-
កូវីដ១៩៖ នាយករដ្ឋមន្ត្រីវៀតណាមឲ្យពន្លឿនចាក់វ៉ាក់សាំង ក្រោយបាន AstraZeneca ឈុតដំបូង
ក្រោយពេលវ៉ាក់សាំងបង្ការជំងឺកូវីដ១៩ ឈុតដំបូង ត្រូវបានដឹកជញ្ជូនមកដល់ប្រទេស កាលពីថ្ងៃទី២៤ កុម្ភៈ ២០២១ នាយករដ្ឋមន្ត្រីវៀតណាម Nguyễn Xuân Phúc បានប្រកាសជំរុញឲ្យចាក់វ៉ាក់សាំងឲ្យបានលឿន ជាការអំពាវនាវ ក្នុងពេលដឹកនាំកិច្ចប្រជុំគណៈកម្មាធិការជាតិគ្រប់គ្រងជំងឺកូវីដ១៩ ភ្លាមៗក្រោយពេលវ៉ាក់សាំងមកដល់។ គួរបញ្ជាក់ថា ម្សិលមិញនេះ យន្តហោះមួយគ្រឿងបានដឹកជញ្ជូនវ៉ាក់សាំង AstraZeneca ចំនួន១១៧៦០០ដូស មកដល់ក្រុងហូជីមីញ ចុះចតនៅចំណតអាកាសយានដ្ឋាន Tân Sơn Nhất ។ វ៉ាក់សាំងអង់គ្លេសនេះត្រូវបានបញ្ជាទិញក្នុងតម្លៃ៥២ម៉ឺនដុល្លារអាមេរិក ពីក្រុមហ៊ុនផលិតនៅកូរ៉េខាងត្បូង៕
-
ក្រុមហ៊ុន Facebook បិទគណនីយទាំងអស់ដែលជាប់ពាក់ព័ន្ធនឹងយោធាមីយ៉ាន់ម៉ា និងការផ្សាយពាណិជ្ជកម្មរបស់ក្រុមហ៊ុនដែលយោធាគ្រប់គ្រង
មីយ៉ាន់ម៉ា៖ ក្រុមហ៊ុនបណ្តាញសង្គមយក្ស Facebook នៅថ្ងៃព្រហស្បតិ៍នេះប្រកាសថា ខ្លួនបាននិងកំពុងហាមឃាត់រាល់គណនីយទាំងអស់ ដែលភ្ជាប់ទៅនឹងរបបយោធាមីយ៉ាន់ម៉ា ព្រមទាំងការផ្សាយពាណិជ្ជកម្មរបស់ក្រុមហ៊ុនដែលគ្រប់គ្រងដោយយោធា បន្ទាប់ពីមានការដណ្តើមអំណាចរបស់កងទ័ពកាលពីថ្ងៃទី០១ ខែកុម្ភៈ ។ ក្រុមហ៊ុន Facebook បានបញ្ជាក់នៅក្នុងសេចក្តីថ្លែងមួយថា ខ្លួនកំពុងចាត់ទុកស្ថានភាព ក្រោយរដ្ឋប្រហារនៅក្នុងប្រទេសមីយ៉ាន់ម៉ាថា ជា “ភាពអាសន្ន” ដោយពន្យល់ថា ការហាមឃាត់នេះ ត្រូវបានដាក់បញ្ចូលដោយសារព្រឹត្តិការណ៍វិវត្តន៍ចុងក្រោយនេះ ចាប់តាំងពីការធ្វើរដ្ឋប្រហារ រួមទាំងការប្រព្រឹត្តអំពើហិង្សាដ៏ប្រល័យ ។ បើតាមក្រុមហ៊ុន Facebook ខ្លួនក៏បានហាមឃាត់រាល់គណនីយដែលពាក់ព័ន្ធនឹង យោធាមីយ៉ាន់ម៉ាជាច្រើនរួចទៅហើយដែរ ចាប់តាំងពីផ្ទុះរដ្ឋប្រហារ ក្នុងនោះរួមទាំងការចូលគ្រប់គ្រងទូរទស្សន៍ Myawaddy TV និង ស្ថានីយ៍ទូរទស្សន៍រដ្ឋ MRTV ។ មិនតែប៉ុណ្ណោះ ហាមឃាត់ខាងលើនេះក៏បានចាប់ផ្តើមធ្វើឡើងនៅក្នុងបណ្តាញសង្គម Instagram ដែលជាក្រុមហ៊ុនកម្មសិទ្ធិរបស់ Facebook ផងដែរ ៕ ប្រភព៖ AP
-
ជប៉ុនកំពុងពិចារណាព្យួរជំនួយអភិវឌ្ឍសម្រាប់ប្រទេសមីយ៉ាន់ម៉ា ចំពេលដែលលោកខាងលិចបានដាក់ទណ្ឌកម្មលើរបបយោធា
ជប៉ុន៖ សារព័ត៌មាន Asahi Shimbun daily បានចុះផ្សាយនៅថ្ងៃព្រហស្បតិ៍នេះថា ជប៉ុនបាននិងកំពុងរៀបចំផែនការចុងក្រោយ ដើម្បីផ្អាកជំនួយអភិវឌ្ឍថ្មីសម្រាប់ប្រទេសមីយ៉ាន់ម៉ា ចំពេលដែលសម្ព័ន្ធមិត្តលោកខាងលិចបាននាំគ្នាដាក់ទណ្ឌកម្ម ក៏ដូចជាគំរាមចាត់វិធានការប្រឆាំងនឹងរដ្ឋប្រហារយោធានៅក្នុងប្រជាជាតិអាស៊ីអាគ្នេយ៍មួយនេះ ។ ដោយផ្អែកលើប្រភពជាច្រើនពីរដ្ឋាភិបាលនោះ សារព័ត៌មានខាងលើនេះបានរាយការណ៍ថា រដ្ឋាភិបាលជប៉ុននឹងមិនបដិសេដចំពោះការហៅការព្យួរជំនួយអភិវឌ្ឍផ្លូវការ (ODA) ថា ជាដាក់ទណ្ឌកម្មនោះទេ ប៉ុន្តែនឹងព្យាយាមបញ្ចុះបញ្ចូលរបបយោធាមីយ៉ាន់ម៉ាអោយឈានដល់ដំណោះស្រាយបែបប្រជាធិបតេយ្យ តាមរយៈកិច្ចពិភាក្សាគ្នា ។ នៅពេលត្រូវបានសាកសួរពីបញ្ហាខាងលើនេះ ប្រធានលេខាធិការគណៈរដ្ឋមន្រ្តីជប៉ុនលោក កាស៊ុណុប៊ុ កាតុ បាននិយាយថា មិនមានសេចក្តីរាយការណ៍ពិតប្រាកដចំពោះរបាយការណ៍នេះនោះទេ ប៉ុន្តែបានបើកចំហរលទ្ធភាព នៃការផ្លាស់ប្តូរគោលនយោបាយ ។ លោក កាតុ បានថ្លែងក្នុងសន្និសិទសារព័ត៌មានមួយថា យោងតាមជំនួយសេដ្ឋកិច្ចសម្រាប់ប្រទេសមីយ៉ាន់ម៉ា… យើងនឹងតាមដានស្ថានភាពដោយប្រុងប្រយ័ត្នដោយគ្មានការរើសអើង និងពិចារណាពីជំរើស ។ ជាមួយគ្នានេះ សារព័ត៌មានជប៉ុន ខ្យូដូ ក៏បានចុះផ្សាយដែរថា រដ្ឋាភិបាលបាននិងកំពុងពិចារណាលើការផ្អាកជំនួយថ្មីនេះ ៕ ប្រភព៖ Reuters
-
ប្រធានាធិបតីចិនប្រកាសពីជោគជ័យជាប្រវត្តិសាស្រ្ត ក្នុងយុទ្ធនាការលុបបំបាត់ភាពក្រីក្រ
ចិន៖ ប្រធានាធិបតីចិនលោក ស៊ី ជីនពីង នៅថ្ងៃព្រហស្បតិ៍នេះប្រកាសថា ចិន បានទទួលភាពជោគជ័យជាប្រវត្តិសាស្រ្ត ចំពោះកិច្ចខិតខំប្រឹងប្រែងលុបបំបាត់ភាពក្រីក្រ ខណៈការប្រកាសនេះ ធ្វើឡើងអំឡុងពេលថ្លែងទៅកាន់កិច្ចប្រជុំដ៏ធំមួយក្នុងទីក្រុងប៉េកាំង ដើម្បីកត់សម្គាល់អំពីសមិទ្ធផលរបស់ប្រទេសជាតិ ក្នុងការកាត់បន្ថយភាពក្រីក្រ ។ ប្រទេសចិន ដែលមានលោក ស៊ី ជិនពីង ជាអគ្គលេខាធិការ នៃគណៈកម្មាធិការមជ្ឈិមបក្សកុម្មុយនីស្តចិន និងជាប្រធានគណៈកម្មាធិការមជ្ឈិមយោធាផងដែរនោះ ក្នុងរយៈពេល០៨ឆ្នាំកន្លងទៅនេះ ប្រជាជនក្រីក្រប្រមាណ៩៨.៩៩លាននាក់ចុងក្រោយ ដែលរស់នៅតាមជនបទ ត្រូវបានគេដកចេញពីបញ្ជីភាពក្រីក្រហើយ គិតត្រឹមដើមឆ្នាំ២០២១នេះ ខណៈស្រុកក្រីក្រចំនួន៨៣២ និងភូមិក្រីក្រចំនួន ១២ម៉ឺន៨ពាន់ក៏ត្រូវបានដកចេញពីបញ្ជីនៃភាពក្រីក្រដែរ ។ ទន្ទឹមគ្នា ប្រទេសចិនក៏បានចូលរួមចំណែកជាង៧០ភាគរយ នៃការកាត់បន្ថយភាពក្រីក្រនៅទូទាំងពិភពលោកក្នុងរយៈពេលដូចគ្នានេះដែរ ហើយជាមួយនឹងសមិទ្ធផលទាំងនេះ ចិនបានបង្កើតអព្ភូតហេតុមួយដែលនឹងត្រូវចារទុកក្នុងប្រវត្តិសាស្ត្រ ៕ ប្រភព៖ Reuters
-
មជ្ឈមណ្ឌលបង្ការ និងគ្រប់គ្រងជំងឺឆ្លងអាមេរិកបញ្ជាក់ថា វ៉ាក់សាំងជាង៦៦.៥លានដូសត្រូវបានចាក់ជូនដល់ប្រជាជនរួចរាល់ហើយ
អាមេរិក៖ សហរដ្ឋអាមេរិកបានចាក់វ៉ាក់សាំងការពារជំងឺ COVID-19 ប្រមាណ ៦៦លាន៤៦ម៉ឺន៤ពាន់៩៤៧ដូសជូនដល់ប្រជាជនរបស់ខ្លួន គិតត្រឹមព្រឹកថ្ងៃពុធនេះ (ម៉ោងក្នុងតំបន់) នៅក្នុងចំណោមវ៉ាក់សាំងដែលបានចែកចាយសរុប៨៨លាន៦៦ម៉ឺន៩ពាន់៣៥ដូស ។ វ៉ាក់សាំងទាំងអស់ខាងលើនេះ គឺជាសុទ្ធតែជាផលិតផលរបស់ក្រុមហ៊ុន ម៉ូឌែណា និង ភីហ្វីហ្សឺ-បាយអូអិនធិច ហើយបើតាមអាជ្ញាធរសុខាភិបាលអាមេរិកនោះ ប្រជាជនជាង៤៥លាននាក់បានទទួលការចាក់វ៉ាក់សាំងការពារជំងឺ COVID-19 សម្រាប់ដូសដំបូង ក្នុងចំណោមនោះ អ្នកខ្លះក៏ទទួលបាន០២ដូសរួចហើយដែរ ខណៈប្រជាជនជាង២០លាន៦០ម៉ឺន៧ពាន់២៦១នាក់ទៀត ក៏បានទទួលការចាក់ ០២ដូចរួចរាល់ហើយដែរ គិតត្រឹមថ្ងៃពុធសប្តាហ៍នេះ ។ ទន្ទឹមគ្នា អាជ្ញាធរសុខាភិបាលអាមេរិកក៏បានបញ្ជាក់ដែរថា វ៉ាក់សាំងការពារជំងឺ COVID-19 ប្រមាណ៦លាន៧២ម៉ឺន៤ពាន់៣១០លានដូសទៀត ក៏ត្រូវបានបញ្ជូនទៅកាន់មណ្ឌលថែទាំសុខភាពរយៈពេលវែងផងដែរ ៕ ប្រភព៖ Reuters
-
រដ្ឋបាលលោក ចូ បៃដិន នឹងចែកចាយម៉ាសការពារប្រមាណជាង២៥លានដល់ប្រជាជនអាមេរិក
អាមេរិក៖ សេតវិមានបានបញ្ជាក់នៅថ្ងៃពុធនេះថា រដ្ឋបាលប្រធានាធិបតីអាមេរិកលោក ចូ បៃដិន នឹងធ្វើការផ្តល់ជូនម៉ាសការពារជាង២៥លានម៉ាសទៅអោយមជ្ឈមណ្ឌលសុខាភិបាលសហគមន៍ ហាងលក់ម្ហូបអាហារ និងស៊ុប នៅនិទាឃរដូវខាងមុខ ដែលនេះជាផ្នែកមួយរបស់ខ្លួន ដើម្បីប្រយុទ្ធប្រឆាំងនឹងការឆ្លងរាតត្បាតនៃវីរុស Covid-19 ។ អាជ្ញាធរសុខាភិបាលអាមេរិកបានណែនាំអោយពាក់ម៉ាសការពារ ដែលវាជាវិធានការដ៏សំខាន់មួយ ក្នុងការជួយកាត់បន្ថយអត្រាឆ្លងរាលដាលនៃជំងឺ Covid-19 ដោយសេតវិមានបានបញ្ជាក់ថា ជនជាតិអាមេរិកដែលមានប្រាក់ចំណូលទាបនៅតែមិនមានម៉ាសការពារ ។ បើតាមផែនការនោះ រដ្ឋាភិបាលអាមេរិកនឹងផ្តល់ជូនម៉ាសការពារទៅដល់មជ្ឈមណ្ឌលសុខាភិបាលសហគមន៍ប្រមាណជាង១ពាន់៣រយកន្លែង ហាងលក់ម្ហូបអាហារ និង ស៊ុបចំនួន៦ម៉ឺនកន្លែងនៅចន្លោះខែមិនា ដល់ខែឧសភាខាងមុខ នេះបើតាមការបញ្ជាក់របស់សេតវិមាន ខណៈផែនការចែកចាយម៉ាសការពារខាងលើ ត្រូវបានគេរំពឹងថា នឹងទៅដល់ដៃប្រជាជនអាមេរិកចន្លោះពី១២លានទៅ១៥លាននាក់ ៕ ប្រភព៖ Reuters
-
សហរដ្ឋអាមេរិក និងអង្គការសិទ្ធិមនុស្សរិះគន់ម៉ាឡេស៊ី ចំពោះការបញ្ជូនជនជាតិមីយ៉ាន់ម៉ាជាងមួយពាន់នាក់អោយទៅរបបយោធា
អាមេរិក៖ រដ្ឋាភិបាលក្រុងវ៉ាស៊ីនតោនបានដឹកនាំការរិះគន់លើម៉ាឡេស៊ីចំពោះការបញ្ជូនជនជាតិមីយ៉ាន់ម៉ាជាង១ពាន់នាក់ ត្រឡប់ទៅកាន់ប្រទេសដែលគ្រប់គ្រងដោយយោធារបស់ពួកគេវិញ ដោយផ្គើនទៅនឹងសេចក្តីបង្គាប់របស់តុលាការ ។ ជាមួយគ្នានេះ ក្រុមអង្គការសិទ្ធិមនុស្សបានរិះគន់យ៉ាងខ្លាំង ចំពោះផែនការនេះ ហើយនៅប៉ុន្មានម៉ោងមុនការនិរទេសចេញនេះ តុលាការកំពូលទីក្រុងគូឡាឡាំពួបានបង្គាប់ឱ្យបញ្ឈប់ការនិរទេសនេះជាបណ្តោះអាសន្ន ដើម្បីអនុញ្ញាតឱ្យមានតស៊ូផ្នែកច្បាប់ពីក្រុមសកម្មជន ។ ជនចំណាកស្រុក ដែលសកម្មជននិយាយថា រួមមានទាំងអ្នកស្វែងរកសិទ្ធិជ្រកកោនងាយរងគ្រោះផងនោះ បានចាកចេញកាលពីថ្ងៃអង្គារសប្តាហ៍នេះ តាមនាវាកងទ័ពជើងទឹកមីយ៉ាន់ម៉ា ពីមូលដ្ឋានយោធាម៉ាឡេស៊ី ពោលគឺប៉ុន្មានសប្តាហ៍ក្រោយរដ្ឋប្រហារកាលពីថ្ងៃទី០១ ខែកុម្ភៈកន្លងទៅនេះ ។ ទោះជាយ៉ាងណាក៏ដោយ ក្រុមមន្ត្រីម៉ាឡេស៊ីនមិនបានផ្តល់ការពន្យល់ អំពីមូលហេតុដែលពួកគេមិនអើពើនឹងសេចក្តីបង្គាប់របស់តុលាការ និងការបញ្ជូនជនចំណាកស្រុកមីយ៉ាន់ម៉ាចំនួន១ពាន់៨៦នាក់ត្រឡប់ទៅកាន់ប្រទេសពួកគេវិញនោះទេ ៕ ប្រភព៖ AFP
-
រដ្ឋមន្រ្តីការបរទេសរបស់យោធាមីយ៉ាន់ម៉ាជួបពិភាក្សាជាមួយសមភាគីថៃ និងឥណ្ឌូនេស៊ី
ថៃ៖ រដ្ឋមន្រ្តីការបរទេសរបស់យោធាមីយ៉ាន់ម៉ាបានធ្វើទស្សនកិច្ចនៅប្រទេសថៃក្នុងថ្ងៃពុធនេះ នៅពេលដែលប្រទេសមហាអំណាចក្នុងតំបន់បានព្យាយាមសម្របសម្រួលបញ្ចប់ភាពចលាចលរយៈពេលជាង៣សប្តាហ៍កន្លងមកនេះ ដែលបង្កឡើងដោយរដ្ឋប្រហារយោធា ។ រដ្ឋមន្រ្តីការបរទេសមីយ៉ាន់ម៉ាលោក វុនណា មោង ល្វីន បានជួបពិភាក្សាជាមួយសមភាគីថៃ និងឥណ្ឌូនេស៊ី នៅក្នុងជំនួបមួយដែលត្រូវបានគេស្គាល់ជាជំនួបតទល់ជាលើកដំបូងរវាងសមាជិកយោធាជាន់ខ្ពស់ និងរដ្ឋាភិបាលបរទេស ។ កិច្ចប្រជុំនេះធ្វើឡើងបន្ទាប់ពីមានសេចក្តីប្រកាសថា រដ្ឋមន្រ្តីការបរទេសឥណ្ឌូនេស៊ីលោកស្រី រ៉េតណូ ម៉ាស៊ូឌី នឹងមិនទៅធ្វើទស្សនកិច្ចប្រទេសដែលរងការវាយប្រហារដោយរដ្ឋប្រហារនេះភ្លាមៗនោះទេ បើទោះបីជាមានការបែកធ្លាយឯកសារពីខាងមីយ៉ាន់ម៉ា អំពីគម្រោងទស្សនកិច្ចរបស់លោកស្រីក៏ដោយ ។ សូមបញ្ជាក់ថា របបដឹកនាំយោធាមីយ៉ាន់ម៉ាបានប្រឈមមុខនឹងព្យុះថ្កោលទោសអន្តរជាតិ ចំពោះការបណ្តេញមេដឹកនាំស៊ីវិលលោកស្រី អោង សាន ស៊ូជី ចេញពីអំណាចកាលថ្ងៃទី០១ ខែកុម្ភៈកន្លងទៅ ខណៈដែលក្រុមប្រឆាំងនៅមីយ៉ាន់ម៉ាកំពុងតែធ្វើបាតុកម្មតវ៉ាទូទាំងប្រទេសជាប្រចាំថ្ងៃ ៕ ប្រភព៖ AFP
-
រដ្ឋបាលចំណីអាហារ និងឱសថអាមេរិកបញ្ជាក់ថា វ៉ាក់សាំងរបស់ Johnson & Johnson ចាក់តែមួយដូស មានសុវត្ថិភាព និងប្រសិទ្ធភាពប្រឆាំង Covid-19
អាមេរិក៖ មន្រ្តីរដ្ឋបាលចំណីអាហារ និងឱសថអាមេរិក (FDA) បានបញ្ជាក់នៅក្នុងឯកសារដែលត្រូវបានផ្សព្វផ្សាយនៅថ្ងៃពុធនេះថា ការពិនិត្យឡើងវិញដោយនិយតករអាមេរិកលើវ៉ាក់សាំង Covid-19 របស់ក្រុមហ៊ុន Johnson & Johnson ចាក់តែមួយដូសបានរកឃើញថា វ៉ាក់សាំងនេះមានសុវត្ថិភាព និងប្រសិទ្ធភាព ។ របាយការណ៍ខាងលើនេះ បានត្រួសត្រាយផ្លូវអោយក្រុមហ៊ុនផលិតឱសថ Johnson & Johnson ក្លាយជាវ៉ាក់សាំង Covid-19 ទី៣ ដែលត្រូវបានអនុញ្ញាតនៅសហរដ្ឋអាមេរិក ប្រហែលជាក្នុងរយៈពេលប៉ុន្មានថ្ងៃទៀត ខណៈវ៉ាក់សាំនេះ អាចជាជម្រើសមួយដែលមានប្រសិទ្ធិភាពក្រៅពីវ៉ាក់សាំង ភីហ្វីហ្សឺ និង ម៉ូឌែណា ហើយអាចត្រូវបានរក្សាទុកនៅក្នុងទូទឹកកកធម្មតាបាន ។ រដ្ឋបាលចំណីអាហារ និង ឱសថអាមេរិក (FDA) បានសន្និដ្ឋានថា វ៉ាក់សាំងរបស់ក្រុមហ៊ុន Johnson & Johnson មានអត្ថប្រយោជន៍ ក្នុងការកាត់បន្ថយទាំងរោគសញ្ញា និងជំងឺធ្ងន់ធ្ងរ ។ តួយ៉ាងទិន្នន័យបានបង្ហាញថា វ៉ាក់សាំងនេះមានប្រសិទ្ធភាពជាង៨៥ភាគរយក្នុងការការពារជំងឺធ្ងន់ធ្ងរ ប៉ុន្តែមានប្រសិទ្ធិភាពតែ៦៦ភាគរយប៉ុណ្ណោះ នៅពេលដែលករណីកម្រិតមធ្យមត្រូវបានរាប់បញ្ចូល ៕ ប្រភព៖ Reuters
-
វេណេស៊ុយអេឡាប្រកាសបណ្តេញអគ្គរដ្ឋទូតអឺរ៉ុបចេញពីប្រទេស ដែលនេះជាការឆ្លើយតបនឹងការដាក់ទណ្ឌកម្មលើមន្រ្តីខ្លួន១៩រូបនាពេលថ្មីៗ
វេណេស៊ុយអេឡា៖ វេណេស៊ុយអេឡា នៅថ្ងៃពុធនេះ បានបណ្ដេញអគ្គរដ្ឋទូតសហភាពអឺរ៉ុបប្រចាំទីក្រុង ការ៉ាកាស់ ចេញពីប្រទេសខ្លួន ដោយទុករយៈពេល៧២ម៉ោង ដើម្បីជាការឆ្លើយតបទៅនឹងការដាក់ទណ្ឌកម្មលើមន្រ្តីរដ្ឋាភិបាលវេណេស៊ុយអេឡាចំនួន១៩រូបនាពេលថ្មីៗនេះ ។ រដ្ឋមន្ត្រីការបរទេសវេណស៊ុយអេឡា លោក ហ្សក អារៀហ្សា បានប្រកាសពីការបណ្ដេញអគ្គរដ្ឋទូតសហភាពអឺរ៉ុប លោកស្រី អ៊ីហ្សាប៊ែល ប្រ៊ីលហាន់ ផេដ្រូសា ចេញពីប្រទេស តែរយៈពេល០២ថ្ងៃប៉ុណ្ណោះ ក្រោយរដ្ឋមន្ត្រីការបរទេសអឺរ៉ុបឯកភាពគ្នាដាក់ទណ្ឌកម្មមន្ត្រីរដ្ឋាភិបាលវេណេស៊ុយអេឡ១៩រូប សម្រាប់ការចូលរួមបំផ្លាញលទ្ធិប្រជាធិបតេយ្យ ។ ស្របពេលជាមួយគ្នានេះដែរ អ្នកនាំពាក្យសហភាពអឺរ៉ុបលោកស្រី Nabila Massrali បានលើកឡើងថា សហភាពអឺរ៉ុបមានការសោកស្តាយយ៉ាងខ្លាំង ចំពោះការសម្រេចចិត្តបែបនេះ ដែលនឹងនាំអោយមានភាពឯកោអន្តរជាតិបន្ថែមទៀតនៃប្រទេសវេណេស៊ុយអេឡា… យើងអំពាវនាវឱ្យរដ្ឋាភិបាលវេណេស៊ុយអេឡាលុបចោលការសម្រេចចិត្តនេះវិញ ៕ ប្រភព៖ AFP