ប៉េកាំង៖ ស្ថានទូតចិនប្រចាំប្រទេសមីយ៉ាន់ម៉ា នៅថ្ងៃព្រហស្បតិ៍សប្តាហ៍នេះ បានអំពាវនាវឱ្យពលរដ្ឋរបស់ខ្លួន ចាកចេញពីសង្កាត់នៅភាគខាងជើងប្រទេសមីយ៉ាន់ម៉ា ជាប់ព្រំដែនប្រទេសជិតខាង ដោយសារហានិភ័យសន្តិសុខតានតឹងខ្លាំង ខណៈក្រុមចលនាប្រដាប់អាវុធភាគតិចបង្កើនការប្រយុទ្ធនឹងយោធារដ្ឋាភិបាល។ ស្ថានទូតចិនប្រចាំប្រទេសមីយ៉ាន់ម៉ា បានបង្ហោះសារនៅលើបណ្តាញសង្គម WeChat ថា ជម្លោះនៅសង្កាត់ Laukkai នៃតំបន់ Kokang នៅភាគខាងជើងប្រទេសមីយ៉ាន់ម៉ា កំពុងបន្តកើតមាន ហើយហានិភ័យសន្តិសុខបានបង្កឱ្យប្រជាជនជាច្រើនជាប់គាំងនៅទីនោះ។ ហេតុដូច្នេះហើយ ជាថ្មីម្តងទៀត ស្ថានទូតចិនប្រចាំប្រទេសមីយ៉ាន់ម៉ា បានក្រើនរំលឹកដល់ប្រជាជនខ្លួននៅក្នុងសង្កាត់ Laukkai ចាកចេញពីទីនោះ ឱ្យបានឆាប់តាមដែលអាចធ្វើទៅបាន។ ជាមួយគ្នានេះ ក្រសួងការបរទេសចិនបានពណ៌នាស្ថានភាពនៅតំបន់ Kokang ថា “ធ្ងន់ធ្ងរ និងស្មុគស្មាញ”។ បើតាមអ្នកនាំពាក្យក្រសួងការបរទេសចិន លោកស្រី Mao Ning បាននិយាយថា ប្រទេសចិនតែងតែជឿជាក់ថា ការរក្សាបទឈប់បាញ់ និងកិច្ចចរចាសន្តិភាព គឺជាផលប្រយោជន៍របស់ភាគីពាក់ព័ន្ធទាំងអស់ជម្លោះនៅប្រទេសមីយ៉ាន់ម៉ា។ គួរបញ្ជាក់ថា កាលពីដើមខែនេះ ទីក្រុងប៉េកាំងនិយាយថា ខ្លួនបានសម្របសម្រួលកិច្ចចរចារវាងយោធា និងសម្ព័នភាពក្រុមប្រដាប់អាវុធជនជាតិភាគតិច ហើយបានឈានដល់កិច្ចព្រមព្រៀងមួយ សម្រាប់ “បទឈប់បាញ់បណ្តោះអាសន្ន”។ ប៉ុន្តែការប៉ះទង្គិចគ្នាបានបន្តកើតមាន នៅក្នុងផ្នែកខ្លះនៃរដ្ឋ Shan ជាមួយនឹងសមាជិកមួយក្រុមទៀតនៃសម្ព័ន្ធភាពនេះ គឺកងទ័ពរំដោះជាតិ Ta’ang…

ឡុងដ៍៖ ខ្យល់បក់បោកខ្លាំងដែលបង្កឡើងដោយព្យុះ Gerrit បានបង្កការខូចខាតយ៉ាងធ្ងន់ធ្ងរ ដល់ផ្នែកខ្លះនៃតំបន់ Greater Mancherster នៅភាគខាងជើងនៃប្រទេសអង់គ្លេស។ ព្យុះដែលវាយលុកអង់គ្លេស បានបង្កឱ្យមានខ្យល់បក់ និងភ្លៀងធ្លាក់ខ្លាំង បំផ្លាញផ្ទះសម្បែង លុបចោលការធ្វើដំណើរតាមរថភ្លើង និងធ្វើឱ្យមនុស្សរាប់ពាន់នាក់គ្មានអគ្គិសនីប្រើប្រាស់ ក្នុងថ្ងៃព្រហស្បតិ៍សប្តាហ៍នេះ នៅទូទាំងប្រទេសស្កុតឡែន និងផ្នែកខ្លះនៅភាគខាងជើងប្រទេសអង់គ្លេស។ អ្នកស្រុកត្រូវបានជម្លៀសចេញពីទីប្រជុំជន Stalybridge ជាកន្លែងដែលខ្យល់កន្ត្រាក់បង្កឡើងពីព្យុះ Gerrit បានផ្តួលរលំដើមឈើ, បំផ្លាញដំបូលផ្ទះ និងទម្លាក់កំទេចកំទីធ្វើឱ្យខូចខាតរថយន្តជាច្រើនគ្រឿង។ ក្រុមកម្មករបានប្រឈមមុខនឹងល្បឿនខ្យល់ ១២៨គីឡូម៉ែត្រក្នុងមួយម៉ោង នៅក្នុងតំបន់ឆ្នេរមួយចំនួននៃប្រទេសស្កុតឡែន ខណៈដែលពួកគេព្យាយាមស្តារថាមពលឡើងវិញ។ ទោះបីជាយ៉ាងណា លំនៅដ្ឋានប្រហែល ១៤,០០០ខ្នងនៅតែបន្តដាច់ចរន្តអគ្គិសនី។ ព្យុះ Gerrit ក៏បានបង្កការរំខានដល់សេវាកម្មរថភ្លើងនៅទូទាំងប្រទេសស្កុតឡេនផងដែរ ដោយការធ្វើដំណើរតាមខ្សែរថភ្លើងមួយចំនួនបានផ្អាកជាបណ្តោះអាសន្ន រហូតដល់មន្ត្រីអាចត្រួតពិនិត្យខ្សែបណ្តាញពេញលេញ។ ដោយឡែកនៅឯអាកាសយានដ្ឋាន Heathrow ដែលជាមជ្ឈមណ្ឌលធ្វើដំណើរដ៏សំខាន់របស់ចក្រភពអង់គ្លេសវិញ បានលុបចោលជើងហោះហើរចំនួន ១៨ជើង កាលពីថ្ងៃពុធសប្តាហ៍នេះ។ រីឯជើងហោះហើរទៅកាន់ទីក្រុងអឺរ៉ុបមួយចំនួន ដូចជាទីក្រុង Barcelona និង Berlin ក៏រងផលប៉ះពាល់ផងដែរ៕ ប្រភព៖ AFP ប្រែសម្រួលដោយ៖ ឈឹម ទីណា

ម៉ិកស៊ីកូ៖ រដ្ឋមន្រ្តីការបរទេសអាមេរិក លោក អាន់ថូនី ប្លីងគែន ព្រមទាំងមន្រ្តីជាន់ខ្ពស់អាមេរិកជាច្រើនរូបទៀត ធ្វើដំណើរទៅដល់ប្រទេសម៉ិកស៊ិកហើយ ដើម្បីជួបពិភាក្សាជាមួយប្រធានាធិបតីម៉ិកស៊ិក ជុំវិញការធ្វើអន្តោប្រវេសន៍កើនឡើងយ៉ាងគំហុក។ រដ្ឋមន្រ្តីការបរទេសអាមេរិក លោក អាន់ថូនី ប្លីងគែន បានប្រើពេល២ម៉ោង ក្នុងជំនួបពិភាក្សាបិទទ្វារជាមួយប្រធានាធិបតីម៉ិកស៊ិក លោក អាន់ទ្រេស ម៉ានូអែល ឡូប៉េស អូប្រាដ័រ រួមទាំងមន្រ្តីម៉ិកស៊ិកកំពូលៗដទៃទៀត ក្នុងកំលុងការបំពេញទស្សនកិច្ចមួយថ្ងៃ។ លោក ឡូប៉េស អូប្រាដ័រ បាននិយាយជាមួយលោក បៃដិន តាមទូរស័ព្ទកាលពីសប្តាហ៍មុន មុនពេលមានជំនួបជាមួយលោក ប្លីងគែន ថា ម៉ិកស៊ិកបាននឹងកំពុងព្យាយាមដោះស្រាយវិបត្តអន្តោប្រវេសន៍។ លោកថា ជនភៀសខ្លួនទាំងនោះបានសម្រេចចិត្តចាកចេញពីទីក្រុងរបស់ពួកគេ ក៏ព្រោះតែវិបត្តិសេដ្ឋកិច្ច និងសង្គមនៅលើពិភពលោក។ ដូច្នេះវិធានការដោះស្រាយបន្ទាន់ នោះគឺការលើកកម្ពស់សកម្មភាពផលិតភាព និងការបង្កើតការងារបន្ថែមទៀត។កាលពីប៉ុន្មានសប្តាហ៍មកនេះ ចំនួនជនអន្តោប្រវេសន៍ប៉ុនប៉ងឆ្លងព្រំដែនទៅអាមេរិកដោយខុសច្បាប់ បានកើនឡើងក្នុងចំនួនប្រមាណ១ម៉ឺននាក់ក្នុងមួយថ្ងៃ ពោលគឺច្រើនជិតទ្វេដង បើធៀបនឹងតួលេខ មុនផ្ទុះជំងឺរាតត្បាត។ រលកអន្តោប្រវេសន៍សម្រុកឆ្លងព្រំដែនច្រើនពេក រហូតដល់អាជ្ញាធរអាមេរិកសម្រេចបិទប៉ុស្តិ៍ព្រំដែន ដើម្បីងាកមើលខុសត្រូវក្រុមអន្តោប្រវេសន៍ឆ្លងដែនដោយខុសច្បាប់វិញ។ ពួកគេភាគច្រើនរត់គេចពីប្រទេសកំណើតនៅតំបន់អាមេរិកកណ្តាល ដែលញាំញីដោយភាពក្រីក្រ អំពើហិង្សា និងគ្រោះមហន្តរាយធម្មជាតិ។ បើតាមអង្គការសហប្រជាជាតិ ចំនួនជនអន្តោប្រវេសន៍មកពីហៃទី ដែលមានហិង្សាបងធំបងតូច និងមកពីវេណេស៊ុយអេឡាដែលលង់ក្នុងវិបត្តិសេដ្ឋកិច្ច…

ព្យុងយ៉ាង៖ មេដឹកនាំកូរ៉េខាងជើង លោក គីម ជុងអ៊ុន បានជំរុញឱ្យគណបក្សរបស់គាត់ បង្កើនការត្រៀមខ្លួនសម្រាប់សង្គ្រាម ក្នុងនោះរួមមានទាំងការពន្លឿនកម្មវិធីអភិវឌ្ឍអាវុធនុយក្លេអ៊ែររបស់ខ្លួន។ មេដឹកនាំកូរ៉េខាងជើង លោក គីម ជុងអ៊ុន បានអត្ថាធិប្បាយបែបនេះ នៅក្នុងកិច្ចប្រជុំចុងឆ្នាំដែលកំពុងបន្តរបស់កូរ៉េខាងជើង ជាទីដែលលោក គីម ត្រូវបានគេរំពឹងថា នឹងបង្ហាញការសម្រេចចិត្តពីគោលនយោបាយសំខាន់ៗសម្រាប់ឆ្នាំ២០២៤។ ប្រព័ន្ធផ្សព្វផ្សាយផ្លូវការកូរ៉េខាងជើងបានរាយការណ៍ថា លោក គីម បានស្នើឱ្យបង្កើនល្បឿនត្រៀមខ្លួនសម្រាប់សង្រ្គាមនៅទូទាំងវិស័យ រួមទាំងការអភិវឌ្ឍអាវុធនុយក្លេអ៊ែរ និងការការពារស៊ីវិល។ បន្ថែមលើនេះ លោក គីម បានសង្កត់ធ្ងន់ថា ស្ថានភាពយោធានៅលើតំបន់ឧបទ្វីបកូរ៉េ បានធ្លាក់ជ្រៅក្នុងភាពតានតឹងខ្លាំងបំផុត ដោយសារតែការប្រឈមមុខដាក់គ្នាមិនធ្លាប់មានពីមុនមក ប្រឆាំងនឹងកូរ៉េខាងជើងពីសំណាក់សហរដ្ឋអាមេរិក។ គួរកត់សម្គាល់ថា អ្វីដែលជាសមិទ្ធិផលដ៏លេចធ្លោរបស់កូរ៉េខាងជើងក្នុងឆ្នាំនេះ នោះគឺបាញ់បង្ហោះផ្កាយរណបឈ្លបយកការណ៍ដោយជោគជ័យ និងបានលើកតម្កើងឋានៈប្រទេសរបស់ខ្លួន ជាមហាអំណាចនុយក្លេអ៊ែរនៅក្នុងរដ្ឋធម្មនុញ្ញ។ ជាការឆ្លើយតប កូរ៉េខាងត្បូង ជប៉ុន និងសហរដ្ឋអាមេរិក បានបង្កើនកិច្ចសហប្រតិបត្តិការលើវិស័យការពារជាតិ ដើម្បីប្រឈមមុខនឹងការបាញ់សាកល្បងអាវុធដ៏ទៃទៀតដោយកូរ៉េខាងជើង៕ ប្រភព៖ AFP ប្រែសម្រួលដោយ៖ ឈឹម ទីណា

ហ្សារកាតា៖ និស្សិតសាកលវិទ្យាល័យរាប់រយនាក់នៅខេត្តភាគខាងលិចបំផុតរបស់ប្រទេសឥណ្ឌូនេស៊ី នៅថ្ងៃពុធសប្តាហ៍នេះ បានសម្រុកចូលទីជម្រកបណ្តោះអាសន្នសម្រាប់ជនភៀសខ្លួនរ៉ូហ៊ីងយ៉ាជាងមួយរយនាក់ ដើម្បីបង្ខំឱ្យពួកគេចាកចេញពីទីនោះ។ ក្រុមនិសិ្សតមកពីសាកលវិទ្យាល័យផ្សេងៗគ្នា បានសម្រុកចូលសាលរដ្ឋាភិបាលក្នុងរដ្ឋធានី បេនដា អាឆេ ជាទីដែលជនភៀសខ្លួនរ៉ូហ៊ីងយ៉ាចំនួន ១៣៧នាក់ស្នាក់នៅ។ ក្រុមនិសិត្សទាំងនោះ បានទាមទារឱ្យពួកគេផ្លាស់ទៅការិយាល័យអន្តោប្រវេសន៍ក្នុងតំបន់ ដូច្នេះពួកគេអាចត្រូវបាននិរទេសចេញពីប្រទេសឥណ្ឌូនេស៊ី។ ក្រុមនិសិ្សតបានស្រែកថា “បណ្តេញពួកគេចេញទៅ” និង “បដិសេធជនជាតិរ៉ូហ៊ីងយ៉ារស់នៅខេត្តអាឆេ”។ ទន្ទឹមគ្នា ក្រុមនិសិ្សតទាំងនោះ ក៏បានប្រើហិង្សាលើជនភៀសខ្លួនរ៉ូហ៊ីងយ៉ាផងដែរ ប៉ុន្តែត្រូវបានប៉ូលិសព្យាយាមរារាំង។ ហើយទីបំផុត ប៉ូលិសបានយល់ស្របនឹងការទាមទាររបស់ក្រុមនិសិ្សត ដោយនាំជនភៀសខ្លួនរ៉ូហ៊ីងយ៉ាទាំងអស់នោះ ឡើងលើរថយន្តចាកចេញទៅកាន់ការិយាល័យរដ្ឋាភិបាលមួយផ្សេងទៀត ដែលស្ថិតនៅក្បែរគ្នា។ គួរបញ្ជាក់ថា ជនភៀសខ្លួនរ៉ូហ៊ីងយ៉ាជាង ១,៥០០នាក់ បានមកដល់ច្រាំងសមុទ្រនៃខេត្តអាឆេ ចាប់តាំងពីពាក់កណ្តាលខែវិច្ឆិកា នៅក្នុងអ្វីដែលអង្គការសហប្រជាជាតិនិយាយថា ជាការហូរចូលដ៏ធំបំផុតក្នុងរយៈពេល ៨ឆ្នាំ។ យ៉ាងណាមិញ ឥណ្ឌូនេស៊ីមិនមែនជាប្រទេសហត្ថលេខី នៃអនុសញ្ញាជនភៀសខ្លួនរបស់អង្គការសហប្រជាជាតិទេ និងបាននិយាយថា ខ្លួនមិនអាចបង្ខំឱ្យទទួលយកជនភៀសខ្លួនពីប្រទេសមីយ៉ាន់ម៉ានោះទេ ដោយអំពាវនាវជំនួសឲ្យប្រទេសជិតខាង ដើម្បីចែករំលែកបន្ទុក និងតាំងទីលំនៅថ្មីឱ្យជនជាតិរ៉ូហ៊ីងយ៉ា៕ ប្រភព៖ AFP ប្រែសម្រួលដោយ៖ ឈឹម ទីណា

បាងកក៖ អាជ្ញាធរថៃ នៅថ្ងៃពុធសប្តាហ៍នេះ បានរាយការណ៍ថា យ៉ាងហោចណាស់មនុស្សចំនួន ៦នាក់បានស្លាប់ និងរាប់ម៉ឺនគ្រួសារផ្សេងទៀតរងផលប៉ះពាល់ ដោយសារគ្រោះទឹកជំនន់វាយលុកភាគខាងត្បូងប្រទេសថៃ។ មន្រ្តីក្នុងតំបន់និយាយថា គ្រោះទឹកជំនន់ដែលបានចាប់ផ្តើមកាលពីថ្ងៃទី២២ ខែធ្នូ បានជន់លិចផ្ទះសម្បែងប្រហែល ៧០,០០០ខ្នងនៅតាមខេត្តផ្សេងៗ រួមមានដូចជា Satun, Songkhla, Pattani, Yala និង Narathiwat។ ជាមួយគ្នានេះ មនុស្ស៦នាក់ដែលស្លាប់ រួមមានទាំងស្រ្តីវ័យ៨៩ឆ្នាំម្នាក់ និងកូនក្មេងម្នាក់ ស្ថិតនៅខេត្ត Narathiwat ខណៈមនុស្សម្នាក់ទៀតនៅបន្តបាត់ខ្លួន។ ក្រុមសង្គ្រោះបានធ្វើការស្ទើរពេញមួយយប់ ដើម្បីចែកចាយទឹកបរិភោគ អាហារសម្រន់ និងត្រួតពិនិត្យមើលអគារដែលរងការខូចខាត។ ទោះបីជាយ៉ាងណា នាយកដ្ឋានបង្ការ និងកាត់បន្ថយគ្រោះមហន្តរាយថៃ បាននិយាយថា កម្រិតទឹកជំនន់បានស្រកចុះបណ្តើរៗហើយ កាលពីព្រឹកថ្ងៃពុធសប្តាហ៍នេះ។ គួរកត់សម្គាល់ថា ក្នុងអំឡុងរដូវវស្សា ទឹកជំនន់តែងតែវាយលុកប្រទេសថៃជាប្រចាំ ប៉ុន្តែអ្នកវិទ្យាសាស្រ្តនិយាយថា ការប្រែប្រួលអាកាសធាតុពិភពលោក បង្កឡើងពីមនុស្ស កំពុងធ្វើឱ្យការធ្លាក់ភ្លៀងមានស្ថានភាពធ្ងន់ធ្ងរជាងធម្មតា។ ជាក់ស្តែង ក្នុងឆ្នាំ ២០១១ ទឹកជំនន់បានសម្លាប់មនុស្សរាប់រយនាក់ និងបំផ្លាញផ្ទះសម្បែងរាប់លានខ្នងនៅទូទាំងប្រទេសថៃ៕ ប្រភព៖ AFP ប្រែសម្រួលដោយ៖ ឈឹម ទីណា