ភ្នំពេញ ៖ កាលពីថ្ងៃទី០៤ ខែកញ្ញា ឆ្នាំ២០២២ ម្សិលមិញ សមត្ថកិច្ចជំនាញចរាចរណ៍ នៅទូទាំងប្រទេសកម្ពុជា បានដាក់គោលដៅសរុបចំនួន ១៤៩គោលដៅ ដើម្បីធ្វើការត្រួតពិនិត្យការអនុវត្តច្បាប់ចរាចរណ៍ផ្លូវគោក ។ ក្នុងនោះ មានយានយន្តចូលគោលដៅចំនួន ១,៤៣៦គ្រឿង ម៉ូតូ ១,១២០គ្រឿង រកឃើញយានយន្តល្មើសសរុបចំនួន ២០៧គ្រឿង មានម៉ូតូចំនួន ១៦៨គ្រឿង ត្រូវបានផាកពិន័យតាមអនុក្រឹត្យលេខ ៣៩.អនក្រ.បក នៅទូទាំងប្រទេស។ នេះបើយោងតាមរបាយការណ៍ពីនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ ស្តីពីការរឹតបន្ដឹងច្បាប់ ស្ដីពីចរាចរណ៍ផ្លូវគោក កាលពីថ្ងៃទី០៤ ខែតុលា ឆ្នាំ២០២២។ របាយការណ៍ដដែល បានវាយតម្លៃថា ការអនុវត្តតាមអនុក្រឹត្យថ្មី ក្នុងការផាកពិន័យយានយន្តល្មើសបានដំណើរការទៅយ៉ាងល្អប្រសើរទទួលបានការគាំទ្រ ពិសេសអ្នកប្រើប្រាស់ផ្លូវទាំងអស់ បានចូលរួមគោរពច្បាប់ចរាចរណ៍យ៉ាងល្អប្រសើរ។ សូមជម្រាបផងដែរថា កាលពីថ្ងៃទី០៤ ខែតុលា ម្សិលមិញនេះ ករណីគ្រោះថ្នាក់ចរាចរណ៍ នៅទូទាំងប្រទេសកម្ពុជា បណ្តាលអោយ មនុស្ស ស្លាប់ ចំនួន ១នាក់ គឺបានកើតឡើង ដោយសារតែការប៉ះទង្គិចគ្នាចំនួន ១លើក ៕ ដោយ៖ ឆៃហួត

ភ្នំពេញ៖ សហភាពសហព័ន្ធយុវជនកម្ពុជា (ស.ស.យ.ក.) នឹងរៀបចំកម្មវិធី «សមាធិរលឹកដួងព្រះវិញ្ញាណក្ខន្ធ» សម្ដេចព្រះនរោត្តម សីហនុ ព្រះបរមរតនកោដ្ឋ នៅថ្ងៃទី១៥ ខែតុលា ឆ្នាំ២០២២ នៅសួនច្បារខាងមុខព្រះបរមរាជវាំង។ ក្នុងសេចក្ដីជូនដំណឹងដែលបណ្ដាញព័ត៌មាន ទទួលបាននៅរសៀលថ្ងៃទី០៤ ខែតុលា ឆ្នាំ២០២២នេះ សហភាពសហព័ន្ធយុវជនកម្ពុជា បានឲ្យដឹងថា កម្មវិធី «សមាធិរលឹកដួងព្រះវិញ្ញាណក្ខន្ធ» ត្រូវបានរៀបចំឡើង ក្នុងគោលបំណង៖ *ទី១៖ ចូលរួមរលឹកគម្រប់ខួប ១០ព្រះវស្សា នៃការយាងសោយព្រះទិវង្គតរបស់ព្រះករុណា ព្រះមហាវីរក្សត្រ ព្រះបរមរតនកោដ្ឋ*ទី២៖ បង្ហាញពីទឹកចិត្ត និងស្មារតីនៃការចងចាំចំពោះព្រះរាជបណ្តាំដ៏ថ្លៃថ្លា និងពោលពេញដោយអត្ថន័យទូន្មាន ដែលបានឆ្លាក់លើផ្ទាំងសិលា ដែលជាព្រះរាជឱង្ការរបស់ ព្រះករុណា ព្រះមហាវីរក្សត្រ ព្រះបរមរតនកោដ្ឋ ដែលបានធ្លាក់លើផ្ទាំងសិលានៅសួនច្បារ ព្រះរាជបណ្តាំ*ទី៣៖ រលឹកពីគំរូវីរភាព និងការសម្ដែងនូវមនោសញ្ចេតនាកតញ្ញូកតវេទីប្រកបដោយការគោរពដ៏ ខ្ពង់ខ្ពស់ថ្វាយព្រះមហាករុណាទិគុណដ៏ប្រសើរថ្លៃថ្លា ប្រកបដោយសេចក្ដីនឹករលឹកសោកស្ដាយរកអ្វីប្រៀបផ្ទឹមពុំបាន ជាមួយនឹងសេចក្តីអំណរព្រះរាជគុណជាអនេកអន័ត្យគ្មាន ថ្ងៃបំភ្លេចបាន។ កម្មវិធី «សមាធិរលឹកដួងព្រះវិញ្ញាណក្ខន្ធ» ជាកម្មវិធីដែលមានព្រះសង្ឃ និងពុទ្ធបរិស័ទ និមន្ត និងអញ្ជើញចូលរួមពីគ្រប់ទិសទី ដើម្បីថ្វាយគ្រឿងសក្ការៈ និងធ្វើសមាធិសូត្រសត្តប្បករុណាភិធម្មបង្សុកូលឧទ្ទិសមហា ព្រះរាជកុសល ថ្វាយដួងព្រះវិញ្ញាណក្ខន្ធ ព្រះបរមរតនកោដ្ឋ…

កំពត ៖ ប្រជាពលរដ្ឋចំនួន ៣ឃុំ ក្នុងស្រុកទឹកឈូ បានរងគ្រោះដោយសារខ្យល់កន្ទ្រាក់ ធ្វើឱ្យខូចខាត និងដួលរលំផ្ទះសំបែង សរុបចំនួន ៥១៣គ្រួសារ កាលពីល្ងាចថ្ងៃទី៣ ខែតុលា ឆ្នាំ២០២២។ ហេតុការណ៍ខ្យល់កន្ត្រាក់នេះ មិនបង្កឱ្យពលរដ្ឋណាម្នាក់រងរបួសទេ ។ នៅព្រឹកថ្ងៃទី៤ ខែតុលា ឆ្នាំ២០២២ ឯកឧត្តមបណ្ឌិត ម៉ៅ ធនិន ប្រធានគណកម្មាធិការសាខាកាកបាទក្រហមកម្ពុជាខេត្តកំពត ឯកឧត្តម ជឹង ផល្លា ប្រធានក្រុមប្រឹក្សាខេត្ត អមដំណើរដោយសហការី ចុះសួរសុខទុក្ខ និងនាំយកអំណោយកាកបាទក្រហមកម្ពុជា ផ្ដល់ជូនដល់ប្រជាពលរដ្ឋរង់គ្រោះដោយសារខ្យល់កន្ទ្រាក់ចំនួន ៥១៣គ្រួសារក្នុងស្រុកទឹកឈូ។ មានមតិសំណេះសំណាលនាឱកាសនោះ ឯកឧត្តមបណ្ឌិត ម៉ៅ ធនិន បញ្ជាក់ថា កាកបាទក្រហមកម្ពុជា ដោយមានការចង្អុលបង្ហាញ ពីសម្តេច គតិព្រឹទ្ធបណ្ឌិត ប៊ុនរ៉ានី ហ៊ុនសែន ជាប្រធាន តែងតែរំលឹកផ្ដាំផ្ញើដល់អាជ្ញាធរខេត្តទាំងអស់បង្កើនការយកចិត្តទុកដាក់ក្នុងការជួយសង្គ្រោះប្រជាពលរដ្ឋងាយរងគ្រោះ និងរងគ្រោះដោយសារគ្រោះមហន្តរាយធម្មជាតិផ្សេងៗនៅក្នុងរដូវវស្សានេះ ។ ជាក់ស្ដែងសម្រាប់សកម្មភាពពេលនេះ ក្រុមការងារសាខាកាកបាទក្រហមខេត្ត ក្រោយពីបានទទួលដំណឹងថា ប្រជាពលរដ្ឋក្នុងស្រុកទឹកឈូ ទទួលរងផលប៉ះពាល់ដោយខ្យល់កន្ត្រាក់ ភ្លាមៗនោះក្រុមការងារមិនបានបង្អង់យូរក្នុងការ រៀបចំជាស្បៀងអាហា និងថវិកាទាំងយប់ដើម្បីចុះមកសួរសុខទុក្ខ…

ខេត្តព្រះវិហារ៖ នៅថ្ងៃអង្គារ ៩កើត ខែអស្សុជ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី០៤ ខែតុលា ឆ្នាំ២០២២ មន្ទីរសាធារណការ និងដឹកជញ្ជូនខេត្តព្រះវិហារបានសេចក្តីជូនដំណឹង ស្តីពីការផ្អាកការចរាចរណ៍ជាបណ្តោះអាសន្ន ចំពោះរថយន្តគ្រប់ប្រភេទទាំងអស់ នៅលើកំណាត់ផ្លូវជាតិលេខ៩២ (ចាប់ពីចំណុចគីឡូម៉ែត្រ លេខ១០០ ដល់គីឡូម៉ែត្រលេខ ១០១) ស្ថិតក្នុងឃុំមរកត (ចំណុចក្បាលដំរី) ស្រុកជាំក្សាន្ត ខេត្តព្រះវិហារ ដោយសារស្ថានភាពជំនន់ទឹកភ្លៀងឡើងដល់កម្រិតប្រកាសអាសន្ន ចាប់ពីថ្ងៃជូនដំណឹងនេះតទៅ រហូតដល់មានសេក្តីជូនដំណឹងសារជាថ្មី ដើម្បីថែរក្សាផ្លូវថ្នល់ស្ពាន កុំឱ្យបាក់ស្រុតនិងធានាដល់ការធ្វើចរាចរណ៍ប្រកបដោយសុវត្ថិភាព៕ សួនលីណា

ភ្នំពេញ ៖ ករណីអគ្គិភ័យមួយបានឆាបឆេះរថយន្តសាមយ៉ុងដែលកំពុងដឹកតុ កៅអី តាមដងផ្លូវយ៉ាងសន្ធោសន្ធៅ និងរាលដាលដល់រថយន្តកូរ៉ូឡាមួយគ្រឿងទៀតនៅក្បែរគ្នា បង្កការភ្ញាក់ផ្អើលដល់ប្រជាពលរដ្ឋនិងសមត្ថកិច្ចចេញរថយន្តពន្លត់អគ្គិភ័យមកជួយអន្តរាគមន៍បាញ់ទឹកពន្លត់ កាលវេលាម៉ោង១១ និង៥០នាទីយប់ថ្ងៃអង្គារ៍ ទី៤ ខែតុលា ឆ្នាំ២០២២ ស្ថិតនៅតាមបណ្ដោយផ្លូវ២៦៥ ត្រង់ចំណុចជិតផ្សារសំណង់១២ ក្នុងសង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ។ បើតាមប្រភពពីអ្នកបើករថយន្តរងគ្រោះបានឲ្យដឹងថា ពួកគាត់មានគ្នាបីបានបើករថយន្តសាមយ៉ុង ពណ៌ស មួយគ្រឿងដឹកតុនិងកៅអីពេញរថយន្ត ចេញពីខេត្តតាកែវ យកមកឲ្យម៉ូយនៅរាជធានីភ្នំពេញ។ ខណៈមកដល់ចំណុចកើតហេតុ កំពុងបើកបរសុខៗស្រាប់តែឆាបឆេះចេញពីខាងក្រោមរថយន្តយ៉ាងខ្លាំង ភ្លាមៗពួកគាត់ទាំងបីនាក់បានឈប់រថយន្តហើយយកទឹកសុទ្ធបួនដប់ដបមកចាក់ពន្លត់ដែរតែមិនរលត់ និងឆេះកាន់ខ្លាំងឡើងៗ ដោយពួកគាត់មិនដឹងរកអ្នកណាឲ្យជួយព្រោះយប់ស្ងាត់ ទើបគាត់រត់ចេញពីរថយន្តស្រែកឲ្យគេជួយ ភ្លាមៗផ្អើលដល់ប្រជាពរដ្ឋបានរាយការណ៍ដល់សមត្ថកិច្ចចេញរថយន្តអគ្គិភ័យពន្លត់មួយគ្រឿងមកបាញ់ពន្លត់ ខណៈកំពុងតែបាញ់មិនទាន់រលត់ផងក៍រាលដាលដល់រថយន្តកូរ៉ូឡាមួយគ្រឿងទៀត បណ្ដាលឲ្យឆេះអស់ប្រហែល៥០% ចំណែករថយន្តសាមយ៉ុងឆេះម៉ត់ទាំងតុនិងកៅអី ទើបបាញ់រលត់ទៅវិញ។ ករណីគ្រោះអគ្គិភ័យនេះ កម្លាំងការិយាល័យបង្ការ សង្គ្រោះអគ្គិភ័យបានប្រើប្រាស់រថយន្តអគ្គិភ័យចំនួន ០៦គ្រឿងទើបបាញ់រលត់ទាំងស្រុង។ ហើយរាល់ការខូចខាតតុ កៅអី រួមទាំងរថយន្ត អស់ខ្ទង់រាប់ម៉ឺនដុល្លារ តែមិនបង្កគ្រោះថ្នាក់ដល់មនុស្សណាម្នាក់ឡើយ ៕ ដោយ ៖ ជីម ភារ៉ា

ភ្នំពេញ ៖ នៅវេលាម៉ោងប្រមាណ ០៧ និង៣០នាទីយប់ ថ្ងៃអង្គារ៍ ទី៤ ខែតុលា ឆ្នាំ២០២២ មានភ្លៀងធ្លាក់មួយមេធំលាយឡំដោយខ្យល់កន្ត្រាក់ និងផ្គររន្ទះ បណ្ដាលឲ្យដើមឈើចំនួន ០៦ដើមដែលដាំអមសង្ខាងផ្លូវព្រលានយន្តហោះអន្តរជាតិភ្នំពេញ បានបាក់រៀបដល់ដី ព្រមទាំងសង្កត់ឡំប្រឺតាមួយគ្រឿងរងការខូចខាតយ៉ាងដំណំ ម្ចាស់ឡំប្រឺតារងរបួសស្រាល ស្ថិតនៅត្រង់ចំណុចមុខខ្លោងទ្វារវត្តវិហារឃួន តាមបណ្ដោយផ្លូវសហព័ន្ធរុស្ស៊ី ជាប់របងព្រលានយន្តហោះអន្តរជាតិភ្នំពេញ ក្នុងសង្កាត់ចោមចៅទី៣ ខណ្ឌពោធិ៍សែនជ័យ រាជធានី ភ្នំពេញ។ ម្ចាស់ឡំប្រឺតាមានឈ្មោះ ហេង គឹមសាធ ភេទប្រុស អាយុ៣៧ឆ្នាំ ជនជាតិខ្មែរ មានស្រុកកំណើតនៅទីរួមខេត្តកំពង់ឆ្នាំង បើកឡំប្រឺតា ពណ៌ស ពាក់ផ្លាកលេខកំពង់ឆ្នាំង1J.9327 ។ តាមសម្ដីរៀបរាប់របស់ម្ចាស់ឡំប្រឺតា បានប្រាប់ឲ្យដឹងថា ដំបូងឡើយគាត់បើកឡំប្រឺតា តាមបណ្ដោយផ្លូវសហព័ន្ធរុស្ស៊ីទិសដៅពីលិចមកកើត ក្នុងល្បឿនយឺតៗ ខណៈមេឃកំពុងភ្លៀងលាយឡំដោយខ្យល់កន្ត្រាក់ និងផ្គររន្ទះផងនោះ ស្រាប់តែមានដើមឈើចំនួន ០៦ដើមបានបាក់រៀបដល់ដី ក្នុងនោះមានដើមឈើមួយដើមបានបាក់ សង្កត់លើឡំប្រឺតារបស់គាត់ បណ្ដាលឲ្យគាត់ត្រូវក្បាល ពកបន្តិចបន្តួច ចំណែកឯឡំប្រឺតាវិញគឺរងការខូចខាតផ្នែកខាងលើយ៉ាងដំណំ។ ក្រោយពីកើតហេតុ ម្ចាស់ឡំប្រឺតាបានសំណូមពរដល់សាលារាជធានីភ្នំពេញ មេត្តាជួយដោះស្រាយ នូវការខូចខាត ឡំប្រឺតារបស់គាត់ផង ពីព្រោះឡំប្រឺតារបស់គាត់បង់រំលស់នៅពីរឆ្នាំទៀត ទើបបានដាច់…