បរទេស៖ នាយកប្រតិបត្តិសហភាពអឺរ៉ុបបានអោយដឹងថា គណៈកម្មការអឺរ៉ុបបានប្រកាសផ្តល់ទឹកប្រាក់១២.៨លានអឺរ៉ូ ឬស្មើនឹង១៥.៤លានដុល្លារជាជំនួយរដ្ឋដល់រដ្ឋាភិបាលអ៊ីតាលី ដើម្បីសង្គ្រោះសេដ្ឋកិច្ចក្រុមហ៊ុនអាកាសចរណ៍ អាលីថារៀ (Alitalia) អោយងើបរួចពីការខាតបង់ ដែលបង្កឡើងដោយវិបត្តិកូវីដ១៩ ។សេចក្តីប្រកាសរបស់គណៈកម្មករអឺរ៉ុបបានលើកឡើងថា គណៈកម្មករអឺរ៉ុបបានមើលឃើញថា វិធានការផ្តល់ជំនួយដល់អ៊ីតាលីចំនួន១២.៨លានអឺរ៉ូ ដើម្បីគាំទ្រដល់ក្រុមហ៊ុនអាកាសចរណ៍អ៊ីតាលី អាលីថារៀ គឺស្របទៅនឹងច្បាប់ជំនួយរដ្ឋក្នុងតំបន់អឺរ៉ុប ។ គណៈកម្មករអឺរ៉ុបបានបន្ថែមថា វិធានការនេះ មានបំណងផ្តល់សំណងដល់ក្រុមហ៊ុនអាកាសចរណ៍សម្រាប់ការខូចខាតដែលរងគ្រោះលើការដឹកជញ្ជូនជាក់ស្តែង ដោយសារការផ្ទុះឡើងវីរុសកូវីដ១៩ អំឡុងពេលខែមករា ឆ្នាំ២០២១ ។ក្រុមហ៊ុន អាលីថារៀ ស្ថិតក្នុងស្ថានភាពក្ស័យធនទៅហើយ ដោយក្រុមហ៊ុនអាកាសចរណ៍អ៊ីតាលីមួយនេះ បានខាតបង់ថវិកាជាច្រើនឆ្នាំរហូតមកដល់ពេលនេះ និងត្រូវបានដាក់ក្រោមរដ្ឋបាលរដ្ឋនៅក្នុងឆ្នាំ ២០១៧ ។ ចាប់តាំងពីពេលនោះមក អ៊ីតាលីពុំអាចរកបានអ្នកដែលអាចទទួលយកក្រុមហ៊ុននេះនៅឡើយ ៕ Reuters

នៅត្រីមាសទី១ដើមឆ្នាំ២០២១នេះ សេដ្ឋកិច្ចចក្រភពអង់គ្លេសបានធ្លាក់ចុះ១.៥ភាគរយអង់គ្លេស៖ ទិន្នន័យផ្លូវការបានបង្ហាញអោយដឹងថា សេដ្ឋកិច្ចរបស់ចក្រភពអង់គ្លេសបានធ្លាក់ចុះ១.៥ភាគរយនៅត្រីមាសទី១ដើមឆ្នាំ២០២១នេះ ដោយសារតែអង់គ្លេសបានទទួលរងផលប៉ះពាល់ពីការបិទខ្ទប់ប្រទេស ដើម្បីទប់ស្កាត់ជំងឺកូវីដ១៩ ។ជាមួយគ្នានេះ រដ្ឋមន្ដ្រីក្រសួងហិរញ្ញវត្ថុអង់គ្លេសលោក រីស៊ី ស៊ូណាក់ (Rishi Sunak) បានឆ្លើយតបចំពោះទិន្នន័យខាងលើនេះថា នៅពេលយើងបើកសេដ្ឋកិច្ចឡើងវិញដោយប្រុងប្រយ័ត្ន ខ្ញុំនឹងបន្តក្នុងការចាត់វិធានការចាំបាច់ទាំងអស់ ដើម្បីគាំទ្រការស្ទុះងើបឡើងវិញរបស់យើង ។ទោះយ៉ាងណា ថ្មីៗនេះចក្រភពអង់គ្លេសកំពុងចាកចេញពីការបិទខ្ទប់ក្នុងល្បឿនជាបណ្ដើរៗ ដែលអាចឲ្យក្រុមហ៊ុនស្ទុះងើបឡើងពីការធ្លាក់ចុះ ដោយសារតែការរីករាលដាលនៃជំងឺកូវីដ១៩ ។ ទន្ទឹមគ្នា ការិយាល័យជាតិស្ថិតិបានបង្ហាញថា ទោះបីជាមានការរឹតបន្តឹងនៅត្រីមាសទី១ក៏ដោយ ក៏ចក្រភពអង់គ្លេសទទួលបានកំណើនការស្ទុះងើបឡើងវិញ២.១ភាគរយកាលពីខែមីនា ឆ្នាំ២០២១នេះផងដែរ ៕ ប្រភព៖ Yahoo News

ភ្នំពេញ៖ កំពង់ផែស្វយ័តក្រុងព្រះសីហនុរកចំណូលសរុបបានជាង២០លានដុល្លារនៅត្រីមាសទី១ ឆ្នាំ២០២១នេះ មានការកើនឡើងជាង១១ភាគរយ បើធៀបនឹងឆ្នាំ២០២០ ប្រមាណ១៧លានដុល្លារ ។បើតាមរបាយការណ៍បានអោយដឹងថា ប្រាក់ចំណូលសរុបរបស់កំពង់ផែស្វយ័តក្រុងព្រះសីហនុក្នុងឆ្នាំ២០២១ ទទួលបានចំនួន៨ម៉ឺន១ពាន់២៩១លាន១១ម៉ឺន៣ពាន់រៀល ឬស្មើនឹងប្រមាណ២០លានដុល្លារ កើនឡើងជាង១១ភាគរយ បើធៀបនឹងឆ្នាំ២០២០ សរុបចំនួន ៧ម៉ឺន១ពាន់៧០៧លាន៧៨ម៉ឺន១ពាន់រៀល ឬស្មើនឹងប្រមាណ១៧លានដុល្លារ ។ ដោយឡែកប្រាក់ចំណេញដែលកំពង់ផែស្វយ័តក្រុងព្រះសីហនុទទួលបាននៅក្នុងឆ្នាំ២០២១នេះសរុបចំនួន៣ម៉ឺន៦ពាន់៨០៥លាន២០ម៉ឹន៦ពាន់រៀល ឬស្មើនឹងប្រមាណជាង៩លានដុល្លារ កើនឡើង៩៧ភាគរយ បើធៀបនឹងឆ្នាំ២០២០ សរុបចំនួន៨២០លាន៣៩ម៉ឺន៥ពាន់រៀល ឬស្មើនឹងប្រមាណ២០ម៉ឺនដុល្លារ ។សូមជម្រាបថា កំពង់ផែស្វយ័តក្រុងព្រះសីហនុ គឺជាកំពុងផែសមុទ្រទឹកជ្រៅអន្តរជាតិតែមួយគត់ក្នុងប្រទេសកម្ពុជា ស្ថិតនៅក្នុងខេត្តព្រះសីហនុ ដែលជាច្រករបៀងសេដ្ឋកិច្ចភាគខាងត្បូងរវាងរាជធានីភ្នំពេញ និងខេត្តព្រះសីហនុ ៕

Video: https://fb.watch/5sIBd9eWRw/ ប្រ៊ូសែល ៖ សហភាពអឺរ៉ុប (EU) បានធ្វើការរំពឹងទាំងភាពជឿជាក់ថា សេដ្ឋកិច្ចនៅក្នុងតំបន់ទាំងមូលនឹងមានភាពល្អប្រសើរឡើងវិញនៅក្នុងឆ្នាំ2021នេះ បន្ទាប់ពីសមាជិកក្នុងប្លុករបស់ខ្លួនទាំងអស់បានដាំក្បាលចុះយ៉ាងខ្លាំងនៃសេដ្ឋកិច្ចស្ទើរគ្រប់ប្រទេស ដោយទទួលរងនូវផលប៉ះពាល់យ៉ាងខ្លាំងពីបញ្ហារាតត្បាតនៃវីរុសកូវីដ១៩កាលពីឆ្នាំកន្លងទៅ ។បើតាមសេចក្តីប្រកាសរបស់សហភាពអឺរ៉ុប (EU) សេដ្ឋកិច្ចរបស់នៅក្នុងប្លុកមួយនេះ នឹងមានកំណើនខ្លាំងឡើងវិញសម្រាប់ឆ្នាំ2021នេះ ដែលតួលេខថ្មីនៃទំហំសេដ្ឋកិច្ចនេះ អាចខ្ពស់ជាងការព្យាករណ៍ទុកលើកមុនទៅទៀត ។ ប្រភពដដែលអោយដឹងទៀតថា កំណើនសេដ្ឋកិច្ចនៅក្នុងបណ្តាប្រទេសសមាជិកទាំង២៧នឹងហក់ឡើងវិញ ដែលអាចធ្វើឲ្យសេដ្ឋកិច្ចក្នុងតំបន់រួមនឹងកើនឡើងប្រមាណជា៤.២ភាគរយ ដែលតួលេខនេះមានភាពខ្លាំងក្លាជាងការរំពឹងទុកដែលធ្លាប់បានធ្វើឡើងកាលពីខែកុម្ភៈ ក្នុងអត្រាត្រឹមតែ3.7ភាគរយប៉ុណ្ណោះ ។សូមជម្រាបថា សម្រាប់ការព្យាករណ៍នៅឆ្នាំក្រោយនេះវិញ សហភាពអឺរ៉ុបអាចទទួលបានកំណើនប្រមាណជា៤.៤ភាគរយជំនួសឲ្យការព្យាករណ៍ទុកលើកមុនកាលពីខែកុម្ភៈដែលមានត្រឹមតែ៣.៩ភាគរយ ហើយវាក៏ជាពេលវេលាដែលរដ្ឋជាសមាជិកទន្ទឹងរង់ចាំជាយូរមកហើយដែរ នៅពេលដែលកញ្ចប់ជំនួយដំបូងបំផុតរបស់សហភាពអឺរ៉ុបប្រមាណជា៧៥០ពាន់លានអឺរ៉ូ ឬស្មើនឹង៩១០ពាន់លានដុល្លារ នឹងត្រូវបានចាប់ផ្តើមយកមកប្រើប្រាស់បាន ក្នុងកិច្ចការងារស្រោចស្រង់សេដ្ឋកិច្ចឡើងវិញ ៕

ខេត្តកំពត៖ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពត លោក ចាន់ រិទ្ធិ បានឲ្យដឹងថា ការប្រមូលផលផ្លែទុរេននៅក្នុងឆ្នាំ២០២១នេះ កើនឡើងជាងឆ្នាំ២០២០កន្លងទៅប្រមាណ២៥ភាគរយ ដោយសារអាកាសធាតុអំណោយផល ។ រីឯតម្លៃវិញ ចន្លោះពី២ម៉ឺនរៀលទៅ២ម៉ឺន៨ពាន់រៀលក្នុង១គីឡូក្រាម ។លោកបន្តថា គិតមកទល់បច្ចុប្បន្ននេះ ផ្ទៃដីដាំដុះទុរេនសរុប១ពាន់៦០ហិចតា ។ ក្នុងនោះផ្ទៃដីប្រមូលផលទំហំ៨៩៨ហិចតា បរិមាណផលចំនួន១ម៉ឺន៣២៧តោន ។ ទាក់ទងតម្លៃទុរេន លោកបានឲ្យដឹងថា ជាមធ្យមសម្រាប់ប្រភេទមួនថងថ្លៃ២ម៉ឺន៨ពាន់រៀលក្នុង១គីឡូ ឳខាក់ ២ម៉ឺន៤ពាន់រៀលក្នុង១គីឡូ និងប្រភេទសន្តង់កិត២ម៉ឺនរៀលក្នុង១គីឡូ ។ លោកបន្ថែមថា ផលទុរេនខេត្តកំពតនៅតែបន្តលក់ចេញទៅក្រៅខេត្តមិនស្ទះទេ គឺមានម៉ូយឱ្យផ្ញើរទៅបណ្ដាខេត្ត និងរាជធានីតាមធម្មតា ទោះបីក្នុងសម័យជម្ងឺកូវីដ១៩កំពុងរីករាលដាលក៏ដោយ ។សូមជម្រាបផងដែរថា ទុរេនក្រៅពីខេត្តកំពត ក៏មានការដាំដុះច្រើនដែរនៅបណ្តាខេត្តផ្សេងៗទៀត ដូចជាខេត្តកំពង់ចាម ត្បូងឃ្មុំ បាត់ដំបង កោះកុង មណ្ឌលគិរី និងខេត្តពោធិ៍សាត់ ។ ប៉ុន្តែចំពោះរសជាតិនៃទុរេនវិញ គឺគ្មានទុរេនខេត្តណាមួយអាចប្រជែងនឹងទុរេនខេត្តកំពតបានទេ ទើបរដ្ឋាភិបាលសម្រេចយកផ្លែទុរេនជានិមិត្តសញ្ញាប្រចាំខេត្តកំពត ៕