន្រ្តី បានរំលេចអំពីភាពចាំបាច់ នៃការងារស្រាវជ្រាវ នវានុវត្តន៍ ដើម្បីការលើកម្ពស់សុខភាព និងទប់ស្កាត់ការប៉ះពាល់សុខភាព តាមរយៈការគិតគូរ ប្រកបដោយភាពបុរេសកម្ម ការពារ និងទប់ស្កាត់ទាំងជំងឺឆ្លង និងជំងឺមិនឆ្លង។ ឯកឧត្តមសាស្រ្តាចារ្យរដ្ឋមន្រ្តី បានបង្ហាញពីភាពប្រទាក់ក្រឡាគ្នា លើតម្រូវការចាំបាច់ សម្រាប់ការសិក្សាស្រាវជ្រាវ ទាំងជំងឺមិនឆ្លង និងជំងឺឆ្លង ដោយបង្ហាញនូវបទពិសោធន៍ទំនាក់ទំនងនៃជំងឺកូវីដ-១៩…

កំពង់ឆ្នាំង ៖ឯកឧត្តមបណ្ឌិតសភាចារ្យអ៊ុក រ៉ាប៊ុន ទេសរដ្ឋមន្ត្រីទទួលបន្ទុក​បេសក​កម្មពិសេស ប្រធានក្រុម​ប្រឹក្សាស្តារ​អភិវឌ្ឍន៍វិស័យកសិកម្មនិងជនបទ និងជាប្រធាន​ក្រុមការងាររាជរដ្ឋាភិបាលចុះមូលដ្ឋានខេត្តកំពង់ឆ្នាំង បានអញ្ជើញ​ជាធិបតីក្នុង​ពិធីលែង​កូនត្រីចម្រុះ នៅទំនប់ទឹកបឹងឈ្វាំងសែនជ័យ ស្រុករលាបៀរ ខេត្តកំពង់ឆ្នាំង។ ក្នុងពិធីដែលមានការអញ្ជើញចូលរួមពីសំណាក់ឯកឧត្តមសមាជិករដ្ឋសភា សមាជិក​ព្រឹទ្ធសភា រដ្ឋលេខាធិការ អនុរដ្ឋ​លេខាធិការ ឯកឧត្តម ស៊ីវ រុន ប្រធានក្រុមប្រឹក្សាខេត្ត ឯកឧត្តម ស៊ុន សុវណ្ណារិទ្ធិ អភិបាលខេត្ត មានការលែងមេត្រីពូជនិងកូនត្រីចម្រុះ​ជាង​ប្រាំម៉ឺនក្បាលទៅក្នុងបឹងធម្មជាតិមួយនេះ។ លោក ងិន ហ៊ុន ប្រធានមន្ទីរកសិកម្ម រុក្ខាប្រមាញ់ និងនេសាទបានឱ្យដឹងថា ចាប់តាំង​ពីឆ្នាំ២០០៣មក មន្ទីរកសិកម្ម ខេត្តបានប្រារព្ធពិធីលែងត្រី ចំនួន ១២ លើក។គិតត្រឹម​ឆ្នាំ២០២៥ ត្រីមេពូជ កូនត្រី និងសត្វពូជក្នុងស្រុកចំនួន ១០ប្រភេទ ប្រមាណ ៣០ម៉ឺនក្បាលបានលែងចូលទៅក្នុងបឹង អាងទឹក និង ក្នុងដែនទឹកត្រីចម្រុះ​និង បង្កង ប្រមាណ​៥០ ០០០ ក្បាល៕ដោយ៖សុខ គឹមសៀន

(ឧត្តរមានជ័យ)៖ ការឈ្លានពាន និងបង្កហេតុបាញ់ប្រហារមកលើកម្ពុជាមុន ពីសំណាក់យោធាថៃ បានបង្កការលំបាកដល់ពលរដ្ឋខ្មែរ ពិសេសបងប្អូនប្រជាពលរដ្ឋដែលរស់ជាប់ព្រំដែនកម្ពុជា-ថៃ។ ជាក់ស្តែងនៅព្រឹកថ្ងៃទី២៤ ខែកក្កដា ឆ្នាំ២០២៥ បន្ទាប់ពីមានការប្រយុទ្ធគ្នារវាងយោធាកម្ពុជា-ថៃ បានបង្ខំឱ្យប្រជាពលរដ្ឋរស់នៅជាប់ព្រំដែន ក្នុងភូមិសាស្ត្រខេត្តឧត្តរមានជ័យ រួមទាំងស្ត្រីមានផ្ទៃពោះផងនោះ ត្រូវរត់គេចចេញពីផ្ទះកក់ក្តៅរ​បស់ខ្លួន ទៅរកទីសុវត្ថិភាព គេចចេញពីគ្រាប់ផ្លោងរបស់ថៃ ។ សូមជម្រាបថា ៖ យោងតាមសេចក្តីថ្លែងការណ៍​របស់អ្នកនាំ​ពាក្យក្រសួងការពារជាតិ នៃព្រះរាជាណាចក្រកម្ពុជា នៅថ្ងៃ​ទី​២៤ ខែកក្កដា ឆ្នាំ២០២៥ បានបញ្ជាក់យ៉ាងច្បាស់ពីពេលវេលា​ទៅតាមដំណាក់កាល​នីមួយ​ៗ​ ដែលភាគីថៃបាន​ឈ្លានពាន​មកលើអធិបតេយ្យ និងបូរណភាពទឹកដីកម្ពុជា ។ កំណត់ហេតុដែលបានចេញផ្សាយដោយក្រសួងការពារជាតិកម្ពុជា មានដូចខាងក្រោមនេះ៖ -ម៉ោងប្រមាណ ០៦:៣០នាទី ភាគីថៃបានចាប់ផ្តើមបង្កសកម្មភាព​បំពានលើកិច្ច​ព្រម​ព្រៀង​ដែល​បាន​ឯក​ភាពគ្នា ដោយឡើងលើប្រាសាទតាមាន់ធំ ហើយលបចូលរាយលួស​បន្លា​តាម​ជើង​ប្រាសាទ​ -ម៉ោង ០៧:០៤នាទី ភាគីថៃបានបង្ហោះដ្រូន រយៈពេល២នាទី -ម៉ោង ០៨:៣០នាទី ភាគីថៃបានធ្វើការបាញ់ឡើងលើ -ម៉ោង ០៨:៤៦នាទី កងទ័ពឈ្លាន​ពាន​ថៃ​បាន​បើក​ការ​បាញ់ប្រហារមុនមក​លើ​កង​ទ័ព​កម្ពុជា​នៅ​តំបន់​ប្រាសាទ​តាមាន់ធំ និងឈានទៅបាញ់ប្រហារ នៅប្រាសាទតាក្របី តំបន់ភ្នំខ្មោច និង​បាន​ពង្រីក​ភូមិ​សាស្រ្តនៃការវាយប្រហារទៅដល់តំបន់មុំបី រួមទាំងប្រើប្រាស់​យន្តហោះ​ចម្បាំង​ទម្លាក់​ចំនួន​០២គ្រាប់ នៅផ្លូវវត្តកែវសិក្ខាគីរីស្វារៈ ដែល​កង​ទ័ព​កម្ពុជា​បាន​នឹង​កំពុង​ឈរ​ជើង​ការ​ពារ​បូរ​ណ​ភាព​​ទឹកដីរបស់ខ្លួនក្នុងភូមិសាស្ត្រខេត្តឧត្តរមានជ័យ និងខេត្តព្រះវិហារ។ -ម៉ោង ០៨:៤៧នាទី…

សៀមរាប​៖ ប្រជាពលរដ្ឋខ្វះខាតចំនួន ៣០០គ្រួសារ ដែលរស់នៅឃុំពពេល, ឃុំតាយ៉ែក, ឃុំចាន់សរ និងឃុំសំរោង ស្រុកសូទ្រនិគម ខេត្តសៀមរាបកាលពីថ្ងៃទី២៣ ខែកក្កដា ឆ្នាំ២០២៥ បានទទួលអំណោយជាពិសេសពី​រាជរដ្ឋា​ភិបាល​កម្ពុជា តាមរយៈមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តសៀមរាប។ អំណោយដែលផ្តល់ជូនរួមមាន អង្ករ , មី, ភួយ , សារុងនិងកន្ទេល។ក្នុងឱកាស​នេះលោក នាក់ ណេរ៉ុន អភិបាលរង​ខេត្តសៀមរាបបានបញ្ជាក់ថា រាជរដ្ឋាភិបាល​កម្ពុជាបានយកចិត្តទុកដាក់ចំពោះសុខទុក្ខរបស់​ប្រជាពលរដ្ឋ គ្រ​ប់​ភូមិ​ភាគដោយ​មិនទុកពលរដ្ឋណាម្នាក់ចោលឡើយ។លោកអភិបាលរងខេត្ត ក៏បានអំពាវនាវឱ្យ​គ្រួសារដែលមាន​កូនចៅត្រលប់ពីប្រទេសថៃ ជំរុញឱ្យពួកគេចុះឈ្មោះសិក្សាវិជ្ជាជីវៈ​បច្ចេកទេស តាមវិទ្យាស្ថាន និងសាលា​នានា​ក្នុងក្រុងសៀមរាប ដើម្បីទទួលឱកាស​ការងារនិងចំណូលសម្រាប់គ្រួសារ។ លោក គង់ សំអឿន ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទា​ខេត្តសៀមរាប បានបញ្ជាក់ថា កម្មវិធី​ផ្ដល់អំណោយដល់ប្រជាពលរដ្ឋក្រីក្រ និងរង​គ្រោះដោយសារទឹកជំនន់ ឬស្ថានភាពជាសះស្បើយ គឺបានចាប់​ផ្ដើម​តាំងពី​ឆ្នាំ​២០២២។ កម្មវិធីនេះអនុវត្តតាមគោលនយោបាយរបស់រាជរដ្ឋាភិបាល ក្នុងការ​ប្រយុទ្ធប្រឆាំងនឹង​ភាពក្រ និងគាំទ្រជីវភាពសង្គម ដោយចាត់ចែងជា ៣កម្រិត៖ កម្រិតធ្ងន់ (ប្រភេទ១), កម្រិតមធ្យម (ប្រភេទ២) និងកម្រិត​ស្រាល (ប្រភេទ៣)៕ដោយ​៖ប៊ុន​រដ្ឋា