ដាកា៖ ចំនួនមនុស្សត្រូវសមត្ថកិច្ចចាប់ខ្លួនទាក់ទិនអំពើហិង្សានៅក្នុងប្រទេសបង់ក្លាដែស បានកើនលើសចំនួន ២,៥០០នាក់កាលពីថ្ងៃអង្គារ បន្ទាប់ពីផ្ទុះបាតុកម្មតវ៉ាដ៏កក្រើកពាក់ព័ន្ធនឹងកូតាការងារ ដែលបានបង្កឱ្យមានភាពចលាចលរីករាលដាលពាសពេញផ្ទៃប្រទេស។ អាជ្ញាធរបង់ក្លាដែសបានចាប់ខ្លួនមនុស្សកើនឡើងជាង ២,៥០០នាក់ ខណៈដែលមនុស្សយ៉ាងហោចណាស់ ១៧៤នាក់បានស្លាប់ រួមទាំងមន្រ្តីប៉ូលីសជាច្រើននាក់ ក្រោយផ្ទុះបាតុកម្មតវ៉ាប្រឆាំងនឹងកូតាការងារកាលពីសប្តាហ៍មុន។ នាយករដ្ឋមន្ត្រីបង់ក្លាដែស លោកស្រី Sheikh Hasina បានទម្លាក់ការទទួលខុសត្រូវទៅលើគណបក្សប្រឆាំង ទាក់ទិនអំពើហិង្សាដែលបានផ្ទុះឡើង ក្នុងបាតុកម្មតវ៉ាដឹកនាំដោយក្រុមនិស្សិត ប្រឆាំងនឹងការកំណត់កូតាជ្រើសមន្ត្រីចូលបម្រើការក្នុងក្របខណ្ឌរដ្ឋ ដោយបាននិយាយថា បម្រាមគោចរនឹងត្រូវបានដកចេញ នៅពេលស្ថានការណ៍ល្អប្រសើរឡើងវិញ។ គិតមកទល់ពេលនេះ ស្ថានការណ៍ក្នុងប្រទេសបង់ក្លាដែសហាក់វិលទៅរកប្រក្រតីឡើងវិញ បន្ទាប់ពីតុលាការកំពូលបានបង្គាប់ឱ្យនិស្សិតបញ្ឈប់សកម្មភាពតវ៉ា និងបានយល់ព្រមបញ្ចុះកូតាជ្រើសមន្ត្រីចូលបម្រើការក្នុងក្របខណ្ឌរដ្ឋពី ៥៦ភាគរយ មកនៅត្រឹម ៧ភាគរយ សម្រាប់កូនចៅរបស់អ្នកនយោបាយ ដែលបានកសាងស្នាដៃធំៗជូនជាតិ និងអ្នកតស៊ូទាមទារឯករាជ្យឱ្យប្រទេសជាតិ។ បច្ចុប្បន្នកន្លែងការងារសម្រាប់ក្របខណ្ឌមន្ត្រីរដ្ឋការមានចំនួន ៩៣ភាគរយ ដែលបើកចំហសម្រាប់ពលរដ្ឋបង់ក្លាដែសទូទៅដែលមានសមត្ថភាព៕ ប្រភព៖ AFP ប្រែសម្រួលដោយ៖ ឈឹម ទីណា

បរទេស៖ នៅឆ្នាំក្រោយ ប្រទេសន័រវេស នឹងដាក់ឲ្យសាកល្បងប្រើផ្លូវមួយខ្សែ នៅទីក្រុង Trondheim ភាគកណ្តាលប្រទេស ដែលអាចសាកថ្មឲ្យរថយន្តអគ្គិសនីដោយស្វ័យប្រវត្តិពេលរថយន្តនោះកំពុងបើក។ បើតាមការចេញផ្សាយរបស់ គេហទំព័រព័ត៌មានបច្ចេកវិទ្យា Tech Dad នាពេលថ្មីៗនេះ។ ក្នុងការសាកល្បង ផ្លូវដែលអាចសាកថ្មីបាននេះមានប្រវែងតែ ១០០ម៉ែត្រប៉ុណ្ណោះ និងត្រូវប្រើឡានក្រុង អគ្គិសនីផលិតឡើងដោយក្រុមហ៊ុន Yuton និង Higer របស់ប្រទេសចិន។ ចំណែក ផ្លូវសាកថ្មីបាននេះ ត្រូវបានតម្លើងឧបករណ៍សាកដោយក្រុមហ៊ុនមានមូលដ្ឋាន នៅអ៊ីស្រាអែល Electreon Wireless។ ការចំណាយជំហានដំបូងសម្រាប់ផ្លូវ ១០០មែត្រនេះ ត្រូវបានប៉ាន់ប្រមាណថា មានជាង ២លានដុល្លារអាមេរិក។ នេះបើតាម Tech Dad ដដែល។ រដ្ឋាភិបាលន័រវេស រំពឹងថា បច្ចេកវិទ្យាច្នៃប្រឌិតថ្មីនេះ នឹងកាត់បន្ថយការបំភាយកាបូន ដោយអនុញ្ញាតឱ្យរថយន្តក្រុងសាកថ្ម ដោយមិនចាំបាច់ឈប់សម្រាប់ការបញ្ចូលថ្ម៕ ប្រែសម្រួល ៖ សារ៉ាត