សហរដ្ឋអាម៉េរិក៖ សេតវិមានសហរដ្ឋអាម៉េរិកបានលើកឡើងនៅថ្ងៃសុក្រសប្តាហ៍នេះថា ខ្លួននឹងប្រគល់ប័ណ្ណសម្គាល់ខ្លួនជាបណ្តោះអាសន្នដល់អ្នកយកព័ត៌មាន CNNលោក ជីម អាខូស្តា ដើម្បីឆ្លើយតបទៅនឹងបទបញ្ជារបស់ចៅក្រមសហព័ន្ធ។ ចៅក្រមសហព័ន្ធនៅថ្ងៃសុក្រម្សិលមិញ បានចេញបញ្ជាឲ្យរដ្ឋបាលរបស់ប្រធានាធិបតីអាមេរិកលោក ដូណាល់ ត្រាំ ប្រគល់ប័ណ្ណសម្គាល់ខ្លួនសម្រាប់ចូលយកព័ត៌មានឲ្យអ្នករាយការណ៍ព័ត៌មានរបស់ភ្នាក់ងារសារព័ត៌មាន CNN លោក ជីម អាខូស្តា ដើម្បីមានសិទ្ធិក្នុងការចូលរួមយកព័ត៌មាននៅសេតវិមានវិញ។ សូមរំលឹកថា ទីភ្នាក់ងារសារព័ត៌មាន CNN បានស្នើសុំឲ្យចៅក្រមបង្ខំឲ្យសេតវិមានប្រគល់មកវិញភ្លាមៗនូវប័ណ្ណសម្គាល់ខ្លួន ដែលបានប្រគល់ឲ្យលោក អាខូស្តា ដែលជាអ្នកទទួលបន្ទុកយកព័ត៌មានប្រចាំនៅសេតវិមាន មកពីស្ថានីយទូរទស្សន៍ CNN ដើម្បីអនុញ្ញាតឲ្យលោកចូលទៅកាន់សេតវិមាន យកសន្និសីទសារព័ត៌មាន និងព្រឹត្តិការណ៍ផ្សេងទៀត។ ការស្នើសុំនេះត្រវបានធ្វើឡើង ខណៈបណ្តឹងនៃការដកហូតប័ណ្ណសម្គាល់ខ្លួនរបស់លោកបាននឹងកំពុងបន្ត៕

មីយ៉ាន់ម៉ា៖ ប្រធានគណៈកម្មាធិការជនភៀសខ្លួនបង់ក្លាដែស បាននិយាយថា ផែនការដើម្បីចាប់ផ្តើមធ្វើមាតុភូមិនិវត្តន៍ជនជាតិដើមភាគតិចរ៉ូហ៊ីងយ៉ាប្រមាណ៧០០,០០០នាក់ទៅកាន់ប្រទេសមីយ៉ាន់ម៉ាវិញ ត្រូវបានបោះបង់ចោល បន្ទាប់ពីក្រុមមន្ត្រីមិនអាចរកឃើញនរណាម្នាក់ដែលចង់វិលត្រឡប់ទៅវិញ។

សហរដ្ឋអាម៉េរិក៖ សារព័ត៌មាន NHK បានរាយការណ៍ថា តួលេខជនរងគ្រោះបាត់បង់ជីវិត ដោយសារភ្លើងឆេះព្រៃដ៏អាក្រក់នៅភាគខាងជើងរដ្ឋកាលីហ្វ័រញ៉ា បានបន្តកើនឡើងដល់៦៦នាក់ហើយ និង៦០០នាក់ផ្សេងទៀតបាត់ខ្លួន។

សិង្ហបុរី៖ អនុប្រធានាធិបតីអាម៉េរិកលោក ម៉ៃ ផេន បានបញ្ជាក់នៅថ្ងៃសុក្រនេះថា តំបន់សមុទ្រចិនខាងត្បូង មិនមែនជាកម្មសិទ្ធិផ្តាច់មុខរបស់ប្រទេសជាតិណាមួយឡើយ ហើយសហរដ្ឋអាម៉េរិកនឹងនៅតែបន្តធ្វើការចល័តនាវា ព្រមទាំងយន្តហោះទៅគ្រប់ទីទាំងកន្លែងឲ្យតែច្បាប់អន្តរជាតិអនុញ្ញាត។ កន្លងមក សហរដ្ឋអាម៉េរិកតែងធ្វើយុទ្ធនាការសេរីភាពនៃនាវាចរណ៍របស់ខ្លួន នៅដែនសមុទ្រមានជម្លោះនេះ ហើយទង្វើនេះ បានធ្វើឲ្យចិនខឹងសម្បារជាខ្លាំង ដោយនិយាយថា ជាការគំរាមកំហែងដល់អធិបតេយ្យភាពរបស់ខ្លួន។ ចិន ព្រុយណេ ម៉ាឡេស៊ី ហ្វីលីពីន វៀតណាម និងតៃវ៉ាន់ សុទ្ធតែមានការទាមទារចំណែករៀងៗខ្លួននៅសមុទ្រចិនខាងត្បូង ជាតំបន់ដែលមានទំហំពាណិជ្ជកម្មប្រមាណ៣ទ្រីលានដុល្លារក្នុងមួយឆ្នាំៗ។ លើកឡើងរបស់អនុប្រធានាធិបតីអាម៉េរិកនេះ នឹងធ្វើឲ្យទើសចិត្តចិនកាន់តែខ្លាំងថែមទៀត ស្របពេលដែលទីក្រុងប៉េកាំងបានប្រកាសទាមទារចំណែកស្ទើរតែទាំងស្រុងនៃតំបន់ផ្លូវសមុទ្រយុទ្ធសាស្ត្រមួយនេះ៕ម.ន

សហរដ្ឋអាម៉េរិក៖ ជាថ្មីម្តងទៀត អនុប្រធានាធិបតីសហរដ្ឋអាមេរិកបានបញ្ជាក់កាលពីថ្ងៃព្រហស្បតិ៍ថា លោកប្រធានាធិបតី ដូណាល់ ត្រាំ មានគម្រោងជួបជាមួយមេដឹកនាំកូរ៉េខាងជើង លោក គីម ជុងអ៊ុន នៅឆ្នាំ២០១៩ ។

សិង្ហបុរី៖ នាយករដ្ឋមន្ត្រីនៃប្រទេសសិង្ហបុរី កាលពីម្សិលមិញ បានប្រគល់ញញួរឈើជានិម្មិតរូប ជាប្រធានអាស៊ានក្នុងឆ្នាំ២០១៩ ពោលគឺក្រោយពេលកិច្ចប្រជុំកំពូលអាស៊ានលើកទី៣៣ ទើបត្រូវបានបិទបញ្ចប់នៅសិង្ហបុរី។

អូស្ត្រាលី៖ រដ្ឋមន្ត្រីរតនាគាររបស់អូស្ត្រាលី Josh Frydenberg បានប្រកាសបញ្ចេញទឹកប្រាក់២ពាន់លានដុល្លារអូស្ត្រាលី ឬ ១,៤ពាន់លានដុល្លារអាម៉េរិក ដើម្បីជួយដល់សហគ្រាសខ្នាតតូច តាមរយៈការផ្តល់មូលនិធិ កាត់បន្ថយការខ្ចីដើមពីធនាគារ នេះបើតាមការចេញផ្សាយរបស់សារព័ត៌មានហ្ស៊ីនហួរ នៅថ្ងៃសុក្រទី១៦ វិច្ឆិកា ២០១៨។

កូរ៉េខាងជើង៖ សារព័ត៌មានរដ្ឋ KCNA របស់កូរ៉េខាងជើងបានចុះផ្សាយថា មេដឹកនាំកំពូលលោក គីម ជុងអ៊ុន បានធ្វើទស្សនកិច្ចដ៏ភ្ញាក់ផ្អើលមួយដោយផ្ទាល់ ដើម្បីពិនិត្យមើលការធ្វើតេស្តអាវុធប្រភេទថ្មី ដែលបំពាក់ដោយបច្ចេកវិទ្យាទំនើប។

សហរដ្ឋអាម៉េរិក៖ ក្រសួងរតនាគារជាតិអាម៉េរិកបានធ្វើការប្រកាសដាក់ទណ្ឌកម្មលើជនជាតិអារ៉ាប៊ីសាអូឌីតចំនួន១៧នាក់ ដែលមានជាប់ទាក់ទិននឹងការស្លាប់របស់អ្នកកាសែត លោកចាម៉ាល់ ខាហ្សូកជី ក្នុងនោះរួមមានលោក Saud al-Qahtani ដែលជាអតីតជំនួយការកំពូលរបស់ព្រះអង្គម្ចាស់អារ៉ាប៊ីសាអូឌីត ម៉ូហាម៉េដ ប៊ីន សាល់ម៉ាន់។

រុស្ស៊ី៖ សារព័ត៌មាន NHK បានចុះផ្សាយថាប្រធានាធិបតីរុស្ស៊ីលោក វ៉្លាឌីមៀ ពូទីន បាននិយាយថា ការពិភាក្សាបន្ថែមទៀត គឺត្រូវការទាក់ទងនឹងអធិបតេយ្យភាពដែនកោះចំនួន២ ដែលសេចក្តីថ្លែងការណ៍អស់រយៈពេលជាច្រើនទសវត្សរ៍មកនេះ បានបញ្ជាក់ថា នឹងត្រូវបញ្ជូនវាឲ្យទៅប្រទេសជប៉ុន។