អន្តរជាតិ៖ អគ្គលេខាធិការអង្គការសហប្រជាជាតិលោក អាន់តូនីញ៉ូ ហ្គូដទែរ៉េស ថ្លែងថា លោកបានត្រៀមខ្លួនរួចរាល់ហើយ ដើម្បីធ្វើកិច្ចពិភាក្សាជាមួយក្រុមតាលីបង់ដោយខ្លួនលោកផ្ទាល់ ។ លោក ហ្គូដទែរ៉េស បន្ថែមថា សម្រាប់ពេលនេះ មន្រ្តីអង្គការសហប្រជាជាតិនៅទីក្រុងកាប៊ុល បានទាក់ទងយ៉ាងជិតស្និទ្ធជាមួយក្រុមតាលីបង់។ប្រមុខអង្គការសហប្រជាជាតិរូបនេះបានសង្កត់ធ្ងន់ថា បំណងប្រាថ្នារបស់ក្រុមតាលីបង់សម្រាប់ការទទួលស្គាល់ជាអន្តរជាតិ គឺជាកម្លាំងចលករតែមួយគត់របស់ក្រុមប្រឹក្សាសន្តិសុខ ក្នុងការដាក់សម្ពាធលើរដ្ឋាភិបាលរួម និងការគោរពសិទ្ធិមនុស្ស ជាពិសេសចំពោះស្ត្រីនៅក្នុងប្រទេសអាហ្វហ្គានីស្ថាន។ បើតាមអ្នកការពារសិទ្ធិមនុស្សរបស់អង្គការសហប្រជាជាតិ វិបត្តិជំនួយនៅក្នុងប្រទេសអាហ្វហ្គានីស្ថានកាន់តែយ៉ាប់ យ៉ឺនយ៉ាងឆាប់រហ័ស ដោយមានប្រជាជនចំនួន ១២,២ លាននាក់គ្មានសុវត្ថិភាពស្បៀងអាហារ។ខណៈមនុស្សរាប់ពាន់នាក់ត្រូវបានគេរាយការណ៍ថា កំពុងភៀសខ្លួន ឬប៉ុនប៉ងរត់ឆ្លងកាត់អាកាសយានដ្ឋានក្រុងកាប៊ុល នោះ ការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិ (OCHA) បញ្ជាក់ថា មនុស្ស៧៣ម៉ឺន៥ពាន់នាក់បានវិលត្រឡប់មកប្រទេសវិញនៅឆ្នាំនេះពីប្រទេសអ៊ីរ៉ង់ ប៉ាគីស្ថាន និងប្រទេសដទៃទៀត ហើយកំពុងត្រូវការជំនួយបន្ទាន់នៃជំនួយមនុស្សធម៌។ ចំនែកឯមនុស្ស៥៥ម៉ឺននាក់ផ្សេងទៀតបានផ្លាស់ទីលំនៅក្នុងប្រទេសចាប់តាំងពីខែមករាមក៕ ប្រភព៖ CGTN & ស៊ីនហួរ

អាមេរិក៖ ប្រធានាធិបតីអាមេរិកលោក ចូ បៃដិន បានធ្វើកិច្ចសន្ទនាគ្នាតាមទូរស័ព្ទជាមួយសមភាគីបារាំងរបស់លោក គឺលោក អេម៉ានុយអែល ម៉ាក្រុង ស្ថិតក្នុងគោលបំណងពិភាក្សាអំពីការវិវត្តថ្មីៗនៅក្នុងប្រទេសអាហ្វហ្គានីស្ថាន។ លោក បៃដិន និងលោក ម៉ាក្រុង បានកត់សម្គាល់ពីសារៈសំខាន់នៃការបន្តការសម្របសម្រួលយ៉ាងជិតស្និទ្ធ ក្នុងចំណោមសម្ព័ន្ធមិត្ត និងដៃគូរប្រជាធិបតេយ្យស្តីពីប្រទេសអាហ្វហ្គានីស្ថាន រួមទាំងតាមរយៈវេទិកាពហុភាគីស្តីពីការផ្តល់ជំនួយមនុស្សធម៌ និងការគាំទ្រដល់ជនភៀសខ្លួន។ កិច្ចពិភាក្សារបស់មេដឹកនាំប្រទេសទាំងពីរបានកើតមានឡើងបន្ទាប់ពីលោក បៃដិន បានថ្លែងប្រាប់ទូរទស្សន៍ ABC News នៅក្នុងសប្តាហ៍នេះថា នឹងអោយកងទ័ពអាមេរិកបន្តស្ថិតនៅលើទឹកដីអាហ្វហ្គានីស្ថាន រហូតទាល់តែពលរដ្ឋអាមេរិកទាំងអស់ត្រូវបានជម្លៀសចេញ ដែលនេះមានន័យថា ទោះជាត្រូវរក្សាទុកកងទ័ពអាមេរិកលើសពេលកំណត់ដកចេញត្រឹមថ្ងៃទី៣១ ខែសីហានេះក៏ដោយ។ រហូតមកទល់ពេលនេះ កងទ័ពអាមេរិក១ម៉ឺន៥ពាន់នាក់កំពុងបន្តស្ថិតនៅក្នុងទឹកដីរបស់អាហ្វហ្គានីស្ថាន ក្រោយក្រុមតាលីបង់ឡើងគ្រប់គ្រងប្រទេសនេះកាលពីចុងសប្ដាហ៍មុន ហើយបើតាមការគ្រោងទុកនោះ កងទ័ពអាមេរិកទាំងអស់នឹងត្រូវដកចេញឱ្យបានមុនថ្ងៃទី៣០ ខែសីហានេះ ពោលគឺធ្វើយ៉ាងណាឱ្យបានមុនខួបមហាភេរវកម្មថ្ងៃទី១១ ខែកញ្ញា ឆ្នាំ២០០១៕ ប្រភព៖ CGTN

អន្តរជាតិ៖ ប្រធានាធិបតីរុស្ស៊ីលោក វ្លាឌីមៀរ ពូទីន បានធ្វើកិច្ចពិភាក្សាជាមួយសមភាគីបារាំងលោក អេម៉ានុយអែល ម៉ាក្រុង និងនាយករដ្ឋមន្ត្រីអ៊ីតាលីលោក ម៉ារីយ៉ូ ត្រាកហ្គី តាមរយៈប្រព័ន្ធទូរស័ព្ទរៀងៗខ្លួននៅថ្ងៃព្រហស្បតិ៍សប្តាហ៍នេះ (ម៉ោងក្នុងតំបន់) ដើម្បីជជែកអំពីស្ថានភាពនៅក្នុងប្រទេសអាហ្វហ្គានីស្ថាន។ វិមានក្រឹមឡាំងបាននិយាយនៅក្នុងសេចក្តីប្រកាសព័ត៌មានមួយថា លោក ពូទីននិងលោក ម៉ាក្រុង បានកត់សម្គាល់ពីសារៈសំខាន់នៃការធានាសុវត្ថិភាពរបស់ជនស៊ីវិល និងដោះស្រាយបញ្ហាប្រឈមផ្នែកមនុស្សធម៌។ បន្ថែមលើនេះ មេដឹកនាំប្រទេសទាំងពីរក៏បានបង្ហាញនូវឆន្ទៈជួយបង្កើតសន្តិភាព និងស្ថិរភាពនៅអាហ្វហ្គានីស្ថាន តាមរយៈកិច្ចសហប្រតិបត្តិការ រួមទាំងកិច្ចខិតខំប្រឹងប្រែងក្នុងក្របខ័ណ្ឌក្រុមប្រឹក្សាសន្តិសុខអង្គការសហប្រជាជាតិ និងក្រុមប្រទេស G20 ផងដែរ ៕ ប្រភព៖ CGTN

កាប៊ុល៖ ក្រុម​តា​លី​បង់​បាន​អំពាវនាវ​ទៅ​ក្រុម​អាចារ្យ​អ៊ីស្លាម​នៅ​អា​ហ្វ​ហ្គានី​ស្ថាន​អោយចេញ​ការអំពាវនាវ​សុំ​ឯកភាព​ជាតិ​ នៅ​ពេល​ពួកគេ​ធ្វើ​ការជួបជុំ​បន់ស្រន់​ជា​លើក​​ដំបូង​នៅ​ថ្ងៃ​សុក្រ​នេះ ​ចាប់​តាំងពី​ក្រុម​អ៊ីស្លាម​នេះ ​ឡើង​គ្រប់គ្រងអំណាច​នៅ​អា​ហ្វ​ហ្គានី​ស្ថាន ចំ​ពេល​ផ្ទុះ​ការតវ៉ា​ប្រឆាំង​នឹង​ការក្តោបក្តាប់​អំណាច​របស់​ខ្លួន នៅ​ទីក្រុង​ជាច្រើន​ រួម​ទាំង​រដ្ឋធានី​កា​ប៊ុល ​ផងដែរ​។​ ​ស្រប​ពេលដែល​អា​ហ្វ​ហ្គានី​ស្ថាន​ប្រារព្ធពិធីឯករាជ្យភា​ពរ​បស់​ខ្លួន ​ចេញពី​ការគ្រប់ គ្រង​អង់គ្លេស​នៅ​ឆ្នាំ​១៩១៩ វីដេអូ​ក្នុង​បណ្តាញ​សង្គម​មួយ​បាន​បង្ហាញ​ហ្វូង​មនុស្ស​ប្រុស​ស្រី​គ្រវី​ទង់​ជាតិពណ៌​ខ្មៅ​ក្រហម ​និង​បៃតង​នៅ​​ទីក្រុង​កា​ប៊ុល​។​ ពួក​គេ​ស្រែក​ថា ​ទង់ជាតិ​របស់​យើង… អត្តសញ្ញាណ​របស់​យើង​​។​ នៅ​កន្លែង​ផ្សេងទៀត អ្នក​ប្រឆាំង​តវ៉ា​ថែម​ទាំង​ហែក​ទង់​ពណ៌​ស​របស់ក្រុម​តា​លី​បង់ផងដែរ។ បើតាមសាក្សី​ម្នាក់ មនុស្ស​ជាច្រើន​ត្រូវបាន​សម្លាប់​នៅ​ពេល​ក្រុមសកម្មប្រយុទ្ធ​តា​លីបង់បាញ់​លើ​ហ្វូងមនុស្ស​នៅ​ទីក្រុង​អាសា​ដា​បាត​ភាគ​ខាងជើង។ ​សាក្សី​ម្នាក់​ទៀតក៏បាន​រាយការណ៍​​អំពី​ការ​បាញ់កាំភ្លើង​នៅ​ជិត​ការជួបជុំ​តវ៉ា​មួយ​ក្បែរ​ទីក្រុង​កា​ប៊ុល តែ​ទំនង​ជា​ការបាញ់ទៅលើ​អាកាសប៉ុណ្ណោះ​។ ជុំវិញបញ្ហានេះដែរ ភ្លាមៗនោះអ្នកនាំពាក្យក្រុមតាលីបង់មិនទាន់ធ្វើការឆ្លើយតបនៅឡើយទេ៕ ប្រភព៖ CNA