ខេត្តតំបន់ឆ្នេរសមុទ្រដ៏សំខាន់ នៅក្នុងប្រទេសវៀតណាម ត្រូវបានប្រកាសអាសន្ន ដោយសារតែគ្រោះរាំងស្ងួត។ រលកកម្តៅរយៈពេលមួយសប្តាហ៍ បាននាំមកនូវគ្រោះរាំងស្ងួត ខណៈដែលទឹកប្រៃចេះតែបន្តចូលតំបន់ Tan Phu Dong នៃខេត្ត Tien Giang ជាខេត្តដែលមានឆ្នេរសមុទ្រប្រវែង ១២ គីឡូម៉ែត្រ តាមបណ្តោយសមុទ្រចិនខាងត្បូង។ នៅថ្ងៃទី៦ ខែមេសា វៀតណាមបានចេញសេចក្តីប្រកាស ដាក់ខេត្តមួយនេះ ក្នុងភាពអាសន្ន ខណៈដែលប្រជាជនវៀតណាមរាប់ពាន់នាក់ នៅទីនោះ កំពុងខ្វះខាតទឹកសាប យ៉ាងធ្ងន់ធ្ងរ។ សេចក្តីប្រកាសបានឲ្យដឹងដែរថា ការជ្រៀតចូលនៃទឹកអំបិលពីសមុទ្របានប៉ះពាល់យ៉ាងធ្ងន់ធ្ងរដល់ដំណាំ និងផ្ទះរាប់ពាន់គ្រួសារ ក្នុងចំណោមប្រជាជន ៤៣០០០នាក់ នៅតំបន់នោះ។ ដីសណ្ដទន្លេមេគង្គប្រឈមនឹងការជ្រៀតចូលទឹកប្រៃ ជារៀងរាល់ឆ្នាំ ប៉ុន្តែ សម្រាប់ឆ្នាំនេះ អាកាសធាតុក្តៅខ្លាំង និងការកើនឡើងកម្រិតទឹកសមុទ្រ ជំរុញដោយការប្រែប្រួលអាកាសធាតុ កំពុងបង្កើនហានិភ័យ។ ការស្រាវជ្រាវចេញផ្សាយ នៅក្នុងខែមីនា បានបង្ហាញថា ដីសណ្ដទន្លេមេគង្គរបស់វៀតណាម ដែលផ្តល់អាហារ និងជីវភាពរស់នៅ សម្រាប់មនុស្សរាប់សិបលាននាក់ ប្រឈមមុខនឹងការខាតបង់ដំណាំកសិកម្ម ជិត ៣ពាន់លានដុល្លារអាមេរិក ក្នុងមួយឆ្នាំ ដោយសារទឹកប្រៃកាន់តែច្រើន ចូលដីបង្កបង្កើនផល៕ ប្រភពពី AFP…

បាងកក៖ នៅថ្ងៃចន្ទនេះ ផ្សែងអ័ព្ទយ៉ាងក្រាស់ ដ៏គ្រោះថ្នាក់ បានគ្របដណ្តប់ខេត្ត ចំនួន ៣៧ ក្នុងចំណោមខេត្តសរុប ចំនួន៧៧ នៅប្រទេសថៃ។ ផ្សែងអ័ព្ទភាគច្រើន មាននៅភាគខាងជើង ហើយប្រជាជន នៅខេត្តឈៀងរ៉ៃ ទទួលរងនូវកម្រិតដ៏អាក្រក់បំផុត នៃភាគល្អិតឆ្មារ PM2.5 ដោយគេដឹងថា PM2.5 មានវិជ្ជមាត្រប៉ុនសរសៃ សក់ និងដែលត្រូវបានអង្គការសហប្រជាជាតិ ចាត់ចំណាត់ថ្នាក់ជាសារធាតុបង្កឲ្យមានជំងឺមហារីក។ ភាគល្អិតឆ្មារនេះជ្រៀតចូលទៅក្នុងសួត ទៅក្នុងឈាម ហើយអាចបង្កឲ្យមានជំងឺផ្លូវដង្ហើម និងជំងឺបេះដូង។ នាយករដ្ឋមន្ត្រីថៃ លោក Srettha Thavisin បានសរសេរ នៅលើបណ្តាញសង្គម ថា រដ្ឋាភិបាលកំពុងប្រឹងប្រែងអស់ពីសមត្ថភាព ដើម្បីគ្រប់គ្រងផ្សែងអ័ព្ទ និងជួយប្រជាពលរដ្ឋ ដែលរងផលប៉ះពាល់។ អភិបាលខេត្តឈៀងម៉ៃ លោក Nirat Pongsitthaworn បានប្រាប់អ្នកយកព័ត៌មានថា អាជ្ញាធរមូលដ្ឋាន និងមន្ទីរពេទ្យ បានត្រៀមបន្ទប់ខ្យល់ស្អាតរួចរាល់ សម្រាប់អ្នកស្រុក ព្រមទាំង ម៉ាស់ ផ្តល់ជូនប្រជាលពលរដ្ឋ៕ ប្រភពពី Bangkok Post ប្រែសម្រួល៖ សារ៉ាត

មូស្គូ៖ ប្រធានាធិបតីនៃប្រទេសរុស្ស៊ី លោក ពូទីន បាននិយាយថា អ្នកនិយមអ៊ីស្លាមគ្មានបំណង កំណត់គោលដៅ វាយប្រហារ លើប្រទេសរុស្ស៊ីនោះទេ។ ជាការថ្លែងក្រោយពេលមានព្រឹត្តិការណ៍វាយប្រហារកន្លែងប្រគុំតន្ត្រី នៅក្នុងទីក្រុងមូស្គូ ស្លាប់មនុស្សជាង១០០នាក់ នាពេលថ្មីៗនេះ។ ថ្លែងក្នុងកិច្ចប្រជុំសភា កាលពីថ្ងៃព្រហស្បតិ៍ ប្រធានាធិបតីរុស្ស៊ី លោក វ្ល៉ាឌីមៀ ពូទីន មានប្រសាសន៍ថា «វិមានក្រឹមឡាំងមានហេតុផលច្រើន ដែលជឿជាក់ថា គោលដៅចម្បងរបស់អ្នកដែលបានបញ្ជាឱ្យមានការវាយប្រហារភេរវកម្ម បង្ហូរឈាម និងគួរឱ្យរន្ធត់ នៅទីក្រុងមូស្គូ ថ្មីៗនេះ គឺចង់ធ្វើឱ្យខូចខាតដល់ការបង្រួបប្រួមរបស់យើង» លោក ពូទីន បានបន្ថែមថា «ពួកអ្នកនិយមអ៊ីស្លាម គ្មានហេតុផល ដើម្បីកំណត់គោលដៅ វាយប្រហារ លើរុស្ស៊ីទេ»។ ទីក្រុង មូស្គូ បានព្យាយាម ម្តងហើយម្តងទៀត ដើម្បីស្តីបន្ទោសដល់ទីក្រុង Kyiv ឬ លោកខាងលិច ចំពោះការវាយប្រហារនេះ ប៉ុន្តែ មេដឹកនាំអ៊ុយក្រែន និងលោកខាងលិច បានបដិសេធ។ ជាមួយគ្នា ក្រុមរដ្ឋឥស្លាម ឬ IS បានអះអាងថា ពួកគេគឺជាអ្នកវាយប្រហារ…