សហរដ្ឋអាម៉េរិក៖ ជនឈ្មោះ ឡាន ដេវីដ ឡង ត្រូវអាជ្ញាធរអាមេរិកកំណត់អត្តសញ្ញាណបានថា គឺជាខ្មាន់កាំភ្លើងដែលបានសម្លាប់មនុស្ស១២នាក់ ក្នុងករណីបាញ់ប្រហារដ៏កក្រើកមួយនៅក្លឹបកម្សាន្តពេលរាត្រីមួយកន្លែង ក្នុងទីក្រុង សៅសិន អកស៍ ភាគខាងត្បូងរដ្ឋកាលីហ្វរញ៉ា។

ឥណ្ឌា៖ ឥណ្ឌានឹងចាប់ផ្តើមនាំចេញស្ករសទៅប្រទេសចិន ចាប់ដើមឆ្នាំ២០១៩ខាងមុខនេះ នេះបើតាមសេចក្តីប្រកាសព័ត៌មានផ្លូវការរបស់ក្រសួងពាណិជ្ជកម្មចេញផ្សាយ កាលពីម្សិលមិញ។

សហរដ្ឋអាម៉េរិក៖ នៅក្នុងសន្និសីទសារព័ត៌មានក្រោយការបោះឆ្នោតពាក់កណ្តាលអាណត្តិនៅអាម៉េរិក ថ្មីៗនេះ ប្រធានាធិបតីអាម៉េរិកលោក ដូណាល់ ត្រាំ បានស្តីបន្ទោសមិនសំចៃមាត់ទៅលើអ្នកសារព័ត៌មានរបស់ CNN គឺលោក Jim Acosta។

សហរដ្ឋអាម៉េរិក៖ អ្នករៀបចំចាត់ចែងកំពុងអំពាវនាវឲ្យមានការតវ៉ាប្រឆាំងនៅទូទាំងសហរដ្ឋអាម៉េរិកនៅថ្ងៃព្រហស្បតិ៍តនេះ នៅក្នុងការឆ្លើយតបទៅនឹងចំណាត់របស់ប្រធានាធិបតីអាម៉េរិកលោក ដូណាល់ ត្រាំ បណ្តេញលោក ចេស សេសសិន រដ្ឋមន្រ្តីក្រសួងយុត្តិធម៌ ហើយជំនួសលោកដោយមនុស្សម្នាក់ ដែលបានរិះគន់ជាសាធារណៈយ៉ាងខ្លាំងដល់ការស៊ើបអង្កេតការជ្រៀតជ្រែករបស់រុស្ស៊ី នៅក្នុងការបោះឆ្នោតប្រធានាធិបតីសហរដ្ឋអាម៉េរិកនៅឆ្នាំ២០១៦។

សហរដ្ឋអាម៉េរិក៖ អគ្គរដ្ឋទូតអាម៉េរិកប្រចាំអង្គការសហប្រជាជាតិលោកស្រី នីគគី ហាលី បានសង្កត់ធ្ងន់ថា រុស្ស៊ីកំពុងព្យាយាមដកទណ្ឌកម្មពីកូរ៉េខាងជើង តែសហរដ្ឋអាម៉េរិកនឹងមិនបណ្ដោយឱ្យរឿងបែបនេះកើតឡើងឡើយ។ លោកស្រី គគី ហាលី បានធ្វើការកត់សម្គាល់បែបនេះ ក្រោយកិច្ចប្រជុំបិទទ្វារមួយរបស់ក្រុមប្រឹក្សាសន្តិសុខអង្គការសហប្រជាជាតិនៅថ្ងៃព្រហស្បតិ៍តសប្ដាហ៍នេះ ដោយលោកស្រីបាននិយាយថា អ្វីដែលពួកគេ (រុស្ស៊ី) កំពុងធ្វើ គឺចង់ដកទណ្ឌកម្មធនាគារពីកូរ៉េខាងជើង។ យើងបានដឹងយ៉ាងច្បាស់ពីបំណងរបស់ពួកគេ ហើយយើងក៏ដឹងផងដែរថា ហេតុអ្វីបានជាពួកគេព្យាយាមដកទណ្ឌកម្មពីកូរ៉េខាងជើង ប៉ុន្តែយើងនឹងមិនបណ្ដោយឱ្យរឿងបែបនេះកើតឡើងជាដាច់ខាត ។

កូរ៉េខាងត្បូង៖ រដ្ឋាភិបាលក្រុងសេអូលបានសន្យាថា នឹងផ្តល់ប្រាក់ជំនួយរាប់ពាន់លានដុល្លារអាម៉េរិក ដោយ២ភាគ៣នៃប្រាក់ជំនួយនោះ មិនចាំបាច់សងវិញឡើយ ក្នុងគោលដៅជួយដល់កូរ៉េខាងជើងអភិវឌ្ឍន៍ហេដ្ឋារចនាសម្ព័ន្ធ។

ថៃ៖ នៅពេលដែលប្រទេសថៃប្រុងប្រៀបរៀបចំការបោះឆ្នោតលើកដំបូងរបស់ខ្លួន ចាប់តាំងពីរដ្ឋប្រហារយោធាកាលពីឆ្នាំ២០១៤មក គណបក្សប្រឆាំងកំពុងសម្តែងទស្សនៈរបស់ខ្លួនអំពីគំនិតនៃការបោះឆ្នោតដោយ «សេរី និងយុត្តិធម៌»។

ចិន៖ នាយករដ្ឋមន្ត្រីរុស្ស៊ីលោក ឌីមីទ្រី ម៉េដវ៉េដេវ និងសមភាគីចិនលោក លី ខឺឈាង បានធ្វើការថ្កោលទោសការគាំពារនិយម ហើយថែមទំាងបានព្រមព្រៀងបង្កើនកិច្ចសហប្រតិបត្តិការលើវិស័យជាច្រើន ដែលរួមទាំងបញ្ហាសេដ្ឋកិច្ច កាលពីថ្ងៃពុធសប្តាហ៍នេះ នៅឯទីក្រុងប៉េកាំង។ មេដឹកនាំទាំងពីរបានឈរមើលការចុះហត្ថលេខាលើអនុស្សរណៈយោគយល់ និងកិច្ចព្រមព្រៀងជាច្រើន ដែលរួមទាំងកិច្ចសហប្រតិបត្តិការសេដ្ឋកិច្ច និងប្រព័ន្ធ GPS ផងដែរ។

រុស្ស៊ី៖ ជំនួយការប្រធានាធិបតីរុស្ស៊ីលោក យូរី យូសាកូវ បានឱ្យដឹងថា មេដឹកនាំកំពូលកូរ៉េខាងជើងលោក គីម ជុងអ៊ុន ទំនងជាអាចនឹងបំពេញដំណើរទស្សនកិច្ចមកកាន់ប្រទេសរុស្ស៊ីនាឆ្នាំក្រោយនេះ ។

សហរដ្ឋអាម៉េរិក៖ សេតវិមានបានប្រកាសនៅក្នុងថ្ងៃពុធសប្តាហ៍នេះថា ប្រធានាធិបតីអាម៉េរិកលោក ដូណាល់ ត្រាំ គ្រោងនឹងចូលរួមកិច្ចប្រជុំទ្វេភាគីជាមួយសមភាគីបារាំងលោក អែមម៉ានុយអ៊ែល ម៉ាក្រុង ក្នុងអំឡុងដំណើរទស្សនកិច្ចរបស់លោកមកកាន់ប្រទេសបារាំងនាចុងសប្តាហ៍នេះ។