សហរដ្ឋអាម៉េរិក៖ ទីបំផុត សម្រាប់ការបោះឆ្នោតពាក់កណ្ដាលអាណត្តិ កាលពីថ្ងៃទី ៦ខែវិច្ឆិកានេះ គណបក្សសាធារណរដ្ឋរបស់ប្រធានាធិបតី ដូណាល់ ត្រាំ បានចាញ់ឆ្នោតគណបក្សប្រជាធិបតេយ្យ នៅក្នុងសភាតំណាងរាស្ត្រ។

បារាំង៖ ប្រទេសបារាំង កាលពីថ្ងៃពុធម្សិលមិញ បានជំរុញឲ្យតុលាការក្រុងប៉ារីសពិន័យធនាគារស្វីស UBS ១,៦ពាន់លានអឺរ៉ូ ឬ ១,៨ពាន់លានដុល្លារអាម៉េរិក ដោយចោទថា ធនាគារ UBS នេះបានជួយដល់អតិថិជនរបស់ខ្លួនបន្លំពន្ធ។

ហូឡង់៖ ទីភ្នាក់ងារស៊ើបការណ៍សម្ងាត់ហូឡង់ ហៅកាត់ថា (AIVD) បានចេញរបាយការណ៍មួយឲ្យដឹងថា ក្រុមភេរវកររដ្ឋអ៊ីស្លាម ISIS នៅតំបន់មជ្ឈិមបូព៌ា បាននិងកំពុងប្រើប្រាស់តួកគីធ្វើជាមូលដ្ឋានយុទ្ធសាស្រ្តរបស់ខ្លួន ដើម្បីប្រមែប្រមូលកម្លាំងឡើងវិញ ដែលវាគឺជាការគំរាមកំហែងធំមួយសម្រាប់សន្តិសុខនៅអឺរ៉ុប។

បារាំង៖ រដ្ឋមន្ត្រីសេដ្ឋកិច្ច និងហិរញ្ញវត្ថុបារាំង លោក Bruno Le Maire បានសម្តែងការប្តេជ្ញាចិត្តយ៉ាងមុតមាំថា ប្រទេសលោកនឹងព្យាយាមដឹកនាំកិច្ចប្រឹងប្រែងរបស់សហភាពអឺរ៉ុប ដើម្បីប្រឆាំងតទល់ជាមួយទណ្ឌកម្មរបស់សហរដ្ឋអាម៉េរិក ដែលទើបបានដាក់ទៅលើអ៊ីរ៉ង់ ហើយទីក្រុងប៉ារីស ក៏នឹងខិតខំលើកស្ទួយលុយអឺរ៉ូនៅលើឆាកអន្តរជាតិផងដែរ។ លោកបានគូសបញ្ជាក់ថា អឺរ៉ុបមិនសុខចិត្តឱបដៃឈរមើលសហរដ្ឋអាម៉េរិកតម្កើងខ្លួន ធ្វើជាអ្នកត្រួតត្រាលើវិស័យពាណិជ្ជកម្មពិភពលោកឡើយ ស្របពេលឥឡូវនេះ កញ្ចប់ទណ្ឌកម្មថ្មីទ្រង់ទ្រាយធំរបស់ទីក្រុងវ៉ាស៊ីនតោន ប្រឆាំងនឹងទីក្រុងតេហេរ៉ង់បានចូលជាធរមានថ្មីៗនេះ។ ការកត់សម្គាល់របស់រដ្ឋមន្ត្រីសេដ្ឋកិច្ចបារាំងរូបនេះ ធ្វើឡើងបន្ទាប់ពីកញ្ចប់ទណ្ឌកម្មទ្រង់ទ្រាយធំលើវិស័យពាណិជ្ជកម្មប្រេង វិស័យដឹកជញ្ជូនតាមកប៉ាល់ និងវិស័យធនាគាររបស់អ៊ីរ៉ង់ បានចូលជាធរមាននាថ្ងៃច័ន្ទដើមសប្តាហ៍នេះ។

ឥណ្ឌូណេស៊ី៖ យន្តហោះមួយគ្រឿងរបស់ក្រុមហ៊ុនអាកាសចរណ៍ Lion Air បានបើកបុកទៅនឹងបង្គោលមួយនៅឯអាកាសយានដ្ឋាន Fatmawati ស្ថិតក្នុងទីក្រុង Bengkulu នៅក្នុងថ្ងៃពុធសប្តាហ៍នេះ ស្របពេលកំពុងត្រៀមខ្លួនហោះហើរឡើង ឆ្ពោះទៅកាន់ទីក្រុងហ្សាកាតា ប្រទេសឥណ្ឌូនេស៊ី។ ប្រព័ន្ធផ្សព្វផ្សាយក្នុងតំបន់បានរាយការណ៍ថា ហេតុការណ៍បុកនេះ បានធ្វើឲ្យស្លាបខាងឆ្វេងយន្តហោះដាច់ និងបណ្តាលឲ្យជើងហោះហើរដែលពាក់ព័ន្ធធ្វើការពន្យារពេលផងដែរ។ ជាមួយគ្នានេះ ក្រុមហ៊ុន Lion Air បានបញ្ជាក់ប្រាប់ទៅកាន់ភ្នាក់ងារសារព័ត៌មានថា យន្តហោះមួយគ្រឿងផ្សេងទៀតត្រូវបានបញ្ជូនទៅ ដើម្បីដឹកជញ្ជូនជំនួស ក្រុមអ្នកធ្វើដំណើរចំនួន១៤៣នាក់ នៃជើងហោះហើរ JT633 របស់ក្រុមហ៊ុន Lion Air ឆ្ពោះទៅកាន់ទីក្រុងហ្សាកាតា។ សូមជម្រាបផងដែរថា ហេតុការណ៍នេះ បានកើតឡើងក្នុងគ្រាដែលក្រុមអាជ្ញាធរកំពុងបន្តការស្វែងរកសាកសពនៃក្រុមអ្នកធ្វើដំណើរលើយន្តហោះ Lion Air ជើងហោះហើរ JT610 ដែលបានធ្លាក់ចូលទៅក្នុងទឹកសមុទ្រ កាលពីថ្ងៃទី២៩ ខែតុលាកន្លងទៅ ខណៈរបាយការណ៍ដំបូងស្តីពីមូលហេតុពិតប្រាកដ ដែលបណ្តាលឲ្យឧបត្តិហេតុធ្លាក់យន្តហោះនេះកើតឡើង ត្រូវបានគេរំពឹងថា នឹងបង្ហាញនៅចុងខែវិច្ឆិកាខាងមុខ៕

អាល្លឺម៉ង់៖ ក្រុមហ៊ុនផលិតរថយន្តដ៏ធំមួយក្នុងប្រទេសអាល្លឺម៉ង់អះអាងថា ក្នុងរយៈពេល៣ខែមកនេះ មានការប៉ះពាល់ប្រាក់ចំណេញរបស់ខ្លួនជិត៣០ភាគរយ ដោយសារតែត្រៀមចំណាយខ្លាំងលើការអភិវឌ្ឍរថយន្តប្រើប្រាស់អគ្គិសនី និងបញ្ហាសង្គ្រាមពាណិជ្ជកម្មជាដើម នេះបើតាមការចេញផ្សាយរបស់សារព័ត៌មាន CGTN កាលពីម្សិលមិញ។

សហរដ្ឋអាម៉េរិក៖ សារព័ត៌មាន CGTN បានចុះផ្សាយថា ប្រធានាធិបតីអាម៉េរិកលោក ដូណាល់ ត្រាំ បានសម្រេចចិត្តបណ្តេញលោក ចេស សេសសិន ចេញពីមុខតំណែងជាអគ្គរដ្ឋអាជ្ញាអាម៉េរិក (រដ្ឋមន្រ្តីយុត្តិធម៌) ហើយ បន្ទាប់ពីមានពាក្យចចាមអារ៉ាមជាបន្តបន្ទាប់ពីទំនាក់ទំនងមិនល្អរវាងអ្នកទាំងពីរ។

សហរដ្ឋអាម៉េរិក៖ អ្នកនាំពាក្យក្រសួងការបរទេសអាម៉េរិកលោកស្រី ហីដធើ ណឺត បានថ្លែងប្រាប់អ្នកសារព័ត៌មានថា គម្រោងរៀបចំកិច្ចពិភាក្សារវាងរដ្ឋមន្ត្រីការបរទេសអាម៉េរិកលោក ម៉ៃ ប៉ុមប៉េអូ និងមន្ត្រីជាន់ខ្ពស់កូរ៉េខាងជើងនៅក្នុងទីក្រុងញ៉ូវយ៉ក ត្រូវសម្រេចលុបចោលវិញ។

អ៊ីរ៉ាក់៖ ផ្នូរកប់ខ្មោចជាង២០០កន្លែង ដែលកប់ខ្មោចរួមជាង១២,០០០នាក់ ក្នុងនោះមានទាំងស្រ្តី កុមារ និងជនពិការផងនោះ ត្រូវបានគេរកឃើញនៅក្នុងប្រទេសអ៊ីរ៉ាក់ គិតចាប់តាំងពីឆ្នាំ២០១៤មក។ បើតាមរបាយការណ៍ស្រាវជ្រាវ របស់អង្គការសហប្រជាជាតិបានបង្ហាញថា មានផ្នូរកប់ខ្មោចរួម ដល់ទៅ២០២ផ្នូរ សរុបមានសាកសពជាង១២,០០០នាក់ នៅភាគខាងជើងប្រទេសអ៊ីរ៉ាក់ ដែលត្រូវបានក្រុមភេវរករសម្លាប់។

រុស្ស៊ី៖ បន្ទាប់ពីទទួលបរាជ័យក្នុងការបាញ់បង្ហោះគ្រាប់រ៉ុក្កែត ដើម្បីបញ្ជូនអវកាសយានិកទៅកាន់ស្ថានីយអវកាស កាលពីខែតុលាកន្លងទៅ នៅថ្ងៃអង្គារ៍សប្តាហ៍នេះ រុស្ស៊ីបានធ្វើការបញ្ជូនផ្កាយរណបមួយគ្រឿងទៀត ទៅដាក់នៅគន្លងផែនដីដោយជោគជ័យ។