ម្ចាស់ Pass App ដែលជិះបញ្ច្រាសទិសហើយទាញដំបងដែកបំរុងប្រើហិង្សា ដាក់លើអ្នកបើករថយន្តស្របទិសចរាចរណ៍, ត្រូវបានសមត្ថកិច្ចចាប់ខ្លួនហើយ ក្រោយរឿងនេះបានផ្ទុះជាការរិះគន់នៅតាមបណ្តាញសង្គម។ រូបភាព នៃបុរសជាម្ចាស់ Pass App ឈ្មោះ កែ ឃីម ដែលបានជិះបញ្ច្រាសនៅលើផ្លូវព្រះនរោត្តម ក្នុងពេលដែលមានចរាចរណ៍កកស្ទះ កាលពីថ្ងៃទី១៥សីហា ត្រូវបានសមត្ថកិច្ចនគរបាលរាជធានី បានធ្វើការស្រាវជ្រាវរកភ្លាមៗ និងក្រោយមកត្រូវបានគេរកឃើញ និងឃាត់ខ្លួននៅក្នុងភូមិស្វាយអាត់កណ្តាល, ឃុំព្រែកតាមាក់, ស្រុកខ្សាច់កណ្តាល ខេត្តកណ្តាល។ យោងតាមគេហទំព័ររបស់ស្នងការដ្ឋាននគរបាលរាជធានី បានសរសេរនៅថ្ងៃនេះថា «អ្នកបើកបរម៉ូតូកង់បីបញ្ច្រាសទិស ហើយមានបំណងបង្កហិង្សា ដោយប្រើដែកទីបចង់វាយទៅលើអ្នកបើកបររថយន្តនោះ ត្រូវបានឃាត់ខ្លួនហើយ»។ សេចក្តីរាយការណ៍តាមបណ្តាញសង្គម បាននិយាយថាបុរសម្នាក់នោះ មានប្រវត្តិជាប់ពន្ធនាគារ កាលពីឆ្នាំ២០១៤ ពាក់ព័ន្ធនឹងរឿងប្រើប្រាស់ហិង្សា ក្នុងកុប្បកម្មមួយ នៅលើស្ពាននាគ កោះពេជ្រ និងបុរសរូបនោះ ទើបបានចេញរួចក្នុងឆ្នាំ២០១៨។

កម្ពុជាដែលស្វែងរកទេសចរណ៍បរទេសយ៉ាងតិច៥លាននាក់ ទើបបានសម្រេចជាងបីលាននាក់ប៉ុណ្ណោះ ក្នុងរយៈពេល៧ខែដើមឆ្នាំនេះ។ កម្ពុជានឹងស្វែងរកទេសចរណ៍ជិត២លាននាក់ទៀត ក្នុងរយៈពេល៥ខែទៅមុខទៀតនេះ។ តើកម្ពុជាធ្វើបាន ឬមិនបាន? អប្សរាណិតរាយការណ៍

រថយន្ដពិនិត្យសុខភាពចល័តចំនួន ១៤គ្រឿងពីក្រុមហ៊ុន Thaco agriculture ត្រូវបានផ្តល់ជូនដល់សាខាកាកបាទក្រហមកម្ពុជា ចំនួន ១២ខេត្ត ដើម្បីជំរុញការងារមនុស្សធម៌កាន់តែប្រសើរ។ ពិធីប្រគល់និងទទួលនេះ បានធ្វើឡើងក្រោមអធិបតីភាព អគ្គលេខាធិការកាកបាទក្រហមកម្ពុជា លោកស្រី ពុំ ចន្ទីនី នៅទីស្នាក់ការកណ្ដាលកាកបាទក្រហមកម្ពុជានៅថ្ងៃទី១៥សីហា។ រថយន្តទាំង១៤គ្រឿងនោះ នឹងត្រូវផ្តល់ទៅសាខាចំនួន១២ ដើម្បីបម្រើសកម្មភាពមនុស្សធម៌ ក្នុងនោះរួមមាន សាខាខេត្តរតនគិរី ទទួលបាន២គ្រឿង, ក្រចេះ ២គ្រឿង មណ្ឌលគិរី ១គ្រឿង, ព្រះវិហារ ១គ្រឿង, ស្ទឹងត្រែង ១គ្រឿង, ប៉ៃលិនរថយន្តមួយ ១គ្រឿង និងម៉ូតូអាគុយ ២គ្រឿង, បន្ទាយមានជ័យ ១គ្រឿង, កំពង់ធំ ១គ្រឿង, កំពង់ឆ្នាំង ១គ្រឿង, ត្បូងឃ្មុំ ១គ្រឿង, កំពង់ស្ពឺ ១គ្រឿង, និងកោះកុង ១គ្រឿង»។

កម្ពុជាបាននិងកំពុងធ្វើជាម្ចាស់ផ្ទះរៀបចំកិច្ចប្រជុំលេខាធិការដ្ឋាន នៃស្ថាប័នប្រឆាំងអំពើពុករលួយអាស៊ានលើកទី១៩។ កិច្ចប្រជុំនេះនឹងមានរយៈពេល២ថ្ងៃ រវាងពីថ្ងៃទី១៦ដល់ ១៧ខែសីហា នៅក្នុងខេត្តសៀមរាប។ អប្សរាណិតរាយការណ៍

ស្ថានទូតឥណ្ឌាបានប្រារព្ធខួប៧៧ឆ្នាំនៃទិវាឯករាជ្យជាតិរបស់ខ្លួន ដោយមានការចូលរួមយ៉ាងអ៊ឹកអធិកពីមន្ត្រីកម្ពុជា និងពលរដ្ឋឥណ្ឌា ដែលរស់នៅក្នុងប្រទេសកម្ពុជា។ ប្រទេសឥណ្ឌា ពីអតីតកាលបានស្ថិតក្រោមអាណានិគមនិមប្រទេសអង់គ្លេស។ ឥណ្ឌាបានទទួលឯករាជ្យរបស់ខ្លួនមកវិញនាថ្ងៃទី១៥ សីហា ឆ្នាំ១៩៤៧។ ខួបនៃទិវាឯករាជ្យជាតិឥណ្ឌាសម្រាប់ឆ្នាំ២០២៣ លើទឹកដីកម្ពុជានេះ បានរៀបចំធ្វើនារសៀលថ្ងៃទី១៥សីហា ក្នុងបរិវេណសណ្ឋាគារ Hyatt ភ្នំពេញ។ រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ , ឯកអគ្គរាជទូតឥណ្ឌា, បណ្តាអង្គទូត នៃប្រទេសនានាជាមិត្តបានអញ្ជើញចូលរួម។ ឯកអគ្គរដ្ឋទូតឥណ្ឌាលោកស្រីបណ្ឌិត ទេវីយ៉ានី ខូប្រាហ្គាឌី Devyani Khobragade បានថ្លែង រំលឹកនូវប្រវត្តិពាក់ព័ន្ធនឹងការទទួលបានឯករាជ្យ និងបានលើកឡើងជុំវិញសមិទ្ធិផលនានា ដែលបានបង្ហាញអំពីទំនាក់ទំនងទ្វេភាគីកម្រិតខ្ពស់ រវាងប្រទេសឥណ្ឌា និងកម្ពុជា។

មនុស្សជិត៣០០នាក់ បានចូលរួមក្នុងទិវាអបអរសុវត្ថិភាពម្ហូបអាហារពិភពលោក ខណៈដែលសុវត្ថិភាពម្ហូបអាហារ នៅតែបង្កជាចំណោទនៃគ្រោះថ្នាក់សុខភាព។ ទិវាអបអរសាទរនេះ បានដាស់តឿនមនុស្សត្រូវប្រុងប្រយ័ត្នចំពោះរបបអាហារទទួលទាន និងសុវត្ថិភាពអាហារប្រចាំថ្ងៃ។ អប្សរាណិតធ្វើសេចក្តីរាយការណ៍

នាយករដ្ឋមន្ត្រីតែងតាំង នៃប្រទេសកម្ពុជា «កិត្តិទេសាភិបាលបណ្ឌិត» ហ៊ុន ម៉ាណែត បានថ្លែងថាលោកមិនគាំទ្រនូវការស្នើណាមួយ ដែលចង់ឱ្យមានការដាំដើមកញ្ឆាជាដំណាំស្របច្បាប់ឡើយ។ ដំណាំកញ្ឆា បើទោះបីជាមានប្រទេសលើសកលលោកតិចតួចខ្លះ ជាពិសេសក្នុងទ្វីបអាមេរិកខាងត្បូង និងក្នុងអាស៊ី បានចាត់ទុកថាជាដំណាំស្របច្បាប់ ប៉ុន្តែចំពោះកម្ពុជា កញ្ឆា គឺជាគ្រឿងញៀន ដែលច្បាប់បានហាមឃាត់។ «កិត្តិទេសាភិបាលបណ្ឌិត» ហ៊ុន ម៉ាណែត ក្នុងប្រសាសន៍ថ្លែងជាសាធារណៈមួយ ដែលត្រូវបានគេបង្ហោះតាមបណ្តាញសង្គមនៅថ្ងៃទី១៦សីហា បានថ្លែងថាលោកមិនគាំទ្រនូវការដាំដំណាំកញ្ឆានេះឡើយ។ ដំណាំកញ្ឆា គឺជាដំណាំមួយដែលប្រទេសមួយចំនួនក្នុងអាស៊ាន បានរារាំងទប់ស្កាត់យ៉ាងខ្លាំងក្លាដូចជាប្រទេសសឹង្ហបុរីនោះជាដើម។ ក្នុងប្រទេសសឹង្ហបុរី ការជួញដូរកញ្ឆាទម្ងន់ជាង ៥០០ក្រាមឡើងទៅនឹងត្រូវទទួលទោសដល់ប្រហារជីវិត។

តួលេខឆ្លងកូវីដ១៩ ក្នុងប្រទេសអាស៊ានកាន់តែបន្តធ្លាក់ចុះ។ ប្រទេសកម្ពុជា ក្នុងរយៈពេល ២៤ម៉ោងចុងក្រោយនេះ ក៏មិនបានរកឃើញអ្នកឆ្លងថ្មីផងដែរ។ ដោយឡែកតួលេខឆ្លងថ្មីកូវីដ១៩ ក្នុងប្រទេសអាស៊ាន នៃរយៈពេល ២៤ម៉ោងចុងក្រោយនេះ មានចំនួន ១៣៨ករណី ដែលជាតួលេខថយចុះច្រើនដល់ ៧៦៧ករណី បើប្រៀបធៀបការឆ្លងកាលពីម្សិលមិញ។ ការឆ្លងក្នុងរយៈពេល ២៤ម៉ោងកន្លងមកនេះ បានកើតលើប្រទេសចំនួន ៤ នៅអាស៊ាន រួមមានប្រទេសម៉ាឡេស៊ី, វៀតណាម, មីយ៉ាន់ម៉ា និងប្រទេសឡាវ។ ប្រទេសម៉ាឡេស៊ី គឺជាប្រទេសដែលមានតួលេខឆ្លងច្រើនជាងគេ ដែលមានការឆ្លងចំនួន ១០២ករណី។ តួលេខឆ្លងតិចជាងគេ គឺប្រទេសឡាវ ដែលមានការឆ្លងចំនួន ២ករណី។ ប្រទេសឥណ្ឌូនេស៊ី, ហ្វីលីពីន, ថៃ, សឹង្ហបុរី, កម្ពុជា និងប្រទេសប្រុយណេ គឺជាប្រទេសដែលគ្មានសេចក្តីរាយការណ៍ជុំវិញតួលេខឆ្លង និងស្លាប់ឡើយ ក្នុងរយៈពេល ២៤ម៉ោងចុងក្រោយនេះ។ ប្រទេសអាស៊ានទាំង ១០ ក្នុងរយៈពេល ២៤ម៉ោងកន្លងមកនេះ ពុំមានអ្នកស្លាប់ដោយសារកូវីដ១៩ នោះឡើយ។ គិតសរុបរួមនៃប្រទេសទាំង១០ អាស៊ាននាពេលនេះ ការឆ្លងសរុប មានចំនួន ៣៦លាន ៣៣ម៉ឺន ៣ពាន់…

ខេត្តកែប គឺជាខេត្តទី៦ដែលត្រូវបានប្រកាសទទួលស្គាល់ជាផ្លូវការ នៃខេត្តបញ្ចប់ការបន្ទោបង់ពាសវាលពាសកាល នៅក្នុងពិធីមួយនាថ្ងៃទី១៥ សីហា ឆ្នាំ២០២៣។ ពិធីប្រកាសទទួលស្គាល់ជាផ្លូវការខេត្តកែប ជាខេត្តបញ្ចប់ការបន្ទោបង់ពាសវាលពាសកាលនេះ បានធ្វើនៅសាលប្រជុំសាលាខេត្តកែប ក្រោមអធិបតីភាពរដ្ឋមន្រ្ដីក្រសួងអភិវឌ្ឍន៍ជនបទបណ្ឌិតសភាចារ្យ អ៊ុក រ៉ាប៊ុន។ យោងតាមផែនការយុទ្ធសាស្រ្តអភិវឌ្ឍន៍ជនបទសម្រាប់ឆ្នាំ២០១៩ ដល់២០២៣ គេបានជ្រើសខេត្តចំនួន៦ គឺខេត្តស្វាយរៀង, ខេត្តកំពង់ស្ពឺ, ខេត្តព្រៃវែង, ខេត្តកំពង់ឆ្នាំង, ខេត្តព្រៃវែង និងខេត្តកែប ដើម្បីក្លាយជាខេត្តបញ្ចប់ការបន្ទោបង់ពាសវាលពាសកាល។ រដ្ឋមន្រ្ដីក្រសួងអភិវឌ្ឍន៍ជនបទ បានថ្លែងក្នុងពិធីថ្ងៃទី១៥សីហាថា «ខេត្តកែប គឺជាខេត្តទី៦ហើយ ដែលត្រូវបានទទួលស្គាល់ជាខេត្តបញ្ចប់ការបន្ទោបង់ពាសវាលពាសកាល ស្របទៅតាមផែនការយុទ្ធសាស្រ្ដជាតិ, ផែនការសកម្មភាពជាតិ និងផែនការសកម្មភាពខេត្ត»។ លោករដ្ឋមន្ត្រី បានណែនាំដល់អភិបាលខេត្ត ត្រូវខិតខំបន្តធ្វើយ៉ាងណាកុំឱ្យការបន្ទោបង់ពាសវាលពាសកាលនេះ បន្តត្រឡប់មកវិញ និងបន្តចុះជំរុញដល់ប្រជាពលរដ្ឋពីផលប៉ះពាល់នៃការបន្ទោបង់ពាសវាលពាសកាល ឱ្យញឹកញាប់ដល់ប្រជាពលរដ្ឋក្នុងមូលដ្ឋានរបស់ខ្លួនផងដែរ។