សេចក្តីរាយការណ៍បានបញ្ជាក់អោយដឹងថា ហេតុការណ៍នោះបានកើតឡើងវេលាម៉ោង ៦ព្រឹកថ្ងៃទី២ ខែមិថុនា ឆ្នាំ២០២១នេះ នៅលើផ្លូវលំ ត្រង់ចំណុចភូមិច្បារច្រុះ ឃុំក្រាំងចេក ស្រុកឧដុង្គ ខេត្តកំពង់ស្ពឺ។ សមត្ថកិច្ចបានអោយដឹងថាក្នុងហេតុការណ៍គ្រោះថ្នាក់ចរាចរណ៍មួយដែលបង្កឡើងដោយ រថយន្តមួយគ្រឿងម៉ាកហ៊ី យ៉ាន់ដាយពណ៌ស គ្មានស្លាកលេខ ដែលដឹកកម្មកររោងចក្រ បានបើកបរក្នុងទិសដៅពីជើងទៅត្បូងលុះដល់ចំណុចកើតហេតុបានរ៉េចង្កូតទៅបុកដើមឈើ តែម្ដងបណ្តាលអោយ កម្មករកម្មការិនី ចំនួន២១នាក់រងរបួសក្នុងនោះ កម្មករចំនួន៦នាក់បានរងរបួសធ្ងន់ ត្រូវបានបញ្ជូនទៅសង្រ្គោះនៅឯមន្ទីរពេទ្យ។ដោយឡែកចំពោះមូលហេតុ សមត្ថកិច្ចនៅមិនទាន់ដឹងច្បាស់នៅឡើយទេថាបណ្តាលមកពីអ្វី?។

រាជធានីភ្នំពេញ៖ ថ្នាក់ដឹកនាំក្រសួងអប់រំ យុវជន និងកីឡា បានរៀបចំកិច្ចប្រជុំពិភាក្សាតាមអនឡាញ ក្នុងគោលដៅប្រែក្លាយវិទ្យាស្ថានជាតិអប់រំ ជាគ្រឹះស្ថានឧត្តមសិក្សាជាតិទទួលបន្ទុកបណ្តុះបណ្តាលគ្រូ បង្រៀន និងមន្ត្រីគ្រប់គ្រងអប់រំ ឈានមុខគេនៅកម្ពុជា ទាំងផ្នែកចំណេះដឹង ជំនាញ និងឥរិយាបថ៕ កិច្ចប្រជុំនេះបានប្រព្រឹត្តទៅក្រោមការដឹកនាំដោយ ឯកឧត្ដមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ដោយមានការចូលរួមពីឯកឧត្ដមបណ្ឌិតសភាចារ្យ រដ្ឋលេខាធិការ ឯកឧត្ដម លោកជំទាវ ថ្នាក់ដឹកនាំ អង្គភាពពាក់ព័ន្ធនានា។ កិច្ចប្រជុំស្ដីពីការធ្វើកំណែទម្រង់វិទ្យាស្ថានជាតិអប់រំនេះ ដើម្បីកំណត់បេសកកម្ម និងគោលដៅ ពិនិត្យមើលផែនការសាងសង់ហេដ្ឋារចនាសម្ព័ន្ធ (ផ្នែករឹង) ពិនិត្យមើលកំណែទម្រង់ផ្នែកទន់ និងការស្វែងរកវិធានការដោះស្រាយ៕ដោយ -រ៉ាវុធ

យោងតាមក្រសួងសាធារណការ និងដឹកជញ្ជូនបានឲ្យដឹងថា គណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្ត ដឹកជញ្ជូនលើសទម្ងន់កម្រិតកំណត់ នៅខែឧសភា ឆ្នាំ ២០២១ បានចាប់រថយន្តដឹកជញ្ជូនលើសទម្ងន់១៧២គ្រឿង ដោយធ្វើការពិន័យបានថវិកាសរុបចំនួន ២៤២ លានរៀល។ ចំនួននោះ មានការកើនឡើង ៦% បើធៀបនឹងទិន្នន័យ ខែមេសា ឆ្នាំ២០២១ កន្លងទៅ ដែលមានរថយន្តដឹកលើសទម្ងន់ចំនួន ១៦១ គ្រឿងត្រូវបានចាប់ផាកពិន័យ ។ ជាមួយគ្នានោះ ក្រសួងសាធារណការ និងដឹកជញ្ជូនបានអំពាវនាវឲ្យម្ចាស់រថយន្តដឹកទំនិញទាំងអស់ត្រូវដឹងថា ការបង្កផលប៉ះពាល់ដែលបណ្តាលមកពីការដឹកជញ្ជូនលើសទម្ងន់ គឺបានបំផ្លាញផ្លូវជាតិដែលនាំឱ្យខាតបង់ថវិកាជាតិ ព្រមទាំងបង្កនូវគ្រោះថ្នាក់ប៉ះពាល់ដល់ទ្រព្យសម្បត្តិសាធារណៈ និងជីវិតមនុស្សផងដែរ។

សេចក្ដីជូនដំណឹង ស្ដីពីការរុះរើ ឬចល័តបែចិញ្ចឹមត្រី ផ្ទះបណ្ដែតទឹក ផ្ទះទូកតូចៗ និងសំណង់មិនរៀបរយលើផ្ទៃទន្លេ នៅភូមិសាស្ត្ររាជធានីភ្នំពេញ ដោយទុករយៈពេល ០១សប្ដាហ៍ គិតចាប់ពីកាលបរិច្ឆេទចេញសេចក្ដីជូនដំណឹងនេះតទៅ៕

នារសៀលថ្ងៃអង្គារ ទី១ ខែមិថុនា ឆ្នាំ២០២១នេះ ឯកឧត្ដម នាយឧត្ដមសេនីយ៍ សាស្ដ្រាចារ្យ សេង ផល្លី ប្រធានបណ្ឌិត្យសភានគរបាលកម្ពុជា បានជួបប្រជុំពិភាក្សាតាមប្រព័ន្ធអនឡាញ ជាមួយ ឯកឧត្ដម បណ្ឌិត Yilmas COLAK ប្រធានបណ្ឌិត្យសភានគរបាលជាតិតួកគី តាមប្រព័ន្ធអនឡាញ ដោយទទួលបានលទ្ធផលដូចខាងក្រោម៖ ១- បណ្ឌិត្យសភានគរបាលជាតិតួកគីអញ្ជើញថ្នាក់ដឹកនាំបណ្ឌិត្យសភា ដើម្បីចូលរួមសន្និសីទ Interpa សម្រាប់ឆ្នាំ២០២១ នៅក្នុងខែវិច្ឆិកា នៅប្រទេសតួកគី និងចុះហត្ថលេខាលើអនុស្សរណៈនៃការយោគយល់គ្នារវាងបណ្ឌិត្យសភានគរបាលទាំង២។ ២- បណ្ឌិត្យសភានគរបាលជាតិតួកគីបានឯកភាពដឹកនាំគណៈប្រតិភូមកបំពេញទស្សនកិច្ចនៅបណ្ឌិត្យសភានគរបាលកម្ពុជា នាដើមឆ្នាំ២០២២។ ៣- ដើម្បីពង្រឹងកិច្ចសហប្រតិបត្តិការ បណ្ឌិត្យសភានគរបាលជាតិតួកគីនឹងផ្ដល់វគ្គបណ្ដុះបណ្ដាលតាមប្រព័ន្ធអនឡាញដល់និស្សិតបណ្ឌិត្យសភានគរបាលកម្ពុជា លើមុខវិជ្ជានៃជំនាញឯកទេសសំខាន់ៗចំនួន៣ គឺ៖ ១-ជំនាញប្រឆាំងភេវរកម្ម ២-ជំនាញប្រឆាំងចារកម្ម និង ៣-ជំនាញស៊ើបអង្កេតបទល្មើសតាមប្រព័ន្ធបច្ចេកវិទ្យា ដែលនឹងត្រូវរៀបចំឡើងនៅអំឡុងខែកញ្ញា នៅឆ្នាំ២០២១នេះ។ដោយ -រ៉ាវុធ

បាត់ដំបង៖ នៅព្រឹកថ្ងៃទី១ ខែមិថុនា ឆ្នាំ២០២១ លោក ណុប ដារ៉ា អភិបាលរងខេត្ត និងជា ប្រធានក្រុមការងារ ស្រាវជ្រាវបង្រ្កាបបទល្មើសឆ្លងដែនគ្រប់ភេទ តំណាងឯកឧត្តម ងួន រតនៈ អភិបាល នៃគណៈអភិបាលខេត្តបាត់ដំបង បានអញ្ជើញដឹកនាំកិច្ចប្រជុំការងារ ដើម្បីពិភាក្សាស្រាវជ្រាវបង្រ្កាបបទល្មើសឆ្លងដែនខុសច្បាប់គ្រប់ប្រភេទ នៅក្នុងភូមិសាស្រ្តស្រុកសំឡូត ខេត្តបាត់ដំបង ។ នៅក្នុងកិច្ចប្រជុំនេះ សំដៅពង្រឹងបន្ថែមទៀតក្នុងការស្រាវជ្រាវបង្រ្កាបបទល្មើសឆ្លងដែនខុសច្បាប់គ្រប់ប្រភេទ ពិសេសស្រាវជ្រាវរកមេខ្យល់ ដែលនាំពលករ ចេញ-ចូល ប្រទេសថៃ ក៍ដូចជា នាំពលករគិចពីការធ្វើចត្តាឡីស័ក ។ លោក ក៏បានកោតសរសើរដល់កងកម្លាំងជួរមុខគ្រប់ប្រភេទ ដែលបានលះបង់កម្លាំងកាយចិត្ត និងឃ្លាតឆ្ងាយពីគ្រួសារ ជាទីស្រលាញ់ ដើម្បីជាតិមាតុភូមិ ហើយដោយឃើញផ្ទាល់ នូវ ទុកលំបាករបស់កងកម្លាំងជួរមុខ, ឯកឧត្តម មានប្រសាសន៍ថា នឹងនាំបញ្ហាប្រឈមទាំងនេះជូនថ្នាក់ដឹកនាំខេត្ត ដើម្បីដោះស្រាយ ជូនក្នុងពេលឆាប់ៗនេះ ។ ក្រោយពីបញ្ចប់អង្គប្រជុំ ឯកឧត្តម ណុប ដារ៉ា បានអញ្ជើញចុះត្រួតពិនិត្យច្រកទំនាក់ទំនងព្រំដែនកម្ពុជា-ថៃ (ច្រក៤០០) ផងដែរ ៕ ដោយវណ្ណលុក

សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានផ្ញើសារចូលរួមរំលែកទុក្ខ ចំពោះមរណភាពរបស់ ឯ,ឧ ត្រាំ អ៉ីវតឹក ទេសរដ្ឋមន្ដ្រីទទួលបន្ទុកបេសកកម្មពិសេស ដែលបានទទួលមរណភាព នៅរសៀលថ្ងៃទី១ ខែមិថុនា ឆ្នាំ២០២១ ក្នុងជន្មាយុ៧៣ឆ្នាំ ដោយរោគាពាធ។