ខេត្តពោធិ៍សាត់ បើទោះបីជាមានកន្លែងខ្លះ បានជួបប្រទះនឹងទឹកលិចក៏ដោយ ប៉ុន្តែក៏មានកន្លែងខ្លះ ដែលជួបប្រទះភាពរាំងស្ងួតផងដែរ។ សេចក្តីរាយការណ៍ពីខេត្តពោធិ៍សាត់ បានឱ្យដឹងថា ស្រូវក្នុងស្រែប្រមាណជាង២០០ហិកតា នៅភូមិផ្សារលើ, សង្កាត់លលកស ក្នុងក្រុងពោធិ៍សាត់ បានជួបប្រទះនឹងភាពរាំងស្ងួត។ អប្សរាណិតរាយការណ៍

កិច្ចពិភាក្សាអំពីប្រាក់ឈ្នួលអប្បបរមាសម្រាប់ឆ្នាំ២០២៤ សម្រាប់កម្មករនិយោជិត បានបន្តថែមទៀតនៅថ្ងៃទី២៨សីហា ប៉ុន្តែមិនទាន់បានបញ្ចេញតួលេខចុងក្រោយ ដែលស្នើនោះឡើយ។ រាជរដ្ឋាភិបាលកម្ពុជា បានដាក់ចេញនូវគោលនយោបាយដំឡើងប្រាក់ឈ្នួល ដល់កម្មករនិយោជិត ក្នុងវិស័យវាយនភណ្ឌ កាត់ដេរសម្លៀកបំពាក់ និងផលិតស្បែកជើងរៀងរាល់ឆ្នាំ ចាប់ពីឆ្នាំ១៩៩៧។ កម្មករនិងនិយោជិត តែងទទួលបានប្រាក់ឈ្នួលបង្កើនរបស់ខ្លួនយ៉ាងទៀងទាត់ តាមកិច្ចពិភាក្សាគ្នារវាងសហជីព និងតំណាងម្ចាស់រោងចក្រ តាមរយៈការសម្របសម្រួលរបស់ក្រសួងការងារ និងបណ្ដុះបណ្ដាលវិជ្ជាជីវៈ បើទោះបីជាការតម្លើងមិនច្រើន ដូចតាមការរំពឹងទុកនោះក៏ដោយ។ កិច្ចពិភាក្សាថ្ងៃទី២៨ សីហា ឆ្នាំ២០២៣ រយៈពេល៤ម៉ោង បានធ្វើឡើងក្រោមវត្តមានរដ្ឋមន្ត្រីក្រសួងការងារ និង បណ្ដុះបណ្ដាលវិជ្ជាជីវៈ លោក ហេង សួរ។ ក្រោយពីការពិភាក្សា, អង្គប្រជុំបានឯកភាពគ្នាកំណត់កិច្ចពិភាក្សាបន្តទៀត នៅថ្ងៃទី៤ ខែកញ្ញា ឆ្នាំ២០២៣ខាងមុខ។ នៅក្នុង២០២៣នេះ ប្រាក់ឈ្នួលអប្បបរមារបស់កម្មករនិយោជិតក្នុងវិស័យវាយនភណ្ឌ កាត់ដេរសម្លៀកបំពាក់ ផលិតស្បែកជើង និងផលិតផលធ្វើដំណើរ និងកាបូប គឺមានចំនួន ២០០ដុល្លារក្នុងមួយខែ។ ប្រសិនបើបូកនឹងប្រាក់អត្ថប្រយោជន៍ផ្សេងៗបន្ថែមទៀត កម្មករនិយោជិតម្នាក់អាចទទួលបានប្រាក់ឈ្នួលចន្លោះពី២១៧ទៅ២២៨ដុល្លារក្នុងមួយខែ៕

កម្ពុជាជាម្ចាស់ផ្ទះបានបិទបញ្ចប់ដោយជោគជ័យ នូវការប្រកួតរ៉ូបូតថ្នាក់អន្តរជាតិ ដែលមានការចូលរួមពី ១៣ប្រទេស។ ក្នុងការប្រកួតនោះ ប្រទេសជប៉ុនទទួលបានជ័យលាភីលេខ១ ខណៈក្រុមរបស់កម្ពុជាបានឡើងត្រឹមវគ្គ ៨ក្រុមចុងក្រោយតែប៉ុណ្ណោះ។ អប្សរាណិតរាយការណ៍

ប្រធានសមាគមសប្បុរសធម៌ខ្មែរកម្ពុជាក្រោម បានថ្កោលទោសការផ្សាយវិទ្យុអាស៊ីសេរី ដែលនិយាយអំពីវៀតណាមធ្វើកម្មសិទ្ធិលើព្រែកជីកកំពង់ស្នាយ ដែលលាតសន្ធឹងក្នុងខេត្តស្វាយរៀង ក្នុងស្រុកស្វាយជ្រំ។ ការថ្កោលទោសការផ្សាយវិទ្យុអាស៊ីសេរី បានធ្វើឡើងបន្ទាប់ពីវិទ្យុ ដែលមានចរឹតផ្សាយជារបៀបក្រុមឧទ្ទាម បានផ្សាយអត្ថបទមួយក្រោមចំណងជើងថា «ពលរដ្ឋសោកស្តាយព្រែកមួយដែលខ្មែរក្រហមជីក បាត់បង់ទៅវៀតណាមក្រោយការបោះបង្គោលព្រំដែន»។ តើកម្ពុជាពិតជាបាត់បង់ព្រែកជីកកំពង់ស្នាយមែនដែរឬទេ? អប្សរាណិតរាយការណ៍

កម្ពុជានិងកូរ៉េខាងត្បូងបានបេ្តជ្ញាបន្តពង្រឹង និងពង្រីកបន្ថែមទៀត នូវកិច្ចសហប្រតិបត្តិការ និងពាណិជ្ជកម្មរវាងប្រទេសទាំងពីរ។ ការប្តេជ្ញាចិត្តនេះបានធ្វើឡើងក្នុងឱកាសនៃជំនួបមួយ រវាងកិតិ្តទេសាភិបាលបណ្ឌិត ហ៊ុន ម៉ាណែត ជាមួយនឹងរដ្ឋមន្ត្រីកសិកម្ម, ស្បៀង និងកិច្ចការជនបទ នៃសាធារណរដ្ឋកូរ៉េ គឺលោក ឆុង វ៉ាងគឺន (Chung Hwang-Keun)។ អប្សរាណិតធ្វើសេចក្តីរាយការណ៍

ឯកអគ្គរដ្ឋទូតសហភាពអឺរ៉ុបប្រចាំកម្ពុជា បានអបអរសាទរកិត្តិទេសាភិបាលបណ្ឌិត ហ៊ុន ម៉ាណែត ដែលព្រះមហាក្សត្របានជ្រើសតាំងជានាយករដ្ឋមន្ត្រីដឹកនាំប្រទេស និងបានបញ្ជាក់ជំហរដ៏មុតមាំ របស់សហភាពអឺរ៉ុប ក្នុងការបន្តកិច្ចសហប្រតិបត្តិការជិតស្និទ្ធបន្ថែមទៀត ជាមួយកម្ពុជា ក្រោមការដឹកនាំផ្ទាល់របស់ឯកឧត្តមកិត្តិទេសាភិបាលបណ្ឌិត។ អប្សរាណិតធ្វើសេចក្តីរាយការណ៍

ព្រះមហាក្សត្រ និងសម្តេចម៉ែ កំពុងគង់ប្រថាប់នៅក្នុងទីក្រុងប៉េកាំង ប្រទេសចិន ដើម្បីពិនិត្យព្រះរាជសុខភាព ក្រោយការយាងចាកចេញពីរាជធានីវេលាព្រឹកថ្ងៃទី២៨សីហា។ ព្រះមហាក្សត្រខ្មែរ និងសម្តេចម៉ែ តែងយាងត្រួតពិនិត្យព្រះរាជសុខភាព នៅសាធារណរដ្ឋប្រជាមានិតចិន យ៉ាងហោច២ដងក្នុងមួយឆ្នាំ។ ព្រះរាជដំណើរថ្ងៃទី២៨ សីហា ឆ្នាំ២០២៣ គឺជាព្រះរាជដំណើរពិនិត្យសុខភាពជាលើកទី២ ដែលជាធម្មតានឹងមានរយៈពេលប្រមាណជាងមួយខែ។ ក្នុងឱកាស នៃព្រះរាជអវត្តមានរបស់ព្រះអង្គក្នុងប្រទេស, សម្ដេចវិបុលសេនាភក្តី សាយ ឈុំ ប្រធានព្រឹទ្ធសភា មានភារកិច្ចទទួលជួយព្រះអង្គក្នុងការបំពេញតួនាទីជាប្រមុខរដ្ឋស្តីទី របស់ព្រះរាជាណាចក្រកម្ពុជា។ អញ្ជើញនិងយាងចូលរួមដង្ហែរព្រះរាជដំណើរនៅព្រលានយន្តហោះអន្តរជាតិវេលាថ្ងៃទី២៨ សីហា រួមមានសម្តេចវិបុលសេនាភក្តី សាយ ឈុំ, សម្តេចអគ្គមហាពញាចក្រី ហេង សំរិន, សម្តេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ, កិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្ត្រី និងប្រធានរដ្ឋសភាលោកជំទាវកិត្តិសង្គហបណ្ឌិត ឃួន សុដារី, មន្រ្តីជាន់ខ្ពស់នៃស្ថាប័នរាជរដ្ឋាភិបាល, ស្ថាប័នព្រឹទ្ធសភា និងរដ្ឋសភា និងសែព្រះញាតិវង្សជាច្រើនអង្គ។