បរទេស៖ ក្រុមអ្នកស្រាវជ្រាវដែលមានទំនាក់ទំនងជាមួយសកលវិទ្យាល័យ Pennsylvania បានរកឃើញថា ថ្នាំ diABZI មានប្រសិទ្ធភាពខ្ពស់ ក្នុងការការពាររោគសញ្ញាធ្ងន់ធ្ងរនៃជំងឺកូវីដ១៩ ក្នុងការធ្វើតេស្តជាមួយសត្វកណ្តុរដែលឆ្លងវីរុស SARS-CoV-2 បំប្លែងខ្លួនច្រើនប្រភេទ ។ក្រុមអ្នកស្រាវជ្រាវបានរកឃើញថា សត្វកណ្តុរមានផ្ទុកជំងឺកូវីដ១៩ចំនួន១២៩ក្បាល ត្រូវបានគេព្យាបាលជាមួយថ្នាំ diABZI ។ នៅពេលប្រៀបធៀបជាមួយក្រុមផ្សេង សត្វកណ្តុរដែលត្រូវបានព្យាបាលដោយថ្នាំនេះ ត្រូវបានគេមើលឃើញថា មានការសម្រកទម្ងន់តិច និងផ្ទុកវីរុសទាប ។យ៉ាងណាមិញ ថ្នាំ DiABZI មិនទាន់ត្រូវបានអនុម័តដោយរដ្ឋបាលចំណីអាហារ និងឱសថអាមេរិក (FDA) ឬភ្នាក់ងារសុខភាពកាណាដានៅឡើយទេ ប៉ុន្តែក្រុមអ្នកវិទ្យាសាស្រ្តនិយាយថា ថ្នាំនេះអាចមានប្រសិទ្ធភាពប្រឆាំងនឹងវីរុសផ្លូវដង្ហើមជាច្រើនប្រភេទ ដូចជាជំងឺផ្តាសាយធម្មតា និងវីរុសគ្រុនផ្តាសាយបក្សីផងដែរ ៕ ប្រភព៖ CTV NEWS

ម៉ាឡេស៊ី៖ រដ្ឋាភិបាលម៉ាឡេស៊ីប្រកាសថា រាល់ផ្សារទំនើបទាំងអស់នឹងត្រូវបិទទ្វារ ស្របពេលដែលវិស័យសេវាកម្មចាំបាច់ចំនួន១៧ ប៉ុណ្ណោះ ដែលនឹងត្រូវបានអនុញ្ញាតអោយដំណើរការធម្មតាក្នុងកំឡុងពេលពីរសប្តាហ៍ខាងមុខនេះ ។ រដ្ឋាភិបាលម៉ាឡេស៊ីក៏នឹងអនុញ្ញាតអោយក្រុមហ៊ុនក្រោមវិស័យឧស្សាហកម្មចំនួន១២បន្តប្រតិបត្តិការផងដែរ ដូចជារោងចក្រផលិតចំណីអាហារ និងភេសជ្ជៈ ឧបករណ៍វេជ្ជសាស្ត្រ វាយនភ័ណ្ឌ និងប្រេងឧស្ម័ន ។ វិស័យទាំងនេះ នឹងត្រូវបើកប្រតិបត្តិការតែ៦០ភាគរយ ។ ការប្រកាសនៅថ្ងៃអាទិត្យម្សិលមិញនេះបានធ្វើឡើង បន្ទាប់ពីការិយាល័យរបស់នាយករដ្ឋមន្រ្តីម៉ាឡេស៊ីបានប្រកាសកាលពីថ្ងៃសុក្រសប្តាហ៍នេះថា ម៉ាឡេស៊ីនឹងត្រូវអនុវត្តវិធានការបិទខ្ទប់ទាំងស្រង់នៅទូទាំងប្រទេស ដោយចាប់ផ្តើមពីថ្ងៃទី១ ខែមិថុនារហូតដល់ថ្ងៃទី១៤ ខែមិថុនាខាងមុខនេះ ៕ ប្រភព៖ CNA

វៀតណាម៖ អាជ្ញាធរក្រុងហូជីមិញ របស់វៀតណាម នឹងអនុវត្តវិធានការបិទខ្ទប់តំបន់មួយចំនួន និងវិធានការរក្សាគម្លាតសុវត្ថិភាពនៅតាមតំបន់ផ្សេងទៀតក្នុងទីក្រុង រយៈពេល១៤ថ្ងៃ ឬពីរសប្តាហ៍ ដោយចាប់ផ្តើមពីម៉ោង០០ថ្ងៃចន្ទដើមសប្តាហ៍នេះ ក្រោមសារាចរណ៍ណែនាំរបស់រដ្ឋាភិបាល ។ សេវាកម្មមិនចាំបាច់នានា ក៏ដូចជាសកម្មភាពកំសាន្ត និងកីឡាផ្សេងៗនៅតាមទីសាធារណៈនឹងត្រូវហាមឃាត់ ។ ការប្រមូលផ្តុំនៅតាមទីសាធារណៈ ដែលមានមនុស្សលើសពីប្រាំនាក់ នឹងត្រូវហាមឃាត់ ។ ចំណែកឯព្រឹត្តិការណ៍នានា និងការប្រជុំគ្នាក្នុងបន្ទប់តែមួយដែលមានមនុស្សជាង២០ ក៏មិនត្រូវបានអនុញ្ញាតដែរ ។ ប្រជាជនត្រូវរក្សាគម្លាតពីគ្នាចម្ងាយ ២ម៉ែតនៅទីសាធារណៈ ហើយការធ្វើដំណើរពីតំបន់ដែលរងការវាយប្រហារដោយសារកូវីដ១៩ធ្ងន់ធ្ងរ ក៏នឹងត្រូវបានកំណត់ផងដែរ ។ ទន្ទឹមនឹងនេះ សារាចរលេខ១៦ របស់រដ្ឋាភិបាលវៀតណាម ដែលសំដៅអនុវត្តចំពោះតំបន់ Gấp និង ThạnhLộc សង្កាត់ទី១២ ជាពិសេសនោះ គឺតម្រូវឲ្យប្រជាជនស្នាក់នៅតែក្នុងផ្ទុះ លើកលែងតែករណីចំបាច់បំផុតប៉ុណ្ណោះ ៕ ប្រភព៖ CNA