តូក្យូ ៖ ទីភ្នាក់ងារអវកាសរបស់ប្រទេសជប៉ុន មានផែនការដាក់ពង្រាយ និងប្រើប្រាស់ផ្កាយរណបក្នុងពេលពីរបីឆ្នាំទៀត ដើម្បីផ្តិចយករូបភាព និងវាយតម្លៃទំហំខូចខាតយ៉ាងឆាប់រហ័ស ដែលបង្កឡើងពីគ្រោះរញ្ជួយដី និងគ្រោះមហន្តរាយធម្មជាតិផ្សេងៗទៀត។ ទីភ្នាក់ងាររុករកអវកាសជប៉ុន JAXA បានរំពឹងថា ផែនការដាក់ពង្រាយផ្កាយរណបនេះ នឹងអាចជួយដល់ប្រតិបត្តិការជួយសង្គ្រោះភ្លាមៗ នៅក្នុងតំបន់ដែលរងគ្រោះដោយគ្រោះមហន្តរាយទូទាំងប្រទេស។ អ្នកស្រាវជ្រាវ JAXA គ្រោងនឹងប្រើប្រាស់ផ្កាយរណបសិក្សាឯកសារទិន្នន័យប្រហែល ២០០,០០០ករណី ទាក់ទិននឹងផ្ទះដែលរងការខូចខាត ដោយសារគ្រោះរញ្ជួយដីដ៏ខ្លាំងនៅភាគនិរតីនៃប្រទេសជប៉ុនកាលពីឆ្នាំ ២០១៦។ ផែនការនេះនឹងប្រៀបធៀបរូបភាពផ្កាយរណប ទាំងមុន និងក្រោយកើតមានគ្រោះមហន្តរាយ។ទីភ្នាក់ងារ JAXA បានបន្ថែមថា ផែនការនេះទៀតសោត នឹងវាយតម្លៃពីទំហខូចខាតនៃសំណង់អគារនីមួយៗគ្រប់ទីកន្លែងទូទាំងប្រទេសក្នុងរយៈពេលជាច្រើនម៉ោង បន្ទាប់ពីការផ្តិតយករូបភាព។ ផែនការដាក់ពង្រាយផ្កាយរណបរបស់ជប៉ុននេះ កើតឡើងបន្ទាប់ពីគ្រោះរញ្ជួយដីដ៏ខ្លាំងក្លាមួយ បានវាយប្រហារឧបទ្វីបណូតូកាលពីថ្ងៃចូលឆ្នាំសកលឆ្នាំមុន បណ្តាលឱ្យបណ្តាញផ្លូវមួយចំនួនត្រូវបានកាត់ផ្តាច់ និងរារាំងប្រតិបត្តិការជួយសង្គ្រោះរបស់ក្រុមអ្នកសង្គ្រោះ ក៏ដូចជាការប៉ាន់ប្រមានពីទំហំនៃការខូចខាតយ៉ាងឆាប់រហ័ស។ លោក Kawakita Shiro មន្រ្តីជាន់ខ្ពស់នៃមជ្ឈមណ្ឌលកម្មវិធី និងប្រតិបត្តិការផ្កាយរណបរបស់ JAXA បាននិយាយថា លោកមានការព្រួយបារម្មណ៍ ដែលមិនអាចផ្តល់ព័ត៌មានដែលមានប្រយោជន៍យ៉ាងឆាប់រហ័ស ពីគ្រោះរញ្ជួយដីនៅឧបទ្វីបណូតូ ហើយថា ក្រុមការងារនៅមជ្ឈមណ្ឌលរបស់លោកកំពុងធ្វើការនេះ ដើម្បីអាចផ្តល់ទិន្នន័យឱ្យបានឆាប់តាមដែលអាចធ្វើទៅបាន៕ ប្រភព ៖ NHK ប្រែសម្រួល ៖ ឈឹម…

បរទេស ៖ ទីភ្នាក់ងារសន្តិសុខជាតិ របស់សហរដ្ឋអាមេរិកបានព្រមានថា ពិធីសម្ពោធការឡើងកាន់តំណែង របស់ប្រធានាធិបតីជាប់ឆ្នោត លោក Donald Trump អាចក្លាយជាគោលដៅវាយប្រហារ ដ៏មានសក្តានុពល ពីសំណាក់ក្រុមជ្រុលនិយមហិង្សា ទោះបីជាពួកគេនិយាយថា មិនទាន់មានការគំរាមកំហែងជាក់លាក់ ដែលអាចជឿទុកចិត្តបានក៏ដោយ នេះបើយោងតាមកាសែត POLITICO ។ ក្រុមភ្នាក់ងារស៊ើបការណ៍សម្ងាត់ និងការអនុវត្តច្បាប់ បានអះអាងថា ការវាយប្រហារអាចនឹងបង្កឡើងពីជនល្មើស ដែលមិនពេញចិត្តនឹងការបោះឆ្នោត ហើយចាត់ទុកថា ពិធីស្បថចូលកាន់តំណែងរបស់ Trump អាចជាឱកាសចុងក្រោយ បង្កអំពើហិង្សាជំទាស់នឹងលទ្ធផលបោះឆ្នោត នេះបើតាមប្រភពដដែល។ ការប្រុងប្រយ័ត្នខ្ពស់នេះ ត្រូវបានត្រៀមជាច្រើនខែ បន្ទាប់ពីការប៉ុនប៉ងធ្វើឃាត ចំនួនពីរលើក លើរូបលោក Trump ក្នុងអំឡុងពេលយុទ្ធនាការឆ្នាំ ២០២៤ ព្រមទាំង ការវាយប្រហារថ្មីៗ នៅក្នុងឆ្នាំ២០២៥ នៅទីក្រុង New Orleans និង Las Vegas ។ ការវាយតម្លៃការគំរាមកំហែងដែលចងក្រងដោយ FBI, សេវាសម្ងាត់ ប៉ូលីសកាពីតូល, នាយកដ្ឋានប៉ូលីស របស់តុលាការកំពូល បានដាក់ចេញនូវសេណារីយ៉ូអាក្រក់ជាច្រើន ដែលអាចបង្កឡើងដោយភេរវករបរទេស,…

ប្រាស៊ីលីយ៉ា ៖ ប្រធានាធិបតីប្រេស៊ីល លោក Lula da Silva កាលពីថ្ងៃទី១៣ ខែមករានេះ បានចុះហត្ថលេខាលើច្បាប់ថ្មី ដែលមានគោលបំណងរឹតបន្តឹងការប្រើប្រាស់ស្មាតហ្វូននៅតាមសាលារៀននានាទូទាំងប្រទេស។ ច្បាប់ថ្មីនេះ នឹងរឹតបន្តឹងការប្រើប្រាស់ស្មាតហ្វូនរបស់សិស្សនៅតាមសាលាបឋមសិក្សា និងវិទ្យាល័យទូទាំងប្រទេសប្រេស៊ីល ដែលនឹងចាប់ផ្តើមអនុវត្តចាប់ពីខែកុម្ភៈ ឆ្នាំ២០២៥តទៅ។ ចំណាត់ការនេះធ្វើឡើងដើម្បីធានាថា សិស្សសាលាអាចប្រើប្រាស់ឧបករណ៍បែបនេះ តែក្នុងករណីមានអាសន្ន, គ្រោះថ្នាក់, ការអប់រំ ឬក៏ក្នុងករណីសិស្សមានពិការភាពប៉ុណ្ណោះ។ រដ្ឋមន្ត្រីក្រសួងអប់រំប្រេស៊ីល លោក Camilo Santana បានប្រាប់អ្នកសារព័ត៌មានថា ក្មេងៗកំពុងប្រើអ៊ីនធឺណិតតាំងពីតូច ដែលធ្វើឱ្យឪពុកម្តាយពិបាកតាមដាននូវអ្វីដែលពួកគេធ្វើ ហើយការរឹតបន្តឹងលើការប្រើប្រាស់ស្មាតហ្វូននៅតាមសាលារៀនទូទាំងប្រទេសនឹងជួយពួកគេ។ ទន្ទឹមគ្នា ឪពុកម្តាយ និងសិស្សជាច្រើនក៏បានឯកភាពលើការដាក់ចេញច្បាប់នេះផងដែរ។ កាលពីខែឧសភាឆ្នាំមុន វិទ្យាស្ថានអប់រំកម្រិតខ្ពស់ Fundacao Getulio Vargas បានឱ្យដឹងថា ប្រទេសប្រេស៊ីលមានស្មាតហ្វូនច្រើនជាងមនុស្សទៅទៀត ពោលគឺមានស្មាតហ្វូនដល់ទៅ ២៥៨លានគ្រឿង ខណៈដែលប្រជាជនប្រេស៊ីលសរុបមានត្រឹមតែ ២០៣លាននាកប៉ុណ្ណោះ។ អ្នកស្រាវជ្រាវទីផ្សារក្នុងស្រុកបាននិយាយកាលពីឆ្នាំមុនថា ប្រជាជនប្រេស៊ីលបានចំណាយពេលរហូតដល់ ៩ម៉ោង១៣នាទីក្នុងមួយថ្ងៃនៅលើអេក្រង់ស្មាតហ្វូន ដែលនេះជាតួលេខខ្ពស់បំផុតមួយរបស់ពិភពលោក៕ ប្រភព ៖ The Star ប្រែសម្រួល៖ ឈឹម ទីណា

ប៉េកាំង ៖ ដើម្បីដោះស្រាយបញ្ហាប្រឈមផ្នែកប្រជាសាស្រ្ត ប្រទេសចិនបានដាក់បញ្ចូលមនុស្សយន្តទៅក្នុងសេវាកម្មថែទាំមនុស្សចាស់ ជាមួយនឹងគោលដៅបង្កើតបណ្តាញសេវាថែទាំមនុស្សចាស់ទូទាំងប្រទេស ឱ្យទូលំទូលាយនៅឆ្នាំ ២០២៩។ នេះបើតាមការចេញផ្សាយដោយសារព័ត៌មាន Interesting Engineering។ គណៈកម្មាធិការមជ្ឈិមបក្សកុម្មុយនិស្តចិន និងក្រុមប្រឹក្សារដ្ឋ កាលពីថ្ងៃទី៣០ ខែធ្នូ ឆ្នាំ២០២៤ បានដាក់ចេញនូវគោលការណ៍ណែនាំថ្មីមួយ ដែលសង្កត់ធ្ងន់លើការអភិវឌ្ឍន៍មនុស្សយន្ត, ការផ្សារភ្ជាប់ខួរក្បាលមនុស្ស និងកុំព្យូទ័រ ព្រមទាំងបច្ចេកវិទ្យាបញ្ញាសិប្បនិម្មិត (AI) សម្រាប់ការថែទាំមនុស្សចាស់។ ស្ថិតក្រោមគោលការណ៍ណែនាំទាំងនេះ ប្រទេសចិនមានគោលបំណងបង្កើតបណ្តាញសេវាថែទាំមនុស្សចាស់ទូទាំងប្រទេសដ៏ទូលំទូលាយមួយនៅឆ្នាំ ២០២៩។ ហើយនៅឆ្នាំ ២០៣៥ ចិនរំពឹងថា នឹងផ្តល់ឱ្យមនុស្សចាស់ទាំងអស់នូវលទ្ធភាពទទួលបានសេវាមូលដ្ឋាន តាមរយៈប្រព័ន្ធថែទាំដែលត្រូវបានអភិវឌ្ឍយ៉ាងល្អ និងដោះស្រាយតម្រូវការនៃប្រជាជនវ័យចំណាស់ដែលកំពុងកើនឡើង។ គិតត្រឹមចុងឆ្នាំ ២០២៣ ប្រទេសចិនមានប្រជាពលរដ្ឋជាង ២១៦.៧៦លាននាក់ មានអាយុចាប់ពី ៦៥ឆ្នាំឡើងទៅ ដែលស្មើនឹង ១៥.៤ភាគរយនៃចំនួនប្រជាជនសរុប។ ជាការឆ្លើយតប រដ្ឋាភិបាលចិនមិនត្រឹមតែរួមបញ្ចូលមនុស្សយន្ត ជាមួយនឹងសមត្ថភាពអន្តរកម្មកម្រិតខ្ពស់ទៅក្នុងវិស័យថែទាំប៉ុណ្ណោះទេ ចិនក៏កំពុងអភិវឌ្ឍប្រព័ន្ធផ្ទះឆ្លាតវៃផងដែរ ដើម្បីបង្កើនសុវត្ថិភាព និងសុខាមាលភាពសម្រាប់មនុស្សចាស់៕ ប្រភព ៖ Interesting Engineering ប្រែសម្រួល ៖ ឈឹម ទីណា