ណៃរ៉ូប៊ី ៖ ចំនួនជនស៊ីវិលដែលត្រូវបានសម្លាប់នៅក្នុងប្រទេសស៊ូដង់ខាងត្បូង បានកើនឡើងដល់កម្រិតខ្ពស់បំផុតក្នុងរយៈពេលជិត៥ឆ្នាំ នេះបើតាមរបាយការណ៍របស់អង្គការសហប្រជាជាតិកាលពីថ្ងៃទី២ ខែកក្កដា។ បេសកកម្មរបស់អង្គការសហប្រជាជាតិនៅស៊ូដង់ខាងត្បូង (UNMISS) បាននិយាយថា នៅចន្លោះខែមករា និងខែមីនាឆ្នាំនេះ ជនស៊ីវិលចំនួន ៧៣៩នាក់ត្រូវបានសម្លាប់របួស ៦៧៩នាក់ ត្រូវគេចាប់ពង្រត់ ១៤៩នាក់ និង ៤០នាក់ទៀតរងអំពើហិង្សាផ្លូវភេទទាក់ទងនឹងជម្លោះ។ បេសកកម្មនេះបានបញ្ជាក់នៅក្នុងសេចក្តីថ្លែងការណ៍មួយថា បើប្រៀបធៀបទៅនឹងត្រីមាសមុន ចំនួនអ្នកស្លាប់ចុងក្រោយនេះ បានស្ទុះឡើងដល់ទៅ ១១០ភាគរយ ពោលគឺជនស៊ីវិលពី ៣៥២ទៅ៧៣៩នាក់ត្រូវបានសម្លាប់។ តួលេខសរុបនេះ គឺជាចំនួនខ្ពស់បំផុតក្នុងរយៈពេល ៣ខែចាប់តាំងពីឆ្នាំ២០២០។ ជនរងគ្រោះភាគច្រើនត្រូវបានកត់ត្រានៅក្នុងរដ្ឋ Warrap ជាកន្លែងដែលលោកប្រធានាធិបតីស៊ូដង់ខាងត្បូងបានប្រកាសដាក់ប្រទេសក្នុងភាពអាសន្នកាលពីខែមិថុនា។ ហើយការសម្លាប់ភាគច្រើនមានជាប់ពាក់ព័ន្ធនឹងកងជីវពលតាម សហគមន៍ ឬ ក្រុមការពារស៊ីវិល។ ប្រទេសអាហ្វ្រិកខាងកើតមួយនេះ បានជួបអស្ថិរភាពកើនឡើង យ៉ាង ខ្លាំង ដោយសារតែអំពើ ហិង្សា ចាប់តាំងពីការចាប់ផ្តើមប្រជែងអំណាច គ្នា រវាង លោក ប្រធានាធិបតី Salva Kiir ននិងលោកអនុប្រធានាធិបតី Riek Machar។ ទន្ទឹមគ្នា អង្គការសហប្រជាជាតិបានព្រមានម្តងហើយម្តងទៀត អំពីស្ថានភាពកាន់តែយ៉ាប់យ៉ឺននៅក្នុងប្រទេសក្រីក្រ ដែលទើបតែងើបឡើងវិញពីសង្គ្រាមស៊ីវិលរយៈពេល៥ឆ្នាំ…

សាណាអា ៖ ពួកហាម៉ាស់បាននិយាយកាលពីថ្ងៃពុធថា ក្រុមខ្លួនកំពុងពិភាក្សាលើសំណើបទឈប់បាញ់នៅតំបន់ហ្គាហ្សាស្ទ្រីប ដែលទទួលបានពីភាគីអ្នកសម្របសម្រួល ក្រោយលោកប្រធានាធិបតីអាមេរិក ដូណាល់ ត្រាំ បានប្រកាសថា អ៊ីស្រាអែលគាំទ្របទឈប់បាញ់រយៈពេល ៦០ថ្ងៃ។ ពួកសកម្មប្រយុទ្ធប៉ាឡេស្ទីនហាម៉ាស់បាននិយាយនៅក្នុងសេចក្តីថ្លែងការណ៍មួយថា ក្រុមខ្លួនកំពុងពិគ្រោះយោបល់ថ្នាក់ជាតិ ដើម្បីពិភាក្សាពីអ្វីដែលយើងបានទទួលពីសំណើររបស់អ្នកសម្របសម្រួល។ ក្រុមហាម៉ាស់ថា ពួកខ្លួនក៏មានគោលបំណងសម្រេចឱ្យបាននូវកិច្ចព្រមព្រៀងមួយ ដែលធានាដល់ការបិទបញ្ចប់ការឈ្លានពាន និងការដកខ្លួនរបស់កងទ័ពអ៊ីស្រាអែលចេញពីតំបន់ហ្គាហ្សា ក៏ដូចជាជួយប្រជាជននៅទីនោះជាបន្ទាន់។ សង្រ្គាមជិត២១ខែរវាងអ៊ីស្រាអែល និងក្រុមហាម៉ាស់ បានបង្កើតលក្ខខណ្ឌមនុស្សធម៌ដ៏អាក្រក់បំផុតមិនធ្លាប់មាន សម្រាប់ប្រជាជនជាងពីរលាននាក់រស់នៅក្នុងតំបន់ហ្គាហ្សាស្ទ្រីប។ អ៊ីស្រាអែលបានបើកការវាយលុកសងសឹកការវាយប្រហារកាលពីថ្ងៃទី៧ ខែតុលា ឆ្នាំ២០២៣របស់ក្រុមហាម៉ាស់ ដែលបានបណ្តាលឱ្យមនុស្សចំនួន១.២១៩នាក់ស្លាប់បាត់បង់ជីវិត ដែលភាគច្រើនជាជនស៊ីវិល នេះបើយោងតាមការបូកសរុបរបស់សារព័ត៌មាន AFP ដោយផ្អែកលើតួលេខផ្លូវការរបស់អ៊ីស្រាអែល។ យុទ្ធនាការយោធាសងសឹករបស់អ៊ីស្រាអែល ក៏បានសម្លាប់មនុស្សយ៉ាងហោចណាស់ ៥៧.០១២នាក់នៅតំបន់ហ្គាហ្សា ដែលភាគច្រើនជាជនស៊ីវិលផងដែរ នេះបើយោងតាមក្រសួងសុខាភិបាលរបស់ក្រុមហាម៉ាស់ ខណៈដែលអង្គការសហប្រជាជាតិបានចាត់ទុកតួលេខនេះគួរឱ្យទុកចិត្ត៕ ប្រភព ៖ AFP ប្រែសម្រួល ៖ ឈឹម ទីណា

តេហេរ៉ង់ ៖ មេដឹកនាំអ៊ីរ៉ង់បានអនុម័តច្បាប់មួយ ក្នុងគោលបំណងបញ្ឈប់កិច្ចសហប្រតិបត្តិការជាមួយទីភ្នាក់ងារថាមពលអាតូមិកអន្តរជាតិ (IAEA) និងជាការប៉ន់ប៉ង់ចាប់ផ្តើមកម្មវិធីនុយក្លេអ៊ែរឡើងវិញដោយសម្ងាត់ ក្រោយរងការខូចខាតដោយសារអាមេរិកទម្លាក់គ្រាប់បែក។ យោងតាមទីភ្នាក់ងារសារព័ត៌មានរដ្ឋ IRNA បានរាយការណ៍ថា លោកប្រធានាធិបតី Masoud Pezeshkian បានបញ្ជាឱ្យអង្គការថាមពលអាតូមិករបស់អ៊ីរ៉ង់ ក្រុមប្រឹក្សាសន្តិសុខជាតិកំពូល និងក្រសួងការបរទេស ឱ្យចាប់ផ្តើមអនុវត្តច្បាប់នេះ។ ការសម្រេចចិត្តរបស់អ៊ីរ៉ង់នេះ កើតឡើងស្របពេលដែលទីក្រុងតេហេរ៉ង់បានស្តីបន្ទោសទីភ្នាក់ងារ IAEA ថា បានលួចឃុបឃិតជាមួយអ៊ីស្រាអែល និងបើកផ្លូវឲ្យមានការវាយប្រហារលើទីតាំងនុយក្លេអ៊ែររបស់ខ្លួន ប៉ុន្តែ IAEA បានប្រកាសច្រានចោលការចោទប្រកាន់ទេ។ អ៊ីរ៉ង់គឺជាប្រទេសហត្ថលេខីនៃសន្ធិសញ្ញាមិនរីកសាយភាយ (NPT) ដែលតម្រូវឱ្យសមាជិកអនុញ្ញាតឱ្យមានការត្រួតពិនិត្យ និងត្រួតពិនិត្យគ្រឿងបរិក្ខារនានា ដើម្បីបញ្ជាក់អំពីកម្មវិធីនុយក្លេអ៊ែរជាលក្ខណៈសន្តិភាព។ ស្របពេលជាមួយគ្នានេះ អាល្លឺម៉ង់បានចេញមុខព្រមានខ្លាំងៗថា ការសម្រេចចិត្តបែបនេះរបស់លោកប្រធានាធិបតីអ៊ីរ៉ង់ Pezeshkian ជាការបញ្ជូន “សញ្ញាដ៏មហន្តរាយ” សម្រាប់ពិភពលោក៕ ប្រភព ៖ CNN ប្រែសម្រួល ៖ ឈឹម ទីណា

មូស្គូ ៖ វិមានក្រឹមឡាំង កាលពីថ្ងៃពុធ បានសាទរការសម្រេចចិត្តរបស់រដ្ឋបាលលោកប្រធានាធិបតីអាមេរិក ដូណាល់ ត្រាំ ក្នុងការបញ្ឈប់បញ្ជូនសព្វាវុធយោធាសំខាន់ៗទៅឱ្យអ៊ុយក្រែន ដោយរុស្ស៊ីបានអះអាងថា ការកាត់បន្ថយនាំចេញសព្វាវុធទៅកាន់ទីក្រុងកៀវ នឹងជួយបញ្ចប់សង្គ្រាមកាន់តែលឿន។ អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកយកព័ត៌មានយ៉ាងដូច្នេះថា ទោះក្នុងកាលៈទេសៈណាក៏ដោយ បើសិនចំនួនសព្វាវុធបញ្ជូនទៅកាន់អ៊ុយក្រែនកាន់តែតិចតួចស្តួចស្តើងជាងមុន នោះការបញ្ចប់ប្រតិបត្តិការយោធារបស់រុស្ស៊ីក៏កាន់តែខិតជិតដល់ទីបញ្ចប់ដែរ។ ការអត្ថាធិប្បាយរបស់លោក Peskov កើតឡើងបន្ទាប់ពីរដ្ឋបាលលោក ដូណាល់ ត្រាំ បានប្រកាសកាត់ផ្តាច់ជំនួយសព្វាវុធយោធាសំខាន់ៗមួយចំនួនទៅកាន់អ៊ុយក្រែន រួមទាំងមីស៊ីលការពារដែនអាកាសដ៏សំខាន់ផងដែរ ដោយសារតែព្រួយបារម្ភថា ឃ្លាំងស្តុកអាវុធរបស់អាមេរិកមានកម្រិតទាបពេក។ ភ្លាមៗ អ៊ុយក្រែនបានចេញមុខព្រមានកាលពីថ្ងៃពុធថា ការសម្រេចចិត្តបែបនេះរបស់ភាគីអាមេរិក នឹងធ្វើឲ្យសមត្ថភាពការពារប្រទេសរបស់ខ្លួន ពីការវាយប្រហាររបស់រុស្ស៊ី កាន់តែចុះខ្សោយជាងមុន។ លើសពីនេះ ក្រសួងការបរទេសអ៊ុយក្រែនថែមទាំងបានកោះហៅបេសកជនអាមេរិក ដើម្បីបង្ហាញការព្រួយបារម្ភ និងបានអះអាងថា ការពន្យារពេលផ្គត់ផ្គង់ជំនួយយោធាណាមួយ នឹងលើកទឹកចិត្តឲ្យជនឈ្លានពានរុស្ស៊ីបន្តសង្គ្រាមថែមទៀត៕ ប្រភព ៖ AFP ប្រែសម្រួល ៖ ឈឹម ទីណា

បរទេស ៖ ក្រុមហ៊ុនអាកាសចរណ៍អូស្ត្រាលី Qantas បានអះអាង កាលពីថ្ងៃទី២ ខែកក្កដា ថា គណនីអតិថិជន ចំនួន៦លាននាក់ ត្រូវបានវាយប្រហារ តាមអ៊ីនធឺណិត ឬ ត្រូវបាន Hacker ចូលទៅលួចយកព័ត៌មានផ្ទាល់ខ្លួន របស់អ្នកជិះយន្តហោះ ទាំងនោះ។ ទីភ្នាក់ងារព័ត៌មាន CNA បានចេញផ្សាយថា នេះគឺជាការរំលោភបំពានទិន្នន័យ ដ៏ធំបំផុត មិនធ្លាប់មាន ក្នុងរយៈពេលជាច្រើនឆ្នាំ សម្រាប់ប្រទេសអូស្ត្រាលី ចំពេលដែលក្រុមហ៊ុនអាកាសចរណ៍ មួយនេះ កំពុងខិតខំកសាងទំនុកចិត្តឡើងវិញ បន្ទាប់ពីមានវិបត្តិ កេរ្តិ៍ឈ្មោះ។ ក្រុមហ៊ុន Qantas បានអះអាងថា ពួក Hacker បានកំណត់គោលដៅ លើមជ្ឈមណ្ឌល «ហៅទូរស័ព្ទ» និងទទួលបានសិទ្ធិ ចូលដំណើរការ ទៅកាន់វេទិកាសេវាកម្មអតិថិជន ភាគីទីបី ដែលមាន អ្នកជិះយន្តហោះ ចំនួន៦លាននាក់ ដើម្បីអាចចូលទៅលួចយក អាសយដ្ឋានអ៊ីមែល, លេខទូរស័ព្ទ ថ្ងៃខែឆ្នាំកំណើត និង លេខជើងហោះហើរ របស់អតិថិជន។ ក្រុមហ៊ុនមិនបានបញ្ជាក់ពីទីតាំង នៃមជ្ឈមណ្ឌលហៅទូរសព្ទ…

បរទេស ៖ អាមេរិកបានលើកឡើងថា ការផ្អាកកិច្ចសហប្រតិបត្តិការ របស់អ៊ីរ៉ង់ ជាមួយទីភ្នាក់ងារថាមពលបរមាណូអន្តរជាតិ ហៅកាត់ IAEA មិនអាចទទួលយកបាននោះទេ។ លោកស្រី Tammy Bruce អ្នកនាំពាក្យ ក្រសួងការបរទេសអាមេរិក មានប្រសាសន៍ កាលពីថ្ងៃពុធថា «យើងនឹងប្រើពាក្យ មិនអាចទទួលយកបាន ដែលអ៊ីរ៉ង់បានជ្រើសរើស ផ្អាកកិច្ចសហប្រតិបត្តិការ ជាមួយ IAEA ព្រោះថា កិច្ចសហប្រតិបត្តិការនេះហើយ គឺជាឱកាសដើម្បីផ្លាស់ប្តូរទិសដៅ និងជ្រើសរើសផ្លូវសន្តិភាព និងវិបុលភាព»។ ទីក្រុងតេអេរ៉ង់ ទើបបានប្រកាសផ្អាកជាផ្លូវការ នូវកិច្ចសហប្រតិបត្តិការ របស់ខ្លួនជាមួយ IAEA ក្រោយរងការវាយប្រហារ ពីសំណាក់ អ៊ីស្រាអែល និងសហរដ្ឋអាមេរិក ទៅលើកន្លែងនុយក្លេអ៊ែររបស់ខ្លួន កាលពីខែមិថុនា។ យ៉ាងណាមិញ លោកស្រី Bruce បញ្ជាក់ថា «អ៊ីរ៉ង់ត្រូវតែសហការដោយ មិនបង្អង់យូរ ជាមួយ IAEA រួមទាំង ការផ្តល់ព័ត៌មានដែលត្រូវការដើម្បីបញ្ជាក់ និងដោះស្រាយសំណួរ ដែលមានរយៈពេលយូរ ទាក់ទងនឹងសម្ភារៈនុយក្លេអ៊ែរ ដែលមិនបានប្រកាសឲ្យដឹង ក៏ដូចជា ផ្តល់សិទ្ធិចូលដំណើរការ ដោយគ្មានការរឹតត្បិត…

បរទេស៖ អាជ្ញាធរនៃប្រទេសបារាំងបានបញ្ជាក់ ពីការចាប់ផ្តើមមានមនុស្សស្លាប់ ព្រោះតែរលកម្តៅ ដែលបានវាយប្រហារ ប្រទេសអឺរ៉ុប មួយនេះ នាប៉ុន្មានថ្ងៃ ចុងក្រោយមកនេះ។ លោកស្រី Agnes Pannier-Runacher រដ្ឋមន្ត្រី ទទួលបន្ទុកការផ្លាស់ប្តូរអេកូឡូស៊ី បានបញ្ជាក់ឲ្យដឹង កាលពីថ្ងៃពុធថា មនុស្សពីរនាក់បានស្លាប់ ដោយសារជំងឺ ទាក់ទងនឹងកំដៅក្តៅខ្លាំង។ ក្រៅពីនេះ មានមនុស្ស ជាង៣០០នាក់ផ្សេងទៀត បានរងរបួស ទទួលការព្យាបាល។ ប្រទេសបារាំងបានកំណត់ថា «ខែមិថុនា» ជាខែក្តៅបំផុត ទីពីរ ចាប់តាំងពីកំណត់ត្រាបានចាប់ផ្តើម នៅឆ្នាំ១៩០០ ក្នុងនោះ ខែមិថុនាក្តៅបំផុត ទី១ គឺស្ថិតនៅក្នុងឆ្នាំ ២០០៣ ជាឆ្នាំដែលធ្លាប់មានមនុស្សស្លាប់ប្រមាណ៥០០នាក់ ព្រោះតែជំងឺពាក់ព័ន្ធនឹងរលកកម្តៅ។ កាលពីថ្ងៃអង្គារ ទីភ្នាក់ងារអាកាសធាតុជាតិ របស់ប្រទេសបារាំង Meteo-France បានដាក់ទីក្រុងប៉ារីស និង តំបន់ចំនួន១៥ផ្សេងទៀត ស្ថិតក្នុងការប្រកាសអាសន្នអាកាសធាតុក្តៅបំផុត ជាមួយនឹងសីតុណ្ហភាពរហូតដល់៤១អង្សាសេ។ ជារួម សីតុណ្ហភាពខ្ពស់ នៅទូទាំងទ្វីបអឺរ៉ុប ក្នុងសប្តាហ៍នេះ បានបំបែកកំណត់ត្រាថ្មី ដែលនាំទៅដល់ការបិទសាលារៀន ជិត ២,០០០កន្លែង នៅក្នុងប្រទេសបារាំង…