មន្រ្តីជាន់ខ្ពស់ក្រសួងការបរទេស និងសហប្រតិបត្តិការអន្តរជាតិ បានណែនាំដល់ប្រជាពលរដ្ឋខ្មែរកំពុងរស់នៅ និងសិក្សានៅប្រទេសបារាំង ឱ្យបង្កើនការប្រុងប្រយ័ត្នខ្ពស់ និងជៀសវាងការធ្វើដំណើរទៅក្បែរតំបន់ដែលមានការធ្វើ បាតុកម្ម ដើម្បីសុវត្ថិភាពផ្ទាល់ខ្លួន។ អ្នកនាំពាក្យស្តីទីក្រសួងការបរទេស និងសហប្រតិបត្តិការអន្តរជាតិ ឯកឧត្តម ចាន់ រតនា បានបញ្ជាក់ប្រាប់ AMS នៅថ្ងៃនេះថា ពលរដ្ឋ និងនិស្សិតខ្មែរទាំងអស់នៅប្រទេសបារាំងមានសុវត្ថិភាពល្អ ហើយមិនមានការពាក់ព័ន្ធនឹងការធ្វើបាតុកម្មឡើយ ខណៈស្ថានការណ៍បាតុកម្មបច្ចុប្បន្នស្ថិតក្រោមការគ្រប់គ្រងរបស់រដ្ឋាភិបាលបារាំង។ ទោះជាយ៉ាងណា ស្ថានទូតកម្ពុជាប្រចាំប្រទេសបារាំង ក៏នៅតែអំពាវនាវឱ្យពលរដ្ឋ អ្នកទៅកម្សាន្ត និងនិស្សិតខ្មែរទាំងអស់ បង្កើនការប្រុងប្រយ័ត្នខ្ពស់ ដោយជៀសវាងទៅក្បែរទីតាំងបាតុកម្ម និងត្រូវអនុវត្តតាមការណែនាំរបស់អាជ្ញាធរមូលដ្ឋាន។ បើតាមអ្នកនាំពាក្យ ប្រសិនបើជួបប្រទះហេតុការណ៍បន្ទាន់ ពលរដ្ឋអាចទាក់ទងទៅស្ថានទូតកម្ពុជា ឬក្រសួងការបរទេសដោយផ្ទាល់ ដើម្បីទទួលបានអន្តរាគមន៍ទាន់ពេលវេលា។ ប្រទេសមួយចំនួនទៀតនៅអាស៊ាន ក៏បានណែនាំឱ្យប្រជាពលរដ្ឋខ្លួន ដែលកំពុងរស់នៅប្រទេសបារាំង បង្កើនការប្រុងប្រយ័ត្នខ្ពស់ដូចគ្នា។ បាតុកម្មនៅប្រទេសបារាំង បានផ្ទុះឡើងដំបូងចេញពីការតវ៉ារបស់ក្រុមសិស្ស-និស្សិត ប្រឆាំងនឹងការកាត់បន្ថយថវិកាក្នុងវិស័យអប់រំ ការកើនឡើងនៃថ្លៃជីវភាព និងតម្លៃប្រេង ដែលជាផលប៉ះពាល់កើតចេញពីសង្គ្រាមនៅអ៊ីរ៉ង់។ ទំហំបាតុកម្មនេះបានរីករាលដាលកាន់តែធំ កាលពីថ្ងៃទី១៧ ខែតុលា កន្លងទៅ ក្រោយមានការចូលរួមពីប្រជាពលរដ្ឋទូទៅ សហជីពកម្មករ និងក្រុមអាវកាក់លឿង ដើម្បីទាមទារឱ្យរដ្ឋាភិបាលបញ្ចុះតម្លៃទំនិញ ព្រមទាំងដំឡើងប្រាក់ខែ និងប្រាក់សោធននិវត្តន៍៕ ទួន សុផល

ឯកឧត្តមអភិសន្តិបណ្ឌិត ស សុខា រដ្ឋមន្ត្រីក្រសួងមហាផ្ទៃ បានប្រកាសចាត់វិធានការតាមផ្លូវច្បាប់យ៉ាងតឹងរ៉ឹងចំពោះជនស៊ីវិលដែលបន្លំខ្លួនជាសមត្ថកិច្ច ក្លែងឯកសារសាធារណៈ ឬបណ្ណសម្គាល់ខ្លួនជាសមត្ថកិច្ច ព្រមទាំងមន្ត្រីដែលប្រើប្រាស់អំណាចខុសច្បាប់ ដើម្បីគំរាមកំហែង ឬទារផលប្រយោជន៍ពីប្រជាពលរដ្ឋ។ តាមរយៈសារបង្ហោះលើបណ្ដាញសង្គម ឯកឧត្តម ស សុខា បានបញ្ជាក់ថា ករណីជនស៊ីវិលបន្លំខ្លួនជាសមត្ថកិច្ច ក្លែងឯកសារសាធារណៈ ឬឯកសណ្ឋានសមត្ថកិច្ច និងការបន្លំខ្លួនទៅឃាត់ខ្លួន ឆែកឆេរ សាកសួរ ឬគំរាមកំហែងប្រជាពលរដ្ឋដោយខុសច្បាប់ ដើម្បីទាញយកផលប្រយោជន៍ គឺជាបទល្មើសព្រហ្មទណ្ឌ ដែលត្រូវស៊ើបអង្កេត កំណត់មុខសញ្ញា ចាប់ខ្លួន និងកសាងសំណុំរឿងបញ្ជូនទៅតុលាការផ្ដន្ទាទោសតាមច្បាប់។ ចំពោះមន្ត្រីចំណុះក្រសួងមហាផ្ទៃ ដែលប្រើប្រាស់តួនាទី ឬអំណាចដោយគ្មានភារកិច្ច ដើម្បីឃាត់ខ្លួន សំឡុត គំរាមកំហែង បង្ខិតបង្ខំ ឬទារផលប្រយោជន៍ពីប្រជាពលរដ្ឋ ជាពិសេសក្នុងទម្រង់«ធ្វើស៊ី»ជាដើមនោះ ឯកឧត្តម ស សុខា ប្រកាសថា មន្ត្រីទាំងនោះនឹងត្រូវបណ្តេញចេញពីក្របខណ្ឌ ហើយត្រូវកសាងសំណុំរឿងទៅអង្គភាពប្រឆាំងអំពើពុករលួយចាត់ការបន្តដោយគ្មានការលើកលែង ឬយោគយល់ឡើយ។ ជាមួយគ្នានេះ ឯកឧត្តមអភិសន្តិបណ្ឌិត បានអំពាវនាវដល់ប្រជាពលរដ្ឋឱ្យរាយការណ៍ ឬដាក់ពាក្យបណ្ដឹងទៅកាន់អាជ្ញាធរ និងអង្គភាពនគរបាលដែលនៅជិតបំផុត ប្រសិនបើបានជួបប្រទះ ឬមានព័ត៌មានអំពីជនស៊ីវិលបន្លំខ្លួនជាសមត្ថកិច្ច ឬមន្ត្រីប្រព្រឹត្តខុសច្បាប់។ ក្នុងករណីចាំបាច់ ពលរដ្ឋអាចរាយការណ៍មកតាមប្រព័ន្ធទទួលពាក្យបណ្តឹងអនឡាញ នៃអគ្គាធិការដ្ឋានក្រសួងមហាផ្ទៃ៕…

ក្រៅពីរបរកសិកម្មធ្វើស្រែចម្ការ បងប្អូនប្រជាពលរដ្ឋជាច្រើនគ្រួសារនៅស្រុកគូលែន ខេត្តព្រះវិហារ បានចាប់យកឱកាសរកប្រាក់ចំណូលបន្ថែម តាមរយៈការធ្វើការងារនៅក្នុងសិប្បកម្មកែច្នៃជន្លេនមួយមួយកន្លែង ដែលអាចផ្តល់ចំណូលល្អប្រសើរសម្រាប់លើកស្ទួយជីវភាពគ្រួសារ។ សិប្បកម្មកែច្នៃជន្លេនខ្នាតសហគមន៍មួយកន្លែងនេះ ស្ថិតនៅក្នុងភូមិស្របាល ឃុំភ្នំពេញ ស្រុកគូលែន បានបើកដំណើរការអស់រយៈពេល ៧ឆ្នាំមកហើយ ដោយបានឈរជើងយ៉ាងរឹងមាំ និងក្លាយជាប្រភពចំណូលដ៏សំខាន់សម្រាប់អ្នកភូមិ។ លោក ឈីង សុយុទ្ធ ម្ចាស់សិប្បកម្មកែច្នៃជន្លេន បានឱ្យដឹងថា ការចាប់ផ្តើមដំបូងឡើយសិប្បកម្មរបស់លោកធ្វើជាលក្ខណៈខ្នាតតូច ប៉ុន្តែដោយសារមានតម្រូវការ និងចង់ជួយបង្កើតការងារជូនអ្នកភូមិ ទើបសម្រេចពង្រីកសិប្បកម្មឱ្យធំជាងមុន និងបំពាក់ឧបករណ៍គ្រប់គ្រាន់សម្រាប់កម្មករ។ បើតាមលោក ឈីង សុយុទ្ធ ការងារនេះបានជួយដល់ប្រជាពលរដ្ឋយ៉ាងច្រើន ជាពិសេសនៅរដូវទំនេរពីការងារស្រែចម្ការ។ ប្រាក់ចំណូលប្រចាំថ្ងៃមិនត្រឹមតែជួយសម្រាលបន្ទុកគ្រួសារ ឬការហូបចុកប៉ុណ្ណោះទេ ប៉ុន្តែថែមទាំងជាប្រភពទ្រទ្រង់ដល់ការសិក្សារបស់កូនៗ ដូចជាការទិញសម្លៀកបំពាក់ និងសម្ភារសិក្សា ដោយមិនបារម្ភពីការខ្វះខាត ឬបង្ខំចិត្តធ្វើចំណាកស្រុកឡើយ។ នេះបើតាមការលើកឡើងរបស់អ្នកស្រី ញ៉ាញ់ សំអាន ពលរដ្ឋរស់នៅស្រុកគូលែន ខេត្តព្រះវិហារ។ ដូចគ្នានេះដែរ អ្នកស្រី ឈុំ ផល្លី ពលរដ្ឋរស់នៅស្រុកគូលែន ខេត្តព្រះវិហារ បានឱ្យដឹងថា ការងារកែច្នៃជន្លេនអាចឱ្យអ្នកស្រីរកចំណូលបានប្រមាណ ១០ម៉ឺនរៀលក្នុងមួយថ្ងៃ។ ដូចជាពលរដ្ឋផ្សេងទៀតនៅក្នុងមូលដ្ឋាន ប្រាក់ចំណូលនេះបានរួមចំណែកយ៉ាងសំខាន់ក្នុងការផ្គត់ផ្គង់ជីវភាពគ្រួសារអ្នកស្រី ។ ម្ចាស់សិប្បកម្ម បានគូសបញ្ជាក់ថា…

វិស័យកសិកម្ម គឺជាវិស័យដ៏មានសក្តានុពលមួយរបស់កម្ពុជា ក្នុងការរួមចំណែកជួយទ្រទ្រង់កំណើនសេដ្ឋកិច្ច និងសន្តិសុខស្បៀង ប៉ុន្តែកន្លងមក​​ អ្នកវិនិយោគហាក់មើលរំលងការវិនិយោគក្នុងវិស័យនេះ។ វិនិយោគិនភាគច្រើនបានចាប់អារម្មណ៍តែលើវិស័យឧស្សាហកម្មកែច្នៃកសិផល ជាពិសេសការកែច្នែគ្រាប់ស្វាយចន្ទី និងអង្ករ សម្រាប់នាំចេញ។ ប៉ុន្តែ ចាប់តាំងពីកម្ពុជាមានជម្លោះព្រំដែនជាមួយប្រទេសថៃ វិស័យកសិកម្មក៏ទទួលបានការចាប់អារម្មណ៍ខ្លាំងពីអ្នកវិនិយោគ ទាំងក្នុងស្រុក និងក្រៅស្រុក។ នេះបើតាមការធ្វើបទបង្ហាញរបស់លោកស្រី សេង មូលិកា អគ្គនាយករងនៃអគ្គនាយកដ្ឋានវិទ្យាសាស្ត្រ បច្ចេកវិទ្យា និងនវានុវត្តន៍ នៅថ្ងៃទី២៣ ខែតុលា ឆ្នាំ២០២៦ នៅក្នុងវេទិកា និងពិព័រណ៍កសិកម្មឆ្នាំ២០២៦។ ទោះបីយ៉ាងណា ជម្លោះព្រំដែនកម្ពុជា និងថៃ ក៏បានធ្វើឱ្យប៉ះពាល់យ៉ាងធ្ងន់ធ្ងរដល់សេដ្ឋកិច្ចកម្ពុជា ពិសេសការនាំចេញកសិផលកម្ពុជាតែម្ដង ព្រោះមុនពេលមានជម្លោះព្រំដែន ប្រទេសថៃគឺជាទីផ្សារនាំចេញកសិផលដ៏ធំរបស់កម្ពុជា។ បច្ចុប្បន្ន ការនាំចេញកសិផលកម្ពុជាទៅកាន់ទីផ្សារថៃ គឺមានតិចតួចបំផុត។ នេះជាការបញ្ជាក់របស់លោកស្រី សេង មូលិកា។ ចំណែកលោកឧកញ៉ា ស៊ិន ចន្ធី អនុប្រធានសមាគមភស្តុភារកម្មកម្ពុជា បានបញ្ជាក់ថា ក្រោយជម្លោះព្រំដែន សកម្មភាពដឹកជញ្ជូនទំនិញរបស់ប្រទេសទាំងពីរ ដំណើរការជាធម្មតាតាមផ្លូវទឹក និងផ្លូវអាកាស។ ទំនិញដែលកម្ពុជា បន្តនាំចូលពីប្រទេសថៃតាមផ្លូវទឹក និងផ្លូវអាកាស ភាគច្រើនគឺជាគ្រឿងបង្គុំដែលផលិតដោយក្រុមហ៊ុនជប៉ុន។ យោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា ក្នុងរយៈពេល…

បច្ចុប្បន្ននេះ ផលិតផលកសិកម្មកម្ពុជាត្រូវបាននាំចេញទៅកាន់ប្រទេសចំនួន ១៧៧ ជុំវិញពិភពលោក ដែលបង្ហាញពីការពង្រីកទីផ្សារនាំចេញ និងសក្តានុពលកសិកម្មកម្ពុជាលើឆាកអន្តរជាតិ។ ក្នុងឆ្នាំ២០២៥ ការនាំចេញកសិផលសរុបរបស់កម្ពុជាបានកើនឡើងដល់ ១៥លានតោន។ លោកបណ្ឌិត កែ មុន្ធីវុធ ប្រធាននាយកដ្ឋានការពារដំណាំ អនាម័យ និងភូតគាមអនាម័យ នៃអគ្គនាយកដ្ឋានក្សេត្រសាស្ត្រ បានថ្លែងក្នុងវេទិកា និងពិព័រណ៍កសិកម្មកម្ពុជា ឆ្នាំ២០២៦ (CAFE26) នៅសាលពិព័រណ៍កោះពេជ្រ នាព្រឹកថ្ងៃទី២៣ ខែតុលា ឆ្នាំ២០២៦ ថា ការនាំចេញកសិផលក្នុងបរិមាណច្រើនទៅកាន់ទីផ្សារអន្តរជាតិ បង្ហាញពីការរីកចម្រើននៃវិស័យកសិកម្មរបស់កម្ពុជា ទាំងផ្នែកបរិមាណ គុណភាព និងប្រព័ន្ធគាំទ្រដល់ការនាំចេញ។ លោកបណ្ឌិត កែ មុន្នីវុធ បញ្ជាក់ថា ការអនុលោមតាមលក្ខខណ្ឌអនាម័យ និងភូតគាមអនាម័យ មានសារៈសំខាន់ក្នុងការធានាសុវត្ថិភាព និងគុណភាពផលិតផលកសិកម្ម ស្របតាមស្តង់ដារប្រទេសនាំចូល ព្រមជួយសម្រួលដល់ការនាំចេញ និងពង្រីកទីផ្សារកសិផលកម្ពុជាទៅកាន់អន្តរជាតិ។ លោកបណ្ឌិត កែ មុន្នីវុធ បានលើកឡើងថា បច្ចុប្បន្ន មានក្រុមហ៊ុនជាង ២ពាន់ ដែលទទួលបានវិញ្ញាបនបត្របញ្ជាក់ការអនុវត្តកសិកម្មល្អ ដើម្បីធានាគុណភាព និងសុវត្ថិភាពផលិតផលកសិកម្ម ស្របតាមស្តង់ដារដែលបានកំណត់។​ លោកបណ្ឌិត បានបញ្ជាក់ថា ក្រសួងកសិកម្ម…

ក្រុមការងារជំនាញនៃក្រសួងបរិស្ថាន បានចុះពិនិត្យ សិក្សាស្រាវជ្រាវ និងធ្វើកំណាយផូស៊ីលឈើលើកទី២ នៅតំបន់ភ្នំភូង៉យ ស្ថិតក្នុងភូមិកាតូត ឃុំកំភុន ស្រុកសេសាន ខេត្តស្ទឹងត្រែង ចាប់ពីថ្ងៃទី២១ ដល់ថ្ងៃទី៣០ ខែតុលា ឆ្នាំ២០២៦ ដើម្បីពង្រឹងការអភិរក្ស និងការគ្រប់គ្រងធនធានបេតិកភណ្ឌធម្មជាតិ ឱ្យមានចីរភាព និងនិរន្តរភាពសម្រាប់មនុស្សជំនាន់ក្រោយ។ លោក លឹម វណ្ណច័ន្ទ  ប្រធានការិយាល័យនៃនាយកដ្ឋានបេតិកភណ្ឌធម្មជាតិ នៃអគ្គនាយកដ្ឋានសហគមន៍មូលដ្ឋានក្រសួងបរិស្ថាន បានឱ្យដឹងថា សកម្មភាពកំណាយផូស៊ីលឈើលើកទី១ នៅតំបន់ភ្នំភូង៉យនេះ បានធ្វើឡើងកាលពីខែកក្កដា ឆ្នាំ២០២៥ ដោយទទួលបានលទ្ធផលគួរឱ្យកត់សម្គាល់ គឺបានរកឃើញផូស៊ីលឈើចំនួន ៣ ដែលមានមុខកាត់ប្រមាណ ១ ម៉ែត្រ និងប្រវែងពី១០ ដល់ប្រមាណ ៤០ ម៉ែត្រ។ តាមការវាយតម្លៃបឋម ផូស៊ីលឈើនេះមានអាយុកាលចន្លោះពី ១០ ម៉ឺនទៅ ២លានឆ្នាំ។ ផ្អែកលើលទ្ធផលជាវិជ្ជមាននៃកំណាយលើកទី១ ក្រសួងបរិស្ថានបានបន្តជំរុញសកម្មភាពកំណាយលើកទី២ ក្នុងឆ្នាំ២០២៦ នេះ និងរកឃើញផូស៊ីលដើមឈើប្រវែងជាង៤០ម៉ែត្រនៅក្នុងកន្លែងតែមួយ។ ក្រុមការងារនឹងប្រមូលចងក្រងទិន្នន័យវិទ្យាសាស្ត្របន្ថែម និងរៀបចំផែនការការពារទីតាំងបេតិកភណ្ឌធម្មជាតិដ៏មានតម្លៃមិនអាចកាត់ថ្លៃបានមួយនេះឱ្យជៀសផុតពីការបំផ្លិចបំផ្លាញ និងរក្សាបាននូវតម្លៃប្រវត្តិសាស្ត្រសម្រាប់កម្ពុជានិងពិភពលោកទាំងមូល។ គិតត្រឹមឆ្នាំ២០២៦ ក្រុមការងារបានកំណត់ និងចងក្រងបញ្ជីស្ថានីយផូស៊ីលសរុបចំនួន ៧៨ទីតាំងនៅទូទាំងប្រទេស ក្នុងនោះមាននៅខេត្តព្រះវិហារ…