សហរដ្ឋអាម៉េរិក៖ សារព័ត៌មាន NHK របស់ជប៉ុនបានចុះផ្សាយថា ក្រុមអ្នកស្រាវជ្រាវអាម៉េរិកបាននិយាយថា ពួកគេកំណត់បានទីតាំងមូលដ្ឋានមីស៊ីលចំនួន១៣កន្លែងនៅកូរ៉េខាងជើង ដោយធ្វើការវិភាគរូបភាពតាមរយៈប្រព័ន្ធផ្កាយរណប។

កូរ៉េខាងជើង៖ សារព័ត៌មាន NHK របស់ជប៉ុនបានចេញផ្សាយថា កូរ៉េខាងជើងបានធ្វើការចោទកូរ៉េខាងត្បូង ពីបទរំលោភបំពានលើកិច្ចព្រមព្រៀង តាមរយៈការចូលរួមធ្វើសមយុទ្ធយោធាខ្នាតតូចជាមួយនឹងសហរដ្ឋអាម៉េរិក។ នៅថ្ងៃច័ន្ទ ដើមសប្តាហ៍នេះ ប្រព័ន្ធផ្សព្វផ្សាយរដ្ឋរបស់កូរ៉េខាងជើងបានធ្វើការចោទប្រកាន់ទីក្រុងសេអ៊ូលថា បានរំលោភបំពានកិច្ចព្រមព្រៀងនាពេលថ្មីៗនេះ ដែលមានគោលបំណងបន្ធូរបន្ថយភាពតានតឹងនៅលើឧបទ្វីបកូរ៉េ។

សហរដ្ឋអាម៉េរិក៖ តួលេខជនរងគ្រោះបាត់បង់ជីវិតបន្តកើនឡើងដល់៣១នាក់ហើយ ក្រោយពេលសាកសពមនុស្ស៦នាក់ទៀតត្រូវបានគេរកឃើញ និង២២៨នាក់ទៀតកំពុងបាត់ខ្លួនខណៈភ្លើងឆេះព្រៃនៅតែបន្តគំរាមគំហែងយ៉ាងធ្ងន់នៅក្នុងរដ្ឋកាលីហ្វរញ៉ា ដោយវាបានបង្កការបំផ្លិចបំផ្លាញយ៉ាងធ្ងន់លើទីក្រុង ផារ៉ាដាយ នៅភាគខាងជើងរដ្ឋ។

សហរដ្ឋអាម៉េរិក៖ មន្ត្រីសេតវិមានបានលើកឡើងនៅថ្ងៃអាទិត្យចុងសប្តាហ៍មុននេះថា ប្រធានាធិបតីអាម៉េរិកលោក ដូណាល់ ត្រាំ និងសមភាគីតួកគីរបស់លោក គឺលោក តាយយីប អឺដូហ្គាន់ បានពិគ្រោះយោបល់គ្នាទៅលើវិធីសាស្ត្រក្នុងការឆ្លើយតបទៅនឹងករណីសម្លាប់អ្នកកាសែត ចាម៉ាល់ ខាហ្សូកជី នៅក្នុងស្ថានកុងអារ៉ាប៊ីសាអូឌីតប្រចំាទីក្រុងអ៊ីស្តង់ប៊ុល ប្រទេសតួកគី កាលពីខែមុន។

រុស្ស៊ី៖ ទីភ្នាក់ងារសារព័ត៌មានរុស្ស៊ីបានចុះផ្សាយថា ប្រធានាធិបតីរុស្ស៊ីលោក វ៉្លាឌីមៀ ពូទីន បាននិយាយនៅក្នុងថ្ងៃអាទិត្យសប្តាហ៍មុននេះថា ទីក្រុងម៉ូស្គូចង់បង្កើតកិច្ចចរចាដ៏ពេញលេញមួយជាមួយសហរដ្ឋអាម៉េរិកឡើងវិញ ពាក់ព័ន្ធនឹងកិច្ចព្រមព្រៀងនុយក្លេអ៊ែរ។

កូរ៉េខាងត្បូង៖ ក្រសួងការពារជាតិទីក្រុងសេអ៊ូលបានលើកឡើងថា កូរ៉េខាងត្បូង និងកូរ៉េខាងជើងបានចាប់ផ្ដើមរំលាយប៉ុស្តិ៍យាមល្បាតចំនួន២០ នៅតាមបណ្ដោយព្រំដែនរបស់ខ្លួនហើយ ក្រោមផែនការកាត់បន្ថយភាពតានតឹងផ្នែកយោធារវាងប្រទេសបងប្អូនកូរ៉េទាំងពីរ។

ចិន៖ ប្រធានាធិបតីចិនលោក ស៊ី ជិនពីង គ្រោងធ្វើទស្សនកិច្ចផ្លូវរដ្ឋទៅកាន់ប្រទេសហ្វលីពីន ព្រុយណេ និងប៉ាពួញូហ្គីណេចាប់ពីថ្ងៃទី១៥ដល់ថ្ងៃទី២១ ខែវិច្ឆិកា ហើយលោក ស៊ី ក៏នឹងចូលរួមផងដែរក្នុងកិច្ចប្រជុំកំពូល កិច្ចសហប្រតិបត្តិការសេដ្ឋកិច្ចនៃតំបន់អាស៊ី-ប៉ាស៊ីហ្វិក ហៅកាត់ថា អេពិច (APEC) ពីថ្ងៃទី១៧ ដល់ទី១៨ ខែវិច្ឆិកា នៅរដ្ឋធានី ផតម៉ូរែស្បាយ របស់ប៉ាពូញូហ្គីណេ។

សហរដ្ឋអាម៉េរិក៖ ការផ្អាកសិទ្ធិសុំជ្រកកោនរបស់ប្រធានាធិបតីអាម៉េរិក លោក ដូណាល់ ត្រាំ សម្រាប់ជនអន្តោប្រវេសន៍ខុសច្បាប់ ដែលកំពុងព្យាយាមចូលក្នុងសហរដ្ឋអាម៉េរិកបានចូលជាធរមានកាលពីថ្ងៃសៅរ៍សប្តាហ៍មុននេះ ក៏ប៉ុន្តែជនចំណាកស្រុកមកពីតំបន់អាម៉េរិកកណ្តាលប្រហែល៤ពាន់នាក់ នៅតែបន្តមានះ ដោយបន្តដំណើរថ្មើជើងរបស់ខ្លួនឆ្ពោះមកកាន់ព្រំដែនសហរដ្ឋអាម៉េរិក។

រុស្ស៊ី៖ យោធាជើងទឹកភូមិភាគខាងជើងរបស់រុស្ស៊ី បានប្រកាសកាលពីថ្ងៃចុងសប្តាហ៍មុនថា សមយុទ្ធយោធាជើងទឹកប្រឆាំងសកម្មភាពចោរសមុទ្រជាមួយប្រទេសជប៉ុន បានចាប់ផ្តើមប្រព្រឹត្តទៅលើឈូងសមុទ្រ អេឌេន ដែលស្ថិតនៅចន្លោះយេម៉ែន និងសូម៉ាលី។

ឥណ្ឌូណេស៊ី៖ អាជ្ញាធរឥណ្ឌូណេស៊ីបានប្រកាសកាលពីថ្ងៃចុងសប្តាហ៍មុននេះថា ខ្លួនបានបិទបញ្ចប់ប្រតិបត្តិការរុករកសាកសពជនរងគ្រោះ ក្នុងករណីធ្លាក់យន្តហោះកាលពីចុងខែតុលាកន្លងទៅ ដែលបានផ្តាច់ជីវិតមនុស្សទាំង១៨៩នាក់ ខណៈការតាមស្វែងរកប្រអប់ខ្មៅទី២របស់យន្តហោះ ដែលមានផ្ទុកសំឡេងសន្ទនាក្នុងបន្ទប់អាកាសយានិក នឹងបន្តប្រព្រឹត្តទៅដដែល។