ថៃ៖ ក្រសួងសុខាភិបាលថៃនៅព្រឹកថ្ងៃសុក្រនេះបានរាយការណ៍ពីការរកឃើញអ្នកឆ្លងជំងឺកូវីដ៩ថ្មីៗចំនួន១ម៉ឺន៤ពាន់៥៧៥ករណី និងស្លាប់១១៤នាក់បន្ថែមទៀតនៅក្នុងរយៈពេល២៤ម៉ោងចុងក្រោយនេះ ។ នៅក្នុងចំណោមការឆ្លងជំងឺកូវីដ១៩ថ្មីៗទាំងអស់ខាងលើនេះ មាន១ម៉ឺន៣ពាន់៥០៣ករណីជាប្រជាជនទូទៅ និង ១ពាន់៧២ករណីទៀតជាអ្នកទោសក្នុងពន្ធនាគារ ។ ហើយនៅក្នុងរយៈពេល២៤ម៉ោងចុងក្រោយនេះ ក៏មានអ្នកជំងឹកូវីដចំនួន៧ពាន់៧៧៥នាក់បានជាសះស្បើយ និង ត្រូវបានអនុញ្ញាតអោយចាកចេញពីមន្ទីរពេទ្យផងដែរ ។ គួរកត់សម្គាល់ ចាប់តាំងពីជំងឺរាតត្បាតផ្ទុះឡើងកាលពីដើមឆ្នាំមុនមក នៅទូទាំងប្រទេសថៃមានអ្នកឆ្លងជំងឺកូវីដ១៩សរុប៤៦ម៉ឺន៧ពាន់៧០៧ករណី ក្នុងនោះមាន៣២ម៉ឺន១៥២នាក់បានជាសះស្បើយ ។ ចំណែកអ្នកស្លាប់ក្នុងរលកទី៣ មានចំនួន៣ពាន់៧១៧នាក់ ធ្វើអោយអ្នកស្លាប់សរុបចាប់តាំងពីរោគរាតត្បាតផ្ទុះឡើងកាលពីដើមឆ្នាំមុនមក កើនឡើងដល់៣ពាន់៨១១នាក់ ៕ ប្រភព៖ Bangkok Post

វៀតណាម៖ ក្រសួងសុខាភិបាលវៀតណាមបានរាយការណ៍ពីការរកឃើញអ្នកឆ្លងជំងឺកូវីដ១៩ថ្មីៗចំនួន៣ពាន់១៩៩ករណីបន្ថែមទៀតកាលពីយប់ថ្ងៃព្រហស្បតិ៍សប្តាហ៍នេះ ធ្វើអោយចំនួនករណីឆ្លងសរុបប្រចាំថ្ងៃឈានដល់កម្រិតបំបែកកំណត់ត្រាថ្មី៦ពាន់១៦៤ករណី ។ ក្នុងចំណោមករណីឆ្លងថ្មីៗទាំងអស់ខាងលើនេះ មានករណីឆ្លងចំនួន១ពាន់៧៨៥ត្រូវបានកត់ត្រានៅក្នុងទីក្រុងហូជីមិញ ៦១៥ករណីនៅទីក្រុង Binh Duong ​១៥៧ករណីនៅទីក្រុង Dong Nai ១៩៩ករណីនៅទីក្រុង Long An និង ៦៣ករណីនៅទីក្រុង Ba Ria-Vung Tau ។ គិតមកទល់ពេលនេះ ប្រទេសវៀតណាមបានកត់ត្រាករណីឆ្លងក្នុងសហគមន៍ចំនួន៧ម៉ឺន៦២១ករណីនៅក្នុង៦១ខេត្ត-ក្រុង ចាប់តាំងពីរលកទី៤ វាយប្រហារកាលពីចុងខែ ខែមេសាមក ។ ដោយឡែកអ្នកជំងឺចំនួន១ពាន់៤៥០នាក់បានជាសះស្បើយ ហើយអនុញ្ញាតអោយចាកចេញពីមន្ទីរពេទ្យនៅថ្ងៃព្រហស្បតិ៍ម្សិលមិញ ដោយធ្វើអោយចំនួនអ្នកជាសះស្បើយសរុបចាប់តាំងពីរោគរាតត្បាតផ្ទុះឡើង កើនឡើងដល់១ម៉ឺន៣ពាន់៤២១ករណី ៕ ប្រភព៖ VNExpress

ចិន៖ មន្រ្តីក្រសួងពាណិជ្ជកម្មចិនម្នាក់បានអោយដឹងថា ចិនបានផ្តល់ជំនួយវ៉ាក់សាំង Covid-19 ប្រមាណជាង៦០០លានដូសហើយ ជូនដល់ប្រទេស និងតំបន់ជាង២០០នៅទូទាំងពិភពលោក ដើម្បីគាំទ្រដល់ការប្រយុទ្ធជាសកលប្រឆាំងវីរុសក៏កាចសាហាវមួយនេះ ។ មន្ត្រីក្រសួងពាណិជ្ជកម្មចិន លោក Li Xingqian បាននិយាយថា គិតមកទល់ពេលនេះ ចិនក៏បានផ្តល់ជំនួយម៉ាសជាង៣០០ពាន់លានម៉ាស និងឧបករណ៍ធ្វើតេស្តចំនួន៤.៨ពាន់លានគ្រឿងដល់ប្រទេស និងតំបន់នៅទូទាំងពិភពលោកផងដែរ ។ បើតាមមន្ត្រីក្រសួងពាណិជ្ជកម្មចិនរូបនេះ បើទោះបីមានការរំខានដោយសារជំងឺកូវីដ១៩ក៏ដោយ ក៏ប្រទេសចិនបានធ្វើការផ្លាស់ប្តូរយ៉ាងឆាប់រហ័ស ដើម្បីផ្គត់ផ្គង់ឧបករណ៍វេជ្ជសាស្រ្ត និងផលិតផលផ្សេងទៀតទៅកាន់ពិភពលោក ដែលជាការរួមចំណែកដល់កិច្ចប្រឹងប្រែងប្រឆាំងនឹងជំងឺរាតត្បាតជាសកល ៕ ប្រភព៖ ស៊ីនហួរ

បារាំង៖ នាយករដ្ឋមន្រ្តីបារាំងលោក Jean Castex បានគូសបញ្ជាក់ថា ស្ទើរតែមនុស្សគ្រប់គ្នានៅក្នុងប្រទេសបារាំង ដែលធ្វើតេស្តរកឃើញវិជ្ជមានជំងឺកូវីដ១៩ គឺអ្នកមិនទាន់ទទួលបានការចាក់វ៉ាក់សាំង ។ការអះអាងបែបនេះរបស់លោក Jean Castex ត្រូវបានធ្វើឡើងនៅក្នុងបទសម្ភាសន៍មួយផ្សាយផ្ទាល់តាមកញ្ចក់ទូរទស្សន៍រដ្ឋកាលពីថ្ងៃពុធសប្តាហ៍នេះ (ម៉ោងក្នុងតំបន់) ដោយលោកបានប្រាប់វិទ្យុបារាំង TF1 ថា រលកទី៤នៃការជំងឺកូវីដ១៩គឺនៅទីនេះ (ប្រទេសបារាំង)… ហើយវាច្បាស់ណាស់គឺនៅទីនេះ និងថា វីរុសបម្លែងថ្មី Delta ដែលមានប្រភពដើមនៅឥណ្ឌា គឺជាកក្តាជំរុញដ៏ធំបំផុតមួយសម្រាប់ករណីឆ្លងថ្មីៗ ។លោកបានសង្កត់ធ្ងន់ថា ៩៦ភាគរយនៃករណីឆ្លងជំងឺកូវីដ១៩ថ្មីៗចំនួន១ម៉ឺន៨ពាន់ករណីនៅក្នុងសប្តាហ៍នេះ ដោយក្នុងចំណោមករណីទាំងអស់ដែលយើងរកឃើញ ភាគច្រើនគឺប្រជាជនដែលមិនបានទទួលការចាក់វ៉ាក់សាំងការពារ ៕ ប្រភព៖ CGTN