ក្រសួងធនធានទឹក និងឧតុនិយម៖ យោងតាមក្រសួងធនធានទឹក និងឧតុនិយម នៅថ្ងៃទី២០តុលាបានឲ្យដឹងថា កម្ពុជាបាននឹងបន្តទទួលនូវខ្យល់មូសុងនិរតីដែលមានកម្រិតមធ្យម ប្រពន្ធ័សម្ពាធទាបនៅបន្តអូសបន្លាយកាត់ពីលើផងដែរ។ ទន្ទឹមនឹងនោះ នៅក្នុងមហាសមុទ្រស្ថិតនៅខាងកើតប្រទេសហ្វីលីពីន នឹងអាចមានការកើតឡើងនូវព្យុះទី១៧ឈ្មោះ សូដែល (SAUDEL) ដែលតាមការព្យាករជាលក្ខណៈតំបន់បង្ហាញថា ព្យុះនោះនឹងធ្វើដំណើរចូលភាគខាងជើងប្រទេសវៀតណាមគឺចំណុចខេត្តវិញ ក្នុងអំឡុងថ្ងៃទី២៥ និងថ្ងៃ១៦តុលាឆ្នាំ២០២០។ ព្យុះនោះ ត្រូវគេព្យាករថា អាចនឹងមានឥទ្ធិពលបន្តិចបន្តួចប៉ុណ្ណោះមកលើភាគឦសាន្តប្រទេសកម្ពុជា។ ជាទូទៅនឹងមានភ្លៀងរាយប៉ាយពីតិចទៅបង្គួរនៅទូទាំងប្រទេស។ ជាមួយគ្នានោះ ក្រសួងធនធានទឹកបានអំពាវនាវឲ្យប្រជាពលរដ្ឋប្រុងប្រយ័ត្នចំពោះបាតុភូតផ្គរ រន្ទះ ខ្យល់កន្ត្រាក់ ចាប់ពីថ្ងៃ២៤ដល់ថ្ងៃ២៨តុលាឆ្នាំ២០២០ អាចនឹងមានខ្យល់បក់បោកខ្លាំង និងរលកសមុទ្រខ្ពស់ៗ៕

ភ្នំពេញ៖ ស្ថានភាពកម្ពស់ទឹកស្ទឹងព្រែកត្នោត នៅសំណង់ទ្វារទឹកទំនប់អាង៧មករា នាថ្ងៃទី២០ ខែតុលា ឆ្នាំ២០២០ វេលាម៉ោង ៧:៣០ នាទីព្រឹក ៖- កម្ពស់ទឹកខាងមុខទ្វារ ៥,៥២ ម៉ែត្រ​ ស្រកចុះ​ ១,១៥ ម៉ែត្រ ធៀបនឹងកម្ពស់ទឹកអតិបរិមា​ ៦,៦៧ ម៉ែត្រ កាលពីថ្ងៃទី​១៤ ខែតុលា ឆ្នាំ២០២០- កម្ពស់ទឹកហូរលើទំនប់បង្ហៀរ ០,៧២ ម៉ែត្រ- កម្ពស់ទឹកខាងក្រោយទ្វារ ៨,៧២ ម៉ែត្រ​ ។ ព្រឹកនេះ កម្ពស់ទឹកស្ទឹងព្រែកត្នោត បានកើនឡើង ០,១២ ម៉ែត្រ ធៀបនឹងពេលល្ងាចថ្ងៃម្សិលមិញ ៕

ភ្នំពេញ៖ នៅព្រឹកនេះ សម្ដេចតេជោ ហ៊ុន សែន កំពុងធ្វើដំណើរទៅកាន់ខេត្តបន្ទាយមានជ័យ ដើម្បីសួរសុខទុក្ខ និងជួយឧបត្ថម្ភប្រជាជនប្រមាណ២មុឺនគ្រួសារ ដែលរងគ្រោះដោយជំនន់ទឹកភ្លៀង ។ សម្ដេចតេជោ ហ៊ុន សែន បានសរសេរក្នុងទំព័រហ្វេសប៊ុកផ្លូវការដូច្នេះថា ៖ ពេលនេះខ្ញុំកំពុងធ្វើដំណើរទៅកាន់ខេត្ត បន្ទាយមានជ័យដើម្បីសួរសុខទុក្ខ និងជួយឧបត្ថម្ភប្រជាជនប្រមាណពីរមុឺនគ្រួសារដែលរងគ្រោះដោយជំនន់ទឹកភ្លៀង។ ខ្ញុំនឹងបំពេញការងារពីរថ្ងៃនៅខេត្តបន្ទាយមានជ័យគឺថ្ងៃ២១និងថ្ងៃ២២ខែតុលាឆ្នាំ២០២០មុននឹងត្រឡប់មកភ្នំពេញវិញដើម្បីដឹកនាំការប្រជុំគណៈរដ្ឋមន្ត្រីនៅថ្ងៃ២៣ខែតុលាឆ្នាំ២០២០។ សម្ដេចបន្តថា ខេត្តបន្ទាយមានជ័យ ជាខេត្តដែលរងគ្រោះធ្ងន់ជាងគេនិងយូរជាងគេដែលចាំបាច់ត្រូវផ្តល់អទិភាពសង្រ្គោះផងនិងស្តារឡើងវិញក្រោយទឹកជំនន់ផង។សូមអរគុណសប្បុរសជនដែលជួយផ្តល់ជាថវិកា សម្ភារៈ ស្បៀងអាហារ។ល។តាមរយះរាជរដ្ឋាភិបាលឬកាកបាទក្រហមឬអាជ្ញាធរថ្នាក់ក្រោមជាតិ ឬចុះចែកផ្ទាល់ដល់ប្រជាជនដែលរងគ្រោះ។ សម្ដេចតេជោ ក៏បានកោតសរសើរចំពោះស្ថាបន័ថ្នាក់ជាតិនិងអាជ្ញាធរគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទព្រះសង្ឃក្រុមយុវជនទាំងអស់ដែលបានចូលរួមជួយសង្រ្គោះប្រជាជននៅតំបន់រងគ្រោះដែលនេះបានបង្ហាញនូវកម្លាំងសាមគ្គីភាពដ៏រឹងមាំនិងទូលំទូលាយនៃជាតិយើង។ សូមជូនពរបងប្អូនជនរួមជាតិជួបតែសេចក្តីសុខ៕

សៀមរាប៖ ក្នុងពេលដែលមានករណីគ្រោះទឹកជំនន់ យើងសង្កេតឃើញមានក្រុមការងាររាជរដ្ឋាភិបាលចុះជួយស្រុក អាជ្ញាធរ ខេត្ត កម្លាំងអន្តរាគមន៍ជាច្រើនផ្នែក រួមទាំងសម្ភារៈ និងមធ្យោបាយជួយសង្គ្រោះផងដែរ បានត្រៀម និងចុះធ្វើសកម្មភាពយ៉ាងមមាញឹក ខណៈពេលដែលស្រុកបន្ទាយស្រី នៃខេត្តសៀមរាប ត្រូវបានគំរាមកំហែងដោយជំនន់ទឹកភ្លៀង ។ ដោយឥទ្ធិពលនៃទឹកភ្លៀងធ្លាក់តំបន់ភ្នំគូលែន ស្រុកបន្ទាយស្រី នៃខេត្តសៀមរាប ប៉ុន្មានថ្ងៃនេះ ធ្វើឲ្យមានភ្លៀងធ្លាក់ជោគជាំ ។ ស្ថិតក្រោមការតាមដានរបស់អាជ្ញាធរស្រុក បានបង្ហាញឲ្យដឹងថា ក្នុងរយៈពេល២៤ម៉ោងចុងក្រោយ គិតត្រឹមព្រឹកថ្ងៃទី១៨ ខែតុលា ឆ្នាំ២០២០ ទឹកស្ទឹងបន្ទាយស្រីបានហក់ឡើងពីកំពស់៣,៣០ម៉ែត្រ ដល់ ៥,៥០ម៉ែត្រ ជិតដល់កម្រឹតប្រកាសអាសន្ន ( ៦,០០ម៉ែត្រ ) ដែលស្ថានភាពបែបនេះ បានជម្រុញឲ្យគណៈបញ្ជាការឯកភាពស្រុក ចាត់នូវវិធានការ ក្នុងការជម្លៀសប្រជាជនមួយចំនួនរស់នៅក្នុងតំបន់នោះ ដែលរងផលប៉ះពាល់ខ្លាំង បញ្ជូនទៅកាន់ទីទួលមានសុវត្ថិភាព  ។ តាមការបញ្ជាក់របស់លោក ឃឹម ហ្វីណង់ អភិបាលស្រុកបន្ទាយស្រី បានឲ្យដឹងដូច្នេះថា ក្នុងពេលដែលកម្លាំងអន្តរាគមន៍របស់ស្រុក រួមមានកម្លាំងនគរបាល អាជ្ញាធរដែនដីចុះជួយប្រជាពលរដ្ឋ ដែលជាពិសេសនោះ គេឃើញមានកម្លាំងសហការដែលចូលរួមដោយ កងយោធារបស់បញ្ជាការដ្ឋានកងពលធំអន្តរាគមន៍លេខ២ និងកម្លាំងមួយចំនួនទៀត រួមទាំងមធ្យាបាយជម្លៀសជនរងគ្រោះផងដែរ ដែលដឹកនាំដោយ ឯកឧត្តម…

កំពង់ស្ពឺ៖ ទោះបីជារដ្ឋបាលខេត្តកំពង់ស្ពឺ បានជូនដំណឹងអំពីការផ្អាកចរាចរណ៍រថយន្តធុនធំលើកំណាត់ផ្លូវមួយចំនួនរួចហើយក្ដី ក៏ក្រុមហ៊ុនរថយន្តធុនធំៗទាំងនោះនៅតែផ្គើនមិនព្រមស្ដាប់តាម ហើយបែរជាបន្តការបើកបរបំពានដដែលជាដដែល ជាហេតុបណ្ដាលឱ្យផ្លូវដែលកំពុងជួបស្ថានភាពលំបាកស្រាប់នោះ រឹតតែរងការខូចខាតថែមទៀត។ ដោយមិនអាចបណ្ដាយឱ្យទង្វើគគ្លើននេះបន្តទៅទៀតបាន ទើប កម្លាំងសមត្ថកិច្ចនគរបាលខេត្តកំពង់ស្ពឺបានចុះឃាត់រថយន្តធុនធំៗជាច្រើនគ្រឿង នៅតាមបណ្តោយផ្លូវជាតិលេខ ៤១ ត្រង់ម្តុំជិតផ្លូវបំបែកស្តុបថ្នល់ទទឹង។ វិធានការនេះគឺតបតាមការជូនដំណឹងរបស់រដ្ឋបាលខេត្តកំពង់ស្ពឺ កាលពីថ្ងៃទី១៧ ខែតុលា ឆ្នាំ២០២០ ដែលសម្រេចផ្អាកការធ្វើចរាចរណ៍ជាបណ្តោះអាសន្នលើផ្លូវជាតិលេខ ៤ ផ្លូវជាតិលេខ ៤១ និងផ្លូវខេត្តលេខ ១៤១ (ចាប់ពីព្រៃផ្តៅដល់ផ្លូវខេត្តលេខ ១៣០) ចំពោះរថយន្តដឹកទំនិញធុនធំគ្រប់ប្រភេទ។ ប៉ុន្តែទោះបីចេញសេចក្ដីជូនដំណឹងនេះហើយក្ដី ក៏នៅតែមានរថយន្តធំៗដែលគេសង្កេតឃើញដឹកសម្ភារសំណង់ជាច្រើនបន្តដឹកមិនគោរពតាម ការជូនដំណឹងនេះសោះ ដែលកត្តានេះបានធ្វើឱ្យប៉ះពាល់ដល់ផ្លូវថ្នល់ជាច្រើនក្នុងភូមិសាស្ត្រខេត្តកំពង់ស្ពឺ៕