ស្វាយរៀង៖ លោកម៉ែន អេង អភិបាលរងខេត្តស្វាយរៀងបានថ្លែងជំរុញដល់អ្នកសារព័ត៌មានទាំងអស់ត្រូវផលិតព័ត៌មានដែលច្បាស់ការនិងទុកចិត្តបាន ព្រមទាំងរួមគ្នាប្រឆាំងព័ត៌មានក្លែងក្លាយ។ ការថ្លែងបែបនេះរបស់លោកម៉ែន អេង បានធ្វើឡើងខណៈដែលលោកតំណាងអភិបាលខេត្តស្វាយរៀងអញ្ជើញចូលរួមសំណេះសំណាលជាមួយថ្នាក់ដឹកនាំ មន្ត្រីមន្ទីរព័ត៌មានខេត្ត និងអ្នកសារព័ត៌មាន ប្រចាំខេត្តស្វាយរៀងនារសៀលថ្ងៃទី៦ខែតុលាឆ្នាំ២០២២ម្សិលមិញនេះ។ លោកម៉ែន អេងបានទឹកចិត្តដល់អ្នកសារព័ត៌មានត្រូវ ចូលរួមជាកែវភ្នែកយុត្តិធម៌ តាមរយៈការផ្សព្វផ្សាយនូវ ព័ត៌មានពិតតាមទិសស្លោក “កុំបំពានសិទ្ធិអ្នកដទៃកុំបំភ្លៃការពិត” ហើយការចូលរួមជាវិជ្ជមានរបស់យើងគ្រប់ៗគ្នា គ្រប់ដំណើរការរបស់សង្គមជាតិ គឺមានតម្លៃពង្រឹងបាននូវ ស្មារតីភាពជាម្ចាស់ប្រទេស ដោយមិនចាំបាច់មានទស្សនៈខាងក្រៅណាផ្តួចផ្តើម វាយតម្លៃ ឬសម្រេច ជំនួសយើងនោះឡើយ។ព្រោះ យើងទាំងអស់គ្នា ជាផ្នែកនៃការទទួលខុសត្រូវរួមលើសមិទ្ធផលសង្គម ហើយអ្វីៗទាំងឡាយនៅក្នុង សង្គមជាតិរបស់យើង គឺជាសូចនាករឆ្លុះបញ្ចាំងពីតម្លៃរួមរបស់យើងវិញផងដែរ។ ជាមួយគ្នានេះ លោអភិបាលរងខេត្ត បានថ្លែងអំណរគុណ និងកោតសរសើរចំពោះកិច្ចខិតខំប្រឹងប្រែងរបស់ថ្នាក់ដឹកនាំ មន្ត្រីនៃមន្ទីរព័ត៌មានខេត្តស្វាយរៀងដែបានខិតខំចុះយកព័ត៌មាន ផលិត ផ្សព្វផ្សាយព័ត៌មាន ក៏ដូចជាការផ្សាយផ្ទាល់រាល់ព្រឹត្តិការណ៍នានា ជាពិសេសទាំងមន្ត្រីព័ត៌មាន និងអ្នកសារព័ត៌មានទាំងអស់ប្រចាំខេត្តស្វាយរៀងបានផលិតផ្សព្វផ្សាយសកម្មភាពថ្នាក់ដឹកនាំ កិច្ចខិតខំប្រឹងប្រែង ការអភិវឌ្ឍក្នុងមូលដ្ឋានការកសាងនូវសមិទ្ធផលនានាក្នុងខេត្តស្វាយរៀង។ ទន្នឹមនឹងនេះដែរ លោកអភិបាលរងខេត្ត បានគូសបញ្ជាក់ថា យើងត្រូវចង់ចាំ «ពាក្យគុណសន្តិភាព» នៅក្នុងដួងចិត្តគ្រប់ៗគ្នា មានសន្តិភាពទើបមានការអភិវឌ្ឍរីកចម្រើន មានស្ថិរភាពក្នុងប្រទេស ប្រជាពលរដ្ឋរស់នៅដោយសុខសាន្ដ ក្នុងនោះវិស័យសារព័ត៌មាន ក៏មានភាពពេញលេញ អ្នកសារព័ត៍មានមានសិទ្ធសេរីភាពពេញលេញ និងលទ្ធភាពគ្រប់គ្រាន់ក្នុងការចុះយកព័ត៌មានដើម្បីផ្សព្វផ្សាយបានយ៉ាងទូលំទូលាយជូនទស្សនិកជន។…

កំពង់ធំ៖ ស្ថានីយ៍វាស់កម្ពស់ទឹកកំពង់ធំ ទឹកស្ទឹងសែន បានហក់ឡើងខ្ពស់ជាលំដាប់ដែលអាចនឹងឈានដល់កម្រិតប្រកាសអាសន្ន រដ្ឋបាលខេត្តកំពង់ធំ បានបន្តអំពាវនាវដល់ប្រជាពលរដ្ឋបង្កើនការប្រុងប្រយ័ត្នខ្ពស់ ចំពោះទឹកជំនន់ទឹកភ្លៀង ដើម្បីជៀសវាងគ្រោះថ្នាក់ផ្សេងៗដែលនឹងអាចកើត មានឡើងជាយថាហេតុ។ នៅក្នុងសេចក្តីជូនដំណឹងរបស់រដ្ឋបាលខេត្តកំពង់ធំ ដែលបណ្តាញព៍ត៍មាន ទទួលបាននៅល្ងាចថ្ងៃទី០៦ ខែតុលា ឆ្នាំ២០២២នេះ បានឱ្យដឹងទៀតថានៅស្ថានីយ៍វាស់កម្ពស់ទឹកកំពង់ធំ ទឹកស្ទឹងសែន បានហក់ឡើងដល់កម្រិតកម្ពស់ ១៤,០០ម កម្ពស់ទឹកប្រកាសឲ្យមានការប្រុងប្រយ័ត្នកម្រិតខ្ពស់ ជាមួយគ្នានេះទឹកស្ទឹងសែនផ្នែក ខាងលើកំពុងកើនឡើងជាលំដាប់។ តាមការជូនដំណឹងរបស់ក្រសួងធនធានទឹក និងឧតុនិយម កាលពីថ្ងៃទី០៤ ខែ តុលា ឆ្នាំ២០២២ បានព្យាករណ៍ថា តំបន់ខ្ពង់រាបមានជាអាទិ៍ ខេត្តឧត្តរមានជ័យ ខេត្ត ព្រះវិហារ (ផ្ទៃរងទឹកភ្លៀងអាងទឹកស្ទឹង) អាចមានភ្លៀងធ្លាក់ក្នុងកម្រិតពីតិចទៅច្រើន ដោយផ្អែកតាមស្ថានភាពនេះ ទឹកស្ទឹងនឹងហូរមកដល់ផ្នែកខាងក្រោម ជាបន្តបន្ទាប់ក្នុងរយៈពេល ០៣ ទៅ ០៧ថ្ងៃខាងមុខ ដែលធ្វើឲ្យកម្ពស់ទឹកស្ទឹងសែននៅស្ថានីយ៍វាស់កម្ពស់ទឹកកំពង់ធំ អាចឡើងដល់កម្រិតប្រកាសអាសន្ន (១៤,៣០ម)។ ក្រៅពីនេះ ដោយសារភ្លៀងបានបន្តធ្លាក់ជារៀងរាល់ថ្ងៃ ដូច្នេះបណ្តាស្រុកផ្សេង ទៀតក៏អាចប្រឈមនឹង ជំនន់ទឹកភ្លៀងផងដែរ ៕សេឌី+លីដា

កំពង់ឆ្នាំង ៖ ឯកឧត្តម សាន់ យូ អភិបាលរងខេត្តកំពង់ឆ្នាំង លោក លី ឡា នាយខណ្ឋរដ្ឋបាលជលផលកំពង់ឆ្នាំងនៃមន្ទីរកសិកម្មខេត្ត ដោយអនុវត្តតាមបទបញ្ជាប្រមុខរាជរដ្ឋាភិបាល និងបទបញ្ជាររបស់ ឯកឧត្តម ស៊ុន សុវណ្ណារិទ្ធិ គណៈបញ្ជាការឯកភាពរដ្ឋបាលខេត្ត នៅព្រឹកថ្ងៃទី០៦ ខែតុលា ឆ្នាំ២០២២ បានដឹកនាំកម្លាំងសម្ថកិច្ចចម្រុះ សហការជាមួយគណៈបញ្ជាការឯកភាពស្រុកបរិបូរណ៍ និងស្រុកជល់គីរី បានចុះប្រតិបត្តិការបង្រ្កាបបទល្មើសជលផល នៅចំណុចក្រចាប់ និងចំណុចបឹងធំ ក្នុងស្រុកបរិបូរណ៍និងស្រុកជល់គីរី ខេត្តកំពង់ឆ្នាំង។ ក្នុងកិច្ចប្រតិបត្តិការបង្ក្រាបបទល្មើសនេសាទ ខាងលើនេះបានប្រើប្រាស់កម្លាំងសរុបចំនួន ៣១នាក់ និង មធ្យោបាយកាណូតស្មាច់ចំនួន០៥ គ្រឿង។ ជាលទ្ធផលកម្លាំងសមត្ថកិច្ចយើងបាន បំផ្លាញចោលវត្ថុតាងរួមមាន៖ របាំងសាច់អួនចំនួន១ករណីស្មើនឹង ២ កន្លែងប្រវែង ៣០០ម៉ែត្រ លបលូសាច់អួនចំនួន ៤មាត់ និងរបាំងស្បៃមុងចំនួន ០១ករណី ស្មើនឹង ០៦កន្លែង មានប្រវែង ២៥០ម៉ែត្រ លូស្បៃមុងចំនួន ០៦មាត់ បង្គោលសរុបចំនួន ៤០០ដើម និងបាន ចាក់លែងកូនត្រីចម្រុះចូលបឹងធម្មជាតិវិញចំនួន ៦០គីឡូក្រាមផងដែរ។ យោងតាមការបញ្ជាក់ពី…

កំពង់ឆ្នាំង ៖ លោក ហ៊ីង ភ័ព្វមីនា អភិបាលក្រុងកំពង់ឆ្នាំង នៅព្រឹកថ្ងៃទី០៦ ខែតុលា ឆ្នាំ២០២២ បានដឹកនាំក្រុមការងារមន្ត្រីរាជការក្នុងក្រុង និងសង្កាត់ផ្សារឆ្នាំង ចុះប្រមូលសម្អាតសំរាមបាន ៣០បេ នៅមាត់ច្រាំងទន្លេផ្សារក្រោម ក្នុងសង្កាត់ផ្សារឆ្នាំងក្រុងកំពង់ឆ្នាំងដែលប្រជាពលរដ្ឋនិងអាជីវករមួយចំនួនបានបោះចោលរៀងរាល់ថ្ងៃនៅមាត់ច្រាំងទន្លេ ធ្វើឱ្យតំបន់ខាងលើមានបរិស្ថានមិនល្អក្នុងទឹកទន្លេ។ ដោយឡែកនៅជុំវិញបរិវេណសាលាបឋមសិក្សាក្រុងកំពង់ឆ្នាំង ជាប់វិមានឯករាជ្យ នៅព្រឹកថ្ងៃទី០៦ ខែតុលានេះដែរ លោកអភិបាលក្រុងកំពង់ឆ្នាំង ក៏បានសហការជាមួយលោកនាយកសាលា និងលោកគ្រូអ្នកគ្រូ សិស្សានុសិស្សជាង ៩០០នាក់ ចូលរួមប្រមូលសំរាមសំអាតតាមដងផ្លូវជុំវិញបរិវេណសាលាបឋមសិក្សាគំរូក្រុងកំពង់ឆ្នាំងផងដែរ។ ទាក់ទងនឹងបញ្ហាសំរាម ប្រជាពលរដ្ឋរស់នៅតំបន់មាត់ទន្លេបានឲ្យដឹងថាសំរាមខាងលើនេះមួយចំនួនត្រូវបានអ្នកមកលេងកម្សាន្តនៅមាត់ទន្លេជាអ្នកបោះចោល និងមួយចំនួនទៀត ជាអាជីវករលក់ដូរនៅផ្សារចំណុចនោះផងដែរ តែអ្វីដែលគេរិះគន់វិញនោះ គឺអាជ្ញាធរក្រុង និងខេត្តទៅវិញ ដែលពុំទាន់មានវិធានការតឹងរឹងចំពោះករណីនេះ ព្រោះថា នៅចំណុចដើមពោធិ៍មាត់ទន្លេផ្សារ ក្រោម គឺមាននគរបាលប៉ុស្តិ៍រដ្ឋបាលផ្សារឆ្នាំងមួយក្រុមនៅទីនោះដែរ បើប្រគល់ភារកិច្ចឲ្យគាត់ត្រួតពិនិត្យឃ្លាំមើល និងផាកពិន័យនោះនឹងអាចទប់ស្កាត់បាន ។ ក្នុងករណីនេះដែរ អភិបាលក្រុងកំពង់ឆ្នាំង លោក ហ៊ីង ភ័ព្វមិនា សូមអំពាវនាវដល់បងប្អូនប្រជាពលរដ្ឋ និងអាជីវករលក់ដូរទាំងអស់ សូមមេត្តាចូលរួមទុកដាក់សំរាមនិងប្រមូលសំរាមទុកដាក់បានសមរម្យ ដើម្បីឲ្យរថយន្តរបស់ក្រុមហ៊ុនអនាម័យប្រមូលសំរាមរបស់ក្រុងកំពង់ឆ្នាំងដឹកឲ្យបានត្រឹមត្រូវ និងសូមកុំឲ្យបោះចោលពាសវាល ពាសកាល ដែលនាំឲ្យទីក្រុងយើងបាត់បង់បរិស្ថាន និងបាត់បង់សោភ័ណភាព ។…