កង់បេរ៉ា ៖ រដ្ឋាភិបាលអូស្ត្រាលី នៅថ្ងៃពុធនេះ បានអនុម័តផែនការបង្កើតកសិដ្ឋានផលិតថាមពលពីពន្លឺព្រះអាទិត្យឬសូឡា ធំបំផុតមិនធ្លាប់មានក្នុងពិភពលោក ដើម្បីលក់ភ្លើងអគ្គិសនីតាមរយៈខ្សែកាបក្រោមបាតសមុទ្រទៅភាគខាងជថើង ប្រទេសសិង្ហបុរី។ គម្រោងនេះមានតម្លៃ ២៤ពាន់លានដុល្លារ ដែលនឹងសាងសង់ឡើងនៅលើផ្ទៃដីទំហំ ១២.០០០ហិកតា ស្ថិតនៅតំបន់ភាគខាងជើងនៃប្រទេសអូស្ត្រាលី ហើយទទួលបានការគាំទ្រពីមហាសេដ្ឋីបច្ចេកវិទ្យា និងសកម្មជនបៃតង លោក Mike Cannon-Brookes ដែលនឹងបង្កើតការងារចំនួន១៤.០០០កន្លែង។ គម្រោងនេះនឹងផ្គត់ផ្គង់ថាមពលរហូតដល់ ៦ជីហ្គាវ៉ាត់ ក្នុងនោះថាមពលទំហំ ៤ជីហ្គាវ៉ាត់ក្នុងមួយម៉ោងសម្រាប់ការប្រើប្រាស់ក្នុងស្រុកដែលអាចផ្គត់ផ្គង់ភ្លើងដល់លំនៅដ្ឋានប្រមាណ ៣លានខ្នង ខណៈថាមពលទំហំ ២ជីហ្គាវ៉ាត់ទៀតនឹងត្រូវបញ្ជូនទៅក្រៅ។ ប្រភព: AFP ប្រែសម្រួលដោយ៖ ឈឹម ទីណា

ឡ្ងងដ៍ : ក្រុមអ្នកមុជទឹកអង់គ្លេសនៅដើមសប្តាហ៍នេះបានការរកឃើញខ្មោចនាវាចម្បាំងអាយុ១១០ឆ្នាំ Royal Navy របស់កងទ័ពជើងទឹកអង់គ្លេស ដែលបានលិចចូលទៅក្នុងសមុទ្រនៃប្រទេសស្កុតឡេន ក្នុងអំឡុងសម័យសង្គ្រាមលោកលើកទី១។ លោក Paul Downs ដែលស្ថិតក្នុងចំណោមអ្នកមុជទឹក និងបានថតវីដេអូពីនាវានោះ បានរៀបរាប់ថា នេះជាការរកឃើញដែលមិនគួរឱ្យជឿ ពីព្រោះរូបរាងរបស់នាវានេះស្ទើរតែនៅដូចដើមទាំងស្រុង។ នាវាចម្បាំងនេះជាប្រភេទ HMS Hawke បានលិចចូលសមុទ្របន្ទាប់ពីរងការវាយប្រហារដោយមីស៊ីល torpedo របស់អាល្លឺម៉ង់ ក្នុងខែតុលា ឆ្នាំ ១៩១៤។ ក្រុមនាវិកនៅក្នុងនាវាចម្បាំងនេះចំនួន ៧០នាក់ប៉ុណ្ណោះដែលនៅរស់រានមានជីវិត ខណៈជាង ៥០០នាក់ទៀតបានបាត់បង់ជីវិត។ ក្រោយរងការវាយប្រហារ នាវានេះបានឆាបឆេះ និងផ្ទុះ ហើយជាង៨នាទីបន្ទាប់ វាបានលិចបាត់ក្នុង ជម្រៅជាង ១០០ម៉ែត្រនៅសមុទ្រខាងជើង នៃប្រទេសស្កុតឡែន។ នាវានេះបានដំណើរការជាលើកដំបូងក្នុងឆ្នាំ ១៨៩១ និងមានប្រវែងជាង១១៨ម៉ែត្រ និងទទឹងជាង ១៨ម៉ែត្រ។ ក្រុមអ្នកមុជទឹកស្វែងរកនាវាលិចក្នុងសមុទ្រកាលពីសង្គ្រាមលោកលើកទី១គឺក្រុម Lost in Waters Deep បានចាយពេលអស់រយៈពេលជាច្រើនឆ្នាំទម្រាំអាចរកនាវាចម្បាំងនេះឃើញ។ មិនទាន់មានព័ត៌មាននៅឡើយថា អង់គ្លេសនឹងស្រង់ខ្មោចនាវានេះចេញពីសមុទ្រស្កុតឡេនឬយ៉ាងណា៕ ប្រភព៖ AFP ប្រែសម្រួលដោយ៖ ឈឹម ទីណា

បរទេស៖ ទូកក្តោងទេសចរណ៍ដ៏ទំនើប Bayesian បានលិច នៅក្បែរកោះ Sicily ប្រទេសអ៊ីតាលី បាត់ខ្លួនមនុស្ស៦នាក់ រួមមានទាំង មហាសេដ្ឋបច្ចេកវិទ្យាជនជាតិអង់គ្លេស លោក Mike Lynch និងកូនស្រី។ ហេតុការណ៍នេះបានកើតឡើង កាលពីថ្ងៃចន្ទ ប៉ុន្តែ រហូតមកដល់ថ្ងៃអង្គារ រកមិនទាន់ឃើញមនុស្សបាត់ខ្លួននៅឡើយទេ ខណៈដែលក្រុមមុជទឹកបន្តស្វែងរក។ ឆ្មាំសមុទ្រអ៊ីតាលី បានឱ្យដឹងថា ទូកក្តោង ដោតទង់ជាតិអង់គ្លេសប្រវែង ៥៦ម៉ែត្រ មួយគ្រឿងនេះ ផ្ទុកមនុស្ស ២២នាក់ ដោយបានបោះយុថ្កា នៅចម្ងាយប្រហែល ៧០០ម៉ែត្រពីកំពង់ផែ ហើយក៏ត្រូវបាន វាយប្រហារ ដោយខ្យល់បោកបក់ខ្លាំង។ ភរិយារបស់លោក Lynch គឺលោកស្រី Angela Bacares ស្ថិតក្នុងចំណោមមនុស្ស ១៥នាក់ដែលត្រូវបានជួយសង្គ្រោះ ប៉ុន្តែលោក Lynch និងកូនស្រីអាយុ ១៨ឆ្នាំឈ្មោះ Hannah បានបាត់ខ្លួន។ ក្នុងវ័យ ៥៩ឆ្នាំ លោក Lynch ជាសហគ្រិន និងអ្នកវិនិយោគ ក្នុងវិស័យបច្ចេកវិទ្យាដ៏ល្បីល្បាញ ប្រចាំនៅអង់គ្លេស។…

បរទេស : ការសិក្សាថ្មីមួយដែលទើបចេញផ្សាយក្នុងទស្សនាវដ្តីវិទ្យាសាស្រ្ត ក្នុងខែសីហានេះ បានឱ្យដឹងថា អាចម៍ផ្កាយដែលបានវាយប្រហារភពផែនដីកាលពី ៦៦លានឆ្នាំមុន និងបានផ្តាច់ពូជពពួកសត្វដាយណូស័រ គឺជាអាចម៍ផ្កាយមកពីតំបន់ខ្សែក្រវ៉ាត់អាចម៍ផ្កាយ នៅចន្លោះភពព្រហស្បតិ៍ និងភពអង្គារ។ ក្រុមអ្នកវិទ្យាសាស្ត្ររកឃើញថា អាចម៍ផ្កាយនោះមានឈ្មោះថា ឈីកសឹលឹប ដែលមានមុខកាត់ជាង ១០គីឡូម៉ែត្រ បានធ្លាក់មកលើផែនដី នៅចំទឹកដីអឺរ៉ុប។ អ្នកវិទ្យាសាស្ត្រអះអាងថា ស្លាកស្នាមដែលមានមុខកាត់ប្រវែង១៤៥គីឡូម៉ែត្រ ស្ថិតនៅតំបន់ឈូងសមុទ្រ យូកាតាន់ (Yucatan) នៃប្រទេសម៉ិកស៊ិកបច្ចុប្បន្ននេះ ត្រូវបានបង្កើតឡើងដោយអាចម៍ផ្កាយឈីកសឹលឹបនេះ។ នេះបើតាមការបញ្ជាក់ពីអ្នកវិទ្យាសាស្ត្រមួយរូបឈ្មោះ Mario Fischer-Gödde មកពីសាកលវិទ្យាល័យ  Cologne ប្រទេសអាល្លឺម៉ង់។ តាមរយៈសំណល់ដែលត្រូវបានបន្សល់ទុកពីអាចម៍ផ្កាយឈ្មោះ ឈីកសឹលឹប (Chicxulub) ដែលត្រូវបានរកឃើញក្នុងសំបកផែនដីនៅត្រង់តំបន់អឺរ៉ុបនោះ ក្រុមអ្នកវិទ្យាសាស្ត្របានរកឃើញសមាសធាតុគីមីដ៏កម្រម្យ៉ាងឈ្មោះ រូថេនៀម (Ruthenium) ដូចទៅនឹងអ្វីដែលមាននៅក្នុងពពួកអាចម៍ផ្កាយ ដែលគោចរក្នុងតំបន់ចន្លោះភពព្រហស្បតិ៍ និងភពអង្គារនោះដែរ។ ប៉ុន្តែ ក្រុមអ្នកវិទ្យាសាស្ត្រមិនបានបញ្ជាក់ថា អាចម៍ផ្កាយនេះបានផ្តាច់ពូជសត្វដាយណូស័រដោយរបៀបណានោះទេ។ សូមបញ្ជាក់ថា ការសិក្សារកប្រភពដើម និងឈ្វេងយល់ពីអាចម៍ផ្កាយតូច-ធំនានា ដែលបានវាយប្រហារផែនដី និងជាពិសេសអាចម៍ផ្កាយ ឈីកសឹលឹប គឺពិតជារឿងដ៏សំខាន់បំផុត ដើម្បីឱ្យយើងអាចត្រៀមខ្លួនបានល្អក្នុងការទប់ទល់គ្រោះមហន្តរាយដែលអាចកើតមានឡើងនៅថ្ងៃអនាគត៕ ប្រភព៖ CNN ប្រែសម្រួលដោយ៖ ឈឹម ទីណា

ប៉េកាំង : ជាលើកដំបូងបំផុត ចិនបានប្រើនាវាមុជទឹក Jiaolong ជ្រមុជចូលទៅក្នុងមហាសមុទ្រប៉ាស៊ីហ្វិកខាងលិច ដើម្បីប្រមូលសរីរាង្គផ្សេងៗ និងដីល្បាប់ពីបាតសមុទ្រ ក្នុងគោលបំណងសិក្សាស្រាវជ្រាវបន្ថែមឱ្យកាន់តែស៊ីជម្រៅ អំពីប្រព័ន្ធអេកូឡូស៊ី និងបរិស្ថានបាតសមុទ្រ។ បេសកម្មនេះបានចាប់ផ្តើមកាលពីថ្ងៃទី ១៨ ខែសីហា ឆ្នាំនេះ ដោយចាប់ផ្តើមចេញដំណើរពីទីក្រុង Qingdao ក្នុងខេត្ត Shandong ភាគខាងកើតប្រទេសចិន។ នៅលើនាវានេះមាននាវិកស្រាវជ្រាវសមុទ្រទឹកជ្រៅលេខ១ របស់ប្រទេសចិន និងនាវិកបរទេសផង។ បេសសកម្មនេះគ្រោងនឹងបញ្ចប់ក្នុងពេល៤៥ថ្ងៃ។ ចាប់តាំងពីឆ្នាំ ២០០៩មក នាវាមុជទឹក Jiaolong បានធ្វើប្រតិបត្តិការរុករកនៅតំបន់ដែនទឹកក្នុងមហាសមុទ្រប៉ាស៊ីហ្វិក មហាសមុទ្រឥណ្ឌា និងមហាសមុទ្រអាត្លង់ទិក ជាមួយនឹងការធ្វើដំណើរសរុបចំនួន៩០០លើកចូលទៅក្នុងសមុទ្រទឹកជ្រៅ៕ ប្រភព៖ ស៊ីនហួរ ប្រែសម្រួលដោយ៖ ឈឹម ទីណា